Малы Иеговалэн Адӟись-Ивортӥсьёсызлэсь публикациоссэс мукет сайтъёсы интыяны уг яра?

Асьмелэсь публикациосмес ми дунтэк вӧлмытӥськомы бере, куд-огъёсыз малпало, соосты мукет сайтъёсы яке социальной сетьёсы интыяны яра шуыса. Но зэмзэ ке верано, со пумит луэ интернет-ресурсъёсмес «Уже кутон условиослы» a. Озьы ик, со шуг-секытъёсы вуттыны быгатэ. «Уже кутон условиосын» шонерак верамын, нокинлы но уг яра шуыса интернетэ поттыны сайтъёсысьтымы суредъёсмес, электрон публикациосмес, логотипъёсмес, крезьгуръёсмес, туспуктэмъёсмес, видеомес но статьяосмес, соосты вань адямиос адӟыны но уже кутыны мед быгатозы шуыса. Малы пуктэмын сыӵе куронъёс?

Интернет-ресурсъёсысьтымы вань публикациосмы авторской правоен утемын. Зэмос йыбырттонлэсь палэнскемъёс но мукет адямиос, кудъёсызлэн ужмылы изъян ваемзы потэ, асьсэ сайтъёсазы Иеговалэн Адӟись-Ивортӥсьёсызлэсь публикациоссэс интыяло, вын-агайёсмес но мукет адямиосты сайтэнызы тунсыкъяськытон вылысь. Со сайтъёсы соос озьы ик интыяло материалъёсты, кудъёсыз адямиослэсь осконзэс лябӟытыны быгато (Пс. 25:4; Мад. 22:5). Куд-огъёсыз публикациосысьтымы материалъёсты, озьы ик логотипъёсмес, уже куто рекламаын, пӧртэм вузъёс вылын но электрон тӥрлыкъёслы программаосын. Нош милям публикациосмы но логотипъёсмы катэн утисько бере, милям правомы вань соосты судэ сётыны, соос сое уже медаз кутэ шуыса (Мад. 27:12). Но суд милемлы уз юртты, ми кинлы ке, озьы ик вын-агайёсмылы, лэзимы ке публикациосмес мукет сайтъёсы интыяны яке логотипъёсмес вузкарон удысын уже кутыны.

Публикациосмес мукет сайтъёсысь скачать каримы ке, со кышкытлык вайыны быгатэ. Духовной сиён сётъяны Иегова «оскиськымон, визьмо ляльчиез» гинэ косӥз (Матф. 24:45). Со понна «ляльчи» организацимылэсь гинэ интернет-ресурсъёссэ уже кутэ. Отын нокыӵе реклама но, Шайтан дуннеен пӧяны тыршыса сётэм информация но ӧвӧл. Нош ми публикациосмес мукет сайтъёсысь скачать кариськомы ке, вераны уг луы, соос ми дорозь воштӥськытэк вуизы шуыса (Пс. 17:27; 18:9).

Со сяна, публикациосмес интыямы ке мукет сайтъёсы, кытын адямиос асьсэлэсь малпанъёссэс гожъяны быгато, со луонлык сётоз зэмос йыбырттонлэсь палэнскемъёслы но ужмылы изъян вайыны тыршисьёслы Иеговалэсь организацизэ тэргаса гожъяны. Куд-ог вын-агайёс, кудъёсыз со выллем сайтъёсы пыраллязы, споръяськонъёсы кыскемын вал. Озьы Инмарлэн нимыз эшшо тросгес саптаськиз на. Интернетын со выллем вераськонъёс со ӧвӧл тупась амал, кызьы мукетъёсызлы юрттыны быгатомы воштӥськыны но зэмлыкез тодыны (1 Тим. 6:3—5; 2 Тим. 2:23—25). Со сяна, вал учыръёс, куке куд-ог адямиос организацимылэн нимыныз яке Кивалтӥсь кенешысь вын-агайёслэн нимынызы сайтъёс но социальной сетьёсын бамъёс кылдытъязы. Но вераны кулэ, Кивалтӥсь кенешысь одӥг вын-агайлэн но аслаз сайтэз яке социальной сетьёсын аслаз бамыз ӧвӧл.

Адямиосты организацимылэн интернет-ресурсъёсыныз тодматыса, ми юрттӥськомы ӟеч иворез вӧлмытыны (Матф. 24:14). Организацимылэн интернет-ресурсъёсыз, кудъёсыз юртто милемлы ӟеч иворез вераны, ялан умой пала воштӥсько. Милям потэ, ваньзы соосты уже мед кутозы шуыса. Соин ик, кызьы верамын «Уже кутон условиосын», ми быгатӥськомы котькыӵе публикацимес яке интернет-ресурсъёсмы вылэ ссылкаез электрон почта пыр лэзьыны. Озьы лэсьтыса, ми возьматӥськомы адямиослы, духовной сиёнэз «оскиськымон, визьмо ляльчи» пыр гинэ басьтыны луэ шуыса.