ХОЙЛАРГА сиген дилеп чорааш, Моисе́й Хорив дагга чеде берген. Аңаа ол отка хып турган, ынчалза-даа өрттенмейн турган чадаң ыяш көрүп каан. ‘Элдептиин аа, чоокшуладыр чеде бергеш, экидир көрүп көрейн’,— деп, Моисе́й бодапкан. Кажан ол чоокшулап орда, чадаң ыяштан үн дыңналган: ‘Бээр чоокшулава. Идииң уштуп ал, чүге дээрге сээң турар чериң — ыдыктыг чер-дир’. Ол дээрге Бурган боду дээрниң төлээзи таварыштыр чугааланып турган, ынчангаш Моисе́й арнын дуглап алган.

Ынчан Бурган: ‘Еги́петте мээң чонумнуң хилинчээн көрүп кагдым. Ону хостаарын күзеп тур мен, а сен мээң чонумну Еги́петтен үндүрер сен’,— деп чугаалаан. Иегова бодунуң чонун кайгамчыктыг Ханаа́н черинче эккээр деп турган.

Ынчалза-даа Моисе́й мынча дээн: ‘Мен кым-даа эвес мен. Канчаар ону кылыр мен? Ындыг-дыр, бодап көрээли, чедип келген дижик мен. Изра́ильчилер менден: ‘Кым сени чорудупту?’ — деп айтырар. Оларга чүү деп харыылаар мен?’

— Оларга мынча дээр сен,— деп, Бурган харыылаан.— „ИЕГОВА, Авраа́мның Бурганы, Исаа́ктың Бурганы болгаш Иа́ковтуң Бурганы, мени силерже чорудупту“.— Оон Иегова немээн:— Бо дээрге мээң мөңгеде адым-дыр.

— Ынчалза-даа канчап билир, мени сен чорудупкан деп бүзүревейн барза,— деп, Моисе́й харыылаан.

— Холуңда чүү чүвел ол?— деп, Бурган айтырган.

— Даянгыыш-тыр,— деп, Моисе́й харыылаан.

— Ону черже октавыт,— деп, Бурган дужааган. Моисе́й даянгыышты октаптарга, ол чылан бооп хуула берген. Ооң соонда Иегова Моисе́йге база бир хуулгаазын көргүскен. ‘Холуңну хевиң хойнунче сувут’,— деп, ол чугаалаан. Моисе́й ынчаар кылган, а кажан ону уштуптарга, ол бүдүнү-биле хар ышкаш ак апарган! Ооң холу эмнеттинмес коргунчуг кеш аарыы-биле аарый берген ышкаш болган. Оон Иегова Моисе́йни үш дугаар хуулгаазын кылып шыдаар кылдыр кылыпкан. Бо бүгүнүң соонда ол Моисе́йни бүзүреткен: ‘Бо шупту хулгаазыннарны кылыптарыңга, сени мен чорудупкан деп, изра́ильчилер бүзүрей бээр’.

Моисе́й чана бергеш, Иофорга чугаалаан: ‘Төрелдеримче барып, оларның канчаар чурттап турарын көрейн, меңээ чөпшээреп көрем’. Иофор-биле байырлашкаш, Моисе́й Еги́петче дедир чорупкан.