КОРГУНЧУГ чүве болган. Чаа-ла Сугга Сугар Иоа́нны өлүрүп каан. Ону хаанның кадайы Иродиада көрбестээн. Ынчангаш Иоа́нның бажын одура шавар кылдыр хаанны албадаан.

Иисус ол дээш дыка муңгараан. Ол ээн черже чорупкан. Ынчалза-даа чон ону эдерипкен. Иисус хөй-хөй бөлүк кижилерни көргеш, оларны хөлчок кээргээн. Ол Бурганның чагыргазының дугайында чугаалап берген база аарыг улусту экиртип каан.

Ол кежээ аңаа өөреникчилери чеде бергеш, көгүдүп чугаалаан: ‘Орайтаан-дыр, а чоок-кавыда кым-даа чурттавайн турар. Кижилерни чоокку суурларже чем садып алыр кылдыр, чоргузувут’.

— Кайнаар-даа барган херээ чок,— деп, Иисус удурланган.— Силер оларны чемгерип каар силер.— Ол Фили́пптен айтырган: Шупту кижилерге чемни кайыын садып ап болурул?

— Кижи бүрүзүнге оода-ла бичии-даа чедишсин дээр болза, дыка хөй акша херек,— деп, аңаа Фили́пп харыылаан. ‘Бистиң чемивисти көдүрүп чоруур оолда беш хлеб биле ийи балык бар. Ынчалза-даа ол бүгү кайын чедер, мынча хөй кижилерни чемгерер дээр болза’,— деп, Андре́й дыңнаткан.

— Кижилерни оът-сиген кырынга олуруп алыр кылдыр, диле,— деп, Иисус чугаалаан. Чем дээш Бурганга четтиргенин илереткеш, ол ону кезектерге чарган. А өөреникчилери кижилерге хлеб биле балыкты үлеп турган. Мында 5 000 эр улус база муңдан хөй херээжен улус биле ажы-төл чыглып келген. Олар шупту тоттур чемненген. А кажан өөреникчилери арткан хлебти чыыптарга, 12 корзина дола берген!

Оон Иисустуң дилээни-биле, Галилей далайны кежер дээш, өөреникчилери хемеге олурупкан. Дүне күштүг шуурган эгелээрге, хемени бир таладан бир талаже чайгап эгелээн. Өөреникчилер корга берген. Хенертен, даң адар деп турда, оларже уткуштур суг кыры-биле кижи кел чыдарын олар көрүп каан. Олар кортканындан алгыржып эгелээн, чүге дизе ол чүү дээрзин билбейн турар.

— Кортпаңар,— деп, Иисус оларны оожургаткан.— Мен-дир мен!— Ынчалза-даа олар ам-даа бүзүревейн турар. Ынчаарга Пётр чугаалаан: ‘Бир эвес сен шынап-ла Дээрги болзуңза, мени сугнуң кыры-биле сеңээ чеде бээрин дужаа’.—‘Чедип кел’,— деп, Иисус аңаа дужааган. Пётр хемеден үнгеш, суг кыры-биле кылаштай берген! Ынчалза-даа Пётр хенертен корга бергеш дүжүп эгелээн — ынчалзажок Иисус ону камгалап каан.

Сөөлүнде Иисус база катап муң-муң кижилерни чемгерген. Бо удаада ол чеди хлеб база каш бичии балыктар-биле чемгерген. База-ла чем шуптузунга четкен. Иисустуң кижилер дээш ынчаар сагыш човап турары кайгамчык эвес-тир бе? Иисус Бурганның тургусканы хаан кылдыр чагырып эгелээрге, бистерге чүнүң-даа дугайында сагышсыраан херээ чок апаар!