МЫНДА чүү бооп турарыл? Бо кижилер улуг дойда. Вавило́ннуң хааны муң хире ат-дужаалдыг кижилерни чыып алган. Олар Иерусали́мде Иегованың өргээзинден үндүрген алдын-мөңгүн дашкаларындан база аяктарындан ижип турар. Ынчан хенертен агаарга кижи холу тыптып келгеш, ханага бижип эгелээн. Шупту чаза корга берген.

Ол үеде Навуходоно́сорнуң уйнуу, Валтаса́р хааннап турар. Ол мерген угааныгларны эккээрин негээн. ‘Кым бижип каан чүүлдү номчуптарыл база ооң утказын тайылбырлаптар болза, хөй белектер алыр база күрүнеде үш дугаар кол кижи болур’,— деп, хаан чарлаан. Ынчалза-даа кым-даа ханада бижикти номчуп-даа, ооң утказын тайылбырлап-даа шыдаваан.

Шимээн дыңнааш, улуг чемненир өрээлге хаанның авазы чедип келген. ‘Ынчаар кортпайн көрем,— деп, ол хаандан дилээн.— Күрүнеде ыдыктыг бурганнар билир кижи бар. Сээң кырган-ачаң Навуходоно́сор хаан тургаш, ону шупту мерген угааныгларның кол кижизи кылдыр томуйлаан. Ооң адын Дании́л дээр. Ону кыйгыртывыт — ол шупту чүвениң утказын тайылбырлап бээр’.

Даниилди ол-ла дораан эккелген. Белектерден ойталааш, Валтаса́рның кырган-ачазы Навуходоно́сорну бир катап Иегова күрүне башкарылгазындан чүге чайладыпканын, ол чугаалап эгелээн. ‘Ол эмин эртир бодун өрү көрдүнер чораан,— деп, Дании́л тайылбырлаан.— Ынчангаш ол дээш Иегова ону шииткен’.

— Сен болза, Навуходоно́сор-биле болган чүүлдү шуптузун билир сен,— деп, Валтаса́рга Дании́л чугаалаан,— ол хиреңде база бодуңну өрү көрдүне берген сен. Иегованың өргээзинден дашкаларны база аяктарны алгаш, оон ижип турган сен. Сен ыяштан, даштан кылган бурганнарны алдаржыдып турган сен, а Өндүр улуг Чаяакчыны алдаржытпаан сен. Ол дээш Бурган холга бо сөстерни бижиирин дужааган. Мында бижээн чүүл бо,—дээш Дании́л дыңнаткан,— „МЕ́НЕ, МЕ́НЕ, ТЕ́КЕЛ болгаш УПАРСИ́Н“.

МЕ́НЕ дээрге, Бурган сээң хааннаашкынның хүннерин санааш, оларга төнчүзүн айыткан. ТЕ́КЕЛ дээрге, деңзиге сени деңзилээрге, чүге-даа херек чок деп көрген. УПАРСИ́Н дээрге, сээң күрүнеңни мидийжилерге болгаш пе́рсилерге бериптер.

Кажан Дании́л чугааланып турда, мидийжилер база пе́рсилер Вавило́нче халдаан. Олар хоорайны эжелеп алгаш, Валтаса́рны өлүрген. Ханада бижээн чүүл ол дүне-ле бүде берген! А изра́ильчилер-биле чүү болур? Удавас ооң дугайында билип алыр бис, ынчалза-даа баштай Дании́л-биле чүү болганыл, көрээлем, че.