Ua paari au i te oire no Alicante i te pae miti Hitia o te râ o Paniora. E tupu noa te peapea i te fare, e pinepine au i te itehia i roto i te mau aroâ. E vahi tataîraa huira pereoo to pihai iho i to matou fare. Ua riro atura mâua José María, hoê o te feia rave ohipa, ei hoa rahi. E taata mǎrû mau oia o tei tâuˈa ia ˈu, e ere hoi mai tera i te fare. I roto i te fifi, ua riro oia ei taeae e ei hoa papu, noa ˈtu e 20 matahiti hau to ˈna i to ˈu.

Ua haamata José María i te haapii i te Bibilia e te mau Ite no Iehova. Ua ite mau vau mea au roa na ˈna te mau Papai, e pinepine oia i te faaite mai i te pue parau mau Bibilia. Ua faaroo vau ia ˈna ma te faatura, aita râ i haapao mau i ta ˈna i parau. No to ˈu apî, vahi ê roa to ˈu feruriraa. Ua taui roa râ i muri aˈe.

Eita vau e au ia faatia i tera ati purumu. Ta ˈu râ e nehenehe e parau, mea maamaa roa e te feruri ore ta ˈu i rave. Hoê noa mahana, ua taui roa to ˈu oraraa. Na mua ˈˈe, e tino oraora maitai e teie nei, eita e nehenehe e hauti faahou e e tarava noa i nia i te hoê roˈi i te fare maˈi. E ere i te mea ohie no ˈu ia farii i tera tupuraa. Ua uiui noa vau, ‘Eaha te faufaaraa ia ora?’

Ua haere mai José María e hiˈo ia ˈu e ua ani oioi i te mau Ite no Iehova o te amuiraa o tera vahi ia haere mai e farerei ia ˈu i te fare maˈi. Ua putapû roa vau i to ratou haere-tamau-raa mai. I to ˈu faarueraa i te piha no te feia maˈi tupuraa atâta, ua haamata vau i te haapii i te Bibilia. Ua ite au no te aha te taata e mauiui e e pohe ai e no te aha te Atua e vaiiho noa ˈi ia tupu te ino. Ua haapii atoa vau i ta te Atua e fafau ra no a muri aˈe ia î roa te fenua taatoa i te feia tia roa e eita te hoê e parau: “Ua paruparu vau i te maˈi.” (Isaia 33:24) I tera taime, ua noaa ia ˈu te hoê tiaturiraa faahiahia mau.

I to ˈu faarueraa i te fare maˈi, ua haere oioi au i mua i roto i ta ˈu haapiiraa Bibilia. Maoti te hoê parahiraa turairai taa ê, ua haere atoa vau i te tahi mau putuputuraa a te mau Ite no Iehova e ua apiti i te ohipa pororaa. I te 5 no Novema 1988, ua bapetizohia vau i roto i te pape i te hoê vahi hopuraa pape taa ê i te 20raa o to ˈu matahiti. Ua tauturu te Atua ra o Iehova ia ˈu ia faaite i te huru feruriraa maitai. E nafea râ vau ia haamauruuru ia ˈna?

Ua faaoti papu vau eiaha ia vaiiho i to ˈu tupuraa ia tapea mai ia rave i te nehenehe i roto i te taviniraa a Iehova. Ua hinaaro vau e tavini atu â i te Atua. (Timoteo 1, 4:15) E ere i te mea ohie i te haamataraa, ua patoi mai hoi to ˈu utuafare no te mea ua taui au i ta ˈu haapaoraa. Te vai ra râ to ˈu mau hoa Kerisetiano o tei riro ei taeae e tuahine i roto i te faaroo. Ua tauturu ratou ia ˈu ia tae i te mau putuputuraa atoa e ia poro noa.

I muri aˈe, ua titauhia ia fanaˈo vau i te tauturu taa ê i te mau mahana atoa. Ua maimi noa vau te tahi pu tano maitai no te huma e ua itehia mai hoê i te oire no Valence i 160 kilometera i te pae apatoerau no Alicante. I reira vau e noho ai tae roa mai teie nei.

Noa ˈtu tei nia noa vau i te roˈi, ua faaoti au e tamau noa i te tavini ia Iehova. Maoti ta ˈu moni tauturu e te tahi atu mau faanahoraa a te hau, ua fanaˈo vau hoê matini roro uira o tei tamauhia i pihai iho i to ˈu roˈi. Ua hoo atoa mai au hoê niuniu afaifai. I te mau poipoi atoa, e tuama te tahi tuati maˈi i ta ˈu matini e ta ˈu niuniu afaifai. Maoti to ˈu taa, e faaohipa vau te tahi atu taoˈa no te faatere i te matini roro uira. Te vai ra atoa hoê raau taa ê ta ˈu e tuu i roto i to ˈu vaha no te patapata i nia i te mau reta e te mau numera o te niuniu afaifai.

Ua tauturu mau tera ravea apî ia ˈu! Na mua roa, e nehenehe au e haere i nia i te reni jw.org e te VAIRAA BUKA I NIA I TE INTERNET. Auê ravea faahiahia no ˈu! E pinepine au i te faataa tau hora i te mau mahana atoa no te haapii e no te rave i te mau maimiraa i roto i te mau papai Bibilia. E tauturu noa mai te reira ia ite atu â no nia i te Atua e to ˈna mau huru maitatai. E ia moemoe aore ra ia paruparu rii au, te vai ra iho â te tahi mea i nia i tera reni Internet o te faaitoito mai.

Maoti te matini roro uira, e nehenehe atoa vau e faaroo e e apiti i te mau putuputuraa a te amuiraa. E nehenehe au e pahono, e pure, e rave i te mau tumu parau e e taio atoa i Te Pare Tiairaa mai te peu na ˈu tera tuhaa. Noa ˈtu eita vau e tae roa ˈtu i te mau putuputuraa, e melo taa maitai au i roto i tera amuiraa.

E nehenehe au e poro maitai maoti atoa te niuniu afaifai e te matini roro uira. Parau mau, eita vau e haere i tera e tera fare mai te tahi atu mau Ite no Iehova, aita râ te reira i tapea ia ˈu. Ma te faaohipa i tera mau ravea, e nehenehe au e faaite i ta ˈu mau tiaturiraa ia vetahi ê. I te mea ua au roa vau e poro na roto i te niuniu afaifai, ua ani mai te matahiapo o te amuiraa ia tiaau i tera hohoˈa taviniraa. Ua tauturu atoa te reira i te mau melo o te amuiraa o te ore e nehenehe e faarue i to ratou fare.

 E ere râ te mau ravea apî anaˈe te mea faahiahia i roto i to ˈu oraraa. I te mau mahana atoa, e haere mai to ˈu mau hoa here e farerei ia ˈu e to ratou mau fetii e te feia i anaanatae i te Bibilia. E pinepine, e ani atoa mai ratou ia aratai i te aparauraa. I te tahi atu taime, e haere mai te mau utuafare e farerei ia ˈu e ani atoa ia apiti atu vau i ta ratou haamoriraa utuafare. Ta ˈu mea au roa ˈˈe, ia faaite te mau tamarii no te aha ratou e here ai ia Iehova a parahi noa ˈi i pihai iho i to ˈu roˈi.

Auê au i te oaoa ia haere mai e rave rahi e farerei ia ˈu. E pinepine, e î roa to ˈu piha i to ˈu mau hoa tei haere mai mai te vahi piri e te atea atoa râ. Ua maere roa iho â ïa te mau tuati maˈi o te pu mea here-mau-hia vau. I te mau mahana atoa, te haamauruuru nei au ia Iehova i te fariiraa ia ˈu i roto i teie fetii taeae faahiahia mau.

Ia aroha mai te taata ia ˈu e ia ani mai eaha to ˈu huru, e parau noa vau: “Te faaitoito noa ra!” Ua ite au e ere vau anaˈe i roto i tera tupuraa. Noa ˈtu eaha to tatou fifi aore ra maˈi, te apiti ra te mau Kerisetiano atoa i te tahi aroraa, ‘te rohiraa maitai i te faaroo.’ (Timoteo 1, 6:12) Eaha tei tauturu mai ia faaitoito i tera rahiraa matahiti? Ua pure au i te mau mahana atoa e ua haamauruuru ia Iehova i te horoaraa mai i te tiaturiraa. E tutava atoa vau i te ohipa rahi i roto i te taviniraa i te Atua ma te haamanaˈo i te oraraa e tiai mai ra.

E pinepine au i te feruri i te ao apî e to ˈu huru ia horo e ia ouˈouˈa faahou vau. I te tahi taime, e hauti au i to ˈu hoa rahi José María, tei roohia i te maˈi polio, ma te parau ia tae anaˈe tera mahana, e faatupu mâua hoê hororaa atea. E ani au ia ˈna: “O vai te upootia?” E pahono mai oia: “Te mea faufaa, e ere o vai te upootia, ia tapae râ tâua i roto i te paradaiso no te rave i tena hororaa.”

E ere i te mea ohie no ˈu ia farii i to ˈu tupuraa. Ua ite au, e ohipa maamaa mau ta ˈu i rave i to ˈu taurearearaa e e ati rahi tei noaa mai. Te haamauruuru nei au ia Iehova, aita roa oia i faarue ia ˈu. Mea rahi ta ˈna i horoa mai, te fetii taeae, te puai no te faaoromai, te oaoa i te tauturu ia vetahi ê e hoê tiaturiraa faahiahia no a muri aˈe. Ahiri e tia ia ˈu ia haapoto i to ˈu manaˈo, e parau noa vau, mea rahi ta Iehova i horoa mai noa ˈtu to ˈu huru.