1, 2. Иегованың бараалгакчыларында кандыг кайгамчыктыг идегел бар?

КАНДЫГ-ДАА кижи өг-бүлезиниң быжыг, ажы-төлүнүң кадык-шыырак болурунга азы аарыг-аржыктан эттине бээринге идегеп чоруур. А бистиң идегеливис чүүден-даа артык: чок апарган чоок улузувуска ужуражып, мөңге чурттаар үени манап турар бис.

² Павел элчин мынча дээн: «Бурган Бодунга шынчы-даа, шынчы эвес-даа улусту катап диргизер дээрзинге... идегелдиг мен» (Аж.-ч. 24:15). Иов база диргизиишкин дугайында чугаалап турган. Бурган ону сактып келгеш, катап диргизер деп, ол долузу-биле бүзүреп чораан (Иов 14:7—10, 12—15).

3. 1 Коринфичилерге 15-ки эге бисти канчаар деткип болур?

³ Диргизиишкин дугайында өөредиг бүзүреливистиң үндезини бооп, «Христос дугайында өөредигниң эге билиглеринге» хамааржып турар (Евр. 6:1, 2). 1-ги Коринфичилерге 15-ки эгеде Павел диргизиишкин дугайында бижээн. Ооң сөстери бирги векте христианнарны деткээн болганда, бисти база албан деткиир дээрзинге чигзинмейн барып болур бис. Оон аңгыда, диргизиишкинге хөй чыл ишти бүзүреп турар-даа болзувусса, Павелдиң сөстери идегеливисти дам быжыктырып болур.

4. Бистиң чоок улузувус катап дирлип кээр дээрзинге чүге чигзинмес бис?

⁴ Бир эвес Иисус дирилбээн болза, бистиң эргим чоок улузувус дирлип кээр деп идегеливис турбас ийик. Павел коринфичилерге «Буянныг Медээни» суртаалдап тургаш, Иисус Христостуң дирилгениниң дугайында чугаалап турган (1 Кор. 15:1, 2). Ол мынча деп бижээн: «А бир эвес Христос катап дирилбээн болза, силерниң бүзүрелиңер хоозун-дур» (1 Кор.  15:17). Шынап-ла, Иисус дирлип келген дээрзинге бүзүрел — бистиң идегеливистиң кол үндезини-дир.

5, 6. 1 Коринфичилерге 15:3, 4-те бижээн барымдаалар биске кандыг хамаарылгалыгыл?

⁵ Диргизиишкин дугайында теманы сайгарарының мурнунда, Павел дараазында үш барымдааны чугаалаан: Христос бистиң бачыттарывыс дээш өлген, ону ажаап каан база, Бижилгениң баш удур чугаалааны ёзугаар, ол үшкү хүнде катап дирлип келген. (Номчуптуңар: 1 Коринфичилерге 15:3, 4.)

⁶ Бо үш барымдаа биске кандыг хамаарылгалыгыл? Исайя медээчи Мессияга хамаарыштыр «дириглер оранынга ону амылыг арттырбаан», «ону бузуттуглар-биле кады ажаап каан» деп баш удур медеглээн. Оон аңгыда, Мессия «хөй улустуң бачыдын боду» чүктээр деп, Исайя немээн. Иисус бодунуң амы-тынын төлевир кылдыр берген үеде ол сөстер күүсеттинген (Иса. 53:8, 9, 12; Мф. 20:28; Рим. 5:8). Ынчап кээрге, Павелдиң чугаалааны үш барымдаа бачыт биле өлүмден хосталып, чок апарган улузувуска ужуражыр бис деп ыяк бүзүрээринге быжыг үндезинни берип турар.

7, 8. Иисус ылап дирлип келген деп, кандыг бадыткалдар көргүзүп турар?

⁷ Диргизиишкинге идегеливис Христостуң дирлип келгени-биле сырый харылзаалыг. Ынчангаш Иегова Иисусту херек кырында диргизипкен дээрзинге ыяк бүзүрээр ужурлуг бис. Аңаа бүзүрээр кандыг бадыткалдар бар?

⁸ Иисус дирлип келгенде, ону хөй улус көрген (1 Кор. 15:5—7). Оларның аразында Павел бир дугаарында Кифаны (Пётр элчинни) сагындырган. Иисустуң дирлип келгенин Пётр ылап көрген деп, элээн каш өөреникчи бадыткаан (Лк. 24:33, 34). Оон ыңай Иисус дирлип келгеш, «он ийи» элчиннерге көзүлген деп, Павел бижээн. А сөөлзүредир Христос «беш чүс ажыг ха-дуңмага чаңгыс удаа көзүлген». Мында Павел, Матфей 28-ки эгениң 16-дан 20-ге чедир шүлүктерде бижээн, Галилеяга болган ужуражылганың дугайында чугаалаан чадавас. Оон аңгыда, Иисус «Иаковка көзүлген». Бо удаада Павел Иисустуң кады төрээн дуңмазының дугайында чугаалаан. Ооң мурнунда Иаков бодунуң акызын Мессия деп санавайн турган, ынчалза-даа Иисустуң дирлип келгенин көргеш, ол аңаа бичии-даа чигзинмейн барган (Ин. 7:5). Солун чүүл, Павел бодунуң чагаазын б. э. 55 хире чылда, дирлип келген Иисусту көрген улустуң хөй кезии дириг турда, бижээн. Ынчангаш Иисустуң дирлип келгенинге чигзинип турган кижилер ону көрген улустан билип ап болур турган.

9. Ажыл-чорудулга 9-ку эгениң 3-тен 5-ке чедир шүлүктерден алырга, Павел Иисустуң дирлип келгенин бадыткап, оон өске чүнү чугаалап болур турган?

⁹ Сөөлүнде Иисус Павелге көзүлген (1 Кор. 15:8). Павел ол үеде Савл деп ады-биле билдингир турган. Дамаск хоорайже чоокшулап бар чыдырда, хенертен ону дээрден чырык хөме чырыдыптарга, ол дээрден Иисустуң үнүн дыңнап каан. (Номчуптуңар: Ажыл-чорудулга 9:3—5.) Павел-биле болган болуушкун — Иисус ылап-ла дирлип келген деп чүүлдү бадыткап турар шынзыдылгаларның бирээзи-дир (Аж.-ч. 26:12—15).

10. Павел Иисустуң дирлип келгенинге бүзүрей бергеш, чүнү кылып эгелээн?

¹⁰ Павел ооң мурнунда христианнарны истеп сүрүп чораан болгаш, ооң бадыткалдары кижилерге чүүден артык дээштиг турган. Иисус ылап дирлип келген деп бүзүрээш, Павел чүткүлдүү-биле ооң дугайында суртаалдап эгелээн. Ол дээш Павел улуска эттедип-соктуруп, кара-бажыңга хоругдаттырып база каш катап далайга озал-ондакка-даа таварышкан (1 Кор. 15:9—11; 2 Кор. 11:23—27). Павел амы-тынын безин чидирип алырындан кортпайн, Иисустуң дирилгениниң дугайында дидим чугаалап турган. Бурган Иисусту ылап-ла диргизипкен  деп баштайгы христианнарның херечилээни диргизиишкинге бүзүреливисти быжыктырып турар эвес-тир бе?

11. Коринфиде чамдык христианнарның диргизиишкин дугайында бодалдары чүге шын эвес турган?

¹¹ Коринф деп грек хоорайда христианнар диргизиишкин дугайында шын эвес үзел-бодалдыг чораан. Оларның чамдыызы «катап дирлири болдунмас» деп чугаалап турган (1 Кор. 15:12). Олар чүге ынчаар бодап чорааныл? Иисус дирлип келген дээрзинге бүзүревейн турган афин философтарның үзел-бодалдары оларның чамдыызынче улуг салдар чедирген чадавас (Аж.-ч. 17:18, 31, 32). А өске христианнарның бодалы-биле алырга, диргизиишкин дорт эвес, а доора уткалыг турган: кылган бачыттарының уржуундан «өлүг» чораан кижи христиан апаргаш, доора уткалыг «дирлип» кээр турган. Павелдиң сөстери-биле алырга, ол христианнарның бүзүрели хоозун турган. Чүге дээрге Бурган Иисусту диргиспээн болза, төлевир төлеттинмээн боор база кижилерниң бачыттары өршээттинмээн боор. Ынчаарга диргизиишкинге бүзүревес улустуң кандыг-даа идегели чок турган (1 Кор. 15:13—19; Евр. 9:11—12, 14).

12. 1 Пётр 3:18, 22-ден алырга, Иисустуң катап дирилгени ооң мурнунда болган диргизиишкиннерден чүзү-биле ылгалдыг?

¹² «Христос херек кырында өлүглер аразындан дирилген» деп чүүлдү Павел ийи караа-биле көрген. Бурунгу үеде Бурган кижилерни диргизип турган-даа болза, үе эртерге, олар дөмей-ле катап чок апаар турган. А Иисустуң дирлип келгени бир онзагай болган. Иисус катап дирлип келгени-биле Эгелекчи болган деп, Павел бижээн. Иисус кандыг уткалыг Эгелекчи болган? Дээрге чурттаары-биле дирлип келгеш, дээрже үне берген улустуң бир дугаары ол болган (1 Кор. 15:20; Аж.-ч. 26:23; номчуптуңар: 1 Пётр 3:18, 22).

13. Павел Ада́м биле Иисустуң аразында ылгалды канчаар тайылбырлааныл?

¹³ Чаңгыс кижиниң өлүмү канчап миллион-миллион улуска амы-тынны эгидип берип болурул? Павел ол айтырыгга харыылап тургаш, Ада́мның хайындан чүү болганын база Иисустуң ачызында чүү болдунганын тода тайылбырлаан. «Өлүмнүң чаңгыс кижи дамчыштыр келгени дег» деп сөстерни бижип тургаш, Павел Ада́мның дугайында чугаалаан. Ада́мның кылган бачыды ооң бодунга-даа, келир үеде салгалдарынга-даа хилинчек-човалаңны эккелген. Бис Ада́мның дыңнангыр эвес чоруунуң хайындан амдыгаа чедир хинчектенип чоруур бис. Ынчалза-даа бисти кайгамчыктыг келир үе манап турар. Чүге дээрге Бурган Бодунуң Оглун диргизипкен. «Өлүглерниң катап дирлири база чаңгыс Кижи дамчыштыр кээр. Өгбевис Адамның хайында шупту улустуң өлүрү дег, Христос-биле харылзаазының ачызында шупту улус катап дирлир» деп, Павел бодунуң тайылбырын түңнээн (1 Кор. 15:21, 22).

14. Бурган Ада́мны катап диргизер бе? Тайылбырлаптыңар.

¹⁴ Павелдиң «Адамның хайында шупту улустуң өлүрү» дээн сөстери чүнү илередип турар? Павел Ада́мның салгакчыларының дугайында чугаалаан, чүге дизе олар өлүм биле бачытты салгап алганнар (Рим. 5:12). Бурган Ада́мны диргиспес, чүге дээрге ол тергиин тургаш, Бурганны өжегерээн дыңнавайн барган. «Кижи амытан Оглу» Ада́мны, Бурганны дыңнаар хөңнү чок кижилерни дег, «кезээ мөңгеде узуткап кааптар» (Мф. 25:31—33, 46; Евр. 5:9).

15. 1 Коринфичилерге 15:22-де диргизиишкин дугайында чүнү бижээн?

¹⁵ Эскерип көрүңер даан, Павел «Христос-биле харылзаазының ачызында шупту улус катап дирлип» кээр деп бижээн (1 Кор. 15:22).  Павел чагаазын Коринф хоорайда дээрге чурттаар идегелдиг, чагдырган христианнарга бижээн. Павел оларны «Христос Иисусту дамчыштыр ыдыктаткаш», «Бурганның чону боору-биле кыйгырткан улус» деп адаан. Оон ыңай ол «Христоска бүзүреп чорааш, өлген улустуң» дугайында база бижээн (1 Кор. 1:2; 15:18; 2 Кор. 5:17). Павел өске чагаазында: «Дөмей өлүм-биле өлгеш, [Иисус-биле] тудуш харылзаалыг апарганывыста, Аңаа дөмейлештир катап дирлип кээр бис!» — деп бижээн (Рим. 6:3—5). Иисус дирлип келген соонда, көзүлбес хуу-бот бооп, дээрже үне берген. Ынчангаш шупту чагдырган христианнар дээрге көзүлбес хуу-бот бооп дирлип кээр.

16. Иисусту «Эгелекчи» деп адааны-биле Павел чүнү чугаалаксааныл?

¹⁶ «Христос... өлүглер аразындан катап дирилген. Ындыг чоруктуң Эгелекчизи ол болган!» — деп, Павел бижээн. Ооң утказы кандыгыл? Ооң мурнунда улус (чижээ, Лазар) черге чурттаар кылдыр дирлип турган. А Иисусту Иегова, дээрге мөңге чурттаар кылдыр, бир дугаар диргискен. Оон аңгыда, Христосту «Эгелекчи» деп адааш, ооң соонда дээрге чурттаары-биле дирлир улус база турар деп, Павел чугаалаан. Элчиннер болгаш өске-даа чагдырган христианнар дээрге чурттаары-биле дирлип кээр.

17. Дээрге чурттаар шаңналын шилип чагдырган христианнар кажан алыр ужурлуг турган?

¹⁷ Кажан Павел коринфичилерге чагаазын бижип турган үеде, дээрге чурттаар идегелдиг христианнарның диргизиишкини амдыызында эгелевээн. А келир үеде чүү болурунуң дугайында Павел мынчаар сагындырган: «Ынчалза-даа катап дирилгеннер ээлчег ёзугаар катап дирлир: баштай — Христос, ооң соонда — Ол ээп келгенде — Аңаа бүзүрээн улус» (1 Кор. 15:23; 1 Фес. 4:15, 16). «Христостуң ээп келгени» дээрге-ле, бистиң амгы үеде чурттап турар үевис-тир. Иисус ээп келбээн шаанда, элчиннер болгаш өске-даа шилип чагдырган христианнар дээрге чурттаар идегелин ап, Иисус-биле тудуш харылзаалыг апарып шыдавас турганнар.

18. а) Баштайгы диргизиишкинден аңгыда, өске диргизиишкин база турар деп чүге чугаалап болурул? б) 1 Коринфичилерге 15:24—26-дан алырга, дээрге кандыг болуушкуннар болур?

¹⁸ Павел болгаш өске-даа дээрге чурттаар идегелдиг христианнар «баштайгы катап дирлиишкинге киржир амыр-чыргалдыг» болур деп Библияда бижээн (Ажыд. 20:6). Ынчап кээрге, баштайгы диргизиишкин бар болганда, оон өске диргизиишкин база турар ужурлуг. Ол чүүл Иовтуң келир үеде чугаалаан  чүүлү-биле дүгжүп турар (Иов 14:15). Чагдырган христианнар кажан «Христос бүгү чагырыкчыларны, эрге-чагырганы азы кара күштерни базып», чок кылып турда, олар ооң-биле кады турар. «Эң сөөлгү дайзынны — өлүмнү» безин узуткап кааптар. Дээрге чурттаар дээш дирлип кээр улус кажан-даа өлбес. А черге чурттаар идегелдиг шынчы христианнарны чүү манап турарыл? (Номчуптуңар: 1 Коринфичилерге 15:24—26.)

19. Черге чурттаар идегелдиг улусту чүү манап турар?

¹⁹ Черге мөңге чурттаар идегелдиг улус Павелдиң «Бурган Бодунга шынчы-даа, шынчы эвес-даа улусту катап диргизер дээрзинге... идегелдиг мен» дээни-биле чөпшээрежип турар (Аж.-ч. 24:15). Дээрге шынчы эвес улус чурттап шыдавас болганда, Павелдиң чугаалаан сөстери келир үеде черге болур диргизиишкинге база хамааржып турар.

20. Диргизиишкинге хамаарыштыр идегелиңерни бо статья канчаар быжыктырган?

²⁰ Диргизиишкин албан болур деп бичии-даа чигзинмес бис! Бурганның диргизипкен улузу черге кезээ-мөңгеде чурттаар. Ол аазаашкынга бүзүреп болур бис. Бистиң эргим чоок улузувус чер кырынга дирлип кээр деп бодап кээривиске, сеткил-сагыжывыс оожургай бээр. Бурган чок апарган улусту Иисустуң Муң чыл башкарылгазының үезинде диргизер (Ажыд. 20:6). А бир эвес Армагеддон мурнунда чок апаар болзувусса, Бурган бисти албан диргизиптер деп, быжыг бүзүреп болур бис. Ынчангаш «ол идегел хоозун эвес» (Рим. 5:5). Ол бисти күш киирип, Иеговага өөрүшкүлүг бараалгаарынга дузалап турар. Коринфичилерге бирги чагааның 15-ки эгеде өске-даа чугула бодалдар бар. Ону дараазында статьядан билип алыр бис.