Иисус Галилеяга өөреникчилери-биле ужурашкаш, оларга дыка чугула даалга берген: «Шупту чоннарже баргаш, өөреникчилерни белеткеңер. Мээң силерге чугаалаан бүгү чүүлүмге оларны өөредиңер база сугже сугуңар». Оон ол: «Сактып чоруңар, мен кезээде силерниң-биле кады болур мен» — деп аазаан.

Иисус дирлип келгеш, 40 хонук ишти Галилеяга база Иерусалимге чүс-чүс өөреникчилеринге көзүлген. Оларны чугула чүүлдерге өөредип, хөй хуулгаазыннарны ол кылган. Оон Иисус Елеон даанга элчиннери-биле сөөлгү катап ужурашкан. «Иерусалимге туруңар, Адамның силерге аазаан чүүлүн манаңар» — деп, Иисус чугаалаан.

Ынчалза-даа элчиннер Иисустуң чугаазының утказын билбейн: «Сен ам Израильдиң Хааны апаар сен бе?» — деп айтырганнар. Ол оларга: «Иегова ол үе ам-даа келбээн дээн. Удавас ыдыктыг сүлдени алгаш, күш кирип, мээң херечилерим апаар силер. Иудеяга, Иерусалимге, Самарияга база черниң эң ыраккы булуңнарынга баргаш, суртаалдаңар» — деп чугаалаан.

Иисус өөреникчилери көрүп турда, дээрже үне бергеш, көзүлбейн барган.

Өөреникчилер Елеон даандан баткаш, Иерусалимде ужуражыр, мөргүүр бажыңынче чедип келгеннер. Аңаа олар Иисустан чаа айтыышкыннар манап турган.