1. Өглениксеп турар угбавыс бодунга кандыг айтырыгларны салыр ужурлуг?

ИИСУС ХРИСТОС — христианнарның баштыңы-дыр. Ол бодунуң ролюн тергиини-биле күүседип турар. А кажан херээжен кижи өгленип алырга, тергиин эвес кижи ооң баштыңы апаар. Ынчангаш ашаанга чагыртыры аңаа белен эвес бооп болур. Кады чурттаар эжин шилип тургаш, угбаларывыс бодунга бо айтырыгларны салып болур: «Сонуургап турар кижим өг-бүлениң эки баштыңы болур бе? Ооң чуртталгазында Иегова кол черни ээлеп турар бе? Чок болза, өгленип алырывыска ол бис ийиниң Бурган-биле харылзаавысты быжыктырып шыдаар бе?» А бодунга хамаарыштыр бо айтырыгларны салып болур: «Эки кадайы боорунга менде кандыг чараш шынарлар бар? Мени шыдамык болгаш харам эвес деп болур бе? Иегова-биле чоок харылзаалыг мен бе?» (Эккл. 4:9, 12). Херээжен кижиниң өг-бүлезинге аас-кежии колдуунда ооң өгленириниң мурнунда кандыг шиитпирлерни хүлээп турарындан хамааржыр.

2. Бо статьяга чүнү сайгарар бис?

² Хөй санныг бистиң кады бүзүрээн угбаларывыс ашактарынга чагыртып чорууру-биле чараш үлегерни көргүзүп турарлар. Олар макталга төлептиг! Угбаларывыс-биле кады Иеговага бараалгаары биске өөрүнчүг. Олар кандыг бергелерге таваржып болур? Кадайы ашаанга чүге чагыртыр ужурлуг? Ашак-кадай улус Иисус Христостан, Авигеядан, Иосифтиң кадайы Мариядан чүнү өөренип ап болур? Бо үш айтырыгны сайгарыптаалыңар.

3. Тергиин өг-бүлелер чок деп чүге чугаалап болур?

³ Өг-бүле — Бургандан тергиин белек-тир. Ынчалза-даа кижилер тергиин эвес (1 Ин. 1:8). Ынчангаш Бурганның Сөзү өгленип алган улуска «түрегделдер көөр» деп сагындырып турар (1 Кор. 7:28). Херээжен кижи өгленип алгаш, кандыг бергелерге таваржып болурун көрүптээлиңер.

4. Херээжен улус ашактарынга чагыртырын чүге дорамчылал деп санап болур?

⁴ Чамдык херээжен улус тус черде кижилерниң үзел-бодалының ужундан ашактарынга чагыртырын дорамчылал деп санаар. АКШ-та чурттап турар Марисоль мынча дээн: «Өскен черимде эр-даа, херээжен-даа улусту бүгү талазы-биле дең эргелиг кылдыр көөр. Башкарылга дүрүмүн Иегова тургузуп каан база кадайы ашаанга биче-сеткилдии-биле чагыртыр ужурлуг деп дыка эки билип турар мен. Ынчалза-даа долгандыр улус өске көрүштүг боорга, ашаамның эрге-чагыргазын хүндүлээри меңээ чамдыкта берге апаар».

5. Чамдык ашактар херээжен улуска кандыг хамаарылгалыгыл?

⁵ Чамдык эр улус херээжен улусту кижи деп санавас боор. Мурнуу Америкадан Ивон дээр угбавыс мынча дээн: «Бистиң чуртувуста эр кижи чемненмээн шаанда, херээжен кижи чемненмес ужурлуг. Кыс уруглар аъш-чем кылып, аштанып-арыгланыр, а оолдарга авалары-даа, угбалары-даа бараалгап, нояннарга ышкаш хамаарылгалыг боор». Азиядан Инлин дээр угбавыс мынчаар үлешкен: «Бистиң дылывыста „херээжен улуска угаан-даа, салым-чаяан-даа херек чок“ деп үлегер домак бар. Олар артык чүве чугаалавайн, бажың ажылын кылыр ужурлуг». Бир эвес ашаа кадайынга ындыг хамаарылгалыг боор болза, кадайы бодун херек чок кылдыр миннип, өг-бүле чуртталгазындан өөрүшкү албайн баар. Шак ынчаар алдынып турар эр улус Иисустуң үлегерин эдербейн, Иегованы хомудадып турар (Эф. 5:28, 29; 1 Пет. 3:7).

6. Бурган-биле чоок хамаарылгалыг болур дизе, өөнүң ишти чүнү канчаар ужурлуг?

⁶ Өг-бүле баштыңы өг-бүлезиниң Бурган-биле харылзаазын быжыктырар, сагыш-сеткил хереглелдерин болгаш материалдыг талазы-биле хандырар харыысалгалыг деп эрткен статьядан көрген бис (1 Тим. 5:8). Ынчалза-даа өөнүң ишти боду Библияны хүннүң-не номчуп, ооң дугайында ханы боданып, мөргүүр дээш үени үндүрер ужурлуг. Ынчалза-даа ол кылыр ажылдың хөйүнге үем-даа, күжүм-даа чок деп боданып болур. Ынчалза-даа Иегова кижи бүрүзүн Ооң-биле чоок хамаарылгалыг болурун күзеп турар (Аж.-ч. 17:27).

7. Чүнүң ачызында башкарылга дүрүмүн сагыыры кадайынга белен боор?

⁷ Кадайы тергиин эвес ашаанга чагыртыр дээш, хөй күжениишкиннерни үндүрер апаар. Бир эвес ол ашаанга чагыртырын Иегова чүге негеп турарын эки билип, ону хүлээп алыр болза, аңаа башкарылга дүрүмүн сагыыры белен боор.

8. Эфесчилерге 5:22—24-тен алырга, кадайы ашаанга чүге чагыртыр ужурлуг?

⁸ Номчуптуңар: Эфесчилерге 5:22—24. Иегова херээжен улуска ынак болгаш база оларга-ла эки болзун дээш, ашактарынга чагыртырын дилеп турар. Мерген угаанныг херээжен кижи ону билип, дээрде Адазынга бүзүреп турар (Ы. х. к. 6:24; 1 Ин. 5:3).

9. Кадайы ашаанга чагыртыр болза, ол чүүл өг-бүлезинге кандыг салдарлыг боор?

 ⁹ Амгы үениң ниитилели херээжен улуска бир-ле кижиге чагыртыры дээрге дорамчылал-дыр деп чугаалап, Бурганның хоойлуларын сагывас кылдыр ыдалап турар. Ындыг үзел-бодалды тарадып чоруур улус бистиң ынакшылдыг Адавысты көңгүс билбес. Иегова уругларынга оларны куду көрүптер хире даалга кажан-даа бербес. Угбавыс ашаанга чагыртыр болза, ооң өг-бүлезинге амыр-тайбың турар (Ыд. ыр. 118:165). Ынчан ооң ашаанга-даа, ажы-төлүнге-даа, бодунга-даа эки боор.

10. Карол угбавыстың чижээнден чүнү өөренип ап болур бис?

¹⁰ Тергиин эвес ашаанга чагыртып тургаш, херээжен кижи башкарылга дүрүмүнүң Тургузукчузу Иеговага ынакшылды болгаш хүндүткелди көргүзүп турар. Мурнуу Америкадан Карол дээр угбавыс мынча дээн: «Мээң ашаам частырыгларны дөмей-ле кылыр деп билир мен. Ол частырыгларга хамаарылгамдан Иегова-биле найыралымны кайы хире үнелеп турарым көскү. Иегованың сеткилин өөртүр дээш, ашаамның эрге-чагыргазын хүндүлээрин кызар-дыр мен».

11. Аниске ашаан өршээринге чүү дузалап турар база оон чүнү өөренип ап болур бис?

¹¹ Ашаа кадайының сагыш-сеткилин болгаш минниишкиннерин херекке албас болза, аңаа чагыртыры болгаш ону хүндүлээри берге боор. Ындыг байдалга таварышкан Анис дээр угбавыс мынча дээн: «Бис шупту чазыптар бис, ынчангаш хомудаарынче далашпас чордум. Иегова бисти элбээ-биле өршээп турар боорга, мен база шак ынчаар кылыксаар мен. Ооң ачызында сагыш-сеткилимге оожургалды миннир чордум» (Ыд. ыр. 85:5). Өршээп билир херээжен кижиге ашаанга чагыртыры берге эвес.

12. Библиядан кандыг чижектерни тып ап болур?

¹² Чамдык кижилер өскелерге кошкак улус чагыртыр дээр. Ынчалза-даа ол шын бе? Библияда өскелерге чагыртып чораан,  быжыг тура-соруктуг улустуң чижектери хөй. Оларның аразында Иисус, Авигея болгаш Мария бар. Оларның чижээнден чүнү өөренип ап болур бис?

13. Иисус Иеговага чүге чагыртып турар? Тайылбырлаптыңар.

¹³ Иисус Иеговага чүге чагыртып турар? Шоолуг угаанныг эвес болгаш бе? Чок. Иисустуң өөредиглеринден алырга, ол тергиин дээн угаанныг турган деп көскү (Ин. 7:45, 46). Иегова Иисустуң кайгамчык салым-чаяанын үнелээр болгаш, Октаргайны чаяарда, ону дузалаштырып алган (У. ч. 8:30; Евр. 1:2—4). Иисус дирлип келген соонда, Иегова аңаа «дээрге база черге бүгү эрге-чагырганы берген» (Мф. 28:18). Иисус чеже-даа кайгамчык салым-чаяанныг болза, Адазынга ынак болгаш, Оон сүмени айтырар турган (Ин. 14:31).

14. Эр улус чүнү өөренип ап болур: а) Иегованың чижээнден? б) Чугаалар 31-ги эгеде бижээн бүдүштүг херээжен кижиниң чижээнден?

¹⁴ Өөнүң ээзинге үлегер. Иегова кадайларын ашактарынга чагыртыр кылдыр күзеп турар. Ол дээрге херээжен улусту эр улустан куду байдалда дивээни ол. Иисус-биле дээрге чагырар улустуң аразында херээжен улус база бар (Гал. 3:26—29). Иегова Оглунга бүзүрээр болгаш, аңаа тускай эргени берген. Шак ынчаар мерген угаанныг эр кижи база кадайы-биле эргезин үлежир боор. Бурганның Сөзүнде бүдүштүг херээжен кижи бажың ажылын болгаш садыг-саарылганы чорудуп турар деп бижээн. (Номчуптуңар: Чугаалар 31:15, 16, 18.) Ашактары кадайларынга чалчалар дег хамаарылгалыг болбас ужурлуг. Ол кадайынга бүзүреп, ооң үзел-бодалын дыңнаар. (Номчуптуңар: Чугаалар 31:11, 26, 27.) Ынчан кадайы ашаанга күзелдии-биле чагыртыр.

15. Иисустуң чижээнден херээжен улус чүнү өөренип ап болур?

¹⁵ Өөнүң иштинге үлегер. Иисус хөй ажыл-херектерни чедиишкинниг күүсеткен-даа болза, Иеговага чагыртырын дорамчылалдыг деп бодавайн турган (1 Кор. 15:28; Флп. 2:5, 6). Ооң-биле дөмей, Иисустан чижекти ап чоруур херээжен кижи ашаанга чагыртырын дорамчылалдыг деп санавас. Ол бир дугаарында Иегованы хүндүлеп, Аңаа ынак болгаш, ашаанга чагыртып чоруур.

16. 1 Хааннар 25:3, 23—28-тен алырга, Авигея кандыг байдалга таварышканыл? (Журналдың даштында чурукту көрүңер.)

¹⁶ Авигея бодун бодаар, өрү көрдүнер, четтиргенин илеретпес Навал деп кижи-биле чурттап чораан. Ынчалза-даа ол ооң-биле чарлырын бодавайн турган. Чижээ, Давидтиң шерии Навалды өлүрер деп баарга, Авигея «мээң херээм эвес-тир» дээш киришпейн барып болур турган. Ынчалза-даа ол ашаан болгаш чоок улузун камгалап алыр дээш, 400 чепсегленген шеригге уткуштур үнүпкен. Давид-биле хүндүткелдиг чугаалажырынга Авигеяга кайы хире эрес-дидим чорук херек турганыл. Безин ол ашааның буруузун бодунче чая каапкан. (Номчуптуңар: 1 Хааннар 25:3, 23—28.) Давид Иегова ону шыңгыы частырыгны кылбайн, угаан киир сургаар кылдыр Авигеяны чорудупкан деп билип каан.

17. Давид биле Авигеяның чижээнден эр улус чүнү өөренип ап болур?

¹⁷ Өөнүң ээзинге үлегер. Авигея мерген угаанныг чораан. Давид харын-даа ооң чугаазын дыңнааш, хан төгүүшкүнүнге буруулуг болбаан. Шак ынчалдыр база мерген угаанныг өөнүң ээзи шиитпир хүлээр мурнунда кадайының үзел-бодалын кичээнгейлиг дыңнаар болза эки. Ынчаар ол артык частырыгларны кылбас.

18. Авигеяның чижээнден херээжен улус чүнү өөренип ап болур?

 ¹⁸ Өөнүң иштинге үлегер. Иеговага ынак херээжен кижи ооң ашаа Бурганга бараалгавайн-даа турар болза азы ооң бүзүрели кошкай берген-даа болза, өг-бүлезин кадагалаар дээш кызып чоруур. Ол, Авигея дег, ашаандан чарлырын бодавас. Ол ашаан хүндүлеп, аңаа чагыртып, ашаа Иегованы билип алыр кылдыр кызар (1 Пет. 3:1, 2). Ашаа чеже-даа ооң күжениишкиннерин херекке албас болза, Иегова ооң бараалгалын үнелеп турар деп, ол билир.

19. Кандыг байдалдарда кадайы ашаан дыңнавайн барып болур?

¹⁹ Ашаа библейжи хоойлу-дүрүмнерни үрээрин негээр болза, угбавыс ону дыңнавайн барып болур. Чижээ, Бурганга бүзүревес ашаа ону Иегованың сеткилинге таарымча чок ажылды кылырын, оорланырын азы мегелээрин дилээр болза, угбавыс чүге ону кылбазын эптиг-чөптүү-биле тайылбырлап бээр болза эки. Шупту христианнар, оларның санында өглүг-баштыг угбаларывыс, бир дугаарында Иеговага чагыртыр ужурлуг (Аж.-ч. 5:29).

20. Мария Иегова-биле чоок хамаарылгалыг турган деп чүге чугаалап болур бис?

²⁰ Мария Иегова-биле чоок харылзаалыг турган. Иоанн Медеглекчиниң авазы Елисавета-биле чугаалажып тургаш, Мария Бижилгени 20 ажыг катап ажыглаан. Моон алырга, ол Бижилгелерни дыка эки билир турган (Лк. 1:46—55). Мария Иосиф-биле дүгдежип алгаш турда, Иегованың төлээзи Иосифке эвес, а Марияга келгеш, ону Бурганның Оглунуң авазы болурун чугаалаан (Лк. 1:26—33). Иегова Марияны эки билир болгаш, ол Ооң Оглун ынакшылдыы-биле кижизидип каар деп бүзүреп турган. Иисус дирлип келгеш, дээрже үне бээрге безин, Мария Иегова-биле чоок харылзааны чидирбээн (Аж.-ч. 1:14).

21. Марияның чижээнден эр улус чүнү өөренип ап болур?

²¹ Өөнүң ээзинге үлегер. Кадайы Библияны эки билир болза, мерген угаанныг өг-бүлениң баштыңы өөрүүр. Ол дээш бодун  ол чөгенчиг кылдыр санавас. Библейжи дүрүмнерни эки билир херээжен кижи өг-бүлениң ёзулуг деткимчези боор деп, ашаа билир. Кадайының билии чеже-даа хөй болза, өг-бүле мөгейиишкини биле Бурганга бараалгал дээш ашаа харыысалгалыг боор ужурлуг (Эф. 6:4).

22. Марияның чижээнден херээжен улус чүнү өөренип ап болур?

²² Өөнүң иштинге үлегер. Өг-бүлениң Бурган-биле чоок харылзаалыг болурунга ашаа харыысалгалыг деп кадайы билир-даа болза, ол боду Бурган-биле чоок харылзаазын сайзырадыр ужурлуг (Гал. 6:5). Ол Библияны хууда шинчилеп, ооң дугайында ханы боданыр дээш үени аңгылаар болза эки. Ынчаар ол Иеговага ынакшылды болгаш хүндүткелди сайзырадып, ашаанга күзелдии-биле чагыртыр.

23. Кадайы ашаанга чагыртыр болза, ол шупту улуска кандыг ажык-дузалыг боор?

²³ Бурганның тургузуп кааны башкарылга дүрүмүн сагывас улуска бодаарга, Бурганга ынак база ашаанга чагыртып чоруур херээжен кижиниң өг-бүлези аас-кежиктиг боор. Олар аныяк өскеннерге чараш чижекти көргүзүп, чүгле өг-бүлезинге эвес, а чыышка база чылыг-чымчак байдалды тургузуп турар (Тит. 2:3—5). Амгы үеде Бурганның бараалгакчыларының хөй кезии — херээжен улус (Ыд. ыр. 67:12). Бурган чыышта эр-даа, херээжен-даа улуска тускай рольдарны берген. Дараазында статьяга кижи бүрүзү ону канчаар күүседип болурун сайгарар бис.