СУГ адаанда кижини көрем. Аңаа кандыг айыыл диргелип келген-дир, көрүп тур сен бе? Ону балык ажырар деп тур! Бо кым деп кижи-дир, билир сен бе? Ол Ио́на-дыр. Билип алыылам, ол канчап мындыг айыылга таваржы бергенил?

Ио́на — Иегованың медээчизи-дир. Медээчи Елисе́йниң өлгенинден бээр хөй эвес үе эрткен, ынчангаш Иегова Ио́нага дужаап турар: ‘Нине́вия деп улуг хоорайже бар. Ол хоорайның чурттакчыларының багай херектери хөй-дүр, ынчангаш ол дугайында оларга чарлаарыңны күзеп тур мен’.

Ынчалза-даа Ио́на ону кылырын күзевейн турар. Ол Нине́виядан удурланышкак талаже чоруур корабльче олурупкан. Иегова ол чүүлге таарзынмаан. Ынчангаш Ол күштүг шуурганны чоргузупкан. Ооң күжүнден корабль сугже кире бээр чыгыы. Далайжылар корткаш, боттарының бурганнарындан дуза дилеп, кыйгыра берген.

Ынчан Ио́на оларга чугаалаан: ‘Мен Иеговага чүдүп тур мен — дээрни болгаш черни чаяаган Бурганга. Ам ооң даалгазын күүсетпес дээш, Иеговадан дезип тур мен’. — ‘Шуурган соксаар кылдыр, сээң-биле чүнү кылыр улус бис?’— деп, далайжылар ужурун тыппаан.

— Мени далайже октаптыңар, ол оожургай бээр,— деп, Ио́на оларга харыылаан. Далайжылар ону кылырын күзевейн турар, ынчалза-даа шуурган дам-дам күштелип кээрге, олар сөөлүнде кээп Ио́наны корабльден үндүр октапкан. Шуурган ол дораан соксаарга, далай катап оожургай берген.

Суг адаанга Ио́наны улуг балык ажырыпкан. Ынчалза-даа ол өлбээн. Ол үш хүн болгаш үш дүн иштинде балыктың хырнынга турган. Иегованы дыңнавайн, Нине́вияже барбаанынга ол аажок хараадаан. Ол ам чүнү кылганыл?

Ио́на Иеговадан дуза дилеп мөргүп турар. Ынчан Ио́наны черже үндүр дүкпүрүптер кылдыр Иегова балыкты албадапкан. Ооң соонда Ио́на Нине́вияже чорупкан. Иегованың кандыг-даа дааскан ажылын күүседирин чугула деп, бо чижек бисти өөредип турар эвес-тир бе?