Бо брошюрада демдеглеп турганы ышкаш, Библияда силерге болгаш силерниң өг-бүлеңерге ажыктыг бооп болур хөй сүмелер бар. Иегова силерни аас-кежиктиг болзун деп күзеп турар. Бир эвес Аңаа бараалгал силерниң чуртталгаңарга кол черни ээлээр болза, «Ол силерге арткан бүгү [херектиг] чүвени бээр» деп, Ооң Сөзү бүзүредип турар (Матфей 6:33). Бурган силерниң-биле өңнүктежирин дыка күзеп турар. Ынчангаш Ооң-биле чоок найыралды тударынга дузалыг бүгү херек чүвени ажыглаңар. Бурганның өңнүү болуру — кижиге өндүр улуг алдар-хүндү-дүр (Матфей 22:37, 38).

БИБЛИЯ ЧҮНҮ ЧУГААЛАП ТУРАР. «„Мен силерниң Адаңар болур мен, а силер мээң оглу-кызым болур силер“ — деп, Аг-шериглиг Бурган чугаалаан» (2 Коринфичилерге 6:18). Бурган силерни бодунуң чоок өңнүктери болур кылдыр күзеп турар. Аңаа хамаарыштыр мөргүл чугула черни ээлээп турар. Иегова: «Соксаал чок мөргүңер» — деп кыйгырып турар (1 Фессалоникчилерге 5:17). Кажан силер аңаа дүвүрелдериңерни болгаш чажыт бодалдарыңарны чугаалап туруңарда, ол кезээде дыңнаарынга белен (Филипчилерге 4:6). Бир эвес өг-бүлеңер-биле кады үргүлчү мөргүүр болзуңарза, силерге Бурган — херек кырында бар хуу-бот-тур деп, чоок улузуңар эскерип каар.

Ынчалзажок Бурган-биле чугаалажырындан аңгыда, ону дыңнаары база чугула. Чижээ, Бурганны ооң Сөзүн болгаш аңаа үндезилээн дептерлерни сайгарып тургаш, дыңнап болур (Ырлар 1:1, 2). Билип алган чүүлдүң дугайында ханы боданыңар (Ырлар 76:12, 13). Оон ыңай Бурганны дыңнаар дизе, христиан ужуражылгаларже доктаамал баары чугула (Ырлар 121:1—4).

Оон аңгыда Бурган-биле харылзааңарны Ооң дугайында өскелерге чугаалап тургаш, быжыктырып болур силер. Ону хөй кылган тудум, Аңаа оон-даа чоок апаар силер (Матфей 28:19, 20).

АЖЫКТЫГ СҮМЕЛЕР

• Хүн бүрүде Библияны номчуурунга болгаш мөргүүрүнге үени аңгылап ап туруңар

• Өг-бүлеңерге бир дугаар черде дыштанылга болгаш хөглээшкин эвес, а Бурганга бараалгал кол черни ээлээр кылдыр кызыңар

БИБЛИЯ ЧҮНҮ ЧУГААЛАП ТУРАР. «Бурганче чоокшулаңар, Ол база силерже чоокшулап кээр» (Иаков 4:8). Өг-бүлеңер-биле чүдүүр үени аңгылап алгаш, оон сырый туттунуңар (Эге дөс 18:19). Оон аңгыда хүн бүрүнүң амыдыралында Бурганның дугайында сактып чорууру чугула. «Бодуңнуң бажыңыңга олургаш-даа, орукка чорааш-даа, удуп чыдып аарда-даа, оттуп келгеш-даа, ол сөстер дугайында чугаалап чор» — деп кыйгыны эдерер болзуңарза, өг-бүлеңерниң Бурган-биле найыралы быжыгар (Ы. х. к. 6:6, 7). Аңаа хамаарыштыр Иисус Навин эки үлегер көргүскен. Ол мынча дээн: «А мен болгаш мээң өг-бүлем Дээрги-Чаяакчыга бараан болур бис!» (Иисус 24:15).

АЖЫКТЫГ СҮМЕ

• Өөренир программаны баш бурунгаар тургузуп тургаш, өг-бүлеңерде кежигүн бүрүзүнүң хереглелдерин кичээнгейге алыңар