Кичээл 2

Бурган деп кымыл?

Алыс шын Бурган деп кымыл база ооң ады кандыгыл?, (1, 2)

Ооң мага-боду кандыгыл? (3)

Ооң кол шынарлары кандыгыл? (4)

Бурганга чүдүүрде дүрзү-хевирлерни болгаш үлегер демдектерни ажыглап болур бе? (5)

Кандыг ийи арга-биле Бурганны билип ап болурул? (6)

1. Кижилер дыка хөй чүүлдерге чүдүп турар. Ынчалза-даа Библия чаңгыс АЛЫС ШЫН Бурган барын чугаалап турар. Дээрде болгаш черде бүгүдени ол чаяаган. Чуртталганы ол берген болганда, чаңгыс Аңаа чүдүүрү чогуур (1 Коринфичилерге 8:5, 6; Ажыдыышкын 4:11).

2. Бурганның ат-дужаалдары хөй, ынчалза-даа ады чаңгыс. Бурганның ады — ИЕГОВА. Библияның очулгаларының хөй кезиинде Бурганның адын ап каапкан азы Дээрги болгаш Бурган деп ат-дужаалдар-биле солаан. Ынчалза-даа Библияның оригиналында «Иегова» деп ат 7 000 хире катап таваржып турар (Исход 3:14; Осия 12:5).

3. Иегованың мага-боду бар, чүгле бистиинден ылгалдыг. «Бурган дээрге Сүлде-дир» (Иоанның 4:24). Сүлде — бистиинден оранчок бедик  чуртталганың хевири. Чаңгыс-даа кижи Бурганны көрүп көрбээн. Иегова дээрде чурттап турар, ынчалза-даа бүгүдени көрүп олурар (Псалом 10:4, 5; Иоанның 1:18). А ыдыктыг сүлде дээрге Бурган ышкаш угаан-сарыылдыг эвес. Ол Бурганның ажыглап турар хөделдирикчи күжү-дүр (Псалом 103:30).

4. Библияда Иегованың бүдүжү ажыттынып турар. Ында ооң кол шынарларын — ынакшылын, чөптүүн, мерген угааныын болгаш күжүн көргүскен (Второзаконие 32:4; Иов 12:13; Исаия 40:26; 1 Иоанның 4:8). Библия оон ыңай Бурганны: кээргээчел, буянныг, өршээринге белен, чаагай сеткилдиг, шыдамык деп чугаалап турар. Бис дыңнангыр ажы-төл-биле дөмей ону өттүнерин кызар ужурлуг бис (Ефесчилерге 5:1, 2).

5. Бурганга чүдүүрде хевир-дүрзүлерни, чуруктарны, үлегер демдектерни ажыглап база оларга мөргүп болур бе? Чок! (Исход 20:4, 5). Чүгле аңаа чүдүүр ужурлуг бис деп, Иегова боду чугаалап турар. Ол алдарын кым-даа, чүү-даа-биле үлешпес. Хевир-дүрзүлерниң биске дузалажыр харыы чок (Псалом 113:12—16; Исаия 42:8).

6. Бурганны канчап эки билип ап болурул? Бирги аргазы — ооң чаяалгаларын топтап көрбүшаан, Бурганның дугайында ол чүнү чугаалап турарын ханы боданыры. Бурганның чаяалгалары ооң күчү күжүн, мерген угаанын көргүзүп турар. Чаяалга бүрүзүнде ооң ынакшылы көстүп турар (Псалом 18:2—7; Римчилерге 1:20). Бурганны билип алырының ийиги аргазы — Библияны өөренири. Ону таварыштыр Бурган бодунуң дугайында хөйнү чугаалап турар. Ында бодунуң сорулгаларын ажытпышаан, бистен чүнү күзеп турарын медеглээн (Амос 3:7; 2 Тимофейден 3:16, 17).

[5 дугаар арын, чурук]

Бис Бурганның дугайында ооң чаяалгалары болгаш Библия таварыштыр билип ап турар бис.