1. Ундарал биске кандыг салдарны чедирип болур?

ХҮННҮҢ-НЕ аңгы-аңгы бергелерни ажып эртип турар бис. Ынчалза-даа ундаралга алыскан болзувусса, ону ажып эртери биске оон-даа берге апаар. Ундарал бистиң өөрүшкүвүстү, бодувуска бүзүреливисти, бергелерни ажып эртер күжүвүстү хунаап ап болур. Чугаалар 24:10-да мынча дээн: «Айыыл-халап хүнүнде кошкааң көргүзер болзуңза, күжүң эвээжээни ол-дур». Муңгаралга алзыр болзувусса, бергелерни ажып эртер күжүвүс чок каар.

2. Кандыг чылдагааннар-биле ундаралга алзып болур бис? Бо статьяга чүнү сайгарар бис?

² Аңгы-аңгы чылдагааннар-биле ундаралга алзып болур бис. Чижээ, боттарывыстың четпестеривис болгаш кошкак талаларывыстан, кадыкшылывыстың баксыраанындан, үр үе дургузунда күзеп келгенивис хүндүткелдиг даалгаларны биске чыыш иштинге бербеске, буянныг медээни улус шоолуг дыңнавас боорга, ундарап болур бис. Ундаралды ажып эртеринге дузалаар сүмелерни бо статьяга сайгарар бис.

3. Боттарывыстың кошкак талаларывыска шын хамаарылгалыг болурунга биске чүү дузалаар?

³ Боттарывыстың четпестеривис болгаш кошкак талаларывыс дээш шын эвес кылдыр боданып, Иегова бисти чаа делегейге чурттатпас боор деп бодап болур бис. Ынчаар боданыры айыылдыг. Четпес талаларывыска кандыг хамаарылгалыг боор болзувусса эки? Иисус Христостан аңгыда, шупту улус бачыт үүлгеткен деп Библияда бижээн (Рим. 3:23). Сагыш човангыр Адавыс Иегова биске дыка ынак болгаш, Ол бистен хөйнү негевейн турар. Ол бистиң кошкак талаларывыс-биле  канчаар туржуп турарывысты көрүп, бисти дыка эки билип турар болгаш, дузалаарынга кезээде белен (Рим. 7:18, 19).

4, 5. Дебора биле Мария кандыг алыс шынны билип кааннар? (1 Иоанн 3:19—20). Оларга ол чүүл канчаар дузалаан?

⁴ Дебора биле Мария деп ийи угбавыстың чижээн көрээлиңер *. Дебора бичии тургаш, чоок улузундан ынакшылды көрбээн. Ону кым-даа мактавайн турган, ынчангаш ол бодунга хүндүткелди болгаш бүзүрелди чидирип алган. Бичии частырыгны кылыпкаш безин, Дебора бодун өөдежоктарның өөдежогу кылдыр санап турган. Мария база шак ындыг бергелиг турган. Чоок улузу ону куду көрүп турган боорга, ол бодун өөдежок кылдыр миннип эгелээн. Иегованың бараалгакчызы апаргаш безин, Мария Бурганның адын эдилээринге төлеп чок мен деп бодап чораан.

⁵ Ынчалза-даа ол угбаларывыс Иеговага бараалгаарын соксатпаан. Оларга чүү дузалаан? Олар Бурганга сагыш-сеткилин тө каап берип, изиг-изиг мөргүп турганнар (Ыд. ыр. 54:23). Бистиң эрткен үевис болгаш бодувусту өөдежок кылдыр санап чоруурувус бисче кандыг салдар чедирип турарын Иегова билир деп, олар билип каан. Оон ыңай чүрээвисте эскербейн чоруурувус эки чүүлдү Иегова көрүп турар деп, олар база билип кааннар. (Номчуптуңар: 1 Иоанн 3:19, 20.)

6. Багай чаңчылы-биле туржуп турар кижи чүнү миннип болурул?

⁶ Бир кижи ханылай берген кошкак талазынга алзыптар болза, ундаралче кирип болур. Кылган бачыды дээш бодун буруулуг кылдыр минниринде багай чүве чок (2 Кор. 7:10). Ынчалза-даа: «Мен кажан-даа эттинип шыдавас кижи-дир мен. Иегова мени черле өршээвес!» деп бодаары шын эвес. Ынчаар боданыр болзувусса, Иеговага бараалгаарын соксадып болур бис. Сузувус бастына бээр болза, күжүвүс чиде бээр деп чүүлдү сактып чоруулуңар (У. ч. 24:10). Ынчангаш Иегова-биле хамаарылгавысты катап тургузуп, Аңаа мөргүп, Ооң энерелин дилээри чугула (Иса. 1:18). Ынчан Иегова бисти өршээптер. Оон аңгыда, хуралдың удуртукчуларындан дузаны дилээр болзувусса эки. Олар биске шыдамыы-биле Иегова-биле найыралывысты катап тургузарынга дузалаар (Иак. 5:14, 15).

7. Шын алдынар дээш кызып тургаш-ла, частырыгны кылыпкаш, чүге ундараан херээ чок?

⁷ «Иегованың караанда чөптүг-шынныг кижи дээрге частырыг кылбас кижи эвес, а частырыгны кылганы дээш хараадап, буруузун миннип турар кижи-дир» — деп, Франциядан Жан-Люк дээр удуртукчу акывыс чугаалаан (Рим. 7:21—25). Ынчангаш кошкак талаңар-биле туржуп турар болзуңарза, бодуңарны чөгенчиг кылдыр санаваңар. Частырыг кылбас кижи чок, ынчангаш бодувустуң күжүвүс-биле  Бурганның караанга актыг-шынныг бооп шыдавас бис. Ындыг чүүл чүгле Бурганның авыралының болгаш Иисустуң берген төлевириниң ачызында болдунар (Эф. 1:7; 1 Ин. 4:10).

8. Ундарап турар болзувусса, деткимчени кымдан дилээр бис?

⁸ Ха-дуңмадан деткимчени дилеңер! Бир эвес сагыш-сеткиливисти үндүр чугаалаар болзувусса, олар бисти дыңнап, деткип болур (У. ч. 12:25; 1 Фес. 5:14). Ундарал-биле туржуп турган Нигериядан Джой дээр угбавыс мынча дээн: «Акы-угбалар эвес болза, та канчаар кижи мен! Иегова мээң мөргүлдеримге харыылап турар дээрзин оларның деткимчезинден көрүп тур мен. Ха-дуңмамның ачызында ундарап турар улуска дузалап өөренип алган мен». Ынчалзажок акы-угбаларывыс биске кажан дуза херегин чамдыкта эскербейн баар. Ынчангаш дузаны бүзүрелдиг эш-өөрден боттарывыс дилээр болзувусса эки.

9. Бо шүлүктер бисти канчаар деткип турарыл? (Ырлар 40:4; 93:19).

⁹ Иеговадан деткимчени дилеңер. Аарып турар болзувусса, ылаңгыя хоочураан аарыглыг болзувусса, эки хөөннүг артары биске берге бооп болур. Амгы үеде Иегова улусту аарыглардан эмневейн турар. Ынчалза-даа Ол бисти оожургадып, шупту чүвени ажып эртер күштү берип турар. (Номчуптуңар: Ырлар 40:4; 93:19.) Оон аңгыда, Иегова акы-угбаларны биске дузалаар кылдыр деткип болур. Чижээ, олар биске бажың ажылдарын кылчып берип, садыгже барып азы бистиң-биле мөргүп болур. Дээрде Адавыс биске Бодунуң Сөзүнден оожургалдыг сөстерни, чижээ: аарыг-аржык, хилинчек-човалаң турбас чаа делегейде идегелдиң дугайында сагындырып болур (Рим. 15:4).

10. Айыыл-халаптың уржуктарын ажып эртеринге Исангка чүү дузалаан?

¹⁰ Нигерияда чурттап турар Исанг айыыл-халапка таварышкаш, чартыктай берген. Эмчи аңаа кажан-даа кылаштап шыдавас сен деп чугаалаан. «Ол коргунчуг медээни дыңнаары меңээ дыка аар согуг болган» — деп, Исанг үлешкен. Ынчалза-даа ол бергени ажып эртипкен. Аңаа чүү дузалаан? «Кадайым-биле Иеговага мөргүүрүн уламчылап, Ооң Сөзүн өөренип турган бис. Оон ыңай Иегованың амгы үеде биске белекке берген бүгү чүүлүн, ооң санында чаа делегейге чурттаар идегеливисти үнелээр деп хөөнненип алган бис» — деп, Исанг чугаалаан.

11. Аар аарый бергеш, Синди кайыын өөрүшкүнү ап турганыл?

¹¹ Мексикада чурттап турар Синди дээр угбавыс аар аарыг-биле аарый берген. Ол бергени ажып эртеринге аңаа чүү дузалаан? Эмчиге чыткан үезинде ол хүннүң-не суртаалдаар сорулганы салып алган. Синди мынча дээн: «Ооң ачызында мен удавас болур кезиишкин болгаш аарыымның дугайында эвес, а өске улустуң дугайында бодап турган мен. Эмчилер болгаш медсестралардан оларның өг-бүлези кайы хире чурттап турар деп сонуургап база олар чүге ындыг нарын профессияны шилип алганыл деп айтырып турган мен. Оларның харыызындан кандыг тема оларга солун болурун билип аар турган мен. „Аарып турар улустуң аразындан кижиге кичээнгей көргүзер улус ховар боор“ деп, олар меңээ четтиргенин илередип турган. А чамдыктары безин меңээ бодунуң адрезин болгаш телефонунуң номерин берген. Бо берге үени Иегова меңээ ажып эртип аарынга дузалаар деп билип турган-даа болзумза, ындыг улуг өөрүшкүнү Иегова меңээ белекке бээр деп безин манаваан мен!» (У. ч. 15:15).

12, 13. Кадыы багай ха-дуңмавыс суртаалдаар кандыг аргаларны тып алганыл база ооң түңнели кандыг болган?

¹² Кадыы багай акы-угбалар суртаалга ооң мурнунда дег, хөйнү кылып шыдавас дээш муңгарап турар чадавас. Ынчалза-даа оларның хөй кезии суртаалдаар аргаларны тып ап  турар. Оларның аразында Каттышкан Штаттардан Лорел дээр угбавыс. Ол 37 чыл дургузунда «демир өкпе» дээр аппараттың дузазы-биле тынып, ооң иштинге чыткан! Оон аңгыда, Лорел дыка хөй кезиишкин эртип, рак болгаш кеш аарыындан хинчектенип чораан. Ынчалза-даа, ындыг аар-берге байдалда безин, ол Бурганның Чагыргазының дугайында чугаалаарын кызып турган. Лорел угбавыс ооң бажыңынга келген эмчилерге суртаалдап турган. Ооң ачызында, эвээш дизе-ле, 17 кижи Иегованың Херечизи апарган! *

¹³ Бажыңындан үнүп шыдавас азы үргүлчү эмчиде чыдар акы-угбаларга Франциядан Ришар дээр удуртукчу акывыс мындыг сүмени берген: «Мен оларга бистиң дептерлеривисти көскү черге салып алырын сүмелээр чордум. Шак ынчаар акы-угбалар улустуң сонуургалын оттуруп, оларның-биле чугааны эгелеп болур. Ооң ачызында бажыңнар кезип, суртаалдаар аргазы чок калган акы-угбаларның хей-аъды көдүрлүп кээп болур». Оон ыңай оларның чагаалар бижиир азы телефон таварыштыр суртаалдаар аргазы бар.

14. Давид хаан биске кандыг кайгамчык чижекти көргүскенил?

¹⁴ Назынывыс улгатканындан, кадыывыс баксыраанындан азы оон өске чылдагааннарның ужундан бистер хуралга харыысалгалыг даалгаларны күүсетпейн турар чадавас бис. Ындыг таварылгада биске Давид хаанның чижээ дузалаар. Ол Иеговага өргээни тудуксап турган. Ынчалза-даа ону Давид эвес, а ооң оглу тудар деп, Бурган чугаалаан. Ол шиитпирниң дугайында Давид дыңнап кааш, бүрүнү-биле чөпшээрежип, өргээни тударынга дыка хөй түңнүг алдын-мөңгүннү безин өргээн. Кандыг кончуг кайгамчыктыг чижек боор! (2 Хаан. 7:12, 13; 1 Чыл. 29:1, 3—5).

15. Анри муңгаранчыг бодалдарны канчаар тиилээнил?

¹⁵ Францияда Анри дээр акывыс кадыының аайы-биле удуртукчу хүлээлгезин күүседип шыдавас апарган. Ол бажың ажылын безин кылып шыдавастай берген. Анри мынча деп бижээн: «Эгезинде мен бодумдан чөгенип турган мен. Ынчалза-даа үе эрткенде таварышкан бергелеримни хүлээп аар ужурлуг мен деп билип каан мен. Ынчан Иеговага бичии-даа болза бараалгап шыдаар аргамга өөрүп турган мен. Гедеон болгаш ооң 300 дайынчылары могап-шылап-даа тургаш, дайылдажып турганы дег, мен база олар дег, черле дүжүп бербес мен!» (Башт. 8:4).

16. Дээрниң төлээлериниң үлегеринден чүнү өөренип ап болур бис?

¹⁶ Бурганга шынчы дээрниң төлээлери база кайгамчык үлегерни көргүскен. Бир катап Иегова Ахав дээр шынчы эвес хаанны оларның кайызы кажарлап үндүрүп шыдаар деп  айтырган. Иегова элээн каш төлээлериниң санал-оналын дыңнааш, оларның чүгле чаңгызынга ол даалганы күүседирин дааскан (3 Хаан. 22:19—22). Өске дээрниң төлээлери ону дыңнааш, муңгарай берген бе? Азы оларның кайы-бирээзи: «Маңаа келгеш, хей-ле үемни чидирген мен» деп бодаан бе? Чок, болбайн канчаар! Дээрниң төлээлери биче сеткилдиг болгаш, бүгү алдар-хүндүнү чүгле Иегова алзын деп күзеп турар (Башт. 13:16—18; Ажыд. 19:10).

17. Биске хүндүткелдиг хүлээлгелерни бербес болза, чүге муңгараан херээ чок?

¹⁷ Иегова биске Ооң Херечилери боор база Чагыргазының дугайында суртаалдаар улуг алдар-хүндүнү көргүскен. Хүндүткелдиг даалгаларывыс бөгүн бар, а даарта чок. Ынчангаш Бурган бисти чүгле ол дээш үнелеп турар деп бодаары шын эвес. Томаарыыр чорукту болгаш биче сеткилди илередиривисти Иегова күзеп турар. Шак ол шынарлар дээш акы-угбаларывыс биске ынак болгай. Ынчангаш биче сеткилдиг артар дээш, Иеговадан дузаны дилеңер. Ол шынарларны илередип чораан Бурганның бараалгакчыларының үлегер-чижээниң дугайында ханы боданыңар. Акы-угбаларга эки чүүлдерни кылырынга белен болуңар (Ыд. ыр. 137:6; 1 Пет. 5:5).

18, 19. Улус буянныг медээни шоолуг сонуургавас болза, өөрүшкүлүг артарынга биске чүү дузалаар?

¹⁸ Улус буянныг медээни сонуургавас боорга, азы олар бажыңнарынга ховар олурар боорга, муңгарап турар чадавас силер. Бо таварылгада өөрүшкүнү чидирбезинге биске чүү дузалаар? « Бараалгалдан оон-даа хөй өөрүшкүнү алырынга чүү дузалаар?» деп көзенектен каш ажыктыг сүмени билип ап болур. Оон аңгыда, бараалгалывыска шын хамаарылгалыг боор болзувусса эки. Ол чүү дээни ол?

¹⁹ Бистиң сорулгавыс — Бурганның адын болгаш Ооң Чагыргазының дугайында улуска чугаалаары деп сактып чоруңар. Мөңге амыдыралга чедирер орукту эвээш улус тып алыр деп, Иисус тода чугаалаан (Мф. 7:13, 14). Бараалгал үезинде бис Иегова, Иисус болгаш дээрниң төлээлери-биле сырый ажылдажып турар бис (Мф. 28:19, 20; 1 Кор. 3:9; Ажыд. 14:6, 7). Иегова Аңаа бараалгаар күзелдиг улусту дилеп турар (Ин. 6:44). Канчап билир, бөгүн бисти дыңнаваан кижи дараазында  кээривиске, буянныг медээни сонуургай бээр чадавас.

20. Иеремия 20:8, 9-та сөстер ундарал-биле туржурунга канчаар дузалап турар?

²⁰ Иеремияның чижээнден хөй чүүлге өөренип ап болур бис. Ол Бурганның медээзин улуска чедирерге, олар ону бак сөглеп, кыжырып турганнар. (Номчуптуңар: Иеремия 20:8, 9.) Иеремия муңгарааш, моон соңгаар Иегованың өмүнээзинден чүве чугаалавас деп бодаан. Ынчалза-даа ол ыыттавайн барып шыдаваан. Чүге дээрге Иегованың сөзү ооң «ишти-хөңнүнден ушта чүткээн от дег» апарган. Ону тудар дээш, Иеремия могап турупкан. Бистиң угаан-бодалывыс болгаш ишти-хөңнүвүс Бурганның Сөзүнден алыс шын-биле долган болза, бис база ыыттавайн барып шыдавас бис. Ынчангаш хүннүң-не Библияны номчуп, ооң дугайында ханы боданыры чугула. Ынчан улуг өөрүшкүнү миннир бис. А бараалгалывыс оон-даа солун болгаш ужур-уткалыг апаар (Иер. 15:16).

21. Ундаралды канчаар тиилеп болур?

²¹ Кырында чугаалашканывыс Дебора мынча дээн: «Муңгарал — Эрликтиң биске удур ажыглап турар коргунчуг чепсээ-дир». Ынчалза-даа Иегова Эрликтен оранчок күштүг. Ынчангаш ундарап турар болзуңарза, Иеговадан деткимчени дилеңер. Ол четпес болгаш кошкак талаларыңарга шын хамаарылгалыг боорунга дузалаар база аарыг-аржык үезинде силерни деткиир. Хүндүткелдиг даалгаларны силерге бербес-даа болза азы улус буянныг медээни дыңнавас-даа болза, Бурган силерге өөрүшкүлүг артарынга дузалаар. Дээрде Адаңарга бүгү сагыш-сеткилиңерни тө каап берип, шупту чүвени чажырбайн чугаалаңар. Ооң дузазы-биле ундаралды тиилеп шыдаар силер!