1. Мар Иегова вераз тушмонмы сярысь Едемын пумит ӝутскон бере?

 АДАМ тодэ вал, кыйёс уг верасько шуыса. Соин ик со валаз, луоз, Еваен кыӵе ке духовной кылдытэм вераськиз шуыса (Ул.-выл. 3:1—6). Адам но, Ева но со сярысь туж ӧжыт тодо вал. Озьы ке но Адам валаса ужпум кутӥз — инмысь яратӥсь Атаезлэсь берытскыны но пумит ӝутскись пала кариськыны, кудзэ со чик но уг тоды вал (1 Тим. 2:14). Иегова соку ик троссэгес усьтыны кутскиз тушмонэз сярысь, кудӥз пӧяз Адамез но Еваез. Инмар кылзэ сётӥз, со быдтэмын луоз шуыса. Озьы ик Иегова вераз, со духовной кылдытэм, кудӥз кый пыр вераськиз, кыӵе ке дыр ӵоже Инмарез яратӥсь адямиослы люкетоз шуыса (Ул.-выл. 3:15).

2, 3. Малы Мессия лыктэмлэсь азьло Шайтан сярысь туж ӧжытэз тодмо вал?

² Иегова — визьмо Инмар, соин ик со ӧз вера инмысь пиезлэсь нимзэ, кудӥз солы пумит ӝутскиз a. Едемын пумит  ӝутскон бере 2500 ар ортчыса гинэ Иегова вераз, кин вал со (Иов 1:6). Со милемлы Шайтан шуыса тодмо луиз. «Шайтан» ним «пумит султӥсь» шуэм луэ. Со Еврей Гожтэмъёсысь куинь книгаосын гинэ пумиське — 1-тӥ Паралипоменонын, Иов книгаын но Захариялэн книгаяз. Малы Мессия лыктэмлэсь азьло адямиос со тушмон сярысь туж ӧжыт тодӥзы?

³ Иеговалэн ӧз поты, шӧдске, Шайтанлы мултэс саклык мед висъялозы шуыса, соин ик Еврей Гожтэмъёсын Шайтан сярысь но солэн ужъёсыз сярысь со трос ӧз вера. Библилэн та люкетэз нырысь ик гожтэмын вал, Инмарлэн ужась-тыршисьёсыз мед быгатозы шуыса валаны, кин со Мессия, но со сьӧры мыныны (Лука 24:44; Гал. 3:24). Куке лыктӥз Мессия, со но солэн апостолъёсыз пыр Иегова адямиослы троссэ усьтӥз со пӧлысь, мае ми али тодӥськомы Шайтан но со пала кариськем кылчинъёс сярысь b. Со валамон, малы ке шуоно Иегова Шайтанэз но со пала кариськемъёсты быдтыны оскиз Иисуслы но зырӟем христианъёслы, кудъёсыз соин ӵош кивалтыны быръемын (Рим. 16:20; Усьт. 17:14; 20:10).

4. Малы милемлы Шайтанлэсь ортчыт трос кышкано ӧвӧл?

⁴ Апостол Пётр Шайтан Дьяволэз «бурсӥсь лев» шуыса нимаз, нош апостол Иоанн — «лобась кый» но «кый» (1 Пётр 5:8; Усьт. 12:9). Но милемлы Шайтанлэсь ортчыт трос кышкано ӧвӧл, малы ке шуоно со котьмар карыны уг быгаты. (Лыдӟе Иаковлэсь 4:7.) Иегова, Иисус но Инмарлы оскымон кылчинъёс котьку дась милемлы юрттыны. Соосын ӵош ми тушмонмылы пумит сылыны быгатӥськомы. Озьы ке но милемлы куинь кулэ луись юанъёслы валэктон шедьтоно: макем кужмо Шайтан? Кызьы Шайтан адямиосты пӧяны тырше? Но мар карыны со уг быгаты? Озьы ик ми малпаськомы, малы со милемыз дышетыны быгатэ.

5, 6. Малы адями кивалтэтъёс уг быгато сётыны адямиослы сое, мар соослы нырысь ик кулэ?

⁵ Шайтанлэн пумит ӝутсконаз трос кылчинъёс пыриськизы. Ву тудӟонлэсь азьло Шайтан куд-ог кылчинъёслэсь мылкыдзэс ӝутӥз музъем вылысь кышномуртъёсын азон-калгон сьӧлыке пырыны. Со сярысь Библия символъёс пыр вера. Отын верамын, лобась кый инмысь кизилиос пӧлысь куинетӥ люкетсэ ас сьӧраз музъем вылэ кыскыса нуиз шуыса (Ул.-выл. 6:1—4; Иуда 6; Усьт. 12:3, 4). Куке со кылчинъёс Инмарлэн семьяысьтыз кошкизы, соос Шайтанлэн киулаз сюризы. Но шуыны уз луы, табере со пумит ӝутскем кылчинъёс ас понназы, кызьы улэмзы потэ, озьы, уло шуыса. Инмарлэсь адӟем карыса, Шайтан аслыз эксэйлык кылдытӥз, кудзэ ми ум адӟиське но кытын со ачиз эксэйяське. Со аслыз кивалтэтъёсты кылдытӥз, кудаз периос кивалто. Со соосты дуннеен кивалтӥсьёс кариз (Еф. 6:12).

⁶ Аслаз адӟиськисьтэм организациез пыр Шайтан вань адями кивалтӥсьёсты ас киулаз возе. Озьы вераны луоз, малы ке шуоно со Иисуслы «дунне вылысь вань эксэйлыкъёсты» возьматӥз  но шуиз: «Вань та эксэйлыкъёсын кивалтыны Тынад кияд кужым сёто, соослэсь данзэс но, уго соос мыным сётэмын, нош мон кинлы сётэме потэ, солы сое сётӥсько» (Лука 4:5, 6). Шайтан уродзэ лэсьтыны мылкыдэз ӝутыны тырше ке но, тросэз адями кивалтэтъёс умой ужъёс лэсьто, нош куд-ог кивалтӥсьёс адямиослы юрттыны но мылкыд каро. Но ӧвӧл сыӵе кивалтэт яке кивалтӥсь, кудӥз адямиослы сётыны быгатысал сое, мар соослы нырысь ик кулэ (Пс. 145:3, 4; Усьт. 12:12).

7. Кызьы Шайтан уже кутэ кивалтэтъёсты, нош озьы ик зэмос луисьтэм религиез но вуз карон системаез? (Учке статья кутсконысь суредэз.)

⁷ «Быдэс дуннелэсь» визьзэ туган понна, Шайтан но периос, кивалтэтъёсты сяна, зэмос луисьтэм религиез но вуз карон системаез уже куто (Усьт. 12:9). Зэмос луисьтэм религия пыр Шайтан Иегова сярысь пӧяса вера. Со сяна, Шайтан туж тырше, тросэз адямиос Инмарлэсь нимзэ медаз тодэ шуыса (Иер. 23:26, 27). Соин ик адямиос, кудъёсыз малпало Инмарлы йыбыртъяло шуыса, зэмзэ ик периослы йыбыртъяло (1 Кор. 10:20; 2 Кор. 11:13—15). Шайтан озьы ик адямиосты пӧя вуз карон система пыр, кудӥз оскытэ адямиосты, коньдон но ваньбур гинэ адямиез шудо каро шуыса (Мад. 18:12). Инмарлы ужам-тыршем интые, Шайтанэн пӧям адямиос узырлыклэн ляльчиосыз луо но солы вань улонзэс сӥзё (Матф. 6:24). Соос куке но Инмарез яратӥзы ке но, узырлыкез яратон Инмарез яратонзэс быдтыны быгатэ (Матф. 13:22; 1 Иоанн 2:15, 16).

8, 9. а) Малы милемыз дышетыны быгатэ Адамен, Еваен но пумит ӝутскем кылчинъёсын луэм учыр? б) Малы милемлы тодыны кулэ, макем кужмо Шайтан?

⁸ Адамен, Еваен но пумит ӝутскем кылчинъёсын луэм учырысь кык кулэ луись йылпумъян лэсьтыны луэ. Нырысетӥез — ми яке Иегова пала гинэ, яке Шайтан пала гинэ кариськыны быгатӥськомы (Матф. 7:13). Кыкетӥез — адями Шайтан пала кариськиз ке, со ноку но уз басьты ваньзэ сое, мае басьто шуыса малпа вал. Адамлы но Евалы луонлык сётэмын вал асьсэлы ужпум кутыны, мар ӟечез но мар уродэз. Нош периослы лэземын вал адями кивалтэтъёсты ас киулазы возьыны (Ул.-выл. 3:22). Но со понна, мае ӵектэ Шайтан, котьку туж бадӟым дун тыроно луэ (Иов 21:7—17; Гал. 6:7, 8).

⁹ Малы милемлы тодыны кулэ, макем кужмо Шайтан? Сое тодон милемлы кивалтӥсьёс шоры шонер учкыны юрттэ но тодытон уже пыриськыны мылкыдмес ӝутэ. Ми валаськомы, Иеговалэн потэ, ми мед гажаломы шуыса соосты, кинъёслы кивалтыны право сётэмын (1 Пётр 2:17). Со возьма, ми шаерысьтымы катъёсты быдэсъяломы шуыса, соос Инмарлэн эсэпъёсызлы пумит ӧвӧл ке (Рим. 13:1—4). Со дыре ик ми валаськомы, политика удысын нокин пала кариськытэк улоно но ноку но со яке та партия яке кивалтӥсь пала пыроно ӧвӧл шуыса (Иоанн 17:15, 16; 18:36). Ми тодӥськомы, Шайтан Инмарлэсь нимзэ сьӧдманы тырше шуыса, соин ик милям туж потэ адямиослы Инмар сярысь зэмлыкез вераммы. Ми шумпотӥськомы, Инмарлэсь нимзэ вераны быгатӥськомы  шуыса, но данъяськиськомы, солэсь нимзэ нуллӥськомы шуыса. Ми тодӥськомы: Инмарез яратон коньдонэз яке арбериосты яратонлэсь трослы дуногес (Ис. 43:10; 1 Тим. 6:6—10).

10—12. а) Кызьы Шайтан трос кылчинъёсты ас палаз кыскыны быгатӥз? б) Малы дышетэ милемыз со, мар луиз со кылчинъёсын?

¹⁰ Шайтан умой тодэ, кызьы косоно адямиосты карыны сое, мае солэн потэ. Со удысын со туж усто. Шайтан пӧртэм сьӧлтэтъёсты пуктэ но возьма, адямиос отчы сюрозы шуыса. Со сяна, со адямиосты кышкатыны тырше, соос солэсь мед кылзӥськозы шуыса.

¹¹ Шайтан сьӧлтэтъёсаз трос кылчинъёсты кутӥз ини. Кызьы со быгатӥз? Кылчинъёсты ас палаз кыскемезлэсь азьло со кема дыр ӵоже соос сьӧры учкыса улӥз, луоз. Куд-ог кылчинъёс лэзизы Шайтанлы асьсэды пӧяны но кышномуртъёсын азон-калгон сьӧлыке пыризы. Озьы соослэн нылпиоссы вордскылӥзы — туж лек ӝужыт таза муртъёс, кудъёсыз адямиосты вӧсь карыса улӥзы (Ул.-выл. 6:1—4). Шайтан кылчинъёсты азон-калгон сьӧлыке пырыны луонлыкен гинэ ӧз гочаты, шӧдске, озьы ик, со соослы адямиосын кивалтыны луонлык сёто шуиз. Озьы Шайтан люкетыны тыршиз, луоз, «кышномуртлэн» кидысэз-выжыез сярысь азьпалзэ ивортонлэн быдэсмемезлы (Ул.-выл. 3:15). Кызьы гинэ медам луы, Ву тудӟон лэзьыса, Иегова Шайтанлэн но периослэн мытэм ужзылы пум понӥз.

¹² Малы дышетэ милемыз та учыр? Вунэтоно ӧвӧл, азон-калгон мыл потонъёс но данъямез яратон — со Шайтанлэн сьӧлтэтъёсыз, кудъёссэ со туж быгатыса уже кутэ. Кылчинъёс, кудъёсыз Шайтан пала кариськизы, трос дыр ӵоже Инмар вӧзын улӥзы но солы ужазы-тыршизы. Озьы ке но соос шонертэм мыл потонъёслы сётскизы. Тодамы возёно, ми трос аръёс ӵоже Иеговалы ужаськомы-тыршиськомы ке но, милям шонертэм мыл потонъёсмы кылдыны быгатозы шуыса  (1 Кор. 10:12). Соин ик туж кулэ чакланы, мар милям сюлмамы, кырсь малпанъёсты палэнтыны но вылтӥяськон сяменымы нюръяськыны (Гал. 5:26; лыдӟе Колоссыослы 3:5).

13. Кыӵе эшшо сьӧлтэтсэ быгатыса уже кутэ на Шайтан но кызьы со сьӧлтэтлэсь утиськоно?

¹³ Эшшо одӥгез сьӧлтэт, кудзэ Шайтан туж быгатыса уже кутэ,— со тунаськон-пелляськонэн, кулэмъёсын вераськонэн, периосын герӟаськем арбериосын тунсыкъяськон. Адямиосты соин тросгес тунсыкъяськытон понна, зэмос луисьтэм религиез кутэм сяна, Шайтан шулдыръяськон амалъёсты но уже кутэ. Фильмъёсын, электрон шудонъёсын, книгаосын, телепередачаосын но трос мукет интыосын тунаськон-пелляськон умоен возьматэмын. Кызьы со сьӧлтэтлэсь утиськоно? Инмарлэн организациез уз вера, кудъёсаз шулдыръяськонъёсы пыриськыны яра, нош кудъёсаз уг яра. Котькудмылы возьытлыкмес дышетоно, Инмарлэн эсэпъёсызъя улон понна (Евр. 5:14). Визьмо ужпумъёс кутыны милемлы апостол Павеллэн визь-кенешез юрттоз: «Яратонды чылкыт сюлмысьтыды потэмын мед луоз» (Рим. 12:9). Адямилэн яратонэз чылкыт сюлмысь уг поты ке, со вера одӥгзэ, нош лэсьтэ мукетсэ. Соин ик, шулдыръяськон амалъёсты бырйыкумы, юано асьмелэсь: «Улӥсько-а мон со возетъёсъя, кудъёсыз сярысь мукетъёсызлы верасько? Мар малпалозы адямиос, кудъёсыныз мон Библиез дышетӥсько, яке соос, кинъёсын Библия сярысь вераськисько, адӟизы ке, кыӵе шутэтскон амалъёсты мон бырйисько?» Ми улӥськомы ке соя, малы дышетӥськомы, Шайтанлэн сьӧлтэтаз ум сюре (1 Иоанн 3:18).

14. Кызьы Шайтан милемыз зӥбыны тырше но мар юрттоз солы сётскытэк улыны?

¹⁴ Шайтан сьӧлтэтъёсты гинэ уже уг куты. Озьы ик, со милемыз кышкатыны тырше, ми Иеговалэсь мед берытскомы шуыса. Кылсярысь, со кивалтӥсьёсты косыны быгатэ, соос милесьтым тодытон ужмес мед дугдытозы шуыса. Со сяна, Шайтан  озьы карыны быгатэ, ӵош ужасьёсмы яке ӵош дышетскисьёсмы милемыз мед серекъялозы, ми Библиысь вылӥ эсэпъёсъя улӥськомы шуыса (1 Пётр 4:4). Куддыръя со милемын кивалтыны тырше ӵыжы-выжыосмы пыр, кудъёсыз милемлы умойзэ карыны турттыса, люкето христиан пумиськонъёсы ветлыны (Матф. 10:36). Мар юрттоз милемлы Шайтанлэн зӥбемезлы сётскытэк улыны? Нырысетӥез, милемлы Шайтанлэн зӥбыны тыршемезлы паймоно ӧвӧл, малы ке шуоно ми тодӥськомы, со милемын ожмаське шуыса (Усьт. 2:10; 12:17). Кыкетӥез, тодамы возёно, сыӵе учыръёсы Шайтанэн ӝутэм споръяськон юанлы валэктон сётӥське шуыса. Со вера, милемлы умой ке, соку гинэ ми Иеговалы ужаськомы-тыршиськомы шуыса, нош шуг-секытъёсын пумиськимы ке, ми Инмарлэсь берытскомы шуыса (Иов 1:9—11; 2:4, 5). Куинетӥез, милемлы котьку Иеговалэсь кужымзэ куроно. Оске: со ноку но милемыз уз кушты (Евр. 13:5).

15. Быгатэ-а Шайтан милемыз кужмысь косыны мар ке карыны? Валэктэ.

¹⁵ Шайтан уг быгаты адямиосты кужмысь косыны мар ке карыны (Иак. 1:14). Тросэз адямиос, асьсэос но сое валатэк, Шайтанлы ужало-тыршо. Но зэмлыкез тодэмез бере котькуд адями ачиз ужпум кутэ, кинлы со ужалоз-тыршоз (Ап. уж. 3:17; 17:30). Милям Инмарлэсь эриксэ быдэсъяны юн мылкыдмы вань ке, Шайтан уз быгаты косыны милемыз Иеговаез кельтыны (Иов 2:3; 27:5).

16, 17. а) Мае эшшо каремзы уг луы Шайтанлэн но периослэн? б) Малы милемлы кышкано ӧвӧл шара вӧсяськыны?

¹⁶ Мае эшшо каремзы уг луы Шайтанлэн но периослэн? Кылсярысь, Библиын верамын ӧвӧл, соос быгато шуыса малпанъёсмес тодыны но адӟыны, мар милям сюлмамы. Сое Иегова но Иисус гинэ быгато (1 Экс. 16:7; Марк 2:8). Нош ми мар ке сярысь шара вераськомы яке вӧсяськиськомы ке? Кышкано-а, Шайтан но периос милемыз кылозы но люкетыны тыршозы шуыса? Ӧвӧл. Малы? Ми ум кышкаське ук шонер ужъёс лэсьтыны но Иеговалы ужаны-тыршыны со понна гинэ, со сярысь Шайтан тодыны быгатоз шуыса. Соин ик, Шайтанлэн кылэмезлэсь кышкаса, шара вӧсяськытэк улоно ӧвӧл. Библиын трос учыръёс гожтэмын, куке Инмарлэн ужась-тыршисьёсыз шара вӧсяськизы. Но отын верамын ӧвӧл, соос кышказы, Шайтан соосты кылоз шуыса (3 Экс. 8:22, 23; Иоанн 11:41, 42; Ап. уж. 4:23, 24). Ужъёсмы но кылъёсмы Иеговалэн эрикезлы пумит уг луо ке, ми оскыны быгатӥськомы: Шайтан милемлы тупатыны луонтэм изъян вайыны уз быгаты. (Лыдӟе Псалтирез 33:8.)

¹⁷ Тушмонмес милемлы умой тодоно, но солэсь ортчыт трос кышкано ӧвӧл. Иеговалэн юрттэменыз тырбыдэстэм адями но Шайтанэз вормыны быгатэ (1 Иоанн 2:14). Ми Шайтанлы пумит султӥмы ке, со ми дорысь бызьыса кошкоз (Иак. 4:7; 1 Пётр 5:9). Шайтан тужгес но егитъёсты аслаз сьӧлтэтъёсаз кутыны тырше. Мар юрттоз соослы солэн сьӧлтэтъёсызлэсь утиськыны? Та юан мукетаз статьяын эскериське.