ШЫНАП-ЛА, Иисус мында ёзулуг хорадаан кылдыр көстүп турар-дыр бе? Чүү дээш, билир сен бе? Бурганның өргээзинде кижилерниң хоптак чазыйынга ол хорадаан. Олар мында Бурганга бараалгап келген кижилерден хөй акша ажылдап алыр дээш кызып турарлар.

Ында бызааларны, хойларны база көге-бугаларны көрүп тур сен бе? Ол кижилер оларны өргээниң мырыңай бодунда садып турар. Чүге деп, билир сен бе? Чүге дизе изра́ильчилерге Бурганга өргүл кылдыр бээр дириг-амытаннар херек.

Бурганның хоойлузунда чугаалаан турган: бир эвес изра́ильчи кижи багай чүүл кылган болза, ол Бурганга өргүл эккээр ужурлуг. Изра́ильчилер өргүлдү өске таварылгаларда база эккээр турган. Ынчалза-даа изра́ильчи кижи Бурганга өргүл кылдыр куштарны азы дириг-амытаннарны кайыын ап болур турганыл?

Чамдыызында боттарының куштары база дириг-амытаннары турган. Ынчангаш олар ону өргүл кылдыр эккеп шыдаар турган. Ынчалза-даа изра́ильчилерниң хөй кезиинде боттарының дириг-амытаннары биле куштары чок турган. Өскелери Иерусали́мден дыка ырак чурттап турган болгаш, аңаа бодунуң дириг-амытаннарын өргээже эккеп шыдавас турган. Ынчангаш кижилер келгеш, херек дириг-амытаннарны азы куштарны мырыңай моон садып ап турган. Ынчалза-даа садыгжылар ол кижилерден эмин эртир аар өртек негеп турган. Олар улусту мегелеп турган. Оон аңгыда, олар Бурганның өргээзинге садыг-саарылга шуут кылбас ужурлуг турган.

Ынчангаш Иисус бо дээш дыка хорадаан. Ол акша солукчуларының столун аңдара октап, оларның чоостарын тарадыр чажыпкан. Ооң соонда хендирлерден кымчы кылгаш, өргээден шупту мал-маганны үндүр сүрүпкен. Көге-буга садыгжыларынга ол дужааган: ‘Доп-дораан оларны моон үндүрүңер! Мээң Ачамның бажыңын саарылга чери кылырын соксадыңар’.

Иисус-биле кады Иерусали́мниң өргээзинде ооң каш талалакчылары турган. Олар Иисустуң шупту кылган чүүлдеринге кайгап турган. Сөөлүнде олар Библияда Бурганның Оглунуң дугайында бижээн черни сактып келгеннер: ‘Бурганның бажыңынга ынакшылы ооң иштинде от дег кывар’.

Иерусали́мге Па́сха байырлалының үезинде Иисус хөй хуулгаазыннар кылган. Байырлал соонда ол Иуде́ядан чорупкаш, Галиле́яже эглип келген. Орук ара ол Сама́рия девискээрин эрткен. Маңаа чүү болур эвес, билип алыылам.