1, 2. Дээрге диргизиишкин чүге бисти шуптувусту сонуургадыр ужурлуг?

АМГЫ үеде Иеговага бараалгап чоруур улустуң хөй кезии черге мөңге чурттаарынга идегеп турар. Ынчалза-даа ыдыктыг сүлдеге чагдырткан христианнар дээрге чурттаар идегелдиг. Дирилгениниң соонда дээрге чуртталгазы кандыг боорун олар дыка билип алыксап турар. А черге чурттаар идегелдиг улус ону чүге сонуургаар ужурлугул? Дээрге болур диргизиишкин оларга база йөрээлдерни эккээр болганда, идегеливис кандыг-даа бол, ол бисти сонуургадыр ужурлуг.

² Бирги векте чурттап чораан Иисустуң чамдык өөреникчилери дээрге чурттаар идегелиниң дугайында бижип турганнар. Чижээ, Иоанн элчин мынча деп бижээн: «Бис ам дээрезинде Бурганның ажы-төлү-дүр бис, келир өйде кандыг болу бээривис амдыызында билдинмес-тир. Ындыг-даа болза, Христос ээп кээрге, шупту Аңаа дөмей апаарывысты билир бис» (1 Ин. 3:2). Ол сөстерден алырга, чагдырган христианнар дээрге көзүлбес мага-боттуг дирлип келгеш, кандыг мага-боттуг боорун билбес. Ынчалза-даа олар шаңналын алгаш, Иегованы көөр аргалыг боор. Библияда дээрге диргизиишкинниң дугайында тодаргай биживээн-даа болза, Павел элчинниң сөстеринден ооң дугайында кезек чүүлдерни билип ап болур бис. «Христос бүгү чагырыкчыларны, эрге-чагырганы азы кара күштерни базып», «эң сөөлгү дайзын — өлүмнү» узуткап кааптарга, шилип чагдырган христианнар дээрге ооң-биле кады турар. Түңнелинде Иисус болгаш  ооң дузалакчылары Иеговага чагыртып база шупту чүвени Аңаа чагыртырлар (1 Кор. 15:24—28). Ол үе дыка өөрүнчүг боор! *

3. Диргизиишкинге бүзүрел Павелге канчаар дузалап турган? (1 Коринфичилерге 15:30—32).

³ Диргизиишкинге бүзүрелиниң ачызында Павел янзы-бүрү шенелделерге быжыг туруштуг артып турган. (Номчуптуңар: 1 Коринфичилерге 15:30—32.) Павел коринфичилерге мынча деп бижээн: «А мен, ха-дуңма, хүннүң-не өлүмче чиге көөр-дүр мен... Эфес хоорайга „араатан аңнар-биле“ демисежип турган-дыр мен». Павел Эфестиң стадионунга, араатан аңнардан камгаланыр дээш, дорт уткалыг тулчуп турган чадавас (2 Кор. 1:8; 4:10; 11:23). Чок болза, араатан аңнар дээрге Павелге удурланып турган иудейлер азы өске кижилер бооп чадавас (Аж.-ч. 19:26—34; 1 Кор. 16:9). Павел янзы-бүрү бергелерге таваржып-даа турган болза, келир үеже быжыг көрүштүг турган (2 Кор. 4:16—18).

4. Диргизиишкинге идегели Бурганның бараалгакчыларын канчаар сорук киирип турар? (Журналдың даштында чурукту көрүңер.)

⁴ Бис кончуг дүшкүүрлүг үеде чурттап турар бис. Чамдык акы-угбалар кем-херек үүлгедикчилеринден когарап турар, а өскелери дайын-чаа болуп турар черлерде чурттап турар. Оон аңгыда, ажыл-чорудулгавысты хоруп каан азы кызыгаарлап каан чурттарда бараалгап турар акы-угбалар база бар. Олар бүзүрели дээш хосталгазын казыттырып, безин амы-тынындан чарлып болур. Ынчалза-даа ол акы-угбалар биске үлегер бооп, быжыг туруштуу-биле улаштыр Иеговага бараалгап чоруурлар. Олар билир: бо делегейде амы-тынындан чарлы-даа бээр болза, Иегова оларны келир үеде, кайгамчыктыг чаа делегейге диргизиптер.

5. Кандыг нептереңгей үзел-бодал бистиң диргизиишкинге идегеливисти кошкадып болур?

⁵ «Өлүглер катап дирилбес турган болза: „Даарта өлүп каар бис — ам дойлап, ижип-чип аалы“». Ынчаар бодаары айыылдыг деп, Павел кады бүзүрээн ха-дуңмазынга сагындырган. Шаанда израильчилер база шак ындыг хөөннүг чорааннар. Павел мында Исайя 22:13-те сөстерни чугаалаан чадавас. Израильчилер Бурган-биле найыралын үнелевейн, боттарының күзээшкиннерин хандырарын кызып турганнар. Өскээр чугаалаарга, олар «чаңгыс катап чурттаар болгай бис» деп амгы үеде нептереңгей үзел-бодал-биле чурттап турганнар. Ынчалза-даа ол чүүл кандыг муңгаранчыг түңнелдерге чедиргенин Библиядан кончуг эки билир бис (2 Чыл. 36:15—20).

6. Диргизиишкинге бүзүрээр болзувусса, кандыг эш-өөрнү шиливес бис?

⁶ Диргизиишкинге бүзүреп турар болганывыста, эш-өөрнү оваарымчалыг шилиири чугула. Хүнүн бодап чурттап чоруур, боттарының күзелдерин хандырарынга ынак кижилер-биле Коринфиде акылар аралашпас ужурлуг турган. Ынчангаш бис база келир үезин бодавас, күзээшкиннерин хандырар улус-биле чоок аралашпас болзувусса эки. Чүге дизе оларның шын эвес хөөнү биске багай салдарны чедирип болур. Безин чадаарда, Бурганның хоойлу-дүрүмүн үреп, бачытты үүлгедип болур бис. Ынчангаш Павел мынча деп сагындырган: «Чогууру-биле сергей берип, бачыт үүлгедирин соксадыңар!» (1 Кор. 15:33, 34).

7. Павелдиң үезинде улус диргизиишкинге хамаарыштыр кандыг айтырыгларны салып чорааныл? (1 Коринфичилерге 15:35—38).

⁷ Номчуптуңар: 1 Коринфичилерге 15:35—38. Диргизиишкин болурунга чигзине бээр  кылдыр, Павелдиң үезинде чамдык улус мынча деп айтырып болур турган: «Өлүг улус канчап катап дирлирил? Олар ээп кээрге, мага-боду кандыг боорул?» Павелдиң бо айтырыгларга канчаар харыылаанының дугайында боданыры биске база ажыктыг. Улустуң өлүм дугайында үзел-бодалы аңгы-аңгы бооп турар. А Бурганның Сөзүнде ооң дугайында чүү дээнил?

8. Кандыг чижектиң дузазы-биле дээрге диргизиишкинниң дугайында билип ап болур бис?

⁸ Кижи чок апаарга, ооң мага-боду ирип каар. Ынчалза-даа Иегова куруг черден Октаргайны чаяап каан болганда, Аңаа кижини катап диргизери көңгүс берге эвес (Э. д. 1:1; 2:7). Дээрге болур диргизиишкинниң дугайында чугаалап тургаш, Павел үрезинни үлегер кылдыр ажыглаан. Бичии ынай үрезинни тарып каарга, оон үрезинге көңгүс дөмей эвес, өске үнүш өзүп кээр. Чаяакчы кижиге Бодунуң «күзээн аайы-биле» мага-ботту хевирлеп болур деп, ол чижектиң дузазы-биле Павел көргүскен.

9. 1 Коринфичилерге 15-ки эгениң 39-тан 41-ге чедир шүлүктеринде чүнүң дугайында чугаалаан?

⁹ Номчуптуңар: 1 Коринфичилерге 15:39—41. Иегованың чаяап каан өртемчейи кайгамчык деп, Павел сагындырган. Чижээ, дириг амытаннарның, кушкаштарның болгаш балыктарның мага-боттары аңгы-аңгы. Ай Хүнге дөмей эвес, ол ышкаш «сылдыстар база чайынналчаа-биле ылгалып турар» деп, Павел чугаалаан. Эртемденнерниң чугаазы-биле алырга, сылдыстар аразында дыка улуг кызыл, бичии ак болгаш бистиң Хүн ышкаш, сарыг сылдыстар бар. Оон ыңай Павел «дээрниң чырымалдарының мага-боттары болгаш черниң мага-боттары бар» деп бижээн. Павел ону чүү дээш чугаалаан? Черде чурттап турар улустуң мага-боду эът-хандан бүткен, а дээрге чурттаар идегелдиг улустуң мага-боттары, дээрниң төлээлериниң ышкаш, көзүлбес боор.

10. Дээрге чурттаар дээш дирлип келген улустуң мага-боду кандыг боор?

¹⁰ Эскерип көрүңер даан, Павел оон улаштыр мынча деп бижээн: «Өлүглер катап дирлирге,  база шак ындыг боор: черге ирип-чыдыыр мага-ботту ажаап каар, а оортан ирип-чыдывас мага-бот көдүрлүр». Ийе, кажан кижи өлүп каарга, ооң мага-боду ирип-чыдып, довурак-доозунче шилчий бээр (Э. д. 3:19). Ынчап кээрге, кижи канчап «ирип-чыдывас» мага-боттуг кылдыр дирлип кээрил? Павел бо удаада Илия, Элисей болгаш Иисустуң диргизипкен улузунуң дугайында чугаалавайн турар. Ол болза Бурганның дээрге чурттаар «ирип-чыдывас» мага-боттуг кылдыр диргизер улузунуң дугайында чугаалап турар (1 Кор. 15:42—44).

11, 12. Иисустуң дирилгениниң соонда чүү болган? Чагдырган христианнар өлүп каарга, оларның-биле чүү болур?

¹¹ Иисус черге чурттап турда, ол эът-боттан болгаш хандан бүткен кижи турган. Ол «мөңге амыдыралдың үнер дөзү апарып», дээрже көзүлбес мага-боттуг бооп, үне берген. Шак-ла ындыг ышкаш, чагдырган христианнар дирлип келген соонда, дээрге амыдырап чурттаарынга таарымчалыг мага-ботту алыр ужурлуг. Павел ону мынчаар тайылбырлаан: «Черниң кижизиниң овур-хевирин дөзеп алганывыс дег, дээрниң Кижизиниң овур-хевирин база дөзеп аар бис» (1 Кор. 15:45—49).

¹² Дирлип келген соонда Иисустуң мага-боду кижинии дег турбаан деп, сактыр болзувусса эки. Бодунуң бодалын түңнээн соонда, Павел ону мынчаар тайылбырлаан: «Эът-бот болгаш хандан бүткен улус Бурганның Чагыргазын салгап ап шыдавас» (1 Кор. 15:50). Ынчангаш, элчиннер болгаш өске-даа чагдырган христианнарның дээрге чурттаар кылдыр дирилгениниң соонда, канчап-даа эът-бот болгаш хандан бүткен ирип-чыдыыр мага-боттуг болбас ужурлуг. Дээрге диргизиишкин кажан эгелээнил? Олар өлүп калган соонда дораан эвес, а келир үеде дээрге дирлир деп, Павел чугаалаан. Павел коринфичилерге бирги чагааны бижип турда, Христостуң «чамдык өөреникчилери мөчүй бергилээн» турган. Оларның аразында Иаков элчин база турган (1 Кор. 15:6; Аж.-ч. 12:1, 2). А өске чагдырган христианнар ол үеде дириг турган.

13. Христостуң чагырып турар үезинде кандыг болуушкуннар болур ужурлуг?

¹³ Иисус черге чурттап чорааш, коргунчуг болуушкуннарның, дайыннарның, чер шимчээшкиннериниң, хамчык аарыг-аржыктарның болгаш өске-даа айыыл-халаптарның болурун баш бурунгаар чугаалаан. Ол өттүр билген медеглелдиң боттанып эгелээнин 1914 чылдан, Иисус Христостуң чагырып эгелээниниң үезинден тура, көрүп турар бис. Оон аңгыда, Бурганның Чагыргазының дугайында «Буянныг Медээни бүгү делегейге, хамык чоннарга медеглээн турар» деп, Иисус хааннай бергениниң база бир демдээн чугаалаан (Мф. 24:3, 7—14). Бурган чагдырган христианнарны Иисустуң чагырып турар үезинде диргизер деп, Павел элчин баш бурунгаар бижээн (1 Фес. 4:14—16; 1 Кор. 15:23).

14. Христостуң үезинде чок апарган чагдырган христианнар-биле чүү болуп турар?

¹⁴ Амгы үеде чагдырган христианнар чок апарган соонда, ол-ла дораан дээрге чурттаар дээш дирлип турар. 1 Коринфичилерге 15-ки эгениң 51 биле 52 дугаар шүлүктеринде Павелдиң сөстери ол чүүлдү бадыткап турар: «Шуптувус өлү бербес бис, ындыг болза-даа, Бурган шуптувусту өскертиптер. Сөөлгү труба эдиптери билек, карак чивеш аразында, көңгүс хензиг өйде өскерлир бис». Павелдиң бижээн сөстери бо үеде күүсеттинип турар! Христостуң ха-дуңмазы дирлип келген соонда, дыка улуг өөрүшкүнү миннип турар, чүге дээрге олар Иисус-биле кезээ-мөңгеде кады турар (1 Фес. 4:17).

15. Дирлип келген чагдырган христианнарны дээрге кандыг даалга манап турар?

¹⁵ Дирлип келген чагдырган христианнарны дээрге кандыг даалга манап турар? Иисус оларга мынча дээн: «Тиилээн кижиге — Мээң күзээн чүүлүмнү эчизинге чедир кылып келген кижиге, Адамдан Мээң башкарар эргени алганым ышкаш, бүгү чоннарны башкартыр мен. Ол кижи демги чоннарны демир мерге-биле  башкарар болгаш дой савагылаштыр чуура шаап кааптар» (Ажыд. 2:26—28). Чагдырганнар Иисустуң удуртулгазы-биле чоннарны демир мерге-биле башкарар (Ажыд. 19:11—15).

16. Хөй улус өлүмнү канчаар тиилээр?

¹⁶ Шилип чагдырганнар өлүмнү тиилээр (1 Кор. 15:54—57). Олар дирлип келгеш, Армагеддон дайынының үезинде черни бүгү каржы-бактан арыглап кааптар. «Коргунчуг хилинчекти» ажып эрткен Бурганның миллион-миллион бараалгакчылары чаа делегейге чурттаар. Олар ооң мурнунда чок апарган миллиард-миллиард кижилерниң канчаар дирлип кээрин ийи караа-биле көөр (Ажыд. 7:14). Чүгле бодап көрүңер даан, өлүмнүң канчаар тиилеттирип бастырганын көргеш, олар кайы хире өөрүүр деп! (Аж.-ч. 24:15). Иеговага долузу-биле шынчы арткан улус Ада́мдан салгап алган өлүмнү тиилеп, кезээ-мөңгеде чурттаар аргалыг боор.

17. 1 Коринфичилерге 15:58-тен алырга, чүнү канчаар болзувусса эки?

¹⁷ Павелдиң диргизиишкин дугайында бижээн сөстери бистиң шуптувусту оожургадып, хей-аъдывысты көдүрүп турар. Ынчангаш Павелдиң: «Дээрги-Чаяакчының даандырган ажыл-херээнге бүгү бодуңарны бараалгадыңар» дээн сөстерин сеткиливистен күүседиилиңер. (Номчуптуңар: 1 Коринфичилерге 15:58.) Бурганга идепкейлиг бараалгаар болзувусса, кайгамчык келир үеде, чаа делегейге бодап безин көрбээнивис күзелдеривистиң боттанырын көрүп каар бис. Ол ышкаш «Дээрги-Чаяакчы дээш кылган ажыл-херээвис хилис барбаан дээрзинге» шынзыгар бис.