1. Кыӵе кусыпъёссы луыны быгато Иеговалэн но адямиослэн?

 ИЕГОВАЛЭН семьяез бадӟым. Отчы пыро Иисус, кудӥз «вань кылдытэм макеослэсь азьвыл вордскемын», но туж трос кылчинъёс (Кол. 1:15; Пс. 102:20). Озьы ик Иеговаез асьсэлэн Атаенызы ниманы быгато солы оскымон адямиос но. Та сярысь верало Иисуслэн кылъёсыз, кудъёссэ со дышетскисьёсызлы вераз: «Аслам Атае доры, тӥляд Атайды доры... ӝутскисько» (Иоанн 20:17). Соин ик, куке ми улонмес Иеговалы сӥзиськомы но пылатӥськиськомы, ми луиськомы солэн семьяез пӧлын, кудаз пыро вын-агайёс но сузэр-апайёс (Марк 10:29, 30).

2. Мае ми эскеромы та статьяын?

² Куд-огъёсызлы секыт Иегова шоры учкыны, асьсэлэн яратӥсь атайзы шоры кадь. Нош кинлы ке но вын-агайёслы но сузэр-апайёслы яратонзэ возьматыны секыт. Та статья возьматоз, пичи пиналлэн атаеныз кусыпъёсыз кадь ик, милям но Инмарен матысь кусыпъёсмы луыны быгато шуыса. Тае валаны милемлы юрттэ Иисуслэн но Иеговалэн кусыпъёссы. Озьы ик тодомы, кызьы ми вын-агайёсмы но сузэр-апайёсмы шоры Иегова сямен учкыны быгатомы.

3. Кызьы Иисуслэн вӧсяськонэз юрттэ милемлы Иеговалы матэгес луыны?

³ Иегова кыӵе ке кузё кадь ӧвӧл, кудӥз аслэсьтыз кылзӥськыны гинэ косэ. Инмар яратӥсь атай кадь, кудӥз котькыӵе дыре дась милемыз кылзыны но милемлы юрттыны. Ӵапак озьы учкиз со шоры Иисус. Со сяна, Иисуслэн потэ, милям но Инмарен сыӵе ик кусыпъёсмы мед луозы шуыса. Соин ик со вӧсяськонзэ таӵе кылъёсын кутскиз: «Инмысь Атаймы» (Матф. 6:9). Библиын гожтэмын Иеговалэн трос титулъёсыз, кылсярысь, «Ваньмызлэсь Кужмо», «Кылдытӥсь», «Пумтэм вапумъёсысь  Эксэй» (Ул.-выл. 49:25; Ис. 45:18; 1 Тим. 1:17). Иисус вераны быгатысал, ми Инмарлы та титулъёсъя мед вазиськомы шуыса, нош со милемыз дышетӥз Иеговалы лякытэн «Атай» шуыса вазиськыны.

4. Потэ-а Иеговалэн, милям соин матысь кусыпъёсмы мед луозы шуыса? Валэктэ.

⁴ Капчи-а тӥледлы Иегова шоры яратӥсь Атай шоры кадь учкыны? Куд-огезлы со капчи ӧвӧл. Кинлэн ке но пичи дырыз ортчиз сыӵе семьяын, кытын атайзы яратэмзэ ӧз возьматы. Нош Иегова милесьтым шӧдонъёсмес вала. Озьы ик вала сое, малы милям сыӵе шӧдонъёсмы кылдо. Макем буйгатэ милемыз та малпан! Инмарлэн потэ, милям соин матысь кусыпъёсмы мед луозы шуыса. Соин ик солэн Кылаз верамын: «Инмарлы матэ кариське, Со но тӥляд матады лыктоз» (Иак. 4:8). Иегова яратэ милемыз. Солэн потэ милемлы самой умой Атай луэмез.

5. Лукалэсь 10:22 лыдэ басьтыса, кызьы Иисус юрттэ милемлы Иеговалы матэ кариськыны?

⁵ Иисус юрттэ милемлы Иеговалы матэ кариськыны. Со Атайзэ туж умой тодэ но солэсь быдэсак адӟем каре. Иисус вераз: «Монэ адӟись мурт Атаез адӟиз» (Иоанн 14:9). Бадӟымез агаймы сямен ик, Иисус дышетэ милемыз Инмысь Атаймес гажаны но солэсь кылзӥськыны. Эшшо со валэктэ, мар кароно, Иеговаез шумпоттон понна, нош мар кароно ӧвӧл, сое ӝоже медам уськытэ шуыса. Иисуслэн улонысьтыз учыръёс троссэ верало милемлы Иеговалэн ӟеч луэмез но яратэмез сярысь. (Лыдӟе Лукалэсь 10:22.) Ойдолэ та сярысь пыр-почгес вераськомы.

6. Кыӵе учыръёсысь адӟиське, Иегова Иисуслэсь вӧсяськонъёссэ кылӥз шуыса?

⁶ Иегова сак кылзэ аслэсьтыз нылпиоссэ. Тани кызьы со кылзӥз аслэсьтыз нырысь вордскем Пизэ. Музъем вылын ужакуз-тыршыкуз, Иисус ӵем дыръя аслаз Атаезлы вӧсяськылӥз, нош Атаез сое сак кылзӥз (Лука 5:16). Иегова кылзӥз, кызьы солэн Пиез вӧсяськиз кулэ луись ужпумъёс кутон азяз, кылсярысь, 12 апостолъёсты бырйыкуз (Лука 6:12, 13). Озьы ик Иегова Иисусэз кылзӥз, куке со улонэзлэн секыт дыръёсаз солы аслаз сюлмаськонъёсыз сярысь вераз. Со  уе, куке Иисусэз вузазы, со вань сюлмысьтыз Атаезлэсь кужым куриз вуоно визь сынаськонъёсты чиданы. Иегова аслэсьтыз дуно Пизэ кылзэм сяна, кылчинзэ но со доры ыстӥз, сое юнматон понна (Лука 22:41—44).

7. Кыӵе шӧдонъёсты тӥляд кылдо, куке тодӥськоды, Иегова вӧсяськонъёстэс кылзэ шуыса?

⁷ Озьы ик туннэ но Иегова ужась-тыршисьёсызлэсь вӧсяськонъёссэс кылзэ. Со соослы ответ сётэ тупась дыре но самой умой амалэн (Пс. 114:1, 2). Индиысь одӥг сузэр тае ас вылаз шӧдӥз. Со курадӟиз висёнэн, кудӥз сэрен со мултэс сюлмаськыса улэ вал. Со вань сюлмысьтыз Иеговалэсь юрттэт куриз. Тани мае со гожтӥз: «2019-тӥ арын куартолэзь понна JW Broadcasting^® программа поттэмын вал со сярысь, кызьы сюлмаськонъёсын но сюлэмшугъяськонъёсын нюръяськоно. Со ӵапак мон понна поттэмын вал но вӧсяськонъёсылы ответ луиз».

8. Кызьы Иегова Иисуслы яратэмзэ возьматӥз?

⁸ Иегова милемлы яратэмзэ возьматэ озьы ик, кызьы Иисуслы возьматӥз, куке со музъем вылын улӥз (Иоанн 5:20). Иегова сюлмаськиз Иисус сярысь но сётӥз солы ваньзэ, мар кулэ, со ужаны-тыршыны мед быгатоз, ассэ умой мед шӧдоз но улон понна ваньмыз кулэез мед луоз шуыса. Эшшо Иегова аслаз Пиезлы яратэмзэ возьматӥсь кылъёс вераз но ушъяз сое (Матф. 3:16, 17). Иисус котькыӵе дыре аслаз яратӥсь Инмысь Атаез вылэ оскиськыны быгатӥз, соин ик ноку но ӧз шӧды, одӥгназ кылиз шуыса (Иоанн 8:16).

9. Мар оскытэ тӥледыз, Иегова милемыз яратэ шуыса?

⁹ Иисус сямен ик, ми пӧлысь котькудӥз шӧдэ, Иегова сое яратэ шуыса. Малпаське, макем трос Иегова милемлы сётэ! Со милемыз ас дораз вайиз, милемын эшъяськон понна, но кузьмаз милемлы яратӥсь вын-агайёсты но сузэр-апайёсты, кудъёсыз милемлы шумпотыса улыны юртто но юнмато милемыз, куке шуг-секытъёсын пумиськиськомы (Иоанн 6:44). Иегова сётэ милемлы ваньзэ кулэзэ, милям осконмы медаз лябӟы шуыса. Озьы ик со сюлмаське нуналлы быдэ кылдӥсь кулэяськонъёсмы сярысь (Матф. 6:31, 32). Макем тросгес ми малпаськомы Иеговалэн милемыз яратэмез сярысь, сокем юнгес ми но сое яратомы.

10. Малы дышетэ милемыз со, кызьы Иегова вын-агайёсмы но сузэр-апайёсмы шоры учке?

¹⁰ Иегова яратэ вын-агайёсмес но сузэр-апайёсмес, нош милемлы куд-ог дыръя капчи ӧвӧл соослы яратэммес возьматыны яке со сярысь вераны. Талы паймонэз ӧвӧл, малы ке шуоно ваньмы ми пӧртэм сямен но пӧртэм сям-йылолъёсъя будэтэмын. Озьы ик ми ваньмы куддыръя янгышаськомы но ог-огмес вӧсь кариськомы. Озьы ке но ми быгатӥськомы вын-агайёсмес но сузэр-апайёсмес яратыса улыны. Со понна милемлы соос шоры Инмысь Атаймы сямен учконо (Еф. 5:1, 2; 1 Иоанн 4:19). Ойдолэ малпаськомы, кызьы Иегова яратэмзэ возьматэ но кызьы ми солэсь адӟем карыны быгатӥськомы.

11. Кызьы Иисус, Иегова сямен ик, адямиослы жалямзэ возьматӥз?

¹¹ Иегова вань «сюлмысьтыз гажан-жалянзэ» возьматэ (Лука 1:78). Куке гажась-жалясь адями адӟе, кин ке но шуге-леке сюриз шуыса, со вӧзтӥз уз ортчы. Со юрттоз солы но буйгатоз сое. Озьы ик Иегова но учке адямиос шоры, нош Иисус солэсь та ласянь адӟем каре (Иоанн 5:19). Трос калыкез адӟыса, Иисус соосты жаляз, малы ке шуоно соос «возьмаськисьтэк кылем ыжъёс кадь» катьтэммемын но пазьгиськемын вал (Матф. 9:36). Адямиосты жалям сяна, Иисус висисьёсты бурмытъяз но «курадӟыса, шугадӟыса улӥсьёслы» юрттыны тыршиз (Матф. 11:28—30; 14:14).

12. Кызьы ми гажан-жалянмес возьматыны быгатӥськомы вын-агайёсмылы но сузэр-апайёсмылы?

 ¹² Вын-агайёсмылы но сузэр-апайёсмылы гажан-жалянмес возьматон понна, малпаськыны кулэ, кыӵе шуг-секытъёсын соос пумиськыло. Шуом, сузэрмылэн секыт висёнэз вань. Мукетъёсызлы висёнэз сярысь со уг вера ке но, со шумпотысал, дыр, ми солы юрттысалмы ке. Быгатэ-а со корка котырысь ужъёссэ быдэсъяны? Оло нош, солы юрттыны кулэ сиён дасяны яке корказэ утялтыны? Яке, шуом, агаймы ужзэ ыштӥз. Быгатысалды-а тӥ солы кӧня ке коньдон сётыны, та коньдон тӥлесьтыд шуыса вератэк но? Озьы тӥ солы юрттыны быгатоды, мукет уж шедьтытозяз.

13, 14. Кызьы ми Иегова кадь шырыт сямо луыны быгатӥськомы?

¹³ Иегова шырыт сямо (Матф. 5:45). Милемлы возьмано ӧвӧл, куке вын-агайёсмы яке сузэр-апайёсмы милесьтым юрттэт курозы. Иегова сямен ик, милемлы асьмелы нырысь юрттэт ӵектоно. Малпаське: адямиослы Иеговаез куроно ӧвӧл, ӵуказе шунды мед ӝужалоз шуыса. Нош учконо ке, шунды котькинэ шунтэ, озьы ик соосты но, кинъёс Иеговалы со понна тау уг каро. Тӥ соглаш луоды, дыр, Иеговалэн ми сярысь сюлмаськемез возьматэ, со милемыз яратэ шуыса. Ми туж яратӥськомы Иеговаез, со ӟеч но шырыт сямо шуыса.

¹⁴ Инмысь Атаймы сямен ик, тросэз вын-агайёсмы но сузэр-апайёсмы шырыт сямзэс возьмато, соосты со сярысь уг куро ке но. Кылсярысь, 2013-тӥ арын Филиппиныын «Хайян» кужмо сильтӧл ортчиз. Соку тросэз вын-агайёсмы но сузэр-апайёсмы коркаостэк но ваньбуртэк кылизы, нош дунневыл вынлыкмы соку ик юрттыны лыктӥз. Тросэз асьсэлэсь коньдонзэс сётъязы яке лэсьтӥськон-тупатъян ужъёсы пыриськизы. Ар но ӧз ортчы, ас мылкыд каремзыя юрттӥськись вын-агайёсмы но сузэр-апайёсмы ог 750 коркаосты выльысь пуктӥзы но тупатъязы! Адӟись-Ивортӥсьёслэн ог-огзылы юрттыны дась луэмзы умой адӟиськиз COVID-19 пандемия дыръя но. Огъя оскисьёсмы пӧлысь кин ке но шуге-леке сюре ке, ми соку ик солы юрттӥськомы. Озьы ми возьматӥськомы, вын-агайёсмес но сузэр-апайёсмес яратӥськомы шуыса.

15, 16. Кызьы милемлы адӟем кароно инмысь Атаймылэсь, Лукалэсь 6:36 лыдэ басьтыса?

 ¹⁵ Иегова гажась-жалясь но простить карыны дась. (Лыдӟе Лукалэсь 6:36.) Тае ми шӧдӥськомы котькуд нунал (Пс. 102:10—14). Иисус но аслаз дышетскисьёсызлы гажась-жалясь луэмзэ возьматӥз, соос тырбыдэстэмесь вал ке но. Со сяна, со аслэсьтыз улонзэ но сётыны дась вал, милесьтым сьӧлыкъёсмес куштон понна (1 Иоанн 2:1, 2). Кыӵе умой, милям Иеговаен но Иисусэн матысь кусыпъёсмы луыны быгато шуыса!

¹⁶ Вын-агайёсынымы но сузэр-апайёсынымы кусыпъёсмы эшшо но юнгес мед луозы шуыса, милемлы ог-огмес вань сюлмысьтымы простить карылоно (Еф. 4:32). Зэм но, куддыръя простить карыны туж секыт луэ. Одӥг сузэрмылы туж юрттӥз «Великодушно прощайте друг друга» статья b. Тани мае со гожтӥз: «Та статья мыным юрттӥз простить карон шоры мукет сямен учкыны но солэсь умой палъёссэ адӟыны. Отын вераськиз: „Мукетъёссэ простить карыны дась луон уг возьматы, тӥ мукетъёслэсь урод ужъёссэс умоен лыдъяськоды шуыса яке уродэзлы синдэс ворсаськоды шуыса. Простить карон возьматэ вӧсь карем понна йыркуръяськытэк но каньыл сюлмын улэмез“». Ми вын-агайёсмес но сузэр-апайёсмес простить кариськомы ке но соослы йыркурмес ум ке возиське, озьы возьматӥськомы, соосты яратӥськомы шуыса но Иегова Атаймылэсь адӟем кариськомы шуыса.

17. Кызьы ми инмысь Атаймес данъяны быгатӥськомы, Матфейлэсь 5:16 гожтэмъя?

¹⁷ Ми понна бадӟым дан яратӥсь дунневыл вынлыкмы пӧлы пырыны но ваньмы ӵош Инмарлы йыбыртъяны. Милям потэ, тросгес адямиос таӵе шумпотонэз мед шедьтозы шуыса. Соин ик милемлы сак луоно, инмысь Атаймылэсь но солэн калыкезлэсь нимзэс медам сапталэ шуыса. Ми асьмеды котьма ласянь возьыны тыршиськомы озьы, ми шоры учкыса, адямиослэн Иеговалы ужамзы-тыршемзы мед потоз шуыса. (Лыдӟе Матфейлэсь 5:16.)

18. Мар юрттоз милемлы кышкатэк тодытыны?

 ¹⁸ Инмысь Атаймылэсь кылзӥськеммы понна куддыръя адямиос милемыз серекъяло яке уйыло-улляло. Сыӵе учыре тодытыны капчи ӧвӧл, дыр. Мар юрттоз милемлы кышкасьтэм луыны? Ми котьку но оскыны быгатӥськомы, Иегова но солэн Пиез милемлы юрттозы шуыса. Иисус аслэсьтыз дышетскисьёссэ оскытӥз: «Нош тӥледыз кутыса сётылыкузы, эн сюлмаське, кызьы яке мар вералом шуыса,— уго тӥледлы сётӥськоз со дыре мар вераны. Соку тӥ уд вералэ, тӥ пушкысь Атайдылэн Духез вералоз» (Матф. 10:19, 20).

19. Кызьы Инмарлэн духез юрттэ милемлы кышкатэк тодытыны? Вералэ пример.

¹⁹ Эскеромы Лымшор Африкаысь Робертлэсь учырзэ. Тани мар соин луиз, куке со Библиез дышетыны кутскиз но трос тодон-валанъёсыз ӧй вал на. Армиын служить карыны пумит луэмез понна, Робертэз судить каризы. Со кышкатэк вераз, кияз ожтӥрлык уз басьты шуыса, малы ке шуоно яратэ быдэс дунне вылын улӥсь вын-агайёссэ. Озьы Роберт возьматӥз, Иеговалэн семьяяз луыны данэз со туж дунъя шуыса! Шӧдтэк шорысь судья солэсь юаз: «Нош кин тынад вын-агайёсыд?» Роберт та юанлы дась ӧй вал. Нош со соку ик тодаз вайиз со нуналлы кылбурез: «Кин быдэсъя Инмысь Атаелэсь эриксэ, со луэ Мыным брат но, сузэр но, анай но» (Матф. 12:50). Роберт Библиез кемалась уг дышеты вал ке но, Инмарлэн духез юрттӥз солы судьялэн возьмамтэ шорысь сётэм юанъёсызлы валэктонъёс сётыны. Иегова Робертэн данъяськиз, луоз! Со милемын но данъяське, куке ми солэсь кышкасьтэм сям куриськомы, огшоры луисьтэм югдуръёсын мукетъёсызлы со сярысь вераны мед быгатомы шуыса.

20. Мар карыны милям юн мылкыдмы луыны кулэ? (Иоанн 17:11, 15).

²⁰ Ми туж тау кариськомы, Иеговалэн яратӥсь семьяяз пыриськомы шуыса! Милям вань самой умой Атаймы но трос оскымон вын-агайёсмы но сузэр-апайёсмы. Тае туж дунъяны кулэ. Шайтан но солэн периосыз лэсьто ваньзэ, ми медам оске ни, Иегова милемыз яратэ шуыса. Озьы ик соос тыршо огкылысь улонмес сӧрыны. Тае валаса, Иисус Атайзэ куриз милемыз утьыны, милям семьямы юн мед кылёз шуыса. (Лыдӟе Иоаннлэсь 17:11, 15.) Иегова та вӧсяськонэзлы ответ сётэ. Ойдолэ, Иисус сямен ик, котьку но оскомы, Иегова милемыз яратэ но милемлы юрттыны дась шуыса. Озьы ик ойдолэ азьланяз но тыршомы вын-агайёсынымы но сузэр-апайёсынымы кусыпъёсмес юнматыны!