СЮЛМАСЬКОНЪЁС сэрен туж секыт луыны быгатэ (Мад. 12:25). Тӥляд но вал, дыр, сыӵе вакытъёсты, куке малпады, чиданы уд быгатэ ни шуыса. Тросэз таӵе шӧдонъёсын пумиськыло. Кин ке но висись ӵыжы-выжызэ утялтэ, кин ке но матысь адямизэ ыштӥз яке инкуазь шимучыре шедиз. Зэм, вань трос югдуръёс, кудъёсыз милемыз вӧсь каро a.

Милемлы трос пайда вайыны быгатэ Давид эксэйлэн примерез. Солэн трос куректонъёсыз но сюлмаськонъёсыз вал. Куддыръя со пумиськылӥз сыӵе учыръёсын, куке со ӧжыт гинэ кулытэк кылиз (1 Экс. 17:34, 35; 18:10, 11). Мар юрттӥз Давидлы сюлмаськонъёссэ вормыны? Малы ми солэсь дышетскыны быгатӥськомы?

Давид огдыре трос сюлмаськонъёсын пумиськиз. Кылсярысь, со пегӟыса улӥз Саул эксэйлэсь, кудӥз сое виыны малпа вал. Куке Давид но солэн ожгарчиосыз ожмаськонысь берытскизы, соос адӟизы, амалик калык соослэсь ваньбурзэс талаз, коркаоссэс сутӥз, озьы ик кышнооссэс но нылпиоссэс пленэ нуиз шуыса. Давидлы но солэн адямиосызлы сокем вӧсь вал, соос викышъяса, куараен бӧрдыны кутскизы — «бӧрдыны кужымзы тырмытозь соос бӧрдӥзы». Со сяна, Давидлэн оскымон ожгарчиосыз сое изэн зыръяса виыны малпазы (1 Экс. 30:1—6). Озьыен, Давид огдыре куинь шуг-секытъёсын пумиськиз: семьяез пленэ нуэмын вал, эшъёсыз сое виыны малпазы но Саул эксэй сое уйылӥз. Малпалэ гинэ, макем вӧсь вал Давидлы со дыре!

Давидлы секыт вал ке но, Иегова Инмар сое юнматӥз. Мар кариз Давид, Инмар солы мед юрттоз шуыса? Со азьло сямен ик Иеговалэсь юрттэт куриз. Озьы ик со тодаз вайылӥз, кызьы Инмар солы азьвыл юрттылӥз (1 Экс. 17:37; Пс. 17:3, 7). Со сяна, Давид валаз, макем кулэ Инмарлэсь кивалтэтсэ утчаны. Соин ик со Иеговалэсь юаз, мар солы кароно. Куке Иегова солы кивалтэт сётӥз, Давид соку ик солэсь кылзӥськиз. Нош собере Инмар юрттӥз Давидлы но солэн ожгарчиосызлы семьяоссэс но ваньбурзэс берыктыны (1 Экс. 30:7—9, 18, 19). Давид куинь вамыш лэсьтӥз: 1) со вӧсяськиз, Иеговалэсь юрттэт курыса; 2) тодаз вайиз, кызьы Инмар солы азьвыл юрттылӥз, но 3) солэсь кивалтэтсэ уже кутӥз. Милемлы но тыршоно озьы ик лэсьтыны. Ойдолэ пыр-почгес эскеромы та вамышъёсты.

1. Вӧсяське. Сюлмаськыкуды Иеговалэсь визьлык но юрттэт куре. Пыр-поч солы вералэ ваньзэ, мар тӥляд сюлмады. Соку тӥледлы капчигес луоз. Кема но пыр-поч вӧсяськыны тӥляд луонлыкты ӧвӧл ке, вералэ Иеговалы кӧня ке кылъёс ке но. Давид кырӟаз: «Кузё-Инмар — юнматскон интые, изкаре, Мозмытӥсе. Инмар — мынам Юрттӥсе, Солы оскиськисько» (Пс. 17:3). Иеговалэсь юрттэт курыса, ми возьматӥськомы, солы быдэсак оскиськиськомы шуыса. Зэм ик-а вӧсяськон юрттэ? Калия нимо сузэр, кудӥз пионер луыса  ужа-тырше, тазьы вера: «Иеговаен вераськыса, сюлмы каньыл луэ. Вӧсяськон юрттэ мыным Иегова кадь малпаськыны но быдэсак солы оскиськыны». Озьыен, вӧсяськон эмъюм кадь, кудӥз вӧсь луонэз капчиятэ. Та эмъюмез милемлы ачиз Иегова сётэ.

2. Тодады вае. Малпаське асьтэлэн улонды сярысь. Быгатоды-а тӥ тодады вайыны шуг-секытъёсты, кудъёссэ Иегова тӥледлы вормыны юрттӥз? Куке ми малпаськиськомы, кызьы Иегова милемлы но вашкала ужась-тыршисьёсызлы юрттылӥз, та милемлы кужым сётэ но солы оскиськыны юрттэ (Пс. 17:18—20). Джошуа нимо тӧро вера: «Мон гожъясько, кызьы Иегова вӧсяськонъёсылы ответ сётылӥз. Озьы мыным капчигес тодам возьыны учыръёсты, куке мон Иеговалэсь мае ке кури но со мыным сётӥз сое, мар мыным кулэ вал». Зэм, Иеговалэн азьвыл юрттэмез вылын малпаськыса, ми азьланяз но быгатомы сюлмаськонъёсын нюръяськыны.

3. Уже кутэ. Сюлмаськонъёс дыръя шонер ужпум кутон понна, милемлы кивалтэт утчано Инмарлэн Кылысьтыз (Пс. 18:8, 12). Кызьы верало тросэз вын-агайёс но сузэр-апайёс, Библиысь кылбурез умойгес валан понна но сое улонэ пыртон понна, нырысь кулэ эскерон ортчытыны. Джаррод тӧро валэктэ: «Эскерон юрттэ мыным Библиысь кылбурез котыр ласянь учкыны но валаны, мае Иеговалэн мыным верамез потэ. Со мынам сюлмам ик пыре но мылкыдме ӝутэ Инмарлэсь кылзӥськыны». Ми Иеговалэсь кивалтэтсэ Библиысь утчаськомы ке но солэсь кылзӥськиськомы ке, соку быгатомы сюлмаськонъёсын нюръяськыны.

Давид валаз, Инмартэк сюлмаськонъёссэ вормыны уз быгаты шуыса. Иеговалэн юрттэмезлы тау каронзэ возьматон понна, со таӵе кылъёс вераз: «Инмаре юрттэмен, из борддорез тэтчыса потӥсько» (Пс. 17:30, 33). Куддыръя ми малпаськомы, шуг-секытъёсмы вормонтэмесь шуыса. Нош Иеговалэн юрттэменыз ми соос пыр потыны быгатомы. Соин ик ойдолэ Иеговалы юрттэт курыса вӧсяськомы, тодамы ваёмы ваньзэ, мае со ми понна лэсьтӥз, но уже кутомы солэсь кивалтэтсэ. Ми оскиськомы: Иегова милемлы кужым но визьлык сётоз сюлмаськонъёсмес вормыны!