Бичииңерде кээп ужуп, хол-будуңарны сүвүре дүжүп чорааныңарны сактыр-дыр силер бе? Аваңар силерни аргалап, балыгны чуггаш, ону пластырь-биле чыпшырып каар турган чадавас. Ыглап туруңарда, ооң куспаа болгаш чылыг-чымчак үнү силерге дүрген оожургай бээринге дузалап чораан. Ол үеде аргалалдың күжүн бодуңарга миннинген силер.

Ынчалза-даа өскен тудум, чуртталгавыс нарыыдап бар чыдар. Бергелер көвүдээр, а аргалалды кайыын алыры билдинмес. Харааданчыг чүүл, улуг улустуң бергелери анаа-ла пластырь болгаш иениң куспаа-биле шиитпирлеттинмес. Каш чижектен көрээлиңер.

• Ажылыңарны чидирип чораан силер бе? Хулианны ажылындан үндүрүптерге, ооң холдары сула салдына берген. «Өг-бүлемни канчап азыраар мен? Бо компанияга дыка хөй чылдар иштинде ажылдап келген мен, а ам оларга херек чок апарган ышкажыл мен!» — деп, ол муңгарап чугаалаан.

• Чара бадыланыышкын дээш, ундаралга бастырып турар чадавас силер. «Бир чыл чартык бурунгаар ашаам мени хенертен кааптарга, аажок муңгараан мен. Чүрээм саргып, сагыш-сеткилим караңгылап калган! Ол байдалымдан коргуп турган мен» — деп, Ракель сагынган.

• Бир эвес кадыыңар баксырап, экириир хире эвес болза, канчаарыл? «Чуртталга хөңнүмге дээпти» — дээн Библияда Иовтуң ышкаш минниишкиннерни үе-үе болгаш миннип болур силер (Иов 7:16). 80 хар ажа берген Луистиң минниишкиннери силерге чоок бооп чадавас. Ол: «Чамдыкта анаа-ла өлүмүмнү манап олурар-дыр мен» — деп ажыы-биле чугаалаан.

• Чок болза, чоок кижиңерни чидиргеш, аргалалды аажок хереглеп турар чадавас силер. «Кажан оглумну озал-ондакка таварышкаш, чок болган деп дыңнааш, бүзүревээн мен. Оон сагыш-сеткилим, Библияда бижээни дег, селеме өттүр балыглаан ышкаш, аарып эгелээн» — деп, Роберт чугаалаан (Лука 2:35).

Роберт, Луис, Ракель болгаш Хулиан ол хире берге байдалдарынга безин аргалалды тып алган. Олар, ёзулуг аргалады берип шыдаар, Бүрүн Күчүлүг Бурган бар деп билип алган. Бурган канчаар аргалап турарыл? Ол силерни аргалап шыдаар бе?