ӨӨРЕНИР СТАТЬЯ 7
ЫРЫ 51 Бурганга чуртталгавыс бараалгаткан бис!
Назорейлерден чүү чүвеге өөренип алыр бис?
«Назорей... хуусааның дургузунда ол кижи [Иегованың] мурнунга ыдыктыг» (САН. 6:8).
КОЛ БОДАЛ
Иеговага боттарывысты хайыралавайн, эрес-дидим бараалгаарынга назорейлерниң чижээ бисти канчаар өөредир?
1. Иегованың бараалгакчылары төөгү дургузунда кандыг хөөннү илередип чоруур?
ИЕГОВА-БИЛЕ хамаарылгаңарны үнелээриңер чигзиниг чок. Бурунгу үеден бээр, Иеговага силер дег чүрээниң ханызындан ынак чораан улус база турган (Ыд. ыр. 103:33, 34). Олар боттарын бодавайн, Бурганны бирги черге салып чорааннар. Назорейлерни база оларга хамаарыштырып болур. Кымнарыл ол? Оларның чижээ бисти чүү чүвеге өөредип турар?
2. а) Назорейлер дээрге кымнарыл? (Саннар 6:1, 2). б) Чамдык израильчилер чүге назорей болур даңгырак берип турган?
2 «Назорей» деп сөс «аңгылаттынган; бараалгаттынган» дээн уткалыг еврей сөстен укталган. Ол сөс Иеговага тускай кылдыр бараалгаар дээн чүткүлдүг израильчилерни көргүскен. Кезек үе дургузунда назорей бооп бараалгаар дээн эр азы херээжен кижиге Моисейниң хоойлузу Иеговага онза даңгырак бээрин чөпшээреп турган a. (Номчуптуңар: Саннар 6:1, 2.) Ындыг даңгырак азы аазаашкын берген кижи ону ыяап сагыыр ужурлуг, а өске израильчилерниң ону кылыры албан эвес. Ынчаарга чүге чамдык улус назорей болуксаар турган? Израильчи кижи Иеговага сеткилинден ханы ынак база ооң бүгү белектери дээш четтиргенин илередип, ол даңгыракты берип турганы чадапчок (Ы. х. к. 6:5; 16:17).
3. Бистиң үевисте Бурганның бараалгакчылары назорейлерге чүзү-биле дөмей?
3 Моисейниң хоойлузун «Христостуң айыткан чүүлү» солуптарга, назорейлерниң үези төнген (Гал. 6:2; Рим. 10:4). Ынчалза-даа назорейлер ышкаш, Иегованың бараалгакчылары бүгү-ле чүлдү-чүрээ-биле, чуртталгазы-биле, угаан-сарыылы-биле болгаш күжү-биле бараалгаарын аажок күзээр (Мк. 12:30). Иеговага чуртталгавыс бараалгаткаш, ону кылырын аазап турар бис. Бурганның күзел соруун күүседиринге берген даңгыраавыс бодун хайыралавазын илередип турар. Назорейлерниң үлегерин шинчилээш, чуртталгавысты бараалгаткан болганывыста, үнелиг кичээлдерни билип алыр бис (Мф. 16:24) b. Чамдык чижектерни көрээлиңер.
ЧИДИРИГЛЕРГЕ БЕЛЕН БОЛУҢАР
4. Саннар 6:3, 4-тен алырга, назорейлерге кандыг негелде турган?
4 Номчуптуңар: Саннар 6:3, 4. Назорейлер араганы база виноградтан кылган суксунну ишпес ужурлуг. Ооң каттарын-даа, кадырган изюмун-даа чивес. Өске улус ону хостуг ижип-чип болур, чүге дизе ында шын эвес чүүл чок. Кызыл арага дээрге Иегованың кижилерге берген белектериниң бирээзи. Библия ону «кижиниң сеткил-хөңнүн хөгледир» белек дээн (Ыд. ыр. 103:14, 15). Ол аъш-чем кижини хөгледип болур-даа болза, назорейлер оон эки тура-биле ойталап турган c.
А силер назорейлер ышкаш чамдык чүүлдерден ойталаарынга белен силер бе? (абзацтар 4—6).
5. Мадиан биле Марсел чүден ойталаан база чүге?
5 Бис база Иеговага хөй бараалгаар дээш, бурунгу назорейлер дег, боттарывысты хайыралавайн турар бис. Мадиа́н биле Марсе́ланың чижээн көрээлиңер d. Оларның шупту чүвези чедер, Мадиан эки төлээр ажылдыг база чараш, эптиг бажыңга чурттап турган. Ынчалза-даа олар Иеговага оон-даа хөйнү кылыксааш, чуртталгазын өскертир деп шиитпирлээннер. «Чарыгдалдарывысты чоорту кызырып, бичежек бажыңче көшкеш, машинавысты садыпкан бис» — деп үлешкеннер. Мадиан биле Марсела ону кылыр ужурлуг турган бе? Чок. Олар бараалгалче хөй үени үндүрер дээш ынчаар кылганнар. Ындыг шиитпир оларга аас-кежикти, сеткил ханыышкынын эккелген.
6. Христианнар чамдык чүүлден ойталаарынга чүге белен? (Чурукту база көрүңер.)
6 Амгы үеде христианнар база бараалгалче хөй үени үндүрер дээш боттарын хайыралавайн турар (1 Кор. 9:3—6). Иегова ону бистен негевес. Оон аңгыда, ойталап турар чүүлүвүстү багай деп база чугаалап болбас. Чижээ, чамдык улус күзеп чоруур ажылындан азы хууда бажыңныг болурундан, безин бажыңга азырал амытаннар тударындан ойталаан. Хөй улус амдыызында өгленмес деп, а чамдыктары ажы-төл чок болурун шиитпирлээннер. Өскелери чоок улузундан ырадыр, Чагырга медээчилери чедишпес черлерже көжүп турар. Боттарывысты хайыралавайн, Иеговага эң-не дээре дээн чүүлдү бээринге белен бис. Аңаа бараалгаар дээш кылган улуг-даа, бичии-даа өргүлдериңерни Иегова үнелээр дээрзинге чигзинмеңер (Евр. 6:10).
ӨСКЕ УЛУСТАН ЫЛГАЛЫРЫНГА БЕЛЕН БОЛУҢАР
7. Назорей кижи кандыг бергелерге таваржып турган? (Саннар 6:5). (Чурукту база көрүңер.)
7 Номчуптуңар: Саннар 6:5. Назорейлер баш дүгүн кеспес деп даңгырак бээр турган. Ооң-биле олар Иеговага долузу-биле чагыртырын көргүзер. Үр үеде назорейниң бажының дүгү узаарга улуска көскү апаар. Бир эвес улус ону деткиир болза, аңаа даңгыраан сагыыры белен боор. Ынчалза-даа харааданчыг чүүл, Израильдиң төөгүзүнде назорейлерни хүндүлевейн чораан үелер база турган. Амос медээчиниң үезинде ойталакчы израильчилер даңгыраан үрепсин дээш, «назорейлерге арага сыгап» турган (Ам. 2:11, 12). Чамдыкта назорейлерге бодунуң шыңгыы даңгыраанга бердинген база өскелерден ылгалдыг чурттаарынга ёзулуг дидим чорук херек турган.
Назорейлер улустан ылгалырынга белен турган (абзац 7).
8. Силерге Беньяминниң таварылгазында чүү солун болду?
8 Пөрүк-даа болзувусса, өскелерден ылгалдыг болурунга Иегова биске дузалаар. Норвегиядан 10 харлыг Иегованың Херечизи Бе́ньяминниң таварылгазын көрээлиңер. Ооң школазынга Украинаны деткиир дээш өөреникчилерни чыгган. Олар Украинаның тугунуң өңнери-биле кеттинип алгаш, ыры ырлаар ужурлуг турган. Ол патриотчу ёзулалга киришпес дээш, Беньямин ынаар чоокшулавазын шиитпирлээн. Ынчалза-даа башкызы эскерип кааш: «Бээр кел, кады ырлаар бис. Сени манап тур бис!» — деп ыыткыр кыйгырган. Ол башкызынга чеде бергеш: «Политика-биле харылзаалыг ёзулалга киришпес мен. Дыка хөй Иегованың Херечилери дайыннарга киришпес дээш, безин кара-бажыңда олурар» — деп дидими-биле тайылбырлаан. Ону дыңнааш, башкызы аңаа киришпезин чөпшээрээн. Ынчалза-даа чаңгысклассчылары ооң чүге кады ырлавайн турарын айтырып эгелээн. Беньямин девидээнинден ыглаптар часкан. Ындыг-даа болза, ол башкызынга чугаалаан чүүлүн бүдүн класс мурнунга дидими-биле катаптаан. Ооң соонда Беньямин Иегованың деткимчезин миннип турганын база бүзүрелин камгалап шыдапканын ада-иези-биле үлешкен.
9. Иегованы канчаар өөртүп болур бис?
9 Бурганның күзел-соруун күүседир деп шиитпирлээш, долгандыр улустан ылгалдыг бис. Школага-даа, ажылга-даа Иегованың Херечилери бис деп чугаалаарынга дидим чорук херек. Бо делегейде кижилерниң алдынып турары база хөөнү баксырап бар чыдарындан, биске библейжи дүрүмнер аайы-биле чурттаары, өөрүшкүлүг медээни суртаалдаары берге апарып болур (2 Тим. 1:8; 3:13). Бурганга бараалгавас улустан ылгалырындан кортпайн, кезээде Иегованың чүрээн өөртүрүн утпаалыңар (У. ч. 27:11; Мал. 3:18).
ИЕГОВА ЧУРТТАЛГАҢАРГА БИР ДУГААР ЧЕРДЕ БОЛЗУН
10. Саннар 6:6, 7-де негелде назорейлерге чүге шенелде апарып болур турган?
10 Номчуптуңар: Саннар 6:6, 7. Назорейлер чок апарган улусче чоокшулап болбас турган. Ол ындыг кончуг чидириг эвес ышкаш сагындырар. Ынчалза-даа библейжи үелерде, ылаңгыя чоок төрели чок апаарга, назорей кижиге ол ёзулуг шенелде апаар. Ол үениң орнукшудулга ёзулалы-биле чок апарган кижиниң чанынга турары албан (Ин. 19:39, 40; Аж.-ч. 9:36—40). Назорей кижи аңаа турбас ужурлуг. Кажыыдап тургаш безин, олар быжыг бүзүрелин илередип, даңгыраан сагыыр. Чигзиниг чок, ындыг берге шенелделер үезинде Иегова бердинген бараалгакчыларын быжыктырып турган.
11. Өг-бүле айтырыгларынга христиан кижи канчаар хөөнненип алыр болза эки? (Чурукту база көрүңер.)
11 Христиан даңгыраавыска шыңгыы хамаарылгалыг бис. Ол чүүл кандыг шиитпирлер үндүреринче, өг-бүлениң ажыл-херектерин канчаар кылырынче салдарны чедирип турар. Өг-бүлевистиң хүлээлгелерин күүседирде, чоок улузувустуң күзелдери Иегованың негелделеринден чугула апаарын болдурбас бис (Мф. 10:35—37; 1 Тим. 5:8). Чамдыкта Иегованы өөртүр дээш, чоок кижилеривистиң чөпшээрежип шыдавазы шиитпирлерни үндүрер апаар бис.
Нарын байдалдарда безин Иегованы бирги черге салырынга белен силер бе? (абзац 11). e
12. Александру өг-бүлезинде амыр эвес байдалга канчаар алдынган?
12 Алекса́ндру биле ооң өөнүң ишти Дори́наның таварылгазын көрүптээли. Олар Библияны бир хире чыл өөренгеннер. Дорина кичээлдерин соксаткаш, ашаа база өөренмезин деп күзээн. Ынчалза-даа Александру чымчаа-биле соксатпас мен дээрге, Дорина таарзынмайн, янзы-бүрү аргалар-биле аңаа шаптыктап турган. Кадайының чүге ынчаар алдынып турарын билип алыксаарга-даа түңнел чок болган. Чамдыкта Александруга кадайының хоранныг сөстеринден Библияны өөренмес деп күзел безин тыптып турган. Ындыг-даа болза, ол Иегованы бирги черге салып, кадайынга улуг ынакшылды болгаш хүндүткелди көргүскен. Түңнелинде ооң туруштуунуң ачызында Дорина Библияны катап өөренип, сугга суктуруп алган. (JW.ORG сайтыда «Истина меняет жизнь» деп рубрикада «Александру и Дорина Вэкар. „Любовь долготерпелива и добра“» деп видеону көрүңер.)
13. Иеговага болгаш өг-бүлевиске ынакшылды канчаар илередип болур бис?
13 Өг-бүлени Иегова тургускан болгаш, ону аас-кежиктиг болзун деп күзеп турар (Эф. 3:14, 15). Ынчангаш ёзулуг аас-кежиктиг болурда, Иегованың күзээн чүүлүн кылыры чугула. Чоок улузуңарга ынакшылды болгаш хүндүткелди көргүзүп, сагыш човаңар (Рим. 12:10). Иегованы өөртүр дээш, бодуңарны хайыралавас күжениишкиннериңер хилис барбас дээрзинге чигзинмеңер.
БОТ-БОДУҢАРГА НАЗОРЕЙЛЕРНИҢ ҮЛЕГЕРИН ЭДЕРЕРИНГЕ ДУЗАЛАҢАР
14. Бистиң демкимчевис кымга дыка херек?
14 Иеговага ынак болуп, аңаа бараалгаар дээн улус боттарын хайыралавас. Ону кылыры чамдыкта белен эвес. Ынчангаш деткимче сөстеривис-биле бот-боттарывыска дузалажып болур бис (Иов 16:5). Чыыжыңарда Иеговага хөйнү кылыр дээш чуртталгазын бөдүүнчүткен акы-угбалар бар бе? Чамдыкта берге-даа болза, школага ылгалырындан кортпас дуңмаларывыс дугайында чүнү чугаалап болур? Өг-бүлези удурланырга берге-даа болза, Библия өөренип турар улусту азы Бурганга шынчы акы-угбаларны билир силер бе? Иегова дээш бодун хайыралавас, эрес-дидим улус макталга төлептиг. Оларны деткиир аргаларны эрттирбээлиңер (Флм. 4, 5, 7).
15. Долу бараалгап чоруур акы-угбаларны чамдык улус канчаар деткип турар?
15 Бурганга долу бараалгап турар акы-угбаларга херек кырында дузалажып болур бис (У. ч. 19:17; Евр. 13:16). Шри-Ланкада чурттап чоруур назылай берген угбавыс шак ынчаар кылган. Ол пенсиязынга немээн акшазын, акша талазы-биле бергедежи берген ийи аныяк эгелекчиге дузалашкан. Ынчангаш угбавыс ай санында немелде акшазын телефоннарынче суп алыр кылдыр оларга берип турган. Угбавыстың хөөнү дыка кайгамчык!
16. Назорейлерниң даңгыраандан чүнү билип алдывыс?
16 Эки тура-биле боттарын хайыралавайн чораан назорейлер биске кайгамчыктыг үлегерни арттырган! Оон аңгыда, дээрде Адавыс Иегованы оон-даа эки билип алырынга биске назорейлерниң даңгыраа дузалап турар. Даңгыраавысты күүседир дээш боттарывысты хайыралавайн, сеткиливистен ону өөртүрүн кызып турарывысты ол билир. Аңаа ынакшылды канчаар илередирин шиитпирлээр хүндүнү Иегова биске берген (У. ч. 23:15, 16; Мк. 10:28—30; 1 Ин. 4:19). Бурган өргүлдеривисти эскерер база үнелээр. Ынчангаш Иеговага эң-не дээре чүүлдү күзелдии-биле бээринге хөөнненип, улаштыр бараалгаалыңар!
КАНЧААР ХАРЫЫЛААР СИЛЕР?
-
Назорейлерниң бодун хайыралавазы база дидими чүден көскү?
-
Назорейлерге дөмей болурунга бот-бодувуска канчаар дузалап болур бис?
-
Иегова биске бүзүреп турарын, назорейлерниң даңгыраа канчаар көргүскен?
ЫРЫ 119 Бүзүреливисти кадагалаар ужурлуг бис
a Чамдык назорейлерни Иегова боду шилээн. Колдуунда назорей болур даңгыракты израильчилер эки тура-биле бээр болган. ( «Иегованың шилип алган назорейлери» деп көзенекти көрүңер.)
b Бистиң ном-дептеривисте долу бараалгакчыларны чамдыкта назорейлерге деңнээн. А бо статьяга Иегованың шупту бараалгакчыларын назорейлерге дөмейлеп болурун чугаалажыр бис.
c Назорей болур даңгыракта кандыг-бир ажыл кылыр негелде чок турган.
d JW.ORG сайтыда «Случаи из жизни Свидетелей Иеговы» деп рубрикада «Мы решили упростить свою жизнь» деп статьяны көрүңер.
e ЧУРУКТА. Назорей бажыңының кырындан орнукшудулганы көрүп турар. Дыка ынак чораан өг-бүлезиниң кежигүнү чок апарган. Аазаашкыны дээш, назорей аңаа киржип шыдавас.
