ИИСУС чуртту кезип, аарыг кижилерни эмнеп турар. Ол хуулгаазыннар дугайында чугаа шупту хоорайларже база суурларже тарап турар. Ынчангаш Иисуска аскак, согур, дүлей база хөй-ле аарыг-аржык кижилерни эккеп турар. Ол шуптузун эмнеп турар.

Иоа́нн Иисусту сугга сукканындан бээр үш чыл ажа берген. Иисус апостолдарга дыңнаткан: удавас ол Иерусали́м чоруур, аңаа ол өлүртүр, оон өлүглерден ону диргизиптер. Амдыызында аарыг улусту эмнээрин ол уламчылавышаан.

Бир катап Иисус субботада өөредип турган. А иуде́йлерге суббота дыштаныр хүн турган. Бо мында көрүп турарың херээжен аар-берге аарыглыг. Ол барык 18 чыл хөкпейип алгаш кылаштап турар, ынчангаш дорт туруп шыдавас. Иисус аңаа холдарын салыптарга, ол дорталы берген. Ол экиртинген!

Шажын баштыңчылары килеңнээнинден билинмейн турар. ‘Биске ажылдаар кылдыр алды хонук бердинген,— деп, оларның бирээзи чонче алгырган.— Субботада эвес, а ынчан экириир дээш келиңер!’

Иисус ооң оозунга харыылаан: ‘Кээргээр чүрек чок кижилер. Силер шупту субботада элчигениңерни чешкеш, аңаа суг ижиртип чедирип турар болгай силер. Ындыг болганда чүге 18 чыл иштинде аарыгдан хилинчектенип келген херээженни субботада эмнеп болбазыл?’ Иисустуң харыызы ол каржы кижилерни ыяттырган.

Оон Иисус биле апостолдары Иерусали́мче углапкан. Чаа-ла Иерихо́н хоорайдан үнүп кээрге, орук кыдыында диленип орар ийи согур улус оларның чанындан Иисус эртип бар чыдар деп дыңнап каан. Ынчангаш олар аңаа ыыткыр кылдыр чаннып турар: ‘Иисус, биске дузалап көр!’

Иисус оларны чанынче кыйгыргаш айтырган: ‘Чүнү күзеп тур силер?’— ‘Дээргивис, бисти көрүп турар кылдыр, кылып көр’,— деп, Иисустан олар дилээн. Ынчаарга Иисус оларның карактарынга холун дээртиптерге, ол-ла дораан олар көрүп эгелээн! Билир сен бе, чүге Иисус ынча хөй кайгамчыктыг хуулгаазыннар кылып турар? Чүге дизе кижилерге ол ынак база аңаа кижилер бүзүрезин деп күзеп турар. Ынчангаш, кажан Иисус чагырып эгелээрге, чер кырында чаңгыс-даа кижи аарывас, деп база бүзүреп болур бис.