E melahi ino mau Satani e mai te mǎhu monoxyde de carbone, eita oia e ite-mata-hia. Aita râ te Atua i vaiiho noa mai ia tatou mai tera. Eita oe e mǎtaˈu ia Satani ia haafaufaa oe i to muri nei mau tauturu no ǒ mai i te Atua:

To tiamâraa ia maiti. Te na ô ra te Iakobo 4:7: “E patoi atu i te diabolo, e na ˈna e maue ê atu.” Noa ˈtu e mana to Satani, eita ta ˈna e nehenehe e faahepo ia oe ia faatupu i te tahi ohipa ta oe e ore e hinaaro e rave. E tiamâraa to oe ia maiti! Te parau ra te Petero 1, 5:9 ia “patoi atu ïa [i te Diabolo] ma te faaroo turori ore.” A haamanaˈo, e toru taime to Iesu patoiraa ˈtu ma te aueue ore, i muri aˈe, ua vaiiho Satani ia ˈna. (Mataio 4:11) E nehenehe atoa oe e maiti i te patoi i ta Satani mau raveraa.

Te auhoaraa e te Atua. Te faaitoito mai ra te Iakobo 4:8 ia “haafatata ˈtu i te Atua.” O Iehova iho tera e ani ra ia oe ia faatupu i te taairaa piri e o ˈna. Eaha ïa te rave? Na mua, a haapii i te Bibilia no te ite atu â o vai o ˈna. (Ioane 17:3) Ma te na reira, e here oe ia Iehova e e itoito-atoa-hia i te rave i to ˈna hinaaro. (Ioane 1, 5:3) Ia haafatata oe i to Metua i te raˈi, eaha ta ˈna e rave? Te na ô atoa ra te Iakobo, “e haafatata mai” te Atua ia oe.

Te parururaa papu. Te taiohia ra i roto i te Maseli 18:10: “Te iˈoa o Iehova ra, e pare etaeta ïa; te horo nei te parau-tia i reira e ua ora ihora.” E ere te auraa, ua riro te iˈoa o te Atua ei taritoa no te paruru i te taata. E nehenehe râ te feia e haafaufaa mau i te iˈoa o te Atua e ani i ta ˈna parururaa i te mau taime atoa.

Te tahi hiˈoraa maitai. Ua rave te feia i ô apî i roto i te amuiraa Kerisetiano no Ephesia i te tahi ohipa papu ia au i te Ohipa 19:19: “E rave rahi hoi to te feia peu huru ê i hopoi mai i ta ratou mau buka, ua tutui ihora i te auahi, i mua i te aro o te taata atoa; ua taio ihora i te moni i te hoo o taua mau  buka ra, e itea ihora, e pae ahururaa te tausani i te moni ario.” * Ua tutui tera mau Kerisetiano i te mau taoˈa atoa tei taaihia i te peu tahutahu noa ˈtu mea moni te reira. E maitai-atoa-hia tatou i tera hiˈoraa i teie mahana. Ua rahi roa te peu tahutahu i roto i teie nei ao. E ere paha te tahi peu aore ra taoˈa iti i te mea ino, e nehenehe râ te reira e riro ei uputa no te mau demoni. Mea faufaa roa ia haapae roa i tera mau tauihaa noa ˈtu te moni e te faufaaraa o te reira.—Deuteronomi 18:10-12.

Tae roa ˈtu i te 50raa o to ˈna matahiti, aita Rogelio, faahitihia i te haamataraa o teie tumu parau, i tiaturi mea mau te Diabolo. Ua taui râ to ˈna manaˈo i teie nei. No te aha? Te na ô ra oia: “A tahi ra vau e fanaˈo ai i te hoê Bibilia. Ma te ite i ta te mau Papai e haapii ra, ua papu ia ˈu mea mau te Diabolo. Te paruru atoa mai ra tera ite ia ore ia vaiiho ia ˈna ia mana i nia ia ˈu.”

E hinaaro anei oe e ite i te mahana aita faahou Satani? Ua tohu te mau Papai i te taime e hurihia ˈi te Diabolo, tei haavare e rave rahi, “i roto i te roto auahi e te gopheri.” (Apokalupo 20:10) Eita iho â te tahi melahi e mauiui i te auahi ura. Mea tano ïa ia manaˈo e faahohoˈaraa te roto auahi no te haamouraa mure ore. Aita faahou Satani a muri aˈe. Auê oaoaraa no te feia e here ra i te Atua!

A tiai noa ˈi, a tamau i te haapii i te mau mea atoa ta oe e nehenehe no nia ia Iehova e ta ˈna mau aratairaa. * A feruri na ia ora oe i te mahana e nehenehe mau ai e parau, “Aita faahou Satani!”