КӨР ДААН, чүү болган-дыр. Адам биле Еваны чараш Эдем садындан үндүр ойладыпкан. Чүге ындыг болганыл, билир сен бе?

Чүге дизе олар бир-ле дыка багай чүвени кылыпкан. Ол дээш Иегова оларны шииткен. Адам биле Ева кандыг багай чүүл үүлгедипкенил, билир сен бе?

Олар Бурганның хоруп каан чүүлүн кылыпкан. Бурган садта шупту ыяштарның чимистерин чиирин чөпшээрээн. Чүгле чаңгыс ыяштан чивес ужурлуг турганнар — оон башка оларны өлүм манап турган. Ол ыяшты Бурган бодунга арттырган. Өске улустуң чүвезин ап болбас деп, билир болгай бис, ындыг аа? Ынчалза-даа чүү болганыл?

Бир-ле катап Ева садка чааскаан артып каарга, ооң-биле чылан чугааланы берген. Бодап көр даан! Ол хоруп каан ыяштың чимизин чиптерин Евага сүмелээн. Ынчалза-даа Иегова чыланнарны чаяап тура, оларга чугааланыр арга бербээн болгай. Ынчангаш чыланның орнунга бир-ле кым-бир чугааланып турганын айтып турары ол боор. Кымыл ол?

Ол Адам эвес болган. Ынчаарга ол черниң тыптып кээриниң ырак мурнунда-ла, Иегованың чаяап кааны амы-хууларның бирээзи чадавас боор. Ол амы-хууларны дээрниң төлээлери деп адаар — оларны көрүп шыдавас бис. Ол бир дээрниң төлээзи аажок өрү көрдүне берген. Бурган ышкаш башкарыкчы болур ужурлуг мен деп, ол бодай берген. Кижилер аңаа Иеговадан артык дыңнангыр болурун ол аажок күзеп турган. Чыланның орнунга ол дээрниң төлээзи чугааланып турган болган-дыр.

Ол Еваны мегелеп шыдаан. Чимисти чипкеш, Бурган ышкаш апаар деп, чыланның сөстеринге херээжен бүзүрепкен. Ынчангаш ол чимисти чиген, а ооң-биле кады Адам база ону чиген. Бурганга дыңнангыр эвес чоруундан олар бодунуң тергиин чараш бажыңын чидирген.

Ынчалза-даа Бурганның бүгү черни Эдем сады ышкаш кайгамчыктыг чараш апаар кылдыр эде кылыптар хүнү кээр. Сен база аңаа канчаар киржип болуруңну чоорту билип алыр бис. Адам болгаш Ева-биле чүү болганыл, ам билип алыылам.