1. 1935 чылда шуулганга дыңнаан илеткел бир аныяк оолга кайы хире улуг салдарны чедиргенил?

БИР аныяк эр кижи 1926 чылда, 18 харлыында сугга суктуруп алган. Ооң ада-иези болгаш кады төрээн акы-угбалары Библияның Шинчилекчилери турган (ол үеде Иегованың Херечилерин ынчаар адаар турган). Чыл санында Иисус Христостуң өлүмүнүң Сактыышкын кежээзинде ол, Библияның шупту Шинчилекчилери дег, хлеб биле араганы амзап турган. Ынчалза-даа 1935 чылда Вашингтонга болган шуулганга ол Рутерфорд акывыстың «Мөөң чон» деп аттыг илеткелди дыңнаан соонда, ооң чуртталгазы бүрүнү-биле өскерилген. Ол шуулганга чүнүң дугайында чугаалааныл?

2. Рутефорд акывыс кандыг чугула алыс шынның дугайында чугаалааныл?

² Ажыдыышкын 7:9-та «мөөң чоннуң» санынче кым кирерин Рутерфорд бодунуң илеткелинге тайылбырлаан. Ол шуулганның мурнунда алыс шынның билиишкини мындыг турган: «мөөң чонга» хамааржыр улус, 144 000-га бодаарга, ындыг кончуг шынчы эвес-даа болза, дөмей-ле дээрже баар. Ынчалза-даа Рутерфорд Библияга даянып, «мөөң чон» — «коргунчуг хилинчекти» ажып эрткеш, черге мөңге чурттаар «өске хойлар» * деп тода көргүскен (Ажыд.  7:14). Иисус мынча дээн: «Менде бо кодандан эвес, өске хойлар база бар — Мен оларны база бөлүп эккээр ужурлуг мен. Олар база-ла Мээң үнүмнү дыңнаар, ынчангаш чаңгыс кадарчылыг чаңгыс кодан турар!» (Ин. 10:16). Иисус черге кезээ-мөңгеде чурттаар идегелдиг Иегованың Херечилерин хойларга деңнээн (Мф. 25:31—33, 46). Алыс шынның чаа билиишкини Иегованың хөй бараалгакчыларының чуртталгазын, ооң санында чугаалашканывыс аныяк акывыстың чуртталгазын, канчаар өскерткенин көрүптээлиңер (Ыд. ыр. 96:11; У. ч. 4:18).

3, 4. 1935 чылдың шуулганынга муң-муң акы-угбалар кандыг түңнелге келген база чүге?

³ Джозеф Рутерфорд: «Черге мөңге чурттаар идегелдиг улустуң шуптузун туруп кээрин дилеп тур мен!» — дээн соонда, 20 муң кижиниң хөй кезии туруп келген. Оон ол: «Көрүңер даан! Бо дээрге мөөң чон-дур!» — деп ыыткыр чугаалаптарга, залда олурган улус өөрүшкүлүг алгыржы бергеннер. Туруп келген улус дээрге чуртталгага шилиттинмээнин база Бурган оларны ыдыктыг сүлдези-биле шилип чагбаан деп билип кааннар. Дараазында хүн 840 чаа Иегованың Херечилери сугга суктуруп алган. Оларның хөй кезии «өске хойларга» хамааржып турган.

⁴ «Мөөң чон» деп илеткелдиң соонда үстүнде чугаалашканывыс аныяк акывыс болгаш өске-даа муң-муң христианнар Сактыышкын кежээзинге хлеб биле араганы амзавайн барган. Бир биче сеткилдиг акывыс Иегованың бараалгакчыларының минниишкиннерин илередип, мынча дээн: «1935 чылдың Сактыышкын кежээзинде сөөлгү катап хлеб биле араганы амзаан мен. Чүге дээрге Иегова меңээ дээрге чурттаар идегелди бербээн деп билип каан мен. Ол меңээ бүгү черни сесерлик кылдыр болбаазырадып, черге мөңге чурттаар идегелди сөңнээн» (Рим. 8:16, 17; 2 Кор. 1:21, 22). Оон бээр «мөөң чоннуң» саны көвүдеп-ле орар. Олар черге артып калган * чагдырган христианнар-биле эгин кожа ажылдажып турарлар.

5. Сактыышкын кежээзинге хлеб биле араганы амзавайн барган улустарга Иегова кандыг хамаарылгалыгыл?

⁵ 1935 чылдың соонда Сактыышкын кежээзинге хлеб биле араганы амзавайн барган улустарга Иегова кандыг хамаарылгалыг? Сактыышкын кежээзинге киржип чораан, ынчалза-даа бодун ыдыктыг сүлде-биле чагдырбаан деп билип каан бараалгакчыларының дугайында Иегова чүнү бодап турар? (1 Кор. 11:28). Келир үеге хамаарыштыр олар идегелин шын эвес билип ап турган. Ынчалза-даа олар боттарының частырыын миннингеш, Сактыышкын кежээзинде хлеб биле араганы амзавайн баргаш, Иеговага улаштыр шынчы бараалгаар болза, «өске хойларның» санынче кирер деп бүзүреп болур. Олар Сактыышкын кежээзиниң киржикчилери эвес-даа болза, дөмей-ле ынаар кээп турар. Чүге дизе олар Иегова биле Иисустуң көргүскен ынакшылы дээш, оларга өөрүп четтирип чоруур.

6. Иисус дээрниң төлээлеринге чүнү дужааганыл?

⁶ Коргунчуг хилинчек чоокшулап келген үеде чурттап турар бис. Ынчангаш чагдырган христианнарның болгаш мөөң чоннуң дугайында бижээн Ажыдыышкынның  7 дугаар эгези бисти сорук киирип болур. Ында Иисус дээрниң төлээлеринге узуткаашкын хадын быжыг тударын дужааган. Чагдырган христианнар долузу-биле демдеглетпээн шаанда, азы олар долузу-биле Иеговага бердингенин бадыткаваан шаанда, олар ол хаттарны салбас ужурлуг (Ажыд. 7:1—4). Ынчан Иегова чагдырган акы-угбаларны шынчы чоруу дээш шаңнаар: олар Иисус-биле кады дээрге хааннар болгаш ыдыктыг бараалгакчылар кылдыр чагырар (Ажыд. 20:6). Кажан 144 000 чагдырган христианнар шаңналын алырга, Иегова, Иисус болгаш дээрниң төлээлери аажок өөрүүрлер.

7. Ажыдыышкын 7:9, 10-дан алырга, Иоанн оон аңгыда кандыг көстүүшкүннү көргенил? (Журналдың даштында чурукту көрүңер.)

⁷ 144 000 хааннар болгаш бараалгакчыларның дугайында бижээн соонда, Армагеддонну ажып эрткен «мөөң чоннуң» дугайында кайгамчык чүүлдү Иоанн чугаалаан. Ол бөлүкке хамааржыр улустуң саны бирги бөлүктен элээн көвей. Ынчангаш Иоанн ол бөлүктүң дугайында «кымның-даа санап күш четпези мөөң чон» деп бижээн. (Номчуптуңар: Ажыдыышкын 7:9, 10.) Олар «ак хептерлиг» турган. Ол дээрге-ле, олар Эрликтиң делегейиниң багынга борашпайн, Бурганга болгаш Иисуска шынчы артып калган (Иак. 1:27). Олар ыыткыр үн-биле: «Камгалал дүжүлгеде саадаан Бурганывыстан болгаш Хурагандан кээр!» — деп алгыржып турганнар. Мөөң чон холдарында пальма ыяш будуктарын тудуп алганы дээрге-ле, Иегованың томуйлап каан Хаанны, Иисусту, хүлээп ап турары ол-дур. (Деңнеңер: Иоанн 12:12, 13.)

8. Ажыдыышкын 7:11, 12-де Иегованың дээрде өг-бүлезинге хамаарыштыр чүү дээнил?

⁸ Номчуптуңар: Ажыдыышкын 7:11, 12. Иоанн чүнү көргенил? Дээрде Иегованың өг-бүлези мөөң чонну көргеш, өөрүп, Бурганны алдаржыдып турган. Иегова болгаш ооң шынчы дээрниң төлээлери удавас мөөң чоннуң Армагеддонну ажып эртип ап турарын көргеш, база аажок өөрүүр.

9. Ажыдыышкын 7:13—15-тен алырга, мөөң чон чүнү кылып турарыл?

⁹ Номчуптуңар: Ажыдыышкын 7:13—15. Мөөң чондан улус «боттарының хевин Хураганның ханынга чуггаш, агартыр арыглап алган» деп, Иоанн бижээн. Ол дээрге-ле олар арыг арыг-нүүрлүг база Иегова оларны чөптүг-шынныг деп санап турар (Иса. 1:18). Иоанн көстүүшкүнүнге чуртталгазын Бурганга бараалгаткан, сугга суктурган христианнарны көрген. Олар Иисустуң өргүлүнге быжыг бүзүреп, Иегова-биле чоок хамаарылганы сайзырадып алган (Ин. 3:36; 1 Пет. 3:21). Ынчангаш Бурган оларга Бодунуң дүжүлгезиниң баарында туруп алгаш, «дүн-хүн дивейн», черге бараан болурун чөпшээреп турар. Бо хүн оларга Бурганның Чагыргазындан артык чугула чүүл чок. Ынчангаш олар суртаал ажылынче хөй үлүг-хуузун киирип турар (Мф. 6:33; 24:14; 28:19, 20).

10. Мөөң чонга хамааржыр улус чүү чүвеге быжыг бүзүрелдиг база олар кандыг өттүр билген медеглелдиң күүсеттинерин көөр?

¹⁰ Коргунчуг хилинчекти ажып эрткен мөөң чон Иегованың олар дээш улаштыр сагыш човаар дээрзинге бичии-даа чигзинмес боор. Ынчангаш Иоанн: «Бурганның турар чери ам улус аразында доктаап турупкан-дыр» деп бижээн. Ынчан олар бо өттүр билген медеглелдиң канчаар күүсеттинип турарын ийи караа-биле көрүп каар: «Бурган кижилерниң караанда чаш бүрүзүн чодуп бээр. Моон соңгаар өлүм-даа, ыы-сыы-даа, ажыг-шүжүг-даа, аарышкы-даа турбас» (Ажыд. 21:3, 4).

11, 12. а) Ажыдыышкын 7:16, 17-ден алырга, мөөң чонну келир үеде кандыг йөрээлдер манап турарыл? б) «Өске хойларны» Сактыышкын кежээзинче кээринче чүү оттуруп турар?

 ¹¹ Номчуптуңар: Ажыдыышкын 7:16, 17. Делегейде берге экономиктиг байдалдың база дайыннарның уржуундан Бурганның чамдык бараалгакчылары аштап-суксап чоруур. А оларның чамдыктары бүзүрели дээш кара-бажыңда олурар. Ынчалза-даа олар аас-кежиктиг, чүге дизе бо каржы делегейниң төнчүзүн ажып эртип, моон соңгаар дорт-даа, доора-даа уткалыг аштап-суксавас бис деп билир. Иоанн: «Оя чиир изиг-даа оларны өрттендир чиртпес» — деп бижээн. Ол дээрге-ле, Иегова кажан Эрликтиң каржы делегейин узуткап турда, Ооң бараалгакчыларының чаңгызы-даа когаравас дээни ол. База коргунчуг хилинчекти эртип алган улусту Иисус мөңге амыдырал хайырлаар суг бажынче алгаш баар. Черге чурттап чораан миллиард-миллиард кижилерге бодаарга, мөөң чон кажанда-даа өлбес боор. Кайы хире кайгамчыктыг идегелдиг-дир! (Ин. 11:26).

¹² «Өске хойлар» Иисус биле Иеговага ол кайгамчык идегел дээш өөрүп четтиргенин илередип чоруур. Дээрге чурттаар кылдыр шилиттинмээн-даа болза, олар дөмей-ле Иеговага эргим болгаш үнелиг. Чагдырган христианнар-даа, «өске хойлар-даа» Бурган биле Иисусту алгап-мактап болур. Ону кылыр аргаларның бирээзи — Сактыышкын кежээзинче баары-дыр.

13, 14. Иисус Христостуң өлгенин демдеглээр Сактыышкын кежээзинче чагдырган христианнар-даа, «өске хойлар-даа» чүге кээр ужурлуг?

¹³ Сөөлгү чылдарда Сактыышкын кежээзинче келген муң кижиниң чүгле чаңгызы хлеб биле араганы амзап турар. Сактыышкын кежээзинде арага биле хлебти амзап турар улус хуралдарның хөй кезиинде чок. Келген улустарның хөй кезии черге чурттаар идегелдиг. Ынчап кээрге, олар чүге Сактыышкын кежээзинче кээп турарыл? Мону чоок эштеривистиң кудазынче барганывыс-биле дөмейлеп болур. Бис оларга ынак болгаштың, оларны деткип турарывысты аңаа барганывыс-биле көргүзүп турар бис. Ооң-биле дөмей, «өске хойлар» Иисус биле чагдырган христианнарга ынакшылын  база оларны деткип турарын көргүзер дээш, Сактыышкын кежээзинче кээп турар. Оон ыңай олар Иисустуң кылган өргүлүнүң ачызында келир үеде мөңге амыдыраар аргалыг болганы дээш четтиргенин илередип, ынаар барып турар.

¹⁴ Оларның Сактыышкын кежээзинче кээп турар база бир чугула чылдагааны — Иисус Христостуң айтыышкынын сагып турары-дыр. Иисус Сактыышкын кежээзин бир дугаар эрттирип тургаш: «Меңээ тураскаал кылдыр ынчаар кылып чоруңар» — деп бодунуң шынчы элчиннеринге чагаан (1 Кор. 11:23—26). Ынчангаш «өске хойлар» чагдырган христианнарның чаңгызы безин черге чурттап турар үеде Сактыышкын кежээзинге кээп, олче күзелдиг улусту чалаар.

15. Сактыышкын кежээзинге кижи бүрүзү Иегова биле Иисус Христосту канчаар алгап-мактап болур?

¹⁵ Сактыышкын кежээзинге Иегова биле Иисустуң бистерге кылган бүгү чүүлү дээш четтиргенивисти илередип, ыры биле мөргүл таварыштыр оларны алгап-мактаар бис. Аңаа «Бурган биле Иисустуң силерге кылган бүгү чүүлүн үнелеңер!» деп илеткелди дыңнаар бис. Ол бистиң Дээрде Адавыска болгаш Ооң Оглунга четтиргенивисти күштелдирер. Иисустуң мага-боду биле ханын илередип турар хлеб биле араганы бот-боттарывыска дамчыдып тургаш, ооң утказының дугайында ханы боданып болур бис. Ол ышкаш Иегова бисти мөңге чурттазын дээш, Оглун өргүлге бергени-биле кайы хире улуг ынакшылды көргүскенин боданыр бис (Мф. 20:28). Иеговага болгаш Ооң Оглунга ынакшылын көргүзер күзелдиг кижилер Сактыышкын кежээзинче албан кээр.

16. Чагдырган христианнар болгаш «өске хойлар» чүзү-биле дөмей?

¹⁶ Иегова чагдырган христианнарны-даа, «өске хойларны-даа» бедик үнелеп турар. Иегова олар дээш дең өртекти төлеп, Бодунуң эргим ынак Оглунуң амы-тынын берген. Чагдырган христианнарның «өске хойлардан» чаңгыс ылгалы — Бурганның оларга берген идегели. Оларның идегели кандыг-даа бол, олар шуптузу Иегова биле Иисуска төнчүзүнге чедир бердинген артып каар ужурлуг (Ыд. ыр. 30:24). Иегова Бодунуң бараалгакчыларынга ыдыктыг сүлдезин дең кылдыр берип турар деп сактыр болзувусса эки. Ол дээрге кижиге ыдыктыг сүлде кайы хире херек болдур, Иегова ол хирени берип турар дээни ол.

17. Черде арткан чагдырган христианнар чүнү четтикпейн манап турар?

¹⁷ Чагдырган христианнар дээрге чурттаар  идегелдиг кылдыр төрүттүнмес, ону оларга Иегова берип турар. Олар дээрге чурттаар идегелин четтикпейн манап, ооң дугайында боданып, мөргүп турар. Дээрге кандыг мага-боттуг болурун олар билбес (Флп. 3:20, 21; 1 Ин. 3:2). Ынчанмыже олар дээрге шаңналын алгаш, Иегова, Иисус, дээрниң төлээлери болгаш өске чагдырган христианнар-биле кады турар үени четтикпейн манап чоруурлар.

18. «Өске хойлар» чүнү четтикпейн манап турарыл?

¹⁸ «Өске хойлар» кижиге чайгаар күзенчиг болур идегелин — мөңге чуртталганы — үнелеп турар (Эккл. 3:11). Олар черни дываажаң кылдыр болбаазырадыр үени четтикпейн манап турарлар. Олар хууда бажыңныг, садтыг болур. Олар-даа, оларның ажы-төлү-даа кажан-даа аарывас (Иса. 65:21—23). Оон олар аян-чоруктап, дагларның, арга-эзимнерниң, далайның чаражын магадап, Бурганның чаяалгаларын шуптузун шинчилээр аргалыг болур. А эң-не өөрүшкүлүг чүүл — Иегова-биле оларның аразында найырал хүнден-хүнче быжыгар.

19. Сактыышкын кежээзи биске кандыг арганы берип турарыл база бо чылын ону кажан демдеглээр бис?

¹⁹ Иегова бараалгакчы бүрүзүнге келир үеде кайгамчык идегелди берген (Иер. 29:11). Бурган биле Христостуң ачызында мөңге чурттап болур бис. Сактыышкын кежээзинге оларны алдаржыдып, өөрүп четтиргенивисти илередип болур бис. Алыс шын христианнарга Сактыышкын кежээзи — эң-не чугула болуушкун-дур. Ону 2021 чылдың март 27-де, субботада, хүн ажа бергенде демдеглээр бис. Ынаар Иегованың, Иисустуң, дээрниң төлээлериниң болгаш шупту дирлип келген чагдырган христианнарның кичээнгейи угланган боор. Бистиң хөй кезиивис Сактыышкын кежээзин хостуг демдеглээр, а чамдыывыс удурланыышкыннар турза-даа, кара-бажыңда-даа эрттирер апаар. Ынчалза-даа биске Сактыышкын кежээзин демдеглээринге чүү-даа шаптыктавазын!