Кижи бүрүзүнде чүгле ийи арга бар: Иеговага азы Эрликке база ооң аза-буктарынга бараалгаар. Ынчангаш шын шиитпир үндүрер ужурлуг бис. Иегованы шилип алыры дыка-ла мерген угаанныг болур!

Буктар кижилерни хинчектеп, мегелеп тургаш, оон өөрүшкү ап турар деп көрдүвүс. Ынчалза-даа Иегова ындыг эвес. Ол, адазының ажы-төлүнге ынаа дег, кижилерге дыка ынак. Иегова «шупту буянныг болгаш тергиин белектерниң» Берикчизи (Иаков 1:17, Чаа делегей). Ол кымны-даа ылгай көрбейн турар, харын-даа кижилерге эң-не экини берип турар. Олар дээш Иегова бодунуң аажок үнелиг Оглун безин өргээн (Эфесчилерге 2:4—7).

Бурганның Оглу Иисустуң черге чүнү кылып турганын боданып көрем. Иисус буктарны ойладып, согурларны карактандырып, үн чок улусту үннүг кылып, кеш аарыын база өске-даа аарыгларны экиртип чораан. Ол Бурганның күжүнүң ачызында чок апарган улусту безин диргизип турган (Матфей 9:32—35; 15:30, 31; Лука 7:11—15).

Бурган кажан-даа мегелевес, кымны-даа дуурайлавас, эткен сөзүн кезээде ээлээр (Саннар 23:19).

Ээремчик дузааның ымыраа-сээкти дузактап алыры дег, бүдүүлүк болгаш меге чорук амгы үеде сая-сая кижилерни дузактап алган. Олар аза-буктардан, өлген улустан дыка коргар. Олар үргүлчү илбилиг сөстер, каргыштар, камгалалдар болгаш тускай демдектер дугайында бодап, дүвүреп чоруурлар. Олар Эрликтиң мегезинге үндезилээн ёзу-чаңчылдарның кулдары апарган. Бурганның бараалгакчылары ындыг меге чүүлдерге алыспас база киришпейн турар.

Иегова Эрликтен оранчок күштүг. Иеговага бараалгаар болзуңза, ол сени аза-буктан камгалаар (Иаков 4:7). Кандыг-даа каргыш салырга, сеңээ четпес боор. Чижээ, Нигерияның үш билдингир хамнары бир хоорайдан Иегованың Херечизи чоруксавас боорга, ону өлүп каар кылдыр, каргыш салып турган. Салган каргыжы аңаа салдар чедирбеске, оларның бирээзи корткаш, Иегованың Херечизинден өршээлди чаннып дилеп турган.

Буктар сени хинчектеп турар болза, Иегованың адын адап, ону кыйгыр. Ынчан ол сени камгалаар (Чугаалар 18:11). А Бурганның камгалалын алыр дизе, караң көрнүр бүгү чүүлдү долузу-биле узуткаар херек. Бурунгу Эфеске Бурганның бараалгакчылары шак ынчаар кылган. Олар караң көрнүр номнарын чыггаш, шуптузун өрттедипкен (Ажыл-чорудулга 19:19, 20). Амгы үеде Бурганның бараалгакчылары база ынчаар кылыр ужурлуг. Амулеттер, талисманнар, камгалалдар, фетиштер, илби номнары база караң көрнүр чорукка хамаарышкан өске-даа чүүлдерден адырлып ал.

Чүгле багай ажыл-херектерден база меге чүдүлгеден ойталааш, Бурганның сеткилинге кирип шыдавас бис. Ынчангаш алыс шын чүдүлгени чүткүлдүг деткиир ужурлуг бис. Ону канчаар кылырын Библияда бижээн.

Чер кырында Эрликке башкартып, шын эвес алдынып, меге өөредиглер тарадып турар улус бар. Ынчалза-даа Иегованың удуртулгазының адаанда чон база бар. Ол дээрге Иегованың Херечилери-дир (Исайя 43:10, Чаа делегей). Бүгү делегейде оларның саны сес миллион ажа берген. Олар улусту алыс шынга өөредип, эки чүүлдү кылырын кызып турарлар. Чурттарның хөй кезиинде бар Хурал залдарындан Иегованың Херечилерин тып ап болур. Олар сени өөрүшкүлүг хүлээп алыр.

Иегованың Херечилери Бурганга шын бараалгаарынга кижилерге дузалажып турар. Олар библейжи кичээлди сээң-биле өөрүшкүлүг эрттирип, Иеговага канчаар шын мөгеерин билип алырынга дузалаар. Ол кичээлдер халас. Бурганның чону күзелдиг улусту алыс шынга өөреткеш, өөрүшкүнү миннип турар, чүге дизе олар кижилерге болгаш Иеговага ынак.