ДИСКЕКТЕНИП алган эр кижи дээрге — Стефа́н-дыр. Иисустуң шынчы өөреникчизи. Ынчалза-даа ону канчап турары ол! Ону даштар-биле соп турар. Чүү дээш Стефа́нны бак көрүп, каржызы-биле аажылап турарлары ол? Билип алыылам.

Бурганның дузазы-биле Стефа́н болуп көрбээн хуулгаазыннар кылып турар. Бо чүүлге ол кижилер таарзынмайн турар, ынчангаш кижилерни шын эвес өөредип турар деп, олар Стефа́нны буруудадып турар. Ынчалза-даа Бурган Стефа́нга улуг мерген угаан берген: херек кырында олар мегеге өөредип турар деп, Стефа́н көргүскен. Ол чүүл оларны аажок кылыктандырыпкан. Олар Стефа́нны сегирип алгаш, ону нүгүлдээр кижилерни чыып алган.

— Ол шын бе? — деп, Стефа́ндан дээди бараалгакчы айтырып турар. Харыы кылдыр Стефа́н Библияга үндезилээн тергиин эки сөс чугаалаан. Шаандагы үеде каржы кижилер Иегованың медээчилеринге кайы-хире хөңнү чок турганын, ол түңнелинде чугаалаан. Оон оларга: ‘Силер ынчангы улус дег силер. Бурганның чалчазы Иисусту өлүрген силер, оон ыңай Бурганның хоойлуларын база дыңнавайн турар силер’,—дээн.

Шажын баштыңчылары оон ыңай кылыын туттунар харыы чок! Хорадаанындан олар диштерин кыжырадып турарлар. Стефа́н бажын көдүрүпкеш алгырган: ‘Көрүңер! Бурганның оң талазында, дээрде турар Иисусту көрүп тур мен’. Ол сөстерден олар кулактарын дуглап, Стефа́нче халый бергеннер. Ону сегирип алгаш, хоорайның кызыгаарындан дашкаар сөөртүп аппарган.

Маңаа олар хевин ужулгаш, Савл дээр оолга кадарар кылдыр берип кааннар. Савлды чуруктан көрүп тур сен бе? Оон оларның чамдыызы Стефа́нче даштарны октаан. А Стефа́н көрүп турарың ышкаш, дискектенип барып дүшкеш, Бурганга мөргүп турар: ‘Иегова оларны бо каржы чоруу дээш шиитпейн көр’. Оларның чамдыызы шажын баштыңчыларынга мегелеткенин, ол билип турган. Оон Стефа́н өлүп калган.

Сени бир-ле кижи бак аажылаар болза, ол кижиге өжээргеп аарышкылыг чүве кылырын кызар-дыр сен бе, азы ол дугайында Бургандан дилээр-дир сен бе? Ынчалза-даа Стефа́н-даа, Иисус-даа ынчанмааннар. Олар-биле багай аажылаар кижилерге безин олар эки хамаарылгалыг турган. Оларның үлегерин өттүнерин кызаалам, че.