1. Кызьы, Библия верамъя, Иегова адямиос шоры учке, но малы со милемыз шумпоттэ?

 КЕЛЬШЫСАЛ-А тӥледлы, адямиос тӥледыз судъясалзы ке соя, кыӵе тӥляд куды, ымнырды яке мугорды? Ӧз, дыр. Кыӵе умой, Иегова милемыз вылтусмыя уг судъя шуыса! Кылсярысь, куке Самуил учкиз Иессейлэн пиосыз шоры, со ӧз адӟы сое, мае адӟиз Иегова. Инмар вераз Самуиллы, Иессейлэн одӥгез пиез Израильлэн эксэез луоз шуыса. Нош кудӥз? Куке Самуил адӟиз Елиавез, Иессейлэсь бадӟымзэ пизэ, со малпаз: «Зэм, та Кузё-Инмар азьын вӧйын зырӟоно мурт!» Елиав йӧно пиосмурт вал, соин ик Самуил малпаз, со эксэй луоз шуыса. Но Иегова Самуиллы шуиз: «Солэн тусбуез шоры, ӝуждалаез шоры эн учкы; Мон сое кулэ ӧй кары». Малы со милемыз дышетэ? Иегова азьланьтӥз: «Мон уг учкиськы адями кадь, уго адями ымныр шоры учке, нош Кузё-Инмар сюлэм шоры учке» (1 Экс. 16:1, 6, 7).

2. Малы лыдэ басьтоно визь-кенешез, кудӥз гожтэмын Иоаннлэсь 7:24? Вералэ пример.

² Тырбыдэстэм луэммы сэрен, милям сяммы вань адямиосты вылтуссыя судъяны. (Лыдӟе Иоаннлэсь 7:24.) Нош вылтусъя гинэ адями сярысь ваньзэ тодыны уг луы. Кылсярысь, быгатӥсь эмъясь, висись шоры учкыса гинэ, адямилэн висёнэз сярысь пыр-поч вераны уг быгаты. Тодон понна, маин адями азьвыл висиз, мар сое али шугъяськытэ но кыӵе висёнъёсыз солэн луыны быгато, эмъясьлы висись адямиез сак кылзоно. Со висись муртэ курыны быгатэ рентген карыны. Тазьы лэсьтытэк, эмъясь уз но вала, вылды, маин адями зэмзэ но висе. Озьы ик ми но ум быгатэ вын-агайёсмес но сузэр-апайёсмес валаны, соослэн вылтуссы шоры гинэ учкимы  ке. Милемлы мургес учкыны тыршоно — валаны тыршоно, кыӵе со адями луэ. Зэм но, ми ум тодӥське, мар адямиослэн сюлмазы, соин ик ми ноку но ум валалэ соосты сокем умой, кызьы соосты Иегова вала. Озьы ке но ми Иеговалэсь адӟем карыны быгатӥськомы. Нош кызьы?

3. Кызьы Библиысь учыръёс, кудъёссэ ми та статьяын эскеромы, юрттозы милемлы Иеговалэсь адӟем карыны?

³ Кызьы Иегова ассэ возе аслаз ужась-тыршисьёсыныз? Со соосты сак кылзэ. Со лыдэ басьтэ ваньзэ: мар пыр соос азьвыл потӥзы но маин соос али пумисько. Со соослы гажан-жалянзэ возьматэ. Ойдолэ эскеромы, кызьы Иегова ассэ возиз Ионаен, Илияен, Агарен но Лотэн. Озьы ик ми малпаськомы, кызьы Инмарлэсь адӟем кароно со пумысен, кызьы асьмеды вын-агайёсын но сузэр-апайёсын возёно.

4. Маин сэрен ми умойтэм малпаны быгатысалмы Иона сярысь?

⁴ Ионалэн учырез сярысь ваньзэ тодытэк, ми малпаны быгатысалмы, со оскиськымон адями ӧй вал но Инмарлэсь кылзӥськисьтэм вал шуыса. Иегова солы валамон курон-косон сётӥз: Ниневияын улӥсьёслы аслэсьтыз приговорзэ вераны. Со интые, Иеговалэн «син азьысьтыз... уяса кошкон понна», Иона пуксиз корабле, кудӥз чылкак мукет пала мынӥз (Иона 1:1—3). Сётысалды-а тӥ Ионалы эшшо одӥг луонлык та ужез быдэстыны? Оло, ӧд но. Нош Иегова мукет сямен учкиз (Иона 3:1, 2).

5. Мар ми тодӥськомы Иона сярысь вӧсяськонысьтыз, кудӥз гожтэмын Ионалэсь 2:2, 3, 10?

⁵ Кыӵе адями Иона зэмзэ но вал, адӟиське солэн вӧсяськонысьтыз. (Лыдӟе Ионалэсь 2:2, 3, 10.) Веранэз ӧвӧл, Иона трос пол Иеговалы вӧсяськылӥз. Одӥгез соос пӧлысь валаны юрттэ: Иона сётэм ужезлэсь кышкаса пегӟиз ке но, со зӥбыт-востэм, тау карись но Иеговалэсь кылзӥськыны мылкыд карись адями вал. Паймонэз ӧвӧл, Ионалэн янгышез шоры учкытэк, Иегова солэн вӧсяськонэзлы ответ сётӥз, озьы ик азьланяз но лэзиз пророкез луыса ужаны-тыршыны.

6. Малы кулэ мукетъёсты сак кылзыны?

⁶ Мукетъёссэ сак кылзон понна, зӥбыт-востэм но чидась луоно. Нош тыршыны кулэ ик, но солы самой ӧжытэз куинь мугъёс вань. Нырысетӥез, солы луыса ми агаймы сярысь умойтэм ум малпалэ, вылды. Кыкетӥез, ми валаны быгатомы, мар агаймы  зэмзэ ик шӧдэ но малы со озьы яке тазьы лэсьтэ, озьы ик солы тросгес гажан-жалянмес возьматомы. Но куинетӥез, ми юрттомы агайлы ассэ умойгес валаны. Куддыръя адями аслэсьтыз гинэ но шӧдонъёссэ уг вала, соос сярысь кинлы ке но вератэк (Мад. 20:5). Азиысь одӥг тӧро вераз: «Одӥг пол мон, сузэрез кылзытэк, сое тупатъяны кутски. Мон верай, солы умоятоно шуыса валэктонъёссэ, кудъёссэ со кенешлэн пумиськонъёсаз сётъя. Нош берлогес мон тодӥ: со умой лыдӟиськыны уг быгаты но, пумиськонъёслы дасяськон понна, солы туж тыршоно луэ». Макем кулэ тӧроослы сак кылзыны, визь-кенеш сётэмзылэсь азьло! (Мад. 18:14).

7. Малы ми дышетскиськомы отысь, кызьы Иегова ассэ Илияен возиз?

⁷ Куд-ог вын-агайёслы но сузэр-апайёслы шӧдонъёссы сярысь вераны секыт, малы ке шуоно соос озьы будэтэмын яке соослэн сямзы сыӵе. Кызьы соослы юрттоно? Тодады вае, мар кариз Иегова, куке Илия Иезавельлэсь ватскыса улӥз. Трос нуналъёс ортчыса гинэ, Илия инмысь Атаезлы сюлэмзэ усьтыны быгатӥз. Иегова сое сак кылзӥз. Собере со Илиялэсь мылкыдзэ ӝутӥз но солы кулэ луись уж сётӥз (3 Экс. 19:1—18). Милемын кышкатэк вераськон понна, вын-агайёсмылы но сузэр-апайёсмылы дыр кулэ луоз, вылды, но соку гинэ соос зэмос шӧдонъёссы сярысь вераны быгатозы. Иеговалэсь адӟем карыса, ми чиданмес возьматӥськомы ке, соку соос милемлы оскозы. Нош куке соос шӧдонъёссы сярысь вераны дась луозы, милемлы соосты сак кылзоно.

8. Улон-вылонэз 16:7—13 лыдэ басьтыса, кызьы Иегова Агарьлы юрттӥз?

⁸ Агарь, Саралэн медо нылыз, Аврамлы кышно луыса, ассэ визьмо воземысь дугдӥз. Агарь секытэн луиз но синазькыль карыны кутскиз кузё кышнозэ, кудӥзлэн нылпиосыз ӧй вал. Сара Агарез сокем ёртыса возиз, Агарь дорысьтыз но пегӟоно луиз (Ул.-выл. 16:4—6). Тырбыдэстэмесь луыса, ми малпаны быгатомы, Агарь вылтӥяськись кышномурт вал но юнме гинэ кылкутытэмын ӧй вал шуыса. Нош Иегова мургес учкиз. Агарь доры со кылчинэз ыстӥз. Сое шедьтыса, кылчин юрттӥз солы мылкыдзэ тупатыны но оскытӥз, Иегова сое уз кельты шуыса. Агарь валаз, Иегова ваньзэ адӟе но солэсь югдурзэ умой тодэ шуыса. Со Иеговалы вераз: «Тон монэ адӟись Инмар». (Лыдӟе Улон-вылонэз 16:7—13.)

9. Мае Инмар тодӥз Агарь сярысь но кызьы со соин ассэ возиз?

⁹ Мае тодӥз Иегова Агарь сярысь? Со тодӥз вань азьвыл улонэз сярысь но со сярысь, мар пыр солы потоно луиз (Мад. 15:3). Агарь Египетысь вуэмын вал, но со еврей семьяын улӥз. Куддыръя со малпаз, вылды, со нокинлы кулэ ӧвӧл шуыса. Агарь семьяезлэсь но вордӥськем музъемезлэсь мӧзме вал, луоз. Со сяна, Аврамлэн мукет но кышноосыз вал. Со дыре Инмарлы оскымон куд-ог пиосмуртъёс кӧня ке кышноос басьтылӥзы. Нош Иегова, нырысетӥ адямиосты кылдытыкуз, озьы ӧз малпа (Матф. 19:4—6). Паймонэз ӧвӧл, сыӵе югдур кылдэмен, семьяосын вожъяськон но керетонъёс потылӥзы. Иегова тодӥз ке но, Агарь Сараен ассэ шонертэм возиз шуыса, ми оскыны быгатӥськомы: Инмар валаз солэсь шӧдонъёссэ но югдурзэ.

10. Кызьы ми умойгес тодыны быгатӥськомы вын-агайёсмес но сузэр-апайёсмес?

¹⁰ Ми Иеговалэсь адӟем кариськомы, адямиосты валаны тыршыса. Со понна вын-агайёсын но сузэр-апайёсын умойгес тодматске. Вераське соосын кенешлэн пумиськонъёсыз  кутскемлэсь азьло но йылпумъяськемзы бере, соосын ӵош тодытэ но быгатэмдыя соосты куное ӧтьылэ. Соку тӥ ваньзэ мукет сямен адӟоды. Кылсярысь, сузэр, кудӥныз, ми малпамъя, эшъяськыны секыт, зэмзэ вераса, возьдаськись; агай, кудӥзлэн коньдонэз трос, солы гинэ саклыксэ уг висъя, нош шырыт сямо луыны тырше; нылпиосын анай, кудӥз ӵем дыръя пумиськонъёсы дырыз дыръя уг вуы, семьяяз шуг-секытъёсын пумиськылэ (Матф. 7:1). Зэм но, ми адямиослэн ужъёсынызы укыр трос тунсыкъяськыны кулэ ӧвӧл (1 Тим. 5:13). Озьы ке но умой луысал тросгес тодыны вын-агайёсмы но сузэр-апайёсмы сярысь но соослэн улонзы сярысь.

11. Малы тӧроос кенешысьтызы ыжъёссэс умой тодыны кулэ?

¹¹ Тужгес но тӧроослы умой тодоно вын-агайёсты но сузэр-апайёсты, кудъёсыз сярысь соос сюлмасько. Тани Артурлэн учырез, кудӥз ёросэз чаклась луыса ужаз-тыршиз. Со мукет тӧроен ӵош лыктӥз сузэр доры, кудӥз мукетъёсызлэсь палэнскыса кадь улӥз. Артур вера: «Соин вераськыса, ми тодӥмы, солэн картэз, кузпалъяськемзы бере кӧня ке ар ортчыса, кулӥз шуыса. Шуг-секытъёс шоры учкытэк, со кык нылъёссэс будэтӥз но дышетӥз соосты Иеговаез яратыны. Собере солэн синмыз лябӟиз, но со депрессиен курадӟыны кутскиз. Озьы ке но со азьло сямен Иеговаез яратэ но солы оске. Ми адӟимы: со туж умой сузэр но солэсь тросэзлы дышетскыны луэ» (Флп. 2:3). Та агай Иеговалэсь адӟем кариз. Иегова тодэ аслэсьтыз ыжъёссэ но соослэсь курадӟонъёссэс (Пот. 3:7). Тӧроос, кудъёсыз кенешысьтызы ыжъёссэс умой тодо, соослы умойгес юрттыны быгато.

12. Кыӵе пайда вайиз Азиысь сузэрмылы, куке со кенешысьтыз одӥг сузэрен умойгес тодматскиз?

¹² Тӥ умойгес тодматскиды ке агаен яке сузэрен, кудӥз йыркурдэс поттэ, тӥледлы капчигес луоз солы гажан-жаляндэс возьматыны. Тани мар вера Азиын улӥсь сузэрмы: «Кенешысьтым одӥг сузэр туж бадӟым куараен вераськылӥз. Мон малпай, атаез но анаез сое умой дышетӥллямтэ шуыса. Нош куке ми соин ӵош, ӟеч иворез вераса, ветлӥмы, мон тодӥ: со анай-атаезлы базарын чорыген вузкарыны юрттылӥз, но басьяськисьёсты ӧтён понна, солы бадӟым куараен вераськоно вал. Мон адӟи: вын-агайёсмес но сузэр-апайёсмес умойгес валан понна, мыным соосын умойгес тодматсконо». Зэм но, со понна тыршыны кулэ. Куке  ми, Библия верамъя, сюлэммес усьтӥськомы, яке мукетъёсыныз умойгес тодматскыны тыршиськомы, ми Иеговалэсь адӟем кариськомы, кудӥз вань адямиосты яратэ (2 Кор. 6:11—13; 1 Тим. 2:3, 4).

13. Улон-вылонэз 19:15, 16 лыдэ басьтыса, мар каризы кылчинъёс, куке Лот Инмарлэсь верамзэ быдэстыны ӧз дырты, но малы?

¹³ Улонэзлэн секыт вакытаз Лотлы Иеговалэсь косонзэ ӝегатскытэк быдэстоно вал. Со доры кык кылчинъёс лыктӥзы но веразы, Содом карысь семьязэ поттоно шуыса. Малы? Кылчинъёс валэктӥзы: «Та интыез ми быдтомы» (Ул.-выл. 19:12, 13). Нош ӵукнаяз Лот семьяеныз дораз вал на. Кылчинъёс Лотэз выльысь алӥзы. Нош со ӧз дырты. Ми малпаны быгатысалмы, Лот Иеговалэсь верамзэ лыдэ ӧз басьты но солэсь ӧз кылзӥськы шуыса. Озьы ке но Инмар Лотэз ӧз кушты. Иегова сое гажаз-жаляз, соин ик кылчинъёс Лотэз но солэсь семьязэ, китӥзы кутыса, кар сьӧры поттӥзы. (Лыдӟе Улон-вылонэз 19:15, 16.)

14. Мар Иеговалэсь мылкыдзэ ӝутӥз, луоз, Лотлы гажан-жалянзэ возьматыны?

¹⁴ Иеговалэн кӧня ке мугъёсыз вал Лотлы гажан-жалянзэ возьматыны. Лот дорысьтыз потыны ӧз дырты, малы ке шуоно со кышказ, вылды, адямиослэсь, кудъёсыз кар сьӧрын улӥзы. Вал на мукет кышкытлыкъёс. Лот тодӥз, дыр, матысяз нёжалын кык эксэйёс сюй-сир гуосы усизы шуыса (Ул.-выл. 14:8—12). Лот, атай но карт луыса, семьяез сярысь сюлмаськиз. Со сяна, Лот узыр вал, соин ик Содом карын со умой коркан улӥз, вылды (Ул.-выл. 13:5, 6). Зэм но, одӥгез но та муг Лотэз но солэсь кылзӥськымтэзэ шонере уг потты. Нош, Лотлэн янгышез шоры учкытэк, Иегова сое шонер улӥсен лыдъяз (2 Пётр 2:7, 8).

15. Мар милемлы кароно, мукет адямилэсь ужъёссэ судъям интые?

¹⁵ Мукет адямилэсь ужъёссэ судъям интые, валаны тырше, мар со шӧдэ. Ӵапак озьы лэсьтӥз Европаысь Вероника нимо сузэр. Со тодаз вае: «Одӥг сузэр котьку урод мылкыдын улӥз но мукетъёсызлэсь палэнскылӥз.  Куддыръя мон соин вераськыны но кышкалляй. Но мон малпай: „Мон со интыын луысал ке, мыным эш кулэ луысал“. Мон ужпум кутӥ тодыны, мар солэн сюлмаз. Но вераськыкумы со мыным шӧдонъёсыз сярысь вераз! Табере мон сое умойгес валасько».

16. Малы, мукетъёсызлы гажан-жалянмес возьматон понна, Иеговалы вӧсяськоно?

¹⁶ Иегова гинэ милемыз быдэсак вала (1 Иоанн 3:20). Соин ик куре Иеговалэсь юрттыны тӥледлы мукет адямиос пушкысь адӟыны сое, мае со адӟе, но валаны, кызьы соослы гажан-жалянэз возьматоно. Вӧсяськон юрттӥз Анжела нимо сузэрлы тросгес гажан-жалянзэ возьматыны. Солэн кенешысьтыз одӥг сузэрлы мукетъёсыныз кусып возьыны секыт луиз. Анжела вера: «Туж капчи вал сое курланы но солэсь палэнскыса улыны. Но мон Иеговаез кури юрттыны мыным та сузэрез валаны». Ответ сётӥз-а Иегова Анжелалэн вӧсяськемезлы? Сузэрмы азьланьтэ: «Ми соин тодытыны мынӥмы, нош собере кема вераськимы. Мон сое сак кылзӥ. Табере мон сое юнгес яратӥсько, но мынам солы юрттэме потэ».

17. Мар карыны милям мылкыдмы вань?

¹⁷ Ми ум быгатӥське ужпум кутыны, кинлы вын-агайёс но сузэр-апайёс пӧлысь гажан-жалянмес возьматоно, нош кинлы — ӧвӧл. Соос пӧлысь ваньзы, Иона, Илия, Агарь но Лот сямен, шуг-секытъёсын пумиськыло. Куддыръя со понна соос асьсэос янгыш луо. Но вунэтоно ӧвӧл, дырын-дырын ми ваньмы шонертэм ужпумъёсмылэн бервылъёсынызы пумиськиськомы шуыса. Тӥни малы Иегова милесьтым мылкыдмес ӝутэ гажась-жалясь луыны (1 Пётр 3:8). Иеговалэсь кылзӥськыса, ми дунневыл семьямылэсь огкылысь улонзэ юнматӥськомы. Соин ик ойдолэ вын-агайёсмес но сузэр-апайёсмес сак кылзомы, соосын умойгес тодматскомы но соослы гажан-жалянмес возьматомы.