Бүзүрелдиг кижиге ада-иези, эш-өөрү, ажыл берикчизи бүзүрээр боор. Ындыг кижи быжыг дүрүмнерден туттунуп, сөзүн ээлеп база кезээде шынын чугаалап чоруур.

Бодуңну кайы хире бүзүрелдиг деп көргүзер сен, ол хире хосталганы алыр сен.

«Ада-иеңниң бүзүрелин чаалап алыр дизиңзе, олар көрүп-даа, көрбейн-даа турда, бодуңну чедишкен болгаш харыысалгалыг кижи кылдыр алдынар ужурлуг сен» (Сарахи).

БИБЛЕЙЖИ ДҮРҮМ: «Бодуңарны шинчилеп көрүңер» (2 Коринфичилерге 13:5).

Бүзүрелди катап чаалап алыр азы хөй хосталганы чедип алыр дизиңзе, дараазында чүүлдү шенеп көр.

Шынчы бол. Мегелээр болзуңза, бүзүрелди дораан чидирип алыр сен. Бодуңнуң частырыың ажыы-биле миннип, шынчы боор болзуңза, улус сеңээ бүзүрээр.

«Шупту чүве эки турда, шынчы болуру белен. Ынчалза-даа сени эки эвес талаңдан көргүзүп болур частырыгларыңны ажыы-биле миннир болзуңза, улус сеңээ оон-даа артык бүзүрээр апаар» (Кайман).

БИБЛЕЙЖИ ДҮРҮМ: «Бүгү чүүлдерге бодувусту шын ап чоруурунче чүткүлдүг бис» (Еврейлерге 13:18).

Харыысалгалыг бол. АКШ-га болган шинчилелден алырга, ажылдакчылар шилиир специалистерниң 78 хуузу харыысалгалыг чорукту ажыл берикчилериниң үнелээр эң кол үш шынарларының бирээзи деп санап турар. Ынчангаш харыысалгалыг чорукка өөренип алыр болзуңза, улгады бээриңге ол сеңээ ажыктыг боор.

«Бажың ажылдарынга харыысалгалыг бооп, сагындырыг чокка-ла кылыр боорумга, ада-ием дыка өөрүүр. Харыысалгалыымны көргеш, ада-ием меңээ оон-даа бүзүреп турар» (Сара).

БИБЛЕЙЖИ ДҮРҮМ: «Херек кырында мээң бижээн чүвемден-даа хөйнү кылып каарыңны билир мен» (Филимонга 21).

Шыдамык бол. Сээң даштыкы овур-хевириң өскерлип, өзүп турарын улус дораан көрүп каар. А иштики бүдүжүңнү, чедишкен болгаш харыысалгалыг апарганыңны эскерип каарынга үе херек.

«Ада-иеңниң болгаш долгандыр улустуң бүзүрелин чаңгыс кылган херек-биле чаалап алыры болдунмас. Ону чедип алыр дизиңзе, бүзүрелге төлептииңни хүнден хүнче көргүзер ужурлуг сен» (Брэндон).

БИБЛЕЙЖИ ДҮРҮМ: «Шыдамык чорукту кедип алыңар» (Колоссчуларга 3:12).