Бурганның өңнүү болуру — сеңээ күзээр эң эки чүүл. Аас-кежиктиг, дүвүрел чок чурттаарынга Бурган сени өөредир. Ол сени меге шажыннар болгаш хоралыг чүүлдерден хостаар. Ол сээң мөргүлдериңни дыңнаар. Бурган сагыш-сеткилиңге оожургалды, бүзүрелди чедип алырыңга дузалажыр (Ырлар 70:5; 72:28). Түрегделдиң үезинде Бурган сеңээ деткимчени бээр (Ырлар 17:19). Оон артык, Бурган сеңээ мөңге чуртталганың белээн сүмелеп турар (Римчилерге 6:23).

Бурганга чоокшулавышаан, Ооң өңнүктери-биле чоокшулажыр сен. Олар сээң база өңнүктериң болур. Харын-даа сеңээ олар угбаларың, акыларың ышкаш болур. Олар сени Бурганның дугайында күзелдии-биле өөредир, сеңээ дузалажыр, деткимчени бээр.

Бис Бурган-биле дең эвес бис. Бурган-биле өңнүктежип тура, бир кол шынны билири чугула. Бурган-биле найырал дизе деңниглерниң найыралы эвес. Ол бистен улуг, мерген угаанныг болгаш күштүг. Ол бүрүн эргелиг Чагырыкчывыс. Ынчангаш Бурганның өңнүктери болур дизивиссе, Ону дыңнаар, Ооң чугаазын ёзугаар чурттаар ужурлуг бис. Ол бүгү биске-ле кезээде ачылыг (Исаия 48:18).