ИЗРА́ИЛЬЧИЛЕР бергеге таварышкаш, Иеговага чаннып эгелээн. Оларның дилээнге харыылап, Иегова дуза кылдыр дидим баштыңчыларны чоргузупкан. Библия оларны шииткекчилер деп адап турар. Бирги шииткекчи Иисус Навин турган, ооң соонда Гофониил, Аод, Самегар шииткекчилер бооп турган. Ынчалза-даа Изра́ильге дузалажып турган ийи кижи — Дево́ра биле Иаиль деп аттыг херээженнер.

Дево́ра — медээчи. Иегова Дево́рага келир үеде чүү болурун дыңнадып турар, а ол Иегованың сөстерин чонга дамчыдып турар. Дево́ра шииткекчи база бооп турар. Ол даг кырында пальма адаанда олурар, а кижилер аңаа дуза дилеп кээп турар.

Ол үеде Ханаа́нның хааны Иави́н апарган. Ол 900 дайынчы тергелиг аъттарлыг. Иави́нниң шерии дыка күштүг, ынчангаш хөй изра́ильчилер ооң чалчалары болур ужурга таварышкан. Ооң шерииниң баштыңчызының адын Сисара дээр.

Бир катап Дево́ра Вара́к шииткекчиге айбычы таварыштыр дамчыткан: ‘Иегова дужаап тур: „10 000 кижиден алгаш, олар-биле Фавор дагже үне бер. Мен аңаа Сисараны эккээр мен. Сеңээ ону база ооң шериин тиилээр дуза бээр мен“’.

Вара́к Дево́рага мынча дээн: ‘Бир эвес сен баар болзуңза, баар мен’. Дево́ра ооң-биле кады чорупкан, ынчалза-даа Вара́кка баш бурунгаар ол мынча дээн: ‘Тиилелге дээш алдарны сен албас сен, чүге дээрге Иегова Сисараны херээжен кижиниң холунче бериптер’. Шак ындыг болган.

Вара́к Фавор дагдан Сисараның дайынчыларынга уткуштур бадып орар. Хенертен Иегова үер болдуруптарга, дайзынның дыка хөй шериглери сугга дүжүп калган. Ынчалза-даа Сисара тергелиг аъдындан дүже халааш, дезипкен.

Каш үе эрткенде Сисара Иаильдиң майгынынга чедип келген. Иаиль ону майгынынче чалааш, сүт ижиртип каан. Оон уйгузурай бергеш, Сисара дораан чык кылдыр удуй берген. Ынчан Иаиль майгынның бир өргенин алгаш, ол бак кижиниң бажынче киир шанчыпкан. Сөөлзүредир Вара́к чедип кээрге, Иаиль аңаа өлүг Сисараны көргүскен! Көр даан, Дево́раның баш удур чугаалааны бүде берген.

Сөөлүнде Иави́н хаанны база өлүрүп каапкан, ынчангаш элээн үе дургузунда изра́ильчилер база катап айыыл чок чурттап турар.