1. Кыӵе ужпум ас азязы пуктыны быгато арлыдо вын-агайёс но сузэр-апайёс?

 АРЛЫДО вын-агайёс но сузэр-апайёс ӵем дыръя сюлмасько, Иеговалы ужан-тыршонын лэсьтыны уг быгато ни шуыса сомында, кӧня соос азьло лэсьтӥзы. Но арлыдзы будэмъя та юан соосты эшшо но золгес сюлмаськытэ. Зэм но, пумен соослэн кужымзы ӧжытгес луэ. Нош соослэн вань визьлыксы но быгатонлыкъёссы, кудъёссэ соос уже кутыны быгато, егитъёслы юрттон понна. Солы луыса егитъёс кенешын тросгес лэсьтыны быгато. Тани мар вераз одӥг агай, кудӥз трос аръёс ӵоже ини тӧро луыса ужа-тырше: «Арлыды сэрен мон трос лэсьтыны уг быгатӥськы. Но шумпотоно: кенешын вань егит агайёс, кудъёсызлы кыӵе ке ужез оскыны луэ».

2. Мае ми эскеромы та статьяын?

² Кылем статьяысь ми тодӥмы, кыӵе пайда вае егит вын-агайёслы но сузэр-апайёслы арлыдоосын эшъяськон. Та статьяын ми эскеромы, кызьы зӥбыт-востэм луон, ваньзэ лэсьтыны уд быгатӥськы шуыса валан, тау карись но шырыт сямо луон юртто арлыдоослы егитъёсын ӵош ужаны но кызьы со быдэс кенешлы пайда вае.

3. Филиппыослы 2:3, 4 гожтэмъя, кытысь адӟиське зӥбыт-востэм сям но кызьы со христиан муртлы юрттыны быгатэ?

³ Арлыдо вын-агайёслэн но сузэр-апайёслэн егитъёслы юрттэмзы потэ ке, соослы зӥбыт-востэмесь луоно. Зӥбыт-востэм адями мукетъёссэ ачиз сярысь умоесьгес шуыса лыдъя. (Лыдӟе Филиппыослы 2:3, 4.) Ӵем дыръя, кыӵе ке  ужез быдэстон понна, кӧня ке амалъёс вань, кудъёсыз умоесь луо но со дыре ик Библиысь возетъёслы пумит уг мыно. Зӥбыт-востэм сям арлыдоослы тае валаны юрттоз. Соос уз малпалэ, ваньзэ дышем сямзыя лэсьтоно шуыса (Екк. 7:10). Веранэз ӧвӧл, арлыдоослэн трос визьлыксы но быгатонлыкъёссы вань, кудъёссэ соос егит вын-агайёсты но сузэр-апайёсты дышетон понна уже куто. Нош со дыре ик соос валало, «таиз дунне ортче-быре» шуыса, соин ик соослы туала улонлы дышоно луоз, дыр (1 Кор. 7:31).

4. Мар огкадез вань ёросэз чакласьёслэн но левитъёслэн?

⁴ Озьы ик зӥбыт-востэм сям юрттэ арлыдоослы валаны, соос егит дыръязы мында лэсьтыны уг быгато ни шуыса. Кылсярысь, куке ёросэз чакласьёслы 70 арез тырме, соослы та ужан-тыршонзэс кельтоно луэ. Со капчи ӧвӧл, дыр, малы ке шуоно соос туж дунъязы трос вын-агайёс но сузэр-апайёс сярысь сюлмаськон ужзэс. Соос вань сюлмысьтызы та ужез быдэсъязы но, азьло сямен ик, соослэн юн мылкыдзы вань сое быдэсъяны. Нош соос валало: ёросэз чаклась луон понна, кулэ егит вын-агайёс, кудъёсызлэн трос кужымзы но юн мылкыдзы вань. Соин ик ёросэз чакласьёсты ӵошатыны луэ вашкала Израильысь левитъёсын, кудъёсыз 50 арес тырмемзы бере скинияын ужамысь-тыршемысь дугдо вал. Та ужась-тыршисьёслэн шумпотонзы герӟаськемын ӧй вал кыӵе ке нимысьтыз ужен: соос шумпотӥзы котькыӵе ужез быдэсъяны но  егит левитъёслы юрттыны (Лыд. 8:25, 26). Озьы ик ёросэз чакласьёс но, куке соослы 70 арес тырме, уг сюлмасько ини трос кенешъёс сярысь, нош юнмато одӥг кенешез, кудаз соос али ужало-тыршо.

5. Кыӵе адӟем карон возьмато Дэн но Кэти?

⁵ Эскеромы Дэн нимо агайлэсь учырзэ, кудӥз 23 ар ӵоже ёросэз чаклась вал. Куке солы 70 арес тырмиз, со но Кэти кышноез нимысьтыз пионеръёс луыса ужаны-тыршыны кутскизы. Кельше-а соослы та выль ужзы? Дэн вера, солэн ноку но тамында ужез ӧй вал на шуыса! Аслэсьтыз ужзэ быдэсъям сяна, со юрттэ на вын-агайёслы кенешлы юрттӥсь луыны, озьы ик ивортӥсьёсты дышетэ трос калыко интыосын но пытсэтъёсын тодытыны. Арлыдо вын-агайёс но сузэр-апайёс, тӥ вань дырдэс сётыса ужаськоды-тыршиськоды-а яке уд-а, тӥляд вань трос луонлыкъёсты мукетъёсызлы юрттыны. Кызьы сое лэсьтоно? Тырше дышыны воштӥськись югдуръёслы, ас азяды выль ужпумъёс пуктэ но саклыктэс висъялэ солы, мае тӥ али лэсьтыны быгатӥськоды.

6. Малы туж кулэ валаны, ми ваньзэ лэсьтыны ум быгатӥське шуыса? Вералэ пример.

⁶ Адями, кудӥз вала, ваньзэ лэсьтыны уг быгаты шуыса, аслыз укыр трос куронъёс уг пукты. Та юрттэ солы шумпотыса улыны но вань сюлмысьтыз тыршыны. Сыӵе адямиез ӵошатыны луоз водителен, кудӥз меӵ гурезе тубе. Машинаез медаз дугды шуыса, солы пичигес передачаен мыноно. Зэм, машина калленгес мыноз, но со уз дугды. Озьы ик адями но, кудӥз вала, ваньзэ лэсьтыны уг быгаты шуыса, шӧдэ, ку «передачазэ пичигес кароно», Иеговалы ужамысь-тыршемысь медаз дугды шуыса (Флп. 4:5, ВД).

7. Кытысь адӟиськиз Верзеллийлэн валамез, со ваньзэ лэсьтыны уг быгаты шуыса?

⁷ Тодамы ваёмы Верзеллийлэсь учырзэ. Куке солы 80 арес вал, Давид эксэй ӵектӥз солы аслаз юртаз ужаны-тыршыны. Но Верзеллий валаз, ваньзэ лэсьтыны уг быгаты шуыса, соин ик со соглаш ӧз кариськы. Со тодӥз, бадӟым арлыдыз сэрен солэн кужымез ӧжыт ини шуыса, соин ик ачиз интые Давидлы со ӵектӥз Кимгамез, кудӥз егитгес вал (2 Экс. 19:35—37). Верзеллий сямен ик, арлыдо вын-агайёс егит вын-агайёслы ужан-тыршонын ужъёсты шумпотыса оско.

8. Кызьы храмез пуктонэн герӟаськем учырысь адӟиськиз Давидлэн валамез, со ваньзэ лэсьтыны уг быгаты шуыса?

⁸ Давид эксэй но валаз, со ваньзэ лэсьтыны уг быгаты шуыса. Та ласянь со милемлы туж умой адӟем карон возьматӥз. Солэн мылкыдыз вал Иеговалы храм пуктыны. Нош куке со тодӥз, Иегова храмез пуктыны егит Соломонэз бырйиз шуыса, Иеговалэн кутэм ужпуменыз со соглаш луиз. Давид трос лэсьтӥз, пуктӥськонлы дасяськон понна (1 Пар 17:4; 22:5). Соломон егит вал бере но быгатонлыкъёсыз трос ӧй вал бере, Давид малпаны быгатысал, храмез пуктыны со ачиз умойгес быгатысал шуыса. Но со озьы ӧз малпа (1 Пар. 29:1). Давид умой валаз: храм пуктэмын луоз Иеговалэн бакель каремезлы луыса, нош пуктӥсьёслэн арлыдзылы яке быгатонлыкъёссылы луыса уз. Давид сямен ик, арлыдо христианъёс туннэ вань сюлмысьтызы Иеговалы ужало-тыршо, соослэн ужъёссы воштӥсько ке но. Соос юн оско: Иегова юрттоз егит вын-агайёслы но сузэр-апайёслы, кудъёсыз соос интые ужъёссэс быдэсъяло.

9. Кызьы филиаллэн комитетысьтыз одӥг агай возьматӥз валамзэ, со ваньзэ лэсьтыны уг быгаты шуыса?

⁹ Озьы ик туж умой адӟем карон возьматӥз  Сигэо агай. Со валаз, ваньзэ лэсьтыны уг быгаты шуыса. 1976-тӥ арын, куке солы 30 арес вал, сое одӥг филиаллэн комитетаз ужаны-тыршыны пуктӥзы. Нош 2004-тӥ арын со филиаллэн комитетэзлэсь ужзэ радъясь луыса ужаны-тыршыны кутскиз. Кӧня ке дыр ортчыса, со валаз, бадӟым арлыдыз сэрен солы та ужез нуыны секыт шуыса. Аслаз сюлмаськонъёсыз сярысь со Иеговалы вераз но ужпум кутӥз, аслэсьтыз ужзэ егитгес агайлы сётыны умойгес луоз шуыса. Сигэо агай аслэсьтыз ужзэ егитгес агайлы сётӥз ке но, со азьло сямен ик филиаллэн комитетэзлы юрттӥськиз. Верзеллийлэн, Давид эксэйлэн но Сигэо агайлэн учыръёсысьтызы адӟиське: адями, кудӥз зӥбыт-востэм луэ но вала, ваньзэ лэсьтыны уг быгаты шуыса, егитъёслэн юн палъёссылы саклыксэ висъя. Со соослы уг вожъяськы, нош соосын ӵош ужа-тырше (Мад. 20:29).

10. Кызьы арлыдо вын-агайёс но сузэр-апайёс егитъёс шоры учко?

¹⁰ Арлыдо вын-агайёс но сузэр-апайёс егитъёсты Иеговалэн кузьымез шуыса лыдъяло но солы туж тау каро соос понна. Соослэн асьсэлэн кужымзы ӧжытгес но ӧжытгес луэ, соин ик соос туж тау каро егит вын-агайёслы но сузэр-апайёслы, соос кенешын но ужан-тыршонын ас вылазы тросгес ужъёс басьтыны дась шуыса.

11. Кызьы Ноеминьлэн учырез возьматэ, малы арлыдоослы егитъёслэсь юрттэмзэс палэнтоно ӧвӧл? (Руфь 4:13—16).

¹¹ Ноеминьлэн учырез возьматэ, кызьы арлыдоос егитъёслэсь юрттэмзэс тау карыса басьтыны быгато. Нырысь Ноеминь туж куриз Руфь кензэ, кудӥз палкышно кылиз, аслаз калыкез доры берытскыны. Нош Руфь Ноеминез кельтыны ӧз но малпа но соин ӵош Вифлееме мыныны куриськиз. Ноеминь  Руфен соглаш луиз но солэсь юрттэтсэ ӧз палэнты (Руфь 1:7, 8, 18). Озьы та кык кышномуртъёс выльысь шумпотыса улыны кутскизы! (Лыдӟе Руфь книгаез 4:13—16.) Зӥбыт-востэм сям арлыдоослэсь мылкыдзэс ӝутоз Ноеминьлэсь адӟем карыны.

12. Кинлы апостол Павел тау кариз но мар понна?

¹² Апостол Павел но туж тау кариз вын-агайёслы но сузэр-апайёслы соослэн юрттэмзы понна. Кылсярысь, филиппыослы гожтэтаз со тау кариз соослэн кенешсылы солы ваньбурен юрттэмзы понна (Флп. 4:16). Со туж дунъяз Тимофейлэсь но юрттэмзэ (Флп. 2:19—22). Куке Павелэз Риме пытсэтэ пуктыны нуизы, со тау кариз Инмарез вын-агайёс понна, кудъёсыз сое юнматыны лыктӥзы (Ап. уж. 28:15). Апостол Павел туж ужась адями вал. Со трос иськемъёс ортчиз, кенешъёс но тодытон уж сярысь сюлмаськон понна. Нош со дыре ик со вын-агайёслэсь но сузэр-апайёслэсь юрттэмзэс ӧз палэнты.

13. Кызьы арлыдоос Иеговалы тау каремзэс возьматыны быгато егитъёс понна?

¹³ Арлыдо вын-агайёс но сузэр-апайёс, тӥ пӧртэм сямен Иеговалы тау карыны быгатӥськоды кенешысьтыды егитъёс понна. Соос ӵекто ке тӥледыз машинаен нуыны, мае ке басьтыны яке корка котырады юрттыны, соглаш луэ. Эн вунэтэ: соослэн сюлмаськемзы пыр Иегова тӥледлы яратэмзэ возьматэ. Со сяна, егит вын-агайёс но сузэр-апайёс тӥледлы матысь эшъёс луыны быгато. Юрттэ соослы Инмарен кусыпъёссэс юнматыны. Ӵемгес вералэ соослы, макем дунъяськоды ужан-тыршонэ но кенешлэн ужъёсаз ӟырдыт мылкыдын пыриськемзэс. Соосын дырдэс ортчытъялэ. Вералэ соослы, малы тӥ дышетскиды быдэс улонды ӵоже. Озьы тӥ возьматоды Иеговалы тау каремдэс егитъёс понна, кудъёссэ со аслаз кенешаз вайиз (Иоанн 6:44; Кол. 3:15; 1 Фес. 5:18).

14. Кызьы Давид эксэй шырыт сямо луэмзэ возьматӥз?

¹⁴ Арлыдоос Давид эксэйлэсь дышетскыны быгато, кызьы шырыт сямо луоно. Аслаз ваньбурезлэсь бадӟым люкетсэ Давид храмез пуктон понна сётӥз (1 Пар. 22:11—16; 29:3, 4). Нош со дыре ик со тодӥз, храмез пуктон понна, Соломон пизэ данъялозы шуыса. Тӥ организациямы пуктӥськон-тупатъян ужъёсы пыриськыны уд ке быгатӥське, тӥ азьло сямен ик быгатӥськоды юрттыны ас мылкыд каремдыя сётэм коньдонэн. Озьы ик тӥ быгатӥськоды егитъёсты дышетыны солы, малы тӥ асьтэос трос аръёс ӵоже дышетскиды.

15. Кызьы Павел Тимофейлы шырыт сямо луэмзэ возьматӥз?

¹⁵ Апостол Павел но шырыт сямо вал. Со Тимофейлы ӵектӥз соин ӵош миссионер луыса ужаны-тыршыны. Павел ӧз жаля дырзэ, Тимофеез тодытон но дышетскисьёсты дасян амалъёслы дышетон понна (Ап. уж. 16:1—3). Солы луыса Тимофей умой тодытӥсь луиз. Озьы ик ачиз но мукетъёссэ дышетыны быгатӥз солы, мае Павеллэсь тодӥз (1 Кор. 4:17).

16. Малы Сигэо мукет вын-агайёсты дышетӥз?

¹⁶ Туннэ но арлыдо христианъёс егитъёсты дышето. Соос уг кышкало но уг малпало, соосты номырлы ярасьтэм адямиен лыдъялозы шуыса. Кылсярысь, Сигэо агай трос аръёс ӵоже филиаллэн комитетысьтыз егитгес вын-агайёсты дышетӥз. Малы? Солэн потэ вал, Эксэйлыклэн ужез мед азьланьтӥськоз шуыса со шаерын но, кытын со ужа-тырше вал. Нош куке солы ужъёссэ быдэсъяны секытгес луиз, со интые та ужез быдэсъяны кутскиз умой дышетэм агай. Сигэо  агай 45 арлэсь но кемагес ини филиаллэн комитетаз ужа-тырше но азьланьтэ дышетыны егитгес вын-агайёсты солы, малы та аръёс ӵоже ачиз дышетскиз. Кыӵе умой, Инмарлэн калыкез пӧлын сыӵе христиан муртъёс вань шуыса!

17. Мар карыны быгато арлыдо христианъёс, Лукалэсь 6:38 лыдэ басьтыса?

¹⁷ Арлыдо вын-агайёс но сузэр-апайёс, асьтэлэн улонэныды тӥ возьматӥськоды, Иеговалы оскымон ужан-тыршонлэсь номыр но умойгес ӧвӧл шуыса. Тӥ туж тыршиды Библиысь возетъёсты тодыны но соосъя улыны. Тӥляд улонды возьматэ, со трос пайда вае шуыса. Тӥ асьтэос адӟиды, кызьы азьло организациямы пӧртэм ужъёс мынӥзы. Но тӥ валаськоды: дыр интыяз уг сылы, соин ик тӥледлы выль югдуръёслы дышоно. Со арлыдо христианъёс но, кудъёсыз алигес пылатӥськизы, быгато егитъёсты малы ке дышетыны. Егитъёслы тунсыко луоз тодыны, кызьы Иегова сярысь зэмлык тӥлесьтыд улондэс воштӥз но малы тӥ дышетскиды быдэс улонды ӵоже. Та аръёс ӵоже люкам визьлыкты но быгатонлыкъёсты сярысь мукетъёслы но верады ке, Иегова тӥледыз бакель кароз. (Лыдӟе Лукалэсь 6:38.)

18. Кызьы арлыдо но егит христианъёс ог-огзылы юрттыны быгато?

¹⁸ Арлыдоослэн но, егитъёслэн но юн палъёссы вань. Арлыдоослэн вань визьлыксы но быгатонлыкъёссы, кудъёссэ соос вань улонзы ӵоже люказы. Нош егитъёслэн вань трос кужымзы. Арлыдоос но егитъёс ог-огенызы дырзэс ӵош ортчытъяло ке, соос ог-огзэс юнматыны быгато (Рим. 1:12). Шумпотоно адӟыны, кызьы егит но арлыдо христианъёс ӵош ужало-тыршо но эшъясько. Озьы соос яратӥсь инмысь Атаймес данъяло но быдэс кенешез юнмато!