«Бичии турумда, акым мени хүннүң-не эттеп, дорамчылап, бастыр турган. Өгленип алырымга, кунчуум куду көрүп эгелээн. Ол бээм-биле кады мени чалча кижини ышкаш аажылаар турган. Ынчангаш амы-тынымга безин четтинер деп боданып турган мен» (Маду a, Индия).

 «Херээжен улуска удур күчүлел бүгү делегейде аажок нептерээн» деп, Делегей чергелиг кадык камгалал организациязы бадыткап турар. Статистикадан көөрге, бүдүн делегейде херээжен улустуң үштүң бирээзи-ле чуртталгазында бир катап эттеткен азы күштеткен боор.

 Ындыг чүүлдерге таварышкан болзуңарза, каяа-даа бодуңарны айыылда кылдыр миннип, күчүлеп-күштедиринден азы дорамчыладырындан сестип-коргуп чоруур чадавас силер. Кыс хиндиктиг кижилерни ылгай көрүп, бастып, күштеп-күчүлеп турарын көргеш, улустуң хөй кезии херээжен кижини үнелевес ышкаш кылдыр силерге сагындырып болур. А Бурганның херээжен улуска хамаарылгазы кандыгыл?

 Шүлүк: «[Бурган]... эр биле кыс кижини чаяап каан» (Эге дөс 1:27).

 Утказы: Бурган эр биле кыс кижини чаяап каан. Оларның кайызы-даа хүндүткелге төлептиг деп, ол санап турар. Оон аңгыда, эр кижи бүрүзү «бодунга боду дег, кадайынга ынак» болурун Бурган күзеп турар. Ашаа кадайын куду көрүп, каржы аажылап, ооң базым бүрүзүн хынап турбас ужурлуг (Эфесчилерге 5:33; Колосчуларга 3:19). Бурганның херээжен улус дээш сагыш човап чорууру моон көскү.

 «Бичии турумда, мени төрелдерим күштеп турган. А 17 харлыымда даргам кады удувас болзуңза, ажылдан үндүрүптер мен деп кыжанып турган. Улгадып келгенимде, ашаам, ада-ием, кожаларым мени куду көрүп эгелээн. Сөөлүнде херээжен улусту хүндүлээр Чаяакчы Бурган Иегованы b билип алган мен. Ынчан Иегова меңээ ынак, ооң караанга үнелиг мен деп көрген мен» (Мария, Аргентина).

 Шүлүк: «Сеңээ ха-дуңмаңдан артык ынак эжиң кижи база турар» (Чугаалар 18:25).

 Утказы: Ёзулуг эш деткиир. Эжиңер силерге дузалаптар деп бүзүреп турар болзуңарза, аңаа сагыш-сеткилиңерни ажыдып бериңер.

 «Күштедип чораанымны 20 чыл ишти кымга-даа чугаалавайн чораан мен. Түңнелинде депрессиялыг, кезээде дүвүреп чоруур, аас-кежик чок апарган мен. А кажан ол бүгүнү бүзүрелдиг эжим-биле үлешкеш, кайгамчык дээн оожургалды миннип, сагыжым чиигей берген» (Элиф, Турция).

 Шүлүк: «Хамык сагыш човаашкыннарыңарны Олче чая кааптыңар, чүге дээрге Ол силер дээш сагыш салып чоруур» (1 Пётр 5:7).

 Утказы: Кажан мөргүп туруңарда, Бурган силерни кичээнгейлиг дыңнап турар (Ырлар 54:23; 64:3). Иегова силер дээш сагыш човап, хүндүткелге төлептииңерни билип алырынга силерге дузалаар.

 «Иегованы эки билип эгелээримге, сагыш-сеткилимде ханы балыглар экирип эгелээн. Бурганга мөргүп тургаш, шупту дүвүрелдеримни чугаалаар чордум. Ол мээң чоок өңнүүм дег, ишти-хөңнүмнүң аарышкызын билип турар» (Ана, Белиз).

 Шүлүк: «Дээрги-Чаяакчы... өскүс база базындырган кижиге чөптүг шииткелиң хайырла; кым-даа болза чер кырынга улусту моон соңгаар коргутпазын» (Ырлар 9:38, 39).

 Утказы: Удавас Бурган чер кырында шупту чөптүг эвес чоруктуң когун үзер. Моон соңгаар херээжен улусту күштеп-күчүлээр деп чүве турбас.

 «Иегова удавас херээжен улуска болгаш аныяк кыс уругларга удур каржы чорукту соксадыр деп билип алгаш, сагыш-сеткилим оожургай берген» (Роберта, Мексика).

 Библияда кандыг идегелди берип турарын, ында аазаашкыннарга чүге бүзүреп болурун база библейжи шүлүктерден канчаар аргалалды ап болурун билип алыксаар-дыр силер бе? Иегованың Херечилери силерге дузалап болур. Оларга хууда ужуражыңар азы jw.org сайтыда онлайн-заявканы долдуруп калыңар.

 Бо статьяның парлап каан хевирин киирип алыңар.