1. Мөргүлге кандыг хамаарылгалыг боор ужурлуг бис?

 ИЕГОВА — дээрниң, черниң Чаяакчызы — Аңаа мөргүүр алдар-хүндүнү биске хайырлаан. Бис Бурганга чүрээвисти кажан-даа, кандыг-даа дылга, эрте дээре дугурушпайн-даа ажыдып болур бис. Каяа-даа турувуста, эмнелгеге-даа азы кара-бажыңга-даа, ынакшылдыг Адавыс бисти дыңнап каар. Ол белек дээш Бурганывыска аажок өөрүп четтирер-дир бис!

2. Давид хаан мөргүүр аргазын үнелеп чораанын канчаар көргүскен?

² Давид хаан мөргүүр аргазын үнелеп чораан. Ол Иеговага мынча деп ырлап турган: «Мээң мөргүлүмнү, Сээң мурнуңга айдызаар өргүл дег, хүлээп ал» (Ыд. ыр. 140:1, 2). Давидтиң үезинде өргээ бараалгакчыларының Бурганга бараалгаарда ажыглап турганы айдызаар чаагай чыттыг чүүлүн тускай хынамчалыг белеткээр турган (Хост. 30:34, 35). Давид айдызаар өргүл дугайында анаа эвес бижээн. Ол дээрде Адазынга чүнү чугаалаарын кончуг таптыг боданып аар турган чадавас. Бис база ындыг күзелдиг бис. Мөргүлдеривис Иегованың сеткилинге кирерин аажок күзээр бис.

3. Бурганга кандыг хамаарылгалыг мөргүүр ужурлуг бис база чүге?

³ Мөргүп турувуста, Бурганга ханы хүндүткеливис көскү боор ужурлуг. Исайяның, Иезекиилдиң, Даниилдиң болгаш Иоанның көрген кайгамчык көстүүшкүннерин сактып келиңер даан. Олар аңгы-аңгы-даа болза, ниити чүүлү турган. Оларның дөгерезинге Иегова өндүр бедик Хаан кылдыр көзүлген. Исайя «бедик дүжүлгеде саадаан Дээргини көрген мен» дээн (Иса. 6:1—3). Иезекиил көстүүшкүнүнге Иегованы «дүжүлгеге дөмей чүвениң кырында» саадап  олурар, а «Ону долгандыр чайынналган... челээш» бар кылдыр көрген (Иез. 1:26—28). Даниилдиң мурнунга Бурган «үе-дүптен бээр амыдыраан Ирей» кылдыр көзүлген. «Ооң хеви — хар дег ак... Ооң дүжүлгези — өөскээн чалбыыш» дег болган (Дан. 7:9, 10). А Иоанн Иегованы «изумруд дег челээш шыва алган» дүжүлгеде олурар кылдыр көрген (Ажыд. 4:2—4). Иегованың ат-алдарынга чүү-даа деңнешпес! Ону бодап келгеш, мөргүүр аргавыс дээш канчап-даа аажок улуг өөрүп четтиргенивис ишти-хөңнүвүске хайныгып кээр. Ынчаар бис Бурганга кайы хире ханы хүндүткел-биле мөргүүрүн боттарывыска сагындырып турар бис. Ынчаарга чүнүң дугайында мөргүүр ужурлуг бис?

4. Үлегерлиг мөргүлдүң эгеки сөстеринден чүнү өөренип ап турар бис? (Матфей 6:9, 10).

⁴ Номчуптуңар: Матфей 6:9, 10. Даг кырынга суртаалга Иисус өөреникчилерин мөргүп өөредип тургаш, Бурганга канчаар таарымчалыг кылдыр мөргүүрүн тайылбырлап берген. «Мынчаар мөргүп чоруңар» дээн сөстериниң соонда, Иисус дораан-на Иегованың күзел-бодалынга дорт хамаарылгалыг чүүлдерни чугаалаан. Ол дээрге Бурганның адын алдаржыдары, Ооң шупту дайзыннарын узуткап каар Чагырганың кээри база кижи төрелгетенге келир үеде шаңнал. Мооң дугайында мөргүп тургаш, Бурганның күзел-соруу биске кол деп көргүзер бис.

5. Хууда диленип мөргүүрүвүске, Иегова дыңнап турар бе?

⁵ Оон Иисус хууда хереглелдерниң дугайында мөргүүрүнде база багай чүве чок деп көргүскен. Бис Иеговадан хүн бүрүде херек аъш-чемни бээрин, бачыттарывысты өршээрин, күткүлгелерге алыспазынга дузалаарын база Эрликтен камгалаарын дилеп болур бис (Мф. 6:9—13). Шак ындыг дилеглер Бурган чокта чүнү-даа кылып шыдавазывысты база Ооң ээ көрүүшкүнүн алыксап турарывысты көргүзүп турар.

6. Бис чүгле Иисустуң үлегерлиг мөргүлүнче кирип турар чүүлдерниң дугайында мөргүүр ужурлуг бис бе? Тайылбырлаптыңар.

⁶ Үлегерлиг мөргүлдү өөреникчилери сөстен сөсче катаптаарын Иисус күзевээн.  Ол мөргүп тургаш, ону дүвүредип турган аңгы-аңгы айтырыгларны чугаалап турган (Мф. 26:39, 42; Ин. 17:1—26). Бис база бисти дүвүредип турар шупту чүүлдерниң дугайында мөргүп болур бис. Шиитпир хүлээрде, Иеговадан мерген угаан дилээри чугула (Ыд. ыр. 118:33, 34). А кажан чаа даалга алгаш, ону канчаар күүседирин билип алыр дээш, чүге мөргүп болбас деп? (У. ч. 2:6). Ада-иелер ажы-төлү дээш, а ажы-төл ада-иези дээш мөргүп болур. Оон аңгыда, бис шупту өөредип база суртаалдап турар улузувус дээш Бурганга мөргүп болур бис. Ийе, мөргүлдеривиске чүгле дилеглер турбас ужурлуг.

7. Мөргүп тургаш, Иегованы алгап-мактаары чүге чугула?

⁷ Мөргүп тургаш, Иегованы алгап-мактаарын утпаңар. Бурганывыстан өске кым-даа мактал-хүндүге төлеп чок. Иегова — «ачы-буянныг, ээ-хайыралыг», «килеңнээчел эвес, кээргээчел, ээ көрнүүчел, элбек энерелдиг база бүзүрелдиг Бурган» (Ыд. ыр. 85:5, 15). Ол хире кайгамчык чараш шынарларлыг болгаш өндүр улуг ажыл-херектерлиг Бурганны алдаржытпайн канчаар!

8. Иеговага чүү дээш өөрүп четтиргенивисти илередип болур бис? (Ырлар 103:12—15, 24).

⁸ Иегованы алгап-мактаарындан аңгыда, Ооң кайгамчык белектери дээш өөрүп четтирери чугула. Чижээ, чараш чечектер, чаагай аъш-чем болгаш чоок өңнүктеривис дээш четтиргенивисти Аңаа илередип болур бис. Бо болгаш өске-даа чүүлдерни ынакшылдыг Адавыс бисти өөрүп чурттазын дээш берип турар. (Номчуптуңар: Ырлар 103:12—15, 24.) Оон артык, Иеговага элбээ-биле берип турар ном-дептерлери, видеороликтери дээш база келир үеже идегел дээш өөрүп четтирер-дир бис!

9. Иеговага өөрүп четтиргенивисти илередирин утпас кылдыр, чүнү кылып болур бис? (1 Фессалоникчилерге 5:17, 18).

⁹ Чөпшээрежир боор силер, чамдыкта Иеговага өөрүп четтиргенивисти илередирин уттуп аар бис. Ындыг байдалда чүнү кылып болур? Мөргүлдериңерге чүнү дилеп турганыңарны даңзылап алгаш, үе-үе болгаш-ла, Иегованың канчаар харыылаанын  хынап болур силер. Ооң соонда Бурганга четтиргениңер илередиңер. (Номчуптуңар: 1 Фессалоникчилерге 5:17, 18.) Чижээ, бир кижи биске четтиргенин илередирге, өөрүп, арын-шырайывыска хүлүмзүрүг тыптып келир. Иегова база четтиргенивисти чугаалаарывыска аажок өөрүп турар (Кол. 3:15). Бурганывыска өөрүп четтирер оон-даа чугула база бир чылдагаан бар.

10. Иисусту черже чорудупканы дээш, чүге Иеговага четтиргенивис илередир ужурлуг бис? (1 Пётр 2:21).

¹⁰ Номчуптуңар: 1 Пётр 2:21. Бодунуң ынак Оглун бисти өөредири-биле чорудупканы дээш, Иеговага четтиргенивис илередир ужурлуг бис. Иисустуң чуртталгазын өөренип тургаш, дээрде Адавыстың дугайында база Ону канчаар өөртүрүн билип алыр бис. Бир эвес Иегованың чоок өңнүү бооп, Ооң-биле эп-найыралдыг болуксаар болзувусса, Христостуң өргүлүнге бүзүрээр ужурлуг бис (Рим. 5:1).

11. Чүге Иисус Христосту таварыштыр мөргүп турар бис?

¹¹ Иеговага Оглун дамчыштыр мөргүүр аргавыс дээш өөрүп четтирип турар бис. Иегова мөргүлдеривиске Оглун дамчыштыр харыылап турар. Иисус Христосту таварыштыр мөргүүр болзувусса, Иегова дилеглеривисти дыңнап, биске херек чүүлдү бээр. Иисус ону мынчаар тайылбырлаан: «Силер Мээң адым адап, чүнү-даа дилээр болзуңарза, Оглун дамчыштыр Адам алдаржызын дээш, ону шуптузун күүседир мен» (Ин. 14:13, 14).

12. Оглу дээш Иеговага четтиргенивисти илередир оон ыңай кандыг чылдагаан бар?

¹² Христостуң өргүлүнге даянып, Иегова бачыттарывысты өршээп турар. Иисусту Библияда мынча дээн: «Дээди бараалгакчы дээрлерде Дээди Өрүкү Бурганның дүжүлгезиниң оң талазында олурупкан» (Евр. 8:1). Иисус кошкак талаларывысты билиринден аңгыда, Бурганның мурнунда «бис дээш дилеп, болчуп турар» (Рим. 8:34; Евр. 4:15; 1 Ин. 2:1). Ындыг кээргээчел Дээди бараалгакчыны биске бергени дээш, Иеговага дыка-ла өөрүп четтирер-дир бис. Бис бачыттыг улус Христостуң өргүлү эвес болза, мөргүүр аргавыс чок боор ийик. Чигзиниг чок, Иеговага Ооң эң-не үнелиг белээ — эргим Оглу — дээш, четтиргенивисти кажанда-даа долузу-биле илередип шыдавас бис.

13. Өлүрүнүң мурнунда дүне Иисус өөреникчилеринге ынакшылын канчаар көргүскен?

¹³ Өлүрүнүң мурнунда дүне Иисус өөреникчилери дээш үр үе дургузунда мөргүп, «оларны бузуттан камгалаары[н]» Адазындан дилеп турган (Ин. 17:15). Коргунчуг шенелделерни эртер деп тургаш безин, Бурганның Оглу бодунуң эвес, а элчиннериниң дугайында сагыш човап турган. Ынчаар ол оларга өндүр улуг ынакшылын көргүскен.

14. Акы-угбаларга ынакшылывысты канчаар көргүзүп болур бис?

¹⁴ Иисусту өттүнерин кызып турар болгаш, чүгле бодувусту бодавас бис. Мөргүлдеривиске бис болганчок-ла акы-угбаларывыстың дугайында дилээр бис. Ынчаар бис: «Бот-боттарыңарга ынак болуңар» дээн Иисустуң чагыын дыңнап турар бис (Ин. 13:34). Бистиң ха-дуңмага ынакшылдыг хамаарылгавысты Иеговага көөрү эки болбайн канчаар. Акы-угбалар дээш мөргүлдеривис оларга дыка дузалыг  бооп болур, чүге дизе Бурганның Сөзүнде: «Чөптүг-шынныг кижиниң мөргүлү аажок күштүг салдарлыг боор» — дээн (Иак. 5:16).

15. Акы-угбаларга бистиң мөргүлдеривис чүге херек?

¹⁵ Акы-угбаларывыска бистиң мөргүлдеривис дыка херек, чүге дизе олар хөй шенелделерге таваржып чоруур. Бойдус халаптарындан, хамааты дайыннардан болгаш истеп сүрүүшкүннерден когараан, ол ышкаш аарып-аржып азы өске-даа озал-ондакка таварышкан ха-дуңмага Иегова дузалаар кылдыр дилеп турар бис. Оон аңгыда, боттарын хайыралавайн, хай-халапка таварышкан улуска дузалап турар акы-угбалар дээш мөргүүрү чугула. Оларны хууда билир чадавас силер. Оларның аттарын адап тургаш, чүге мөргүп болбас деп? Ынчаар ха-дуңмага ёзулуг ынакшылды көргүзер силер.

16. Удуртур хүлээлгелиг улус дээш чүге мөргүүр ужурлуг бис?

¹⁶ Чыышты удуртур хүлээлгелиг акылар дээш мөргүүр боорувуска, олар четтиргенин илередип турар. Бистиң мөргүлдеривис эвес болза, оларга хүлээлгелерин күүседири берге боор ийик. Ооң дугайында Павел элчин мынчаар бижээн: «Мени бодааш — чугаалай бээримге-ле, Бурган меңээ херектиг сөстерни айтып берзин дээш база Буянныг Медээниң чажыдын коргуш чок суртаалдаарым дээш — мөргүңер-ле» (Эф. 6:19). Амгы үеде, Павел элчин ышкаш, бодун хайыралавас хөй акылар бистиң-биле кады бараалгап турар. Ынакшыл бисти Иеговадан оларны деткиир кылдыр дилээринче оттурар.

17, 18. Кажан бисти улус мурнунга ыыткыр мөргүүрүн дилеп болур база чүнүң дугайында сактыр ужурлуг бис?

¹⁷ Чамдыкта бисти улус мурнунга мөргүүрүн дилеп болур. Чижээ, бир угбавыс библейжи кичээлче өске угбавысты чалап алгаш, ону мөргүүрүн дилеп болур. Чалаттырган угбавыс өөренип турар кижиниң байдалдарын билбес болгаш, кичээл соонда мөргүүрүн саналдаар чадавас. Ынчаар аңаа өөреникчиниң хереглелдери дээш мөргүүрү чиик боор.

¹⁸ Акывыска суртаалга белеткээр ужуражылгага  азы чыышка мөргүүрүн дагзып болур. Ол чүнүң дугайында сактыр ужурлуг? Баштай ол улустуң чүү дээш чыглып келгенин херекке алыр ужурлуг. Оон аңгыда, мөргүп тургаш, чыышка сүмелер кадып азы чарлалдар чугаалаан херээ чок. Арта ырыже болгаш мөргүлче чүгле беш минут берип турар. Ынчангаш мөргүп турар акывыс ылаңгыя эгеки мөргүлде хөй чугааланып турбас ужурлуг (Мф. 6:7).

19. Иегованың шииткел хүнүнге белен боорунга биске чүү дузалаар?

¹⁹ Иегованың шииткел хүнү чоокшулаан тудум, мөргүүрү биске ылаңгыя чугула. Ынчангаш Иисус мынча дээн: «Бо бүгү кел чыдар айыыл-халаптардан чайлай бээр харыктыг болур дээш... үргүлчү серемчилелдиг болуңар, а ол ышкаш мөргүңер» (Лк. 21:36). Иеговага үргүлчү мөргүп турар болзувусса, бүзүреливис быжыг боор база Ооң шииткелиниң хүнү биске хеп-хенертен келбес.

20. Кандыг байдалда бистиң мөргүлдеривисти айдызаар чүүлдүң чаагай чыдынга дөмейлеп болур?

²⁰ Чүнү сайгарган бис? Мөргүүр арганы үнелээр болзувусса эки. Мөргүлдеривистиң кол темазы Иегованың үзел-бодалы-биле дорт холбаалыг боор ужурлуг. Оон ыңай Бурганга Ооң Оглу дээш база Христостуң холунда Чагырга дээш четтиргенин илередири чогуур. Оон аңгыда, акы-угбалар дээш мөргүүр херек. Иеговадан хүн бүрүде хереглелдеривис дээш сагыш човаарын болгаш бүзүреливис быжыг бооп артарынга дузалаарын база дилеп болур бис. Бир эвес чүнүң дугайында мөргүүрүн боданып ап турар болзувусса, Бурганга мөргүүр арганы үнелеп турарывыс ол. Ынчан аас-сөзүвүс, айдызаар чүүлдүң чаагай чыды ышкаш, Иеговага таарымчалыг боор (У. ч. 15:8).