1. 2023 чылдың хуралынга чүнү билип алган бис?

 2023 чылдың хуралы a төөгүлүг болган! Аңаа чамдык библейжи өөредиглерниң ылавылаан чаа билиишкинни база бараалгалга хамаарышкан чарлалдарны чугаалаан. Чижээ, Өндүр улуг Вавилонну узуткаан соонда безин, кижилерге Иегованың чонунга каттыжып кээр арга турар чадавас деп билип алган бис. Оон аңгыда, 2023 чылдың ноябрьдан эгелеп, Чагырганың суртаалчылары тодаргай отчёт дужаавас апарган. Ынчаарга суртаал ажылын эвээжедир дээн бе? Канчап-даа чок!

2. Хүнден хүнче суртаал ажылының чугулазы чүге дам барып турар? (Марк 13:10).

² Үениң төнчүзү кел чыдар болгаш, хүнден хүнче суртаал ажылы дыка чугула апарган. Өөреникчилериниң сөөлгү хүннерде кылыр ажылының дугайында Иисус чүү деп өттүр сөглээнин бодап көрүңер. (Номчуптуңар: Марк 13:10.) Ону Матфей мынчаар дамчыткан: «Өөрүшкүлүг медээни бүгү черге... суртаалдаан турар, ынчан бүгү чүвениң төнчүзү кээр» (Мф. 24:14). Мында Эрликтиң каржы делегейиниң төнчүзүнүң дугайында чугаа чоруп турар. Иегова келир болуушкуннарның «хүнүн база шагын» тургузуп каан (Мф. 24:36; 25:13; Аж.-ч. 1:7). Хүн бүрүде аас-кежиктиг төнчү чоокшулап кел чыдар (Рим. 13:11). Амдыызында суртаалдаар ужурлуг бис.

3. Бисти суртаалдаарынче чүү оттуруп турар?

³ Өөрүшкүлүг медээни суртаалдаарынче бисти чүү оттуруп  турарын боданып көрээлиңер. Чаңгыс сөс-биле чугаалаарга — ынакшыл. Өөрүшкүлүг медээге, кижилерге, а кол-ла чүүл Иеговага болгаш ооң адынга ынакшылывысты суртаалдаарывыс-биле көргүзүп турар бис. Ону тодаргай чугаалажыылы.

ӨӨРҮШКҮЛҮГ МЕДЭЭГЕ ЫНАК БОЛГАШ, СУРТААЛДАП ТУРАР БИС

4. Эки медээ дыңнааш, кижи чүнү миннир?

⁴ Эки медээ дыңнааш, кандыг минниишкинниг болганыңарны сактып келиңер. Төрелиңерниң өпеязы төрүттүнген азы эки ажыл тып алган чадавас силер. Ол медээни чоок улузуңар, эш-өөрүңер-биле четтикпейн үлешкениңер чугаажок. Бурганның Чагыргазының дугайында эң-не дээре өөрүшкүлүг медээни дыңнааш, чүнү миннип турган силер?

5. Бурганның Сөзүнден алыс шынны бир дугаар дыңнап кааш, кандыг минниишкинниг болган силер? (Чурукту база көрүңер.)

⁵ Бурганның Сөзүнден алыс шынны эң-не баштай дыңнаан үеже эглип кээлиңер. Дээрде адавыс биске ынак база бисти өг-бүлезиниң кезии апарзын деп ооң күзелин билип каан бис. Аарышкы биле хилинчек келир үеде турбас деп биске Бурган ажыткан. А оон аңгыда, чаа делегейге дирлип кээр эргим улузувуска ужуражыр идегеливис бар (Мк. 10:29, 30; Ин. 5:28, 29; Рим. 8:38, 39; Ажыд. 21:3, 4). Алыс шын чүрээвисти чылдып турар (Лк. 24:32). Ол билиглерге ынак апарып, ону чугаалавайн барып шыдавас бис! (Деңнеңер: Иеремия 20:9.)

6. Эрнест биле Розаның төөгүзүнде кандыг кичээл бар?

⁶ Бир өг-бүлениң төөгүзүн көрээлиңер. Эрне́ст b 10 харлыг турда ачазы чок апарган. Ачазы өрү дээрде бе азы кайда деп айтырыг ону дүвүредип турган. Өске ажыл-төлдүң ада-иези бар боорга, Эрнест адааргаар турган. Ол хүннүң-не ачазының хөөрүнге дис кырынга мөргүп турган:  «Бурганым дилеп тур мен, ачамның кайдазын билип аарынга дузалажып көрем». 17 хире чыл эрткенде библейжи кичээл сүмелээрге, Эрнест өөрүшкүлүг чөпшээрешкен. Өлген улус ханы уйгуда дег, чүнү-даа билбес, оларны келир үеде диргизиишкин манап турар деп билип алган (Эккл. 9:5, 10; Аж.-ч. 24:15). Ам-на хөй чылдар дургузунда дүвүредип чораан айтырыгларының харыызын тып алгаш, Эрнест дыка магадаан. Библейжи алыс шынга ол дыка ынак турган. Өөнүң ишти Роза аңаа каттыжып, чаа билиглерге база ынак апарган. 1978 чылда олар сугга суктуруп алгаш, ийилээ күжүн харамнанмайн, үнелиг алыс шынны өг-бүлези, эш-өөрү база өске улус-биле үлежип эгелээн. Эрнест биле Розаның ачызында 70 ажыг кижи Иегова-биле таныжып алгаш, сугга суктуруп алган.

7. Библейжи алыс шынга ынакшылывыс дазылданы бээрге, биске салдары кандыг? (Лука 6:45).

⁷ Алыс шынга ынакшыл чүректеривиске дазылданы бээрге, ону чугаалавайн барып шыдавас бис. (Номчуптуңар: Лука 6:45.) «Көрген болгаш дыңнаан чүвевис дугайында ыыттавайн барып шыдавас бис» — дээн бирги векте Иисустуң өөреникчилери-биле чөпшээрежир бис (Аж.-ч. 4:20). Алыс шынга ынакшылывыс күштүг болганда, оон-даа хөй улуска ону чугаалаар күзелдиг бис.

КИЖИЛЕРГЕ ЫНАК БОЛГАШ, СУРТААЛДАП ТУРАР БИС

8. Өөрүшкүлүг медээни улус-биле үлежиринче бисти чүү оттуруп турар? ( «Ынакшыл өөреникчилер белеткээринге дузалаар» деп көзенекти көрүңер.) (Чурукту база көрүңер.)

⁸ Иегова биле ооң Оглу ышкаш, кижилерге ынак бис (У. ч. 8:31; Ин. 3:16). Бурганны билбес, идегели чок улусту дыка кээргээр бис (Эф. 2:12). Олар амыдыралдың бергелеринче дүлнү берген, а бисте оларны камгалаар өөрүшкүлүг медээ бар. Өөрүшкүлүг медээни үлежирде, кандыг-даа арганы ажыглаарынче бисти ынакшыл биле кээргээчел чорук оттуруп турар. Бурганның дугайында билиглер оларга амдан тура аас-кежиктиг апаарынга дузалап болур, чаа делегейге мөңге «алыс шын амыдыралче» идегелди белекке бээр (1 Тим. 6:19).

9. Кижилерге чүнү дыңнадып турар бис база чүге? (Иезекиил 33:7, 8).

⁹ Каржы делегейниң төнчүзү чоокшулаан деп сагындырарынче кижилерге ынакшыл база бисти оттуруп турар. (Номчуптуңар: Иезекиил 33:7, 8.) Бурганга бараалгавас улусту, ооң санында чоок төрелдеривисти чүү манап турарын бодап кээрге, чүрээвис ыстай бээр. Дыка хөй улус «бо делегейни чаяаганындан бээр, амдыгаа чедир кажан-даа  болбаан база моон соңгаар кажан-даа болбас коргунчуг хилинчек... болур» деп билбес (Мф. 24:21). Иегованың шииткелиниң үезинде: баштай меге шажыннарны, а оон бүгү каржы делегейни Армагеддонга узуткаарын олар билип алган болза деп күзээр бис (Ажыд. 16:14, 16; 17:16, 17; 19:11, 19, 20). Бо сагындырыгны оон-даа хөй улус дыңнааш, арыг чүдүлгеже ам каттыжып келзин деп мөргүп турар бис. Амдыызында бисти дыңнавас улуска, ооң санында эргим чоок улузувуска хамаарыштыр чүнү чугаалап болур?

10. Удавас келир болуушкуннар дугайында улуска дыңнадыры чүге дыка чугула?

¹⁰ Эрткен статьядан алырга, меге чүдүлгени узуткап эгелээрге, Бурганга бүзүрей бээр улуска камгаланыр арганы Иегова бээр чадавас. Бир эвес ындыг болза, амдан эгелеп өндүр улуг Вавилонну чүү манап турарын улуска дамчыдары дыка чугула. Боданып көрүңер: ам чугаалаан чүүлүвүстү кижилер келир үеде сактып кээп болур. (Деңнеңер: Иезекиил 33:33.) Бистен дыңнаан сагындырыгны олар сактып келгеш, хөлү эртпээнде арыг чүдүлгеге каттыжып кээр чадавас. Чижээ, Филиппы хоорайга таңныылдар даргазы чүгле «күштүг чер шимчээшкини эгелээн» соонда Иисуска бүзүрей берген (Аж.-ч. 16:25—34). Өндүр улуг Вавилоннуң хенертен узуткаашкыны чамдык улусту силгиптер. Амгы үеде өөрүшкүлүг медээни хүлээвейн турар улустуң келир үеде хамаарылгазы өскерлип болур.

ИЕГОВАГА БАЗА ООҢ АДЫНГА ЫНАК БОЛГАШ, СУРТААЛДАП ТУРАР БИС

11. Иегованы канчаар алгап-мактап, аңаа күжүвүстү берип турар бис? (Ажыдыышкын 4:11). (Чурукту база көрүңер.)

¹¹ Өөрүшкүлүг медээни суртаалдап турар эң кол чылдагаанывыс — Иеговага база ооң ыдыктыг адынга ынакшыл. Биске суртаал ажылы — ынак Адавысты алдаржыдар арга-дыр. (Номчуптуңар: Ажыдыышкын 4:11.) «Бистиң күчү-күштүг Бурганывыс Иегова, алдар-атты, мактал-хүндүнү алыр эргелиг сен» деп сөстер-биле бүгү сеткиливистен чөпшээрежир бис (Ажыд. 4:11, Чаа делегей). Иегова Бурган бисти база бүгү чүвени чаяаган деп бүзүрелдиг бадыткалдарны өске улуска чугаалап, ону алгап-мактаар бис. Байдалывыс аайы-биле суртаал ажылынга үевисти, бүгү бар чүүлүвүстү долузу-биле ажыглавышаан, Иеговага күжүвүстү бээр бис (Мф. 6:33; Лк. 13:24; Кол. 3:23). Бурганывыстың дугайында чугаалаарынга ынак болгаш, ол бүгү  чүүлдү кылып турар бис. Ооң адын, адының утказын база улуска таныштырар харыысалгавысты миннип турар бис. Чүге?

12. Бараалгалывыс-биле Иегованың адын канчаар алдаржыдып турар бис?

¹² Иеговага ынакшылывыс бисти ооң адын алдаржыдарынче оттуруп турар (Мф. 6:9). Эрликтиң бужар мегезинден Бурганның адын арыглаар күзелдиг бис (Э. д. 3:1—5; Иов 2:4; Ин. 8:44). Бисти дыңнаарынга белен улуска Бурганның дугайында алыс шынны чугаалап, аңаа болчуп турар бис. Кижилер бистиң ышкаш билиглерлиг болзун деп күзээр бис. Бурганның дээди шынары — ынакшыл. Ооң чөптүг, шынныг чагыргазы удавас бүгү хилинчекти узуткааш, кижи төрелгетенге тайбыңны, аас-кежикти эккээр (Ыд. ыр. 36:10, 11, 29; 1 Ин. 4:8). Иегованың ат-алдарын камгалап, ону алдаржыдар бис. Иегованың Херечилери деп адывыска дүүштүр чурттап чоруур бис.

13. Иегованың Херечилери болганывыска чүге чоргаарланыр бис? (Исайя 43:10—12).

¹³ Иегова бисти бодунуң херечилери кылдыр шилип алган. (Номчуптуңар: Исайя 43:10—12.) Удуртукчу чөвүлелдиң бир чагаазынга мынчаар бижээн: «Иегованың Херечилери деп адаттырары — кижиге эң-не дээди алдар» c. Чүге ынча деп болур? Чижектен көрээлиңер. Силерни кем-херек үүлгеткен деп буруудаткан дижик. Судка буруу чогуңарны бадыткаар херечи херек. Чугаажок, эки таныырыңар, сөстери бүзүрелдиг, эки ат-алдарлыг херечини шилип алыр болгай силер. Бодунуң Херечилери кылдыр шилип алгаш, Иегова бисти эки билирин база ону чаңгыс алыс шын Бурган  деп суртаалдаарынга төлептиивисти көргүскен. Ооң Херечилери боору биске дыка улуг алдар-хүндү! Ынчангаш арга тыптып кээрге-ле, Бурганның адын бүгү-ле меге буруудадыышкындан арыглап, алдаржыдып турар бис. Ынчалдыр Иегованың Херечилери деп эдилеп чоруур адывысты чоргаарал-биле бадыткаар бис! (Ыд. ыр. 82:19; Рим. 10:13—15).

ТӨНЧҮЗҮНГЕ ЧЕДИР СУРТААЛДААР БИС

14. Чоокку келир үеде чүнү манап турар бис?

¹⁴ Чоокку келир үеде чүнү манап болур бис? Суртаал ажылынга күжениишкиннеривисти Иегова йөрээр база коргунчуг хилинчектиң бетинде алыс шынны хөй улус хүлээп алыр деп идегээр бис. Өөрүнчүг чүүл, кижи төрелгетенниң төөгүзүнде эң-не дүмбей үеде — коргунчуг хилинчек үезинде безин — кижилер өлүп бар чыдар Эрликтиң делегейинден хосталыр аргалыг болур чадавас. Олар Иегованы алдаржыдар дээш, биске катчып кээр (Аж.-ч. 13:48).

15, 16. Кандыг ажылды кажанга чедир кылыр бис?

¹⁵ Ам дээрезинде ажылывыс эмгежок. Бүгү чер-делегейге Бурганның Чагыргазының дугайында өөрүшкүлүг медээ-биле үлежип, кажан-даа катаптаттынмас ажылды кылып турар бис. Бо каржы делегейниң төнчүзү дүргени-биле чоокшулап келгенин улуска сагындырып турар бис. Шииткел үези кээрге, медээвис Иеговадан деп, олар билип каар (Иез. 38:23).

¹⁶ Бо статья бисти чүнү кылырынче оттуруп турар? Өөрүшкүлүг медээге, кижилерге база эң-не кол чүүл Иеговага болгаш ооң адынга ынакшылга башкартып хөделиилиңер. Ынчан Иегованың: «Ажыл төнген!» — деп чарлаарынга чедир бүгү сеткиливистен, чүткүлдүү-биле суртаалдаар бис.