1. Эр кижиниң кадайы биле ажы-төлүнге хамаарылгазынче чүү салдар чедирип болур?

ЧҮҮ деп бодаар силер, өг-бүлениң баштыңы кандыг боор ужурлуг? Эр улус колдуунда кадайларынга болгаш ажы-төлүнге культуразында болгаш боттарының өг-бүлезинге көрүп өскен хамаарылганы көргүзер. Европадан Янита дээр угбавыс: «Мээң чуртумда херээжен улуска чалчаларга дег хамаарылгалыг боор» — дээн. А Каттышкан Штаттардан Люк мынча дээн: «Чамдык адалар оолдарын херээжен кижи артык чүве чугаалавас ужурлуг, оларның бодалы кымга-даа солун эвес деп өөредип турар». Ынчалза-даа Иегованың көрүжү оон көңгүс өске. (Деңнеңер: Марк 7:13.) Ынчаарга өг-бүлениң эки баштыңы кандыг болурул?

2. Өг-бүлениң баштыңнары чүнү эки билип алыр ужурлуг база ол чүге чугула?

² Өг-бүлениң эки баштыңы Иегова оон чүнү манап турарын, башкарылга дүрүмүн чүге тургусканын база Иегова биле Иисустан чүнү өөренип ап болурун баштай эки билип алыр ужурлуг. Чүге? Бурган өөнүң ээлеринге эрге-чагырганы берген болганда, ону шын ажыглаарын негеп турар (Лк. 12:48б).

3. 1 Коринфичилерге 11:3-те бижээн башкарылга дүрүмүнден чүнү билип алдывыс?

³ Номчуптуңар: 1 Коринфичилерге 11:3. Бо шүлүкте Бурганның өг-бүлезинге тургускан башкарылга дүрүмүн бижээн. Иегова — бүгү амылыг чүвениң Баштыңы-дыр. Ооң эрге-чагыргазы кызыгаар чок. Дээрниң төлээлери-даа, черде кижилер-даа Ооң мурнунга харыы тудар (Рим. 14:10; Эф. 3:14, 15). Бурган чыышты чагырар эрге-чагырганы Иисуска берген. Иисус ол чагырганы канчаар ажыглап турары дээш Бурганга харыы тудар (1 Кор. 15:27). Оон ыңай Иегова эр улуска өг-бүлезиниң иштинге эрге-чагырганы берген. Олар  ажы-төлү биле кадайынга кандыг хамаарылга көргүскени дээш, Иисус биле Иегованың мурнунга харыылаар (1 Пет. 3:7).

4. Иегованың болгаш Иисустуң кандыг эрге-чагыргазы бар?

⁴ Иегова бүгү чаяалганың Баштыңы болганда, дээрде-даа, черде-даа ажы-төлүнге дүрүмнер тургузар эргелиг. Бурган оларның ол дүрүмнерни канчаар сагып турарын көрүп турар (Иса. 33:22). Иисус база чүгле чыыштар иштинге шак ындыг эргелиг (Гал. 6:2; Кол. 1:18—20).

5. Өг-бүлелерниң баштыңнары кандыг эрге-чагыргалыг? Ол эрге кызыгаарлыг бе?

⁵ Иегова эр улуска өг-бүлезинге дүрүмнер тургузар эргени берген (Рим. 7:2; Эф. 6:4). Ынчалза-даа ол эрге-чагырга кызыгаарлыг. Чижээ, ооң тургускан дүрүмнери Библияга үндезилеттинген боор ужурлуг (У. ч. 3:5, 6). А өске улуска ооң дүрүмнер тургузар эргези чок (Рим. 14:4). Оон аңгыда, ажы-төлү өскеш, аңгы чурттай бергеш, ачазын дөмей-ле хүндүлээр. Ынчалза-даа ол ам оларның баштыңы эвес боор (Мф. 19:5).

6. Иегова башкарылга дүрүмүн чүге тургусканыл?

⁶ Иегова өг-бүлезинге ынак болгаш, башкарылга дүрүмүн тургускан. Ону белек деп болур, чүге дизе ооң ачызында Иегованың өг-бүлезинде амыр-тайбың биле корум-чурум тергиидеп турар (1 Кор. 14:33, 40). Ол дүрүм чок турган болза, Иегованың өг-бүлезинге аас-кежик-даа, чурум-даа турбас ийик. Чижээ, чугула шиитпирлерни кым хүлээр эргелиг база ону кым күүседир ужурлуг дээн айтырыглар тыптып кээп болур турган.

7. Эфесчилерге 5:25, 28-тен алырга, эр кижи кадайынга кандыг хамаарылгалыг болур ужурлуг?

⁷ Башкарылга дүрүмү шупту улуска аас-кежик эккээр ужурлуг болза, чүге хөй херээжен улус ашактарының каржы хамаарылгазындан хинчектенип чоруур? Чүге дээрге эр улустуң хөй кезии Иегованың негелделерин эвес, а тус черниң ёзу-чаңчылдарын сагып чоруур. Безин чамдык эр улус бодун «ёзулуг эр кижи» кылдыр миннир дээш, кадайларын куду көөрүнге ынак. Олар мынча деп бодап болур: «Кадайым меңээ ынак эвес-даа болза, ону коргудуп алырымга, ол мээң аайымдан эртпес дийин» *. Ынчалза-даа Иегова херээжен улуска шак ындыг хамаарылганы хүлээп көрбес. Эр кижи кадайынга ынак бооп, аңаа хүндүткелди көргүссүн деп, Ол күзеп турар. (Номчуптуңар: Эфесчилерге 5:25, 28.)

8. Өг-бүлениң эки баштыңы болур дизе, чүнү канчаарыл?

⁸ Өг-бүлениң эки баштыңы болур дээн кижи, Иегова биле Иисус ышкаш, эрге-чагырганы шын ажыглаар ужурлуг. Ам Иегова биле Иисустуң илередип турар ийи шынарын сайгарып көргеш, өг-бүлениң баштыңы кадайынга болгаш уругларынга ол шынарларны канчаар илередип болурун боданып көрээлиңер.

9. Иегова биче сеткилди канчаар көргүзүп турар?

⁹ Биче сеткил. Иеговадан артык мерген угаанныг кым-даа чок. Ынчалза-даа Ол бараалгакчыларының үзел-бодалын сонуургап, оларны кичээнгейлиг дыңнап турар (Э. д. 18:23, 24, 32; 3 Хаан. 22:19—22). Иегова тергиин-даа болза, бисти ындыг боорун негевейн турар. Харын-даа Ол биче сеткилдии-биле тергиин эвес кижилерге Аңаа бердинген болурунга дузалажып турар (Ыд. ыр. 112:6, 7; Ыд. ыр. 26:9; Евр. 13:6). Давид хаан Иегованың дузазы чокта даалгаларын күүседип шыдавазын билип турган (2 Хаан. 22:36).

10. Иисус биче сеткилди канчаар көргүзүп турган?

 ¹⁰ Ам Иисустуң чижээн көрээлиңер. Иисус өөреникчилеринге Дээрги турган-даа болза, оларның буттарын чуп берген. Иегова ол болуушкунну өг-бүлелерниң баштыңнары база өске-даа улус Иисустан үлегер алзын дээш, Библияже киирип каан. Иисус өөреникчилеринге мынча дээн: «Мээң силерге кылган чүвемни база шак ынчаар кылзыннар дээш мен силерге үлегер көргүстүм» (Ин. 13:12—17). Иисус улуг эрге-чагыргалыг турган-даа болза, улустуң аңаа бараан болурун манавайн, харын-даа боду улуска бараан бооп чораан (Мф. 20:28).

11. Өг-бүлениң баштыңнары Иегова биле Иисустуң биче сеткилин канчаар өттүнүп болур?

¹¹ Биске кичээл. Өг-бүле баштыңы биче сеткилди канчаар илередип болур? Чижээ, ол кадайы биле ажы-төлүнден тергиин чорукту манавас. Ол оларның үзел-бодалы-биле чөпшээрешпес-даа болза, оларны дөмей-ле дыңнаар. Каттышкан Штаттардан Марли мынча деп үлешкен: «Ашаам-биле чамдык айтырыгларда бодалдарывыс дүүшпейн баар. Ынчалза-даа ооң мени үнелеп, хүндүлеп турарын үргүлчү эскерер чордум, чүге дизе шиитпир хүлээрде, ол мээң бодалымны сонуургап айтырар». Оон аңгыда, биче сеткилдиг өг-бүлениң баштыңы кадайынга бажың ажылдарын кылырынга дузалажып бээр. Ынчалза-даа ону кылыры чамдыкта берге. Чүге дизе тус черниң улузу бажың ажылын херээжен кижи кылыр деп санаар. Рейчел угбавыс мынча дээн: «Мээң чуртумда эр кижи кадайынга дузалажып, аяк чуп, бажың аштаар болза, кожалары болгаш төрелдери ону кошкак кижи деп санаар». Бир эвес чурттап турар чериңерде ындыг бодалдар нептереңгей болза, канчаар? Иисус өөреникчилериниң буттарын чуп, чалча кижиниң ажылын кылырындан ыятпаан деп утпаңар. Эки өг-бүле баштыңынга кожаларының үзел-бодалы эвес, а ажы-төлүнүң болгаш кадайының аас-кежии чугула боор. Өг-бүлениң баштыңы биче сеткилден аңгыда, оон ыңай кандыг шынарны илередир болза эки?

12. Иегова биле Иисус биске ынакшылын канчаар көргүскен?

¹² Ынакшыл. Иегова шупту чүвени ынакшыл-биле кылып турар (1 Ин. 4:7, 8). Ол бисти быжыг бүзүрелдиг болзун дээш, Бодунуң организациязы биле Сөзү таварыштыр сагыш човап турар. Ол бисти ынакшылынга  бүзүредип, сагыш-сеткиливистиң хереглелдерин хандырып чоруур. Оон ыңай Бурганывыс биске амыдыраарынга херек чүүлдерни берип, «сеткил ханар бүгү чүүлүвүстү элбээ-биле хандырып» турар (1 Тим. 6:17). А кажан частырыг кылыптарывыска, Ол бистен хая көрүнмейн, эттинип алырывыска дузалап турар. Иегова ынакшылын биске көргүзүп, Оглун бис дээш база берген. А Иисустуң биске ынакшылы бодунуң амы-тынын өргүлге бергенинден көскү (Ин. 3:16; 15:13). Иегова биле Иисустуң ынакшылы оларга бердинген улуска кажан-даа төнүп читпес (Ин. 13:1; Рим. 8:35, 38, 39).

13. Өг-бүле баштыңнары өг-бүлезинге ынакшылын көргүзери чүге чугула? (« Өгленип алгаш, ашаа кадайының хүндүткелин канчаар чаалап ап болур?» деп көзенекти көрүңер.)

¹³ Биске кичээл. Өг-бүле баштыңы шупту чүвени чүге ынакшылдыы-биле кылыр ужурлуг? Иоанн элчин мынчаар бижээн: «Көрүп чорууру эжинге [өг-бүлезинге] ынак эвес кижи көрүп көрбээни Бурганга канчап ынак боорул?» (1 Ин. 4:11, 20). Иегова биле Иисусту өттүнүксеп чоруур ынакшылдыг эр кижи өг-бүлезиниң шупту хереглелдерин хандырар боор. Ол өг-бүлези Бурган-биле быжыг харылзаалыг болзун дээш сагыш човаар база оларны материалдыг болгаш сагыш-сеткил талазы-биле хандырар (1 Тим. 5:8). Оон ыңай ол ажы-төлүн өөредип кижизидер. Ол Иегованы алдаржыдар база өг-бүлезинге аас-кежик эккээр шиитпирлерни хүлээрин кызар ужурлуг. Ам ол негелде бүрүзүн чаңгыстап көрүп база өг-бүле баштыңнары Иегова биле Иисусту канчаар өттүнүп болурун сайгарыптаалыңар.

14. Өг-бүлениң баштыңы өг-бүлезиниң Бурган-биле харылзаа тудар хереглелин канчаар хандырар ужурлуг?

¹⁴ Өг-бүлезиниң Бурган-биле харылзаа тудар хереглелин хандырар. Иисус Адазындан үлегер ап, өөреникчилеринге Бурган-биле чоок харылзаалыг болурунга дузалап чораан (Мф. 5:3, 6; Мк. 6:34). Өг-бүлениң эки баштыңы база бар шаа-биле ынчаар кылып  чоруур (Ы. х. к. 6:6—9). Ооң өг-бүлезинде Библияны номчуп шинчилээри, чыыштарже баары база буянныг медээни суртаалдаары чугула черни ээлеп турар. Ынчаар кылып тургаш, ол кадайы биле ажы-төлүнүң Бурган-биле харылзаазын быжыктырып турар.

15. Өг-бүлениң баштыңы өг-бүлезиниң сагыш-сеткил хереглелдерин канчаар хандырып болур?

¹⁵ Өг-бүлезиниң сагыш-сеткил хереглелдерин хандырар. Иегова Иисуска ынакшылын ажыы-биле көргүзүп турган (Мф. 3:17). Иисус өөреникчилеринге ынакшылын чугаа-сөзү-биле болгаш ажыл-херээ-биле көргүзүп чораан. А олар Иисуска ынакшылын чаңгыс эвес удаа илередип турганнар (Ин. 15:9, 12, 13; 21:16). Өг-бүлениң баштыңы кадайы, ажы-төлү-биле Библияны кады өөренип тургаш, ынакшылын көргүзүп болур. Оон ыңай ол оларны кайы хире үнелеп турарын база оларга ынаан чугаалаар болза эки. А чогуур үеде улус мурнунга оларны мактап болур (У. ч. 31:28, 29).

16. Өг-бүле баштыңы өг-бүлезиниң оон ыңай кандыг хереглелин хандырар ужурлуг? Ол кандыг айыылдан оваарныр болза эки?

¹⁶ Өг-бүлезиниң материалдыг хереглелдерин хандырар. Иегованы израильчилер дыңнавайн турда безин, Ол олар дээш сагыш човап турган (Ы. х. к. 2:7; 29:5). Ол амгы үеде база бис дээш сагыш салып чоруур (Мф. 6:31—33; 7:11). Иисус черге тургаш, улус дээш база сагыш човап, оларны ашкарып-чемгерип, аарыгларын экиртип турган (Мф. 4:24; 14:17—20). Иегованы өөртүксеп турар өг-бүле баштыңы кадайы биле ажы-төлүн база азыраар ужурлуг. Ынчалза-даа ол хөй ажылдап туруп бээр болза, кадайының болгаш ажы-төлүнүң Бурган-биле быжыг харылзаазы кошкай берип болур. Ынчангаш ол ажылынга шын хамаарылгалыг болур болза эки.

17. Иегова биле Иисус бисти канчаар өөредип, эдип-чазап турар?

¹⁷ Өг-бүлезиниң кежигүннерин өөредир. Иегова биске экини күзээш, бисти өөредип, эдип-чазап турар (Евр. 12:7—9). Иисус Ачазын өттүнүп, өөреникчилерин ынакшылдыы-биле өөредип, оларны херек үеде чылыг-чымчаа-биле эдип-чазап турган (Ин. 15:14, 15; Мф. 20:24—28). Бисти тергиин эвес болгаш, чазыптар деп, ол билир (Мф. 26:41).

18. Өг-бүлениң баштыңы чүнү кичээнгейге алыр ужурлуг?

¹⁸ Иегова биле Иисустуң чижээн өттүнүп турар өг-бүлениң баштыңы кадайы биле ажы-төлүнүң четпестеринге шын хамаарылгалыг. Ол оларны кадыг-дошкун аажылавас (Кол. 3:19). Харын-даа ол Галатчыларга 6:1-де сүмени сагып, кадайы биле ажы-төлүнүң частырыын «эптиг, чымчаа-биле» эдип-чазап турар. Ол бодун база тергиин эвес деп миннип турар. Иисус ышкаш, өг-бүлениң баштыңы өскелерни өөредир эң эки арга — бодунуң үлегер-чижээ деп билир (1 Пет. 2:21).

19, 20. Өг-бүлениң баштыңы шиитпирлерни хүлээп тургаш, Иегова биле Иисусту канчаар өттүнүп болур?

 ¹⁹ Шиитпир хүлээрде, өскелерниң ажыын бодаар. Иегова шиитпирлерни хүлээп тургаш, бир дугаарында өскелерниң дугайында бодап турар. Чижээ, ол биске чуртталганы бээрде, бистен бир-ле чүүлдү удур алыр дээш эвес, а бисти оон өөрүшкүнү алзын дээш чаяап каан. Оон аңгыда, Иегова бистиң бачыттарывысты арыглаар дээш, Бодунуң Оглун эки тура-биле берген. Иисус база улуска ажыктыг шиитпирлер хүлээп чораан (Рим. 15:3). Чижээ, ол буянныг медээни өскелерге чугаалаар дээш, бодунуң дыжын безин бодавас турган (Мк. 6:31—34).

²⁰ Өг-бүлениң эки баштыңы мерген угаанныг шиитпирлерни хүлээри белен эвес деп билир болгаш, аңаа шыңгыы хамаарылгалыг. Ол кандыг-бир шиитпир хүлээрде, ону буу-хаа эвес, а Иегованың оон чүнү манап турарын билип аарын кызар (У. ч. 2:6, 7) *. Шак ынчаар ол чүгле бодунуң эвес, а өскелерниң эрге-ажыының дугайында сагыш човап турар (Флп. 2:4).

21. Дараазында статьяга чүнү сайгарар бис?

²¹ Иегова эр улуска өг-бүлениң баштыңы болур белен эвес даалганы берген. Олар ону канчаар күүседип турары дээш Ооң мурнунга харыы тудар. Бир эвес эр кижи Иегова биле Иисустуң үлегерин кызып өттүнер болза, ол өг-бүлениң эки баштыңы болур. Оон ыңай өг-бүлениң аас-кежиинге эвээш эвес үлүг-хууну кадайы киирип турар. Ол башкарылга дүрүмүнге кандыг хамаарылгалыг боор ужурлуг? Башкарылга дүрүмүнге шын хамаарылганы сайзырадыры чүге чамдыкта берге? Ол айтырыгларны дараазында статьяга сайгарар бис.