I te tahi mahana i Ierusalema, a faataa ˈi Iesu i te taata o vai mau na to ˈna Metua ra o Iehova, ua faaite atoa ˈtu oia i te mau haapiiraa hape a te mau tia faaroo i to ˈna tau. (Ioane 8:12-30) E haapii mai ta ˈna i parau i tera taime e nafea ia papu e mea tano anei ta te taata e tiaturi ra no nia i te Atua. Ua na ô Iesu: “Ia mau maite outou i ta ˈu parau, e pǐpǐ mau ia outou na ˈu i reira. E ite ïa outou i te parau mau, e na te parau mau outou e faatiamâ.”—Ioane 8:31, 32.

“Ia mau maite outou i ta ˈu parau.” Ua faaite ïa Iesu e nafea ia ite e e mea “mau” te tahi haapiiraa. Ia faaroo oe i te tahi mea no nia i te Atua, a uiui na: ‘Ua tano anei te reira i ta Iesu mau parau e te toea o te Bibilia?’ A rave mai tei faaroo i te aposetolo Paulo e tei “hiopoa . . . i te papairaa moˈa i te mau mahana atoa, ua tiˈa mau anei te mau parau i faaitehia ia ratou.”—Ohipa 17:11, Te Faufaa Api.

Ua hiˈopoa maite Marco, Rosa e Raymonde i faahitihia ˈtu na i ta ratou mau tiaturiraa ma te haapii i te Bibilia e te mau Ite no Iehova. Eaha ïa ta ratou i taa?

Marco: “No te pahono i ta ˈu mau uiraa e ta to ˈu hoa faaipoipo, ua faaohipa noa tei haapii mai ia ˈu i te Bibilia. Rahi mai nei to mâua here ia Iehova e ua piri atu â vau i ta ˈu vahine!”

Rosa: “I te haamataraa, no ˈu, ua tuu noa te taata i to ratou manaˈo no nia i te Atua i roto i te Bibilia. I teie nei râ, ua pahono mai te Bibilia i ta ˈu mau uiraa. I teie nei, e mea mau Iehova no ˈu. O ˈna ta ˈu e tiaturi.”

Raymonde: “I pure na vau i te Atua ia tauturu mai ia ite o vai mau O ˈna. Aita i maoro, ua haapii vau e ta ˈu tane i te Bibilia. Ite aˈera mâua i te parau mau no nia ia Iehova! Auê mâua i te oaoa a ite ai eaha mau na te huru o te Atua!”

Eita noa te Bibilia e tauturu mai ia ite i te mau parau haavare no nia i te Atua, i te parau mau atoa râ no nia i to ˈna mau huru maitatai. Maoti ta ˈna Parau faaurua, e “ite tatou i te mau mea i horoa-noa-hia mai e te Atua no tatou nei.” Eaha ïa te reira? Te parau mau no nia i te Atua, ta ˈna opuaraa e to tatou a muri aˈe. (Korinetia 1, 2:12) No te aha e ore ai e hiˈo i ta te Bibilia e pahono i tera mau uiraa faufaa roa? E nehenehe atoa oe e ani i te hoê haapiiraa Bibilia i nia www.dan124.com/ty aore ra i te mau Ite no Iehova. Ma te na reira, e hinaaro atu â oe e here i te Atua.