1—3. а) Кызьы Иегова законлы пумит улон шоры учке, Псалтирез 5:5—7 лыдэ басьтоно ке? б) Малы вераны луоз, нылпиосты эриктэман «Христослэн законэзлы» пумит луэ шуыса?

 ИЕГОВА адӟемпотостэм каре законлы пумит улонэз, яке котькыӵе лек ужез. (Лыдӟе Псалтирез 5:5—7.) Макем со адӟемпотостэм каре нылпиосты эриктэманэз! Со туж юрӟым уж луэ. Милям но Инмарлэн кадь шӧдонъёсмы, малы ке шуоно, солэн Адӟись-Ивортӥсьёсыз луыса, ми котьку солэсь адӟем кариськомы. Христиан кенешын сыӵе лек ужъёсты ми ноку но ум чидалэ (Рим. 12:9; Евр. 12:15, 16).

² Нылпиосты пӧртэм сямен эриктэман чылкак пумит луэ «Христослэн законэзлы» (Гал. 6:2). Малы? Кызьы верамын вал азьвыл статьяын, Христослэн законэз (яке ваньмыз, малы дышетӥз Иисус кылъёсыныз но ужъёсыныз) яратон вылэ пыкиське но шонерлыко ужъёс лэсьтыны мылкыдэз ӝутэ. Сое уже кутыса, зэмос христианъёс нылпиосын асьсэды озьы возё, соос мед шӧдозы, соосты зэмзэ ик ярато но соос сярысь сюлмасько шуыса. Эриктэман — со кышкыт йыруж, кудӥз сэрен нылпиос кышкаса улыны кутско но малпало, соосты уг ярато шуыса.

³ Жаляса верано луэ, нылпиосты эриктэман асьме дыре  туж ӵем пумиське. Та шуг-секытэн зэмос христианъёс но пумисько. Дунне тырмемын «кескич адямиосын, пӧяськисьёсын», но кин ке но соос пӧлысь кенеше но пырыны быгатэ (2 Тим. 3:13). Со сяна, куд-огъёсыз, кинъёс асьсэды зэмос христианъёс луо шуыса веразы, асьсэлэн мылпотонъёссылы сётскизы но нылпиосты эриктэмазы. Ойдолэ эскеромы, малы Иегова сое секыт сьӧлыкен лыдъя. Собере ми вераськомы со сярысь, мар каро тӧроос, куке кенешын кин ке но сыӵе сьӧлыкез лэсьтэ, но кызьы анай-атайёс нылпиоссэс утьыны быгато b.

4, 5. Малы нылпиез эриктэман — со нылпилы пумит сьӧлык?

⁴ Эриктэманлэн бервылъёсыз кема дыр ӵоже шӧдӥсько. Эриктэманэн пумиськем адямиос гинэ уг курадӟо, озьы ик соос но, кинъёс соосты ярато — соослэн семьязы но кенешысь вын-агайёс но сузэр-апайёс. Со туж секыт сьӧлык.

⁵ Нылпилы пумит сьӧлык. Со, кин мукетъёсты вӧсь каре но курадӟытэ, сьӧлык лэсьтэ. Кызьы ми адӟомы вуонояз статьяын, эриктэмась нылпиез туж зол вӧсь каре. Со нылпиез ас палаз пӧяса кыске, собере нылпи адямиослы оскемысь дугдэ но кышкаса улыны кутске. Нылпиосты та йыружлэсь утёно, озьы ик буйгатоно но юнматоно соосты, кинъёс эриктэманэн пумиськизы (1 Фес. 5:14).

6, 7. Малы нылпиез эриктэман — со кенешлы но та дуннеысь кивалтӥсьёслы пумит сьӧлык?

⁶ Кенешлы пумит сьӧлык. Кенешын кин ке но нылпиез эриктэма ке, со кенешез сантэма (Матф. 5:16; 1 Пётр 2:12). Макем шонерлыктэм луэ янгыше уськытыны трос миллион христианъёсты, кудъёсыз вань кужмысьтызы осконзэс утьыны тыршо! (Иуда 3). Лек уж лэсьтыса но ӧпкельытэк улыса, адями кенешлэсь нимзэ сапта ке, со Иеговалэн Адӟись-Ивортӥсез луыны уг быгаты ни.

⁷ Та дуннеысь кивалтӥсьёслы пумит сьӧлык. Христианъёслы «вылӥ властьёслэсь-кивалтӥсьёслэсь» кылзӥськыны кулэ (Рим. 13:1). Нош со понна шаерысь катъёсты гажано но быдэсъяно. Кенешын кин ке но катэз тӥя ке, кылсярысь, нылпиез эриктэма ке, со та дуннеысь кивалтӥсьёслы пумит сьӧлык лэсьтэ. (Ӵошатэ Апостолъёслэсь ужъёссэс 25:8.) Тӧроослэн правозы ӧвӧл катэз тӥясьёсты кыл кутытыны. Нош соос катэз тӥясьёсты уг утё кивалтӥсьёслэн кыл кутытэмзылэсь (Рим. 13:4). Кызьы гожтэмын Галатъёслы 6:7, «адями мае кизе, сое ик со ара».

8. Кызьы Иегова учке адямилы пумит лэсьтэм сьӧлык шоры?

⁸ Инмарлы пумит сьӧлык (Пс. 50:6). Адямилы пумит сьӧлык — со озьы ик Иеговалы пумит сьӧлык. Моисейлэн законэзъя, кудзэ Иегова израиль калыклы сётӥз, адями, кудӥз матысезлэсь марзэ ке лушка вал яке сое пӧя вал, «Кузё-Инмар азьын сьӧлыказ» (Лев. 6:2—4). Озьы ик со, кин нылпиез эриктэма но солэсь каньыл сюлмын улонзэ «лушка», Инмар азьын сьӧлыка. Эриктэмась Иеговалэсь ӟеч нимзэ сапта. Соин ик ми эриктэманэз адӟемпотостэм кариськомы но сое Инмарлы пумит секыт сьӧлыкен лыдъяськомы.

9. Кыӵе юанъёсты, Библия вылэ пыкиськыса, валэктэ Иеговалэн организациез но малы?

 ⁹ Трос аръёс ӵоже Иеговалэн организациез, Библия вылэ пыкиськыса, валэктэ юанъёсты, кудъёсыз нылпиосты эриктэманэн герӟаськемын. Кылсярысь, дырын-дырын «Возьмаськон башня» но «Сайкалэ!» журналъёсын эскериське, кызьы эриктэманэн пумиськемъёс вӧсь луэмзэс эмъяны быгато, кызьы соослы мукет адямиослэн юрттэмзы луэ но кызьы анай-атайёс нылпиоссэс утьыны быгато. Библия вылэ пыкиськыса, организацимы тӧроослы пыр-поч валэктэ, мар кароно, куке кенешын кин ке но нылпиез эриктэма. Куддыръя та юанэз эскеронъя кивалтэт выльдӥське. Малы? Тӧроос Христослэсь законзэ уже куто шуыса валан понна.

10—12. а) Мар сярысь вунэтоно ӧвӧл тӧроослы, кудъёсыз секыт сьӧлыкез эскеро? б) Мар карыны тыршо тӧроос, Иаковлэсь 5:14, 15 лыдэ басьтыса?

¹⁰ Куке тӧроос секыт сьӧлыкез эскеро, соослы вунэтоно ӧвӧл, мар карыны куре соосты Христослэн законэз. Соослы кенешын котькудӥныз асьсэды яратыса возёно но лэсьтоно сое, мае Инмар шонерен но шонерлыкоен лыдъя. Мар сярысь соослы тодазы возёно? Нырысь ик, Инмарлэсь нимзэ данъян сярысь (Лев. 22:31, 32; Матф. 6:9). Со сяна, тӧроослы тодазы возёно: соос юрттыны кулэ кенешысь вын-агайёслы но сузэр-апайёслы Иеговаен матысь кусыпъёс возьыны, озьы ик юнматыны кулэ соосты, кинъёслы пумит секыт сьӧлык лэсьтэмын вал.

¹¹ Куке кенешын кин ке но сьӧлыказ но со сярысь ӧпкеле, тӧроос солы юрттыны тыршо Иеговаен кусыпъёссэ тупатыны. (Лыдӟе Иаковлэсь 5:14, 15.) Христиан мурт, кудӥз шонертэм мылпотонъёсызлы сётскиз но секыт сьӧлык лэсьтӥз, висись муртлы укша. Со возьматэ, солэн Иеговаен кусыпъёсыз сӧриськизы шуыса c. Тӧроосыз эмъясьёсын ӵошатыны луэ. Соос бурмытыны тыршо «висисез», яке сьӧлыкам муртэз. Тӧроослэн Библия вылэ пыкиськыса сётэм визь-кенешсы адямилы юрттыны быгатэ Инмарен кусыпъёссэ тупатыны. Но соос юрттыны быгато солы гинэ, кин вань сюлмысьтыз лэсьтэм сьӧлыкез сярысь ӧпкеле (Ап. уж. 3:19, 20а; 2 Кор. 2:5—10).

¹² Кызьы адӟиське, тӧроослы бадӟым уж оскемын. Соос яратыса сюлмасько ыжъёс сярысь, кудъёссэ соослы оскыса сётӥз Инмар (1 Пётр 5:1—3). Тӧроослэн потэ, вын-агайёс но сузэр-апайёс кенешын каньыл сюлмын но кышкатэк мед улозы шуыса. Соин ик, секыт сьӧлык сярысь тодыса, кылсярысь, нылпиез эриктэман сярысь, соос ӝегатскытэк мар ке но карыны тыршо. Эскеромы, мар каро тӧроос сыӵе учыръёсын.

13, 14. Кулэ-а тӧроос вераны кивалтӥсьёслы нылпиез эриктэман сярысь? Валэктэ.

¹³ Кулэ-а тӧроос вераны кивалтӥсьёслы нылпиез эриктэман сярысь, сое шаерлэн катъёсыз куро ке? Кулэ. Тӧроос кылзӥсько та дуннеысь катъёслэсь, кудъёсыз косо сыӵе учыръёс сярысь кивалтӥсьёслы ивортыны (Рим. 13:1). Та катъёс Инмарлэн курон-косонъёсызлы пумит уг мыно (Ап. уж. 5:28, 29). Куке тӧроос тодо, нылпи эриктэмамын вал, вылды, шуыса, соос тодыны тыршо, мар кароно соослы та учырын шаерзылэн  катъёсызъя. Со понна тӧроос соку ик герӟасько со инты сярысь сюлмаськись филиалэн.

¹⁴ Тӧроос валэкто эриктэманэн пумиськемъёслы, соослэн анай-атайёссылы но мукет адямиослы, кудъёсыз луэм учыр сярысь тодо, соос эриктэман сярысь кивалтӥсьёслы вераны быгато шуыса. Нош мар вераны луэ, куке янгыше уськыто кенешысь христиан муртэз но та учыр сярысь трос адямиослы тодмо луэ? Уг сантэма-а Инмарлэсь нимзэ христиан мурт, кудӥз со сярысь кивалтӥсьёслы вера? Уг. Инмарлэсь нимзэ сантэма со, кин нылпиез эриктэмаз.

15, 16. а) 1 Тимофейлы 5:19 лыдэ басьтыса, малы кенешысь тӧроослы кык адӟисьёслэн ке но верамзы кулэ, кин ке но секыт сьӧлык лэсьтӥз шуыса валан понна? б) Мар каро тӧроос, куке тодо, нылпиез эриктэман понна кенешысь кинэ ке но янгыше уськыто шуыса?

¹⁵ Малы кенешысь тӧроослы кык адӟисьёслэн ке но верамзы кулэ, кин ке но секыт сьӧлык лэсьтӥз шуыса валан понна? Малы ке шуоно со Библиысь шонерлыко курон-косонъёс пӧлысь одӥгез луэ. Куке адямиез секыт сьӧлык лэсьтэмез понна янгыше уськыто, нош со соин соглаш уг кариськы, тӧроос правовой комитет люканы быгато соку гинэ, куке кык адӟисьёслэн верамзы вань (К. Зак. 19:15; Матф. 18:16; лыдӟе 1 Тимофейлы 5:19). Кык адӟисьёслэн верамзы ӧвӧл ке, возьматэ-а со, кивалтӥсьёслы верано ӧвӧл, нылпи эриктэмамын вал, вылды, шуыса? Уг, уг возьматы. Кивалтӥсьёслы сыӵе учыръёс сярысь веран понна, тӧроослы но мукет адямиослы кык адӟисьёс кулэ ӧвӧл.

¹⁶ Куке тӧроос тодӥзы, нылпиез эриктэман понна кенешысь кинэ ке но янгыше уськыто шуыса, соос, шаерысьтызы катъёсты лыдэ басьтыса, со учыр сярысь кивалтӥсьёслы верало. Нош собере тӧроос ваньзэ пыр-поч эскеро но, Библиысь курон-косонъёсты лыдэ басьтыса, валаны тыршо, кулэ-а правовой комитет люканы. Адями, кудзэ янгыше уськыто, солы пумит верам кылъёсын соглаш уг луы ке, тӧроос адӟисьёслэсь верамзэс кылзо. Тӧроос правовой комитет люканы быгато, куке кык адӟисьёслэн верамзы вань, янгыше уськытӥсь муртлэн но мукет адямилэн, кудӥз вераны быгатэ, таиз яке мукетыз нылпи эриктэмамын вал шуыса d. Кыкетӥ адӟись ӧвӧл ке, со уг возьматы, янгыше уськытон шонертэм шуыса. Нылпиез эриктэман сярысь кык адӟисьёс вераны уг быгато ке но, тӧроос лыдэ басьто, секыт сьӧлык лэсьтэмын вал, дыр, шуыса, кудӥз мукетъёссэ туж вӧсь кариз. Тӧроос котьку дась юрттыны соослы, кинъёс вӧсь каремын вал. Со сяна, соос тыршо кенешез утьыны со адямилэсь, кудзэ нылпиез эриктэман понна янгыше уськыто (Ап. уж. 20:28).

17, 18. Кыӵе ужпумез правовой комитетлэн?

¹⁷ Кыӵе ужпумез правовой комитетлэн? Тӧроос, кудъёсыз отчы пыро, ужпум куто, быгатэ-а адями, кудӥз секыт сьӧлык лэсьтӥз, кенеше кыльыны. Соос ужпум уг куто, кулэ-а эриктэмась адямиез шаерысь катъёсты тӥян понна кыл кутытыны. Тӧроос валало: со луэ шаерысьтызы кивалтӥсьёслэн ужзы (Рим. 13:2—4; Тит. 3:1).

¹⁸ Правовой комитетэ пырись тӧроос сьӧлыкам муртэз Инмарлэн законъёсызъя судить каро. Библия вылэ пыкиськыса, соос валаны тыршо, ӧпкеле-а эриктэмась, уг-а. Уг ӧпкельы ке, сое кенешысь потто  но со сярысь кенешын ялон лэсьто (1 Кор. 5:11—13). Нош со ӧпкеле ке, сое кенешысь уг потто. Соку тӧроос солы валэкто, кенешын оскем ужъёсты нуыны со ноку но уз быгаты, вылды, шуыса. Кенешысь быдэ вуымтэ нылпиосты утён понна, тӧроос курыны быгато анай-атайёсты сак луыны, со адями нылпиоссы котырын луэ ке. Нош со дыре ик тӧроос анай-атайёслы вераны кулэ ӧвӧл, кинэ со адями эриктэмаз.

19—22. Кызьы анай-атайёс нылпиоссэс утьыны быгато? (Учке вылбамысь туспуктэмез.)

¹⁹ Нылпиосты утьыны, нырысь ик, анай-атайёслы кулэ e. Тӥляд нылпиосты — со Инмарлэн дуно кузьымез (Пс. 126:3). Соосты утьыны — со Инмарен тӥледлы сётэм уж. Мар тӥ карыны быгатӥськоды, нылпиостэс эриктэманлэсь утён понна?

²⁰ Нырысетӥез, тросгес тодэ нылпиосты эриктэман сярысь. Тӥледлы валаны кулэ, кыӵе адямиос эриктэмасьёс луо но кызьы соос нылпиосты пӧяло. Азьло ик малпаське кышкытлыкъёс сярысь, кудъёсыз кылдыны быгато (Мад. 22:3; 24:3). Тодады возе: ӵем дыръя эриктэмась — со адями, кудзэ нылпи тодэ но кудӥзлы со оске.

²¹ Кыкетӥез, нылпиосыныды вераськыны тырше (К. Зак. 6:6, 7). Со понна соосты кылзыны быгатоно (Иак. 1:19). Лыдэ басьтэ, тросэз нылпиос эриктэман сярысь вераны кышкало шуыса. Соос кышкало, соослы уз оске шуыса. Мукетъёсыз номыр уг верало, малы ке шуоно соосты эриктэмась кышкатӥз. Тӥ мае ке но умойтэмзэ шӧдӥды ке, нылпидылы лякытэн юанъёс сётъялэ но сое сак кылзэ.

²² Куинетӥез, нылпиостэс дышетэ. Сётэ соослы секс сярысь тодон-валан, кудӥз арлыдзыя тупа. Валэктэ соослы, кызьы асьсэды возёно, куке кин ке но кутылыны тырше со интыоссэс, кудъёссэ кутылыны уг яра. Уже кутэ сое, мае Иеговалэн организациез сётэ анай-атайёслы, нылпиоссэс утьыны юрттон понна. (Учке « Анай-атайёслы но нылпиослы юрттэт» рамкаез.)

23. Кызьы ми учкиськомы нылпиосты эриктэман шоры? Мае ми эскеромы вуоно статьяын?

²³ Иеговалэн Адӟись-Ивортӥсьёсыз луыса, нылпиосты эриктэманэз ми кышкыт йыружен но секыт сьӧлыкен лыдъяськомы. Христослэсь законзэ уже кутыса, кенеш уг утьы эриктэмасьёсты урод ужъёссылэн бервылъёсызлэсь. Нош кызьы юрттоно соослы, кинъёс эриктэманэн пумиськизы? Со сярысь вуоно статьяын вераськоз.