КИЧЭЭЛ 80
Иисус 12 элчинни шилип алган
Иисус бир чыл чартык суртаалдап келген. Ам чугула шиитпир үндүрер үе келген. Ооң эң чоок өөреникчилери кымнар болурул? Ол чоруптарга, христиан чыыш дээш кым сагыш човаар? Ону билип алыр дээш, Иисус Иеговадан дуза дилээр деп бодап алган. Ол дагже чорупкаш, аңаа хондур мөргээн. Эртенинде Иисус өөреникчилерин кыйгыргаш, оларның аразындан 12 элчинни шилип алган. Оларның аттарын билир сен бе? Оларны Пётр, Андрей, Иаков, Иоанн, Филипп, Варфоломей, Фома, Матфей, Иаков (Алфейниң оглу), Фаддей, Симон, Иуда Искариот дээр.
Андрей, Пётр, Филипп, Иаков
12 элчин кезээде Иисус-биле кады чораан. Иисус оларны өөреткеш, суртаалдадып чоргузуп турган. Иегова оларга буктарны ойладыр база аарыглар экиртир күштү берген.
Иоанн, Матфей, Варфоломей, Фома
Иисус 12 элчинни эштерим деп адаар турган. Ол оларга дыка бүзүрээр чораан. А фарисейлер элчиннерни эртем-билиг чок, бөдүүн улус деп санаар турган. Ынчалза-даа Иисус оларны шупту чүүлге өөредип каан. Олар Иисустуң чуртталгазының эң чугула үелеринде, чижээ, өлүмүнүң бетинде база дирлип келгениниң соонда, кады турган. Оларның хөй кезии, Иисус дег, Галилеяга өзүп келген, а чамдыызы кадайларлыг чораан.
Алфейниң оглу Иаков, Иуда Искариот, Фаддей, Симон
Элчиннер бачыттыг болгаш, шын эвес чүүлдү чугаалап азы кылыптар чораан. Чамдыкта оларга шыдамык чорук база чедишпейн баар турган. Олар безин кым дээре дээш маргыжып турган. Ынчалза-даа олар эки база Иеговага ынак улус чораан. Соонда олар тускай даалгалар алган.
«Мен силерни эш-өөрүм деп ададым, чүге дээрге Адамдан дыңнааным бүгү чүүлдү силерге чугаалап бердим» (Иоанн 15:15)
