1, 2. Кыӵе йылпумъян лэсьтӥз одӥг гожъяськись но мае ми эскеромы та статьяын?

 ТУННЭ трос миллион адямиос верало, Иисуслы оско шуыса, нош асьсэос солэн дышетонъёсызъя уг уло (2 Тим. 4:3, 4). Тани кыӵе йылпумъян лэсьтэ одӥг гожъяськись: «Туннэ „выль“ Иисус лыктысал ке но дышетысал ке солы ик, малы дышетӥз Иисус нырысетӥ даурын, ӧм палэнтысалмы-а ми сое озьы ик, кызьы сое палэнтӥзы 2000 ар талэсь азьло? Палэнтысалмы, дыр».

² Нырысетӥ даурын тросэз Иисусэз кылзӥзы но солэсь паймымон ужъёссэ адӟизы ке но, солы ӧз оске. Кылем статьяын ми эскеримы ньыль мугъёсты, малы со озьы луиз. Нош таяз статьяын эскеромы эшшо ньыльзэ. Со сяна, ми вераськомы, малы туннэ адямиос Иисуслэсь дышетскисьёссэ уг кылзо, озьы ик тодомы, мар юрттоз милемлы юн осконэн улыны.

3. Малы куд-ог адямиос Иисуслы ӧз оске?

³ Музъем вылын улыкуз, Иисус пӧртэм адямиосын дырзэ ортчытъяз. Со сиськиз узыр, дано адямиос дорын, озьы ик со трос саклыксэ висъяз куанер но ултӥям адямиослы. Со сяна, со гажан-жалянзэ возьматӥз соослы, кинъёсты сьӧлыко адямиосын лыдъязы. Соин сэрен вылтӥяськись адямиос солы ӧз оске. Одӥг пол соос Иисуслэн дышетскисьёсызлэсь юазы: «Малы тӥ выт бичасьёсын, сьӧлыкоосын ӵош сииськоды, юиськоды?» Нош Иисус соослы вераз: «Висисьтэмъёслы эмъясь кулэ ӧвӧл, висисьёслы кулэ. Шонер улӥсьёсты ӧтьыны Мон ӧй лыкты, сьӧлыкоосты ӧпкельыса сьӧлыкъёссылэсь куштӥськонэ ӧтьыны лыктӥ» (Лука 5:29—32).

4. Мае тодыны кулэ вал еврей калык Мессия сярысь Исаиялэн азьпалзэ ивортонысьтыз?

 ⁴ Мар вера Библия? Исаия пророк азьло ик вераз, адямиос Мессияез палэнтозы шуыса. Иисуслэн музъем вылэ лыктэмезлэсь трослы азьлогес со гожтӥз: «Со синазькыль каремын, сантэмамын вал адямиос азьын... Со бордысь ми синъёсмес палэнтылӥмы; Сое синазькыль карылӥзы, ми но Сое номыр ӵотэ ӧм понылэ» (Ис. 53:3). Нырысетӥ даурын еврей калык тодӥз, адямиос Мессиялэсь палэнскозы шуыса. Соин ик со паймыны кулэ ӧй вал, Иисуслы уг оско шуыса.

5. Кызьы тросэз адямиос учко Иисуслэн дышетскисьёсыз шоры?

⁵ Кылдэ-а таӵе шуг-секыт туннэ но? Кылдэ. Тросэз религиозной кивалтӥсьёс шумпото, куке соос доры лыкто дано, узыр но трос дышетскем адямиос. Нош учконо ке, та адямиос Инмарлэн курон-косонъёсызлы пумит мыно. Со дыре ик религиозной кивалтӥсьёс адӟемпотостэм каро соосты, кинъёс вань сюлмысьтызы Иеговалы ужало-тыршо но солэн вылӥ эсэпъёсызъя уло. Малы? Малы ке шуоно, та дуннеысь адямиослэн малпамзыя, Иеговалэн ужась-тыршисьёсыз огшорыесь но дышетскымтэ адямиос луо. Кызьы вераз Павел, Инмар бырйиз соосты, кинъёсты адямиос ӵем дыръя адӟемпотостэм каро (1 Кор. 1:26—29). Нош кызьы гинэ та дуннеысь адямиос Иеговалэн ужась-тыршисьёсыз шоры медаз учке, Иеговалы аслаз оскымон калыкез дуно потэ.

6. Кызьы кылъёс, кудъёсыз гожтэмын Матфейлэсь 11:25, 26, юрттозы милемлы Иисус сьӧры мыныны?

⁶ Мар юрттоз милемлы юн осконэн улыны? (Лыдӟе Матфейлэсь 11:25, 26.) Инмарлэн ужась-тыршисьёсыз шоры та дуннеысь адямиос кадь учконо ӧвӧл. Тодамы возёно: аслэсьтыз эриксэ быдэстон понна, Иегова зӥбыт-востэм адямиосты гинэ кутэ (Пс. 137:6). Малпаське, макем трос со лэсьтӥз соос пыр, кинэ та дунне визьмоосын уг лыдъя.

7. Малы Иисус фарисейёсты чеберъяськисьёсын нимаз но кызьы соос та шоры учкизы?

⁷ Иисус кышкатэк шарае поттӥз Иеговалы ярамон луисьтэм религиозной сям-йылолъёсты, кудъёсыз со дыре вӧлмемын вал. Кылсярысь, со шара вераз фарисейёслэн чеберъяськемзы сярысь. Соослы киез миськон пумысен сям-йылол кулэгес вал анай-атайёс сярысь сюлмаськонлэсь (Матф. 15:1—11). Иисуслэн кылъёсыз солэсь дышетскисьёссэ паймытӥзы, дыр, соин ик соос юазы: «Тодӥськод-а, фарисейёс, та кылэз кылыса, сьӧлыке пыризы [«канжаськизы», ВД]?» Иисус соослы вераз: «Инмысь Атаелэн мерттымтэ будосэз ваньмыз ик выжытэм быдтӥськоз. Кельтэ соосыз, соос синтэмъёслэн синтэм валтӥсьёссы; нош синтэм валтэ ке синтэмез, соос кыксы ик гуэ усёзы» (Матф. 15:12—14). Религиозной кивалтӥсьёс йыркуръяськизы, куке Иисус шара вераз, соослэн шонертэм ужъёссы сярысь. Озьы ке но Иисус тодытэмысь ӧз дугды.

8. Кызьы Иисус валэктӥз, Инмарлы уг ярало шуыса вань дышетонъёс, кудъёсыз Инмарлы йыбыртъянэн герӟаськемын?

⁸ Со сяна, Иисус шарае поттӥз зэмос луисьтэм дышетонъёсты. Со ноку но ӧз вера, Инмарлы ярало шуыса вань дышетонъёс, кудъёсыз Инмарлы йыбыртъянэн герӟаськемын. Нош со вераз, тросэз паськыт сюрестӥ мыно шуыса, кудӥз кулонэ нуэ, но ӧжытэз гинэ — сюбег сюрестӥ, кудӥз улонэ нуэ (Матф. 7:13, 14). Иисус валэктӥз: куд-огъёсыз Инмарлы ужало-тыршо шуыса верало ке но, зэмзэ вераса, со озьы ӧвӧл. Со алӥз: «Ӧрекчи пророкъёслэсь утиське. Соос тӥ доры ыжку дӥсен лыкто, нош пушсы сьӧсь  кионъёслэн кадесь. Емышсыя тӥ соосты тодмалоды» (Матф. 7:15—20).

9. Вералэ куд-ог зэмос луисьтэм дышетонъёсты, кудъёссэ Иисус шарае поттӥз.

⁹ Мар вера Библия? Библиысь одӥгаз азьпалзэ ивортонын вераське, кыӵе мылкыдын Мессия Иеговалэсь ужзэ быдэстоз: «Тынад коркаед понна тыршон мынам пушкам тылын ӝуа» (Пс. 68:10; Иоанн 2:14—17). Иисуслэн сокем ӟырдыт мылкыдыз вал, со зэмос луисьтэм дышетонъёсты но сям-йылолъёсты шарае поттӥз. Кылсярысь, фарисейёс оскизы, адямилэн лулыз ноку уг кулы шуыса, нош Иисус дышетӥз, кулэмъёс изё шуыса (Иоанн 11:11). Саддукейёс ӧз оске улӟытонлы, нош Иисус аслэсьтыз Лазарь эшсэ улӟытӥз (Иоанн 11:43, 44; Ап. уж. 23:8). Фарисейёс верало вал, адямилэн адӟонэз вань шуыса. Соос дышетӥзы: Инмар ужпум кутэ, кыӵе адямилэн улонэз луоз, но ачиз адями ужпум кутыны уг быгаты ни. Нош Иисус дышетӥз: адями ачиз бырйыны быгатэ, Инмарлы ужано-тыршоно-а, ӧвӧл-а шуыса? (Матф. 11:28).

10. Малы милям дышетонъёсмы тросэзлы канжаськон муг луо?

¹⁰ Кылдэ-а таӵе шуг-секыт туннэ но? Кылдэ. Тросэз милемыз уг кылзо, малы ке шуоно, Библиез уже кутыса, ми шарае поттӥськомы зэмос луисьтэм дышетонъёсты. Религиозной кивалтӥсьёс дышето, Инмар адямиосты адын курадӟытэ шуыса. Озьы соос адямиосты кышкато но соосты асьсэлэн ки улазы возё. Нош ми ужаськомы-тыршиськомы Иеговалы — Инмарлы, кудӥз адямиосты яратэ, но шарае поттӥськомы та зэмос луисьтэм дышетонэз. Со сяна, религиозной кивалтӥсьёс дышето, адямилэн лулыз ноку уг кулы шуыса. Нош ми шара ивортӥськомы, та дышетон зэмос луисьтэм Инмаръёслы йыбыртъянэн герӟаськемын шуыса, но со зэм луысал ке, улӟытон кулэ ӧй луысал шуыса. Трос религиосын ӵошатыса, ми ум оскиське, адямилэн адӟонэз вань шуыса. Нош ми дышетӥськомы: адями ачиз ужпум кутыны быгатэ, Инмарлы ужано-тыршоно-а, ӧвӧл-а. Кызьы та шоры учко религиозной кивалтӥсьёс? Тросэз соос пӧлысь лекомо.

11. Мае куре Инмар аслаз ужась-тыршисьёсызлэсь, кызьы гожтэмын Иоаннлэсь 8:45—47?

 ¹¹ Мар юрттоз милемлы юн осконэн улыны? Ми зэмлыкез яратӥськомы ке, соку Инмарлэн кылъёсызлы оскомы но солэсь кылзӥськомы. (Лыдӟе Иоаннлэсь 8:45—47.) Шайтанэн ӵошатыса, ми зэмлыкын юн сылӥськомы но котьку уломы соя, малы ми оскиськомы (Иоанн 8:44). Инмар аслаз ужась-тыршисьёсызлэсь куре: «Урод ужез адӟонтэм каре, ӟечез борды лякиське» (Рим. 12:9). Ӵапак озьы ик лэсьтӥз Иисус но (Евр. 1:9).

12. Малы еврей калык пӧлысь тросэз Иисуслы ӧз оске, сое юбо борды кортӵогамзы сэрен?

¹² Кыӵе эшшо одӥгез муг, малы еврей калык Иисуслы ӧз оскы? Павел вераз: «Ми кортӵогам Иисус сярысь тодытӥськомы, иудейёс понна со канжаськон из» (1 Кор. 1:23). Малы еврей калык пӧлысь тросэз Иисуслы ӧз оске, сое юбо борды кортӵогамзы сэрен? Соослэн малпамзыя, Иисусэз озьы виизы бере, со Мессия ӧй вал, нош со вал йыруж лэсьтӥсь но сьӧлыко адями (К. Зак. 21:22, 23).

13. Мае ӧз вала еврей калык, кудӥз Иисусэз Мессияен ӧз лыдъя?

¹³ Еврей калык, кудӥз Иисусэз Мессияен ӧз лыдъя, ӧз вала, Иисус янгыш ӧй вал, сое шонертэм янгыше уськытӥзы но адямиос соин асьсэды шонертэм возизы шуыса. Соос, кинъёс Иисусэз судъязы, шонерлык сярысь ӧз но малпалэ. Сӥнедрион ӝог но дыртыса люкаськиз. Суд вань курон-косонъёсты тӥяса ортчытӥськиз (Лука 22:54; Иоанн 18:24). Куке еврей калык Иисусэз янгыше уськытыны тыршиз, судьяос, нокин пала кариськытэк, сое кылзыны кулэ вал. Нош соос, «Иисусэз виыса сётон вылысь, Солэсь шекъёссэ утчазы, но ӧз шедьтэ». Соку Быдӟым священник тыршиз, Иисус ачиз сярысь шонертэмзэ мед вералоз шуыса, мар понна сое янгыше уськытыны луысал (Матф. 26:59; Марк 14:55—64). Нош Иисус улӟем бере шонерлыктэм судьяос коньдон сётӥзы рим ожгарчиослы, кудъёсыз Иисуслэсь шайгузэ чакланы пуктэмын вал. Соос косӥзы  ожгарчиосты пӧяса вераны, малы Иисуслэн шайгуэз буш вал, но со понна соослы «трос коньдон» сётӥзы (Матф. 28:11—15).

14. Мар азьло ик верамын вал Мессиялэн кулонэз сярысь Священной Гожтэмын?

¹⁴ Мар вера Библия? Еврей калык пӧлысь тросэз Иисус дыръя ӧз малпалэ, Мессиялы кулоно луоз шуыса. Но висъялэ саклыктэс, одӥгаз азьпалзэ ивортонын вераське, Мессия аслэсьтыз лулзэ виисьёс кие сётӥз но законлы пумит улӥсьёсын оградэ пыртэмын вал шуыса, озьы ик ас вылаз тросэзлэсь сьӧлыксэс нуиз но йырвандӥсьёслы дурбасьтӥсь луиз шуыса (Ис. 53:12). Соин ик, куке Иисусэз йыруж лэсьтӥсез кадь кортӵогазы, еврей калыклэн Мессияез палэнтыны мугез ӧй вал.

15. Кыӵе янгыше уськытонъёс сэрен куд-огъёсыз Иеговалэн Адӟись-Ивортӥсьёсызлы уг оско?

¹⁵ Кылдэ-а таӵе шуг-секыт туннэ но? Кылдэ. Иисусэз сантэмазы но шонертэм янгыше уськытӥзы. Иеговалэн Адӟись-Ивортӥсьёсыз но таӵе ик шуг-секытъёсын пумиськыло. Тани куд-ог учыръёс. 1930—40-тӥ аръёсы Огазеяськем Штатъёсын ми трос пол судъёсы вазиськылӥмы, Инмарлы йыбыртъян правомес утён понна. Куд-ог судьяос ми шоры азьло ик уродэн учкизы. Канадаын, Квебек провинциын, католической черк но кивалтӥсьёс, ӵош кариськыса, тыршизы ужмес дугдытыны. Инмарлэн Эксэйлыкез сярысь вераськемзы понна гинэ Адӟись-Ивортӥсьёсты пытсэтъёсы пуктылӥзы. Германиын, нацистъёс кивалтыку, трос егит агайёсты казнить каризы. Нош берло аръёсы Россиын судъёс Иеговалэсь Адӟись-Ивортӥсьёссэ янгыше уськытъяло но пытсэтъёсы пуктыло, соос мукетъёсыныз Библия сярысь верасько шуыса. Таӵе вераськонъёс понна соосты экстремистъёсын лыдъяло. Со сяна, ӟуч кылын поттэм «Священной Гожтэмез — Выль дуннелэсь берыктэмзэ» кивалтӥсьёс уже кутыны ӧз лэзе но сое экстремистской материалъёс пӧлы пыртӥзы, малы ке шуоно отын кутӥське Иегова ним.

16. Малы осконо ӧвӧл Иеговалэн ужась-тыршисьёсыз сярысь пӧяськонлы, кызьы гожтэмын 1 Иоаннлэн 4:1?

¹⁶ Мар юрттоз милемлы юн осконэн улыны? Мае ке кылӥськоды ке, тырше валаны: зэм-а со, ӧвӧл-а? Гурезь йылын тодытыкуз, Иисус аслэсьтыз кылзӥсьёссэ алӥз, адямиос соос сярысь урод кылъёс вӧлдозы шуыса (Матф. 5:11). Та пӧяськон Шайтан бордысь потэ. Ӵапак со тушмонъёсмылэсь мылкыдзэс ӝутэ, зэмлыкез яратӥсьёслэсь ӟеч нимзэс саптаны (Усьт. 12:9, 10). Милемлы та пӧяськонлы осконо ӧвӧл. Лэзёно ӧвӧл, со милемыз мед кышкатоз но осконмес мед лябӟытоз шуыса. (Лыдӟе 1 Иоаннлэсь 4:1.)

17. Кызьы куд-огъёсыз вылын шӧдӥськиз, дыр, со, мар луиз Иисусэн кулон азяз?

¹⁷ Иисус кулон азьынгес ик 12 апостолъёс пӧлысь одӥгез сое вузаз. Эшшо одӥгез апостол солэсь куинь пол куштӥськиз. Озьы ик ваньзы соос Иисуслэн кулон азяз ӝытазе сое кельтӥзы (Матф. 26:14—16, 47, 56, 75). Иисусэз та ӧз паймыты. Со азьло ик вераз, озьы луоз шуыса (Иоанн 6:64; 13:21, 26, 38; 16:32). Оло нош, куд-огъёсызлы та югдуръёс канжаськон понна муг луизы. Соос малпаны быгатӥзы: «Иисуслэн апостолъёсыз но асьсэды озьы возё бере, мынам соос пӧлын луэме уг поты!»

18. Кыӵе азьпалзэ ивортонъёс быдэсмизы Иисус вылын солэн кулон азяз?

¹⁸ Мар вера Библия? Трос сю аръёслы азьлогес Иегова аслаз Кылыз пыр усьтӥз, Мессияез «куамын азвесь коньдонэн» вузалозы шуыса (Зах. 11:12, 13). Со сяна, со азьло ик вераз, Иисуслэн матысь эшез сое вузалоз  шуыса (Пс. 40:9). Озьы ик Захария пророк гожтӥз: «Возьмаськисез погырты, соку ыжъёс пазьгиськозы!» (Зах. 13:7). Соин ик, та югдуръёсты адӟыса, зӥбыт-востэм адямиос Иисусэз палэнтыны кулэ ӧй вал. Азьпалзэ ивортонъёслэн быдэсмемзы соослэсь осконзэс юнматыны кулэ вал.

19. Мае валало зӥбыт-востэм адямиос?

¹⁹ Кылдэ-а таӵе шуг-секыт туннэ но? Кылдэ. Асьме нуналъёсы Иеговалэн куд-ог тодмо Адӟись-Ивортӥсьёсыз зэмлыкез кельтӥзы, зэмос йыбырттонлэсь палэнскизы но куд-огъёссэ ас сьӧразы кыскыны тыршизы. Телевизор, радио, газетъёс но интернет пыр соос Иеговалэн Адӟись-Ивортӥсьёсыз сярысь урод кылъёс вӧлдо но пӧяськыса верало. Нош зӥбыт-востэм адямиос та пӧяськонлы уг оско. Соос валало: озьы быдэсмо Библиысь азьпалзэ ивортонъёс (Матф. 24:24; 2 Пётр 2:18—22).

20. Мар милемлы кароно, зэмлыкез кельтэмъёс сэрен милям осконмы медаз лябӟы шуыса? (2 Тимофейлы 4:4, 5).

²⁰ Мар юрттоз милемлы юн осконэн улыны? Милемлы ялан эскероно Библиез, вӧсяськоно но ӟырдыт мылкыдын пыриськоно уже, кудзэ милемлы Иегова сётӥз. (Лыдӟе 2 Тимофейлы 4:4, 5.) Милям осконмы юн ке, соку Иеговалэн Адӟись-Ивортӥсьёсыз сярысь урод кылъёс милемыз уз кышкатэ (Ис. 28:16). Иеговаез, солэсь Кылзэ но вын-агайёсмес яратӥмы ке, зэмлыкез кельтэмъёс сэрен милям осконмы уз лябӟы.

21. Туннэ тросэз ивормес уг кылзо ке но, малы ми оскыны быгатӥськомы?

²¹ Нырысетӥ даурын тросэз Иисуслы ӧз оске ке но, вал соос но, кинъёс солы оскизы. Кылсярысь, соос пӧлын вал Сӥнедрионлэн одӥгез ёзчиез, озьы ик «священникъёс пӧлысь но туж тросэз» оскизы (Ап. уж. 6:7; Матф. 27:57—60; Марк 15:43). Туннэ но трос миллион адямиос ужпум кутӥзы Иисус сьӧры мыныны. Малы? Малы ке шуоно соос Библиысь зэмлыкъёсты тодо но ярато. Инмарлэн Кылаз верамын: «Закондэ яратӥсьёслэн сюлмазы туж быдӟым каньыллык улэ, ӧвӧл соослы канжаськон» (Пс. 119:165).