Өршээри дээрге хомудалды шыгжавайн, багай бодалдардан, минниишкиннерден адырлып алыры-дыр. А болган чүүлдү херекке албазы азы ону шуут болбаан ышкаш алдынарын өршээпкени деп болбас.

БИБЛЕЙЖИ ДҮРҮМ: «Бот-боттарыңарга шыдамык хамаарылгалыг бооп, кайы-бирээңер өске-бир эжинге хомудап-даа турза, бот-боттарыңарны өршээңер» (Колосчуларга 3:13).

«Бир-ле кижиге ынак болзуңза, ооң четпес талаларынче көрбес болгай сен, а ооң эки талаже өскерлип алыр дээш кызып турарынче көөр сен» (Эрон).

Хомудал шыгжаар чорук өг-бүлени бузар база мага-ботка, сагыш-сеткилге хора чедирип болур.

«Бир катап ашаам мени дыка аарышкылыг кылдыр хомудадыпкаш, сөөлүнде буруузун миннип каан. Ону өршээри меңээ дыка берге болган. Үе эрткенде чогум өршээпкен мен, ынчалза-даа ашаамны дораан өршээвээнимге дыка хараадаар мен. Үезинде өршээпкен болзумза, ол хире үе ишти аравыска эпчок байдал турбас турган ийик» (Джулия).

БОДУҢАРНЫ ХЫНАҢАР

Ашааңар (кадайыңар) силерни хомудадыптар болза, бодуңардан айтырыңар:

• «Шупту чүүлдү чүрээмче чоок хүлээп ап турар эвес мен бе?»

• «Ол меңээ буруузун миннир хире кылдыр шыңгыы буруудаан бе? Болган чүүлдүң дугайында анаа уттуптуп болур мен бе?»

КАДЫ САЙГАРЫҢАР

• Бот-боттарыңарны өршээринге силерге кайы хире үе херек?

• Бот-боттарын дүрген өршээптер дээш, чүнү кылып болурул?

СҮМЕЛЕР

• Бир эвес кады чурттаан эжиңер силерни хомудадыптар болза, ол ону кара сагыштыг кылган деп бодаваңар.

• Ашааңарның (кадайыңарның) чүге ынчаар кылганын билип аар дээш кызыңар. Кижи бүрүзү частырыгны кылыптар деп сактып чоруңар (Иаков 3:2).

«Бир эвес болган чүүлге ийилээ буруулуг болзуңарза, өршээри белен боор. А сенде буруу чок ышкаш болза, өршээри берге боор. Эжиң буруузун миннип турда, ону өршээптер дээш, улуургак сеткилди арта базар ужурлуг сен» (Кимберли).

БИБЛЕЙЖИ ДҮРҮМ: «Эрте дээре эптежип ал» (Матфей 5:25).