1. Мае Иегова анай-атайёслы оске?

 ИЕГОВА нырысетӥ кузпалъёсты нылпи вордон мылкыдын кылдытӥз. Библиын верамын: «Кузё-Инмарлэн сётэм люкетэз — нылпиос» (Пс. 126:3). Кызьы валано та кылъёсты? Пуктэ син азяды, тӥляд матысь эшты тӥледлы трос коньдон сётӥз, тӥ сое ас дорады мед возёды шуыса. Мае тӥ шӧдоды? Тӥ дунъялоды, дыр, солэсь тӥледлы оскемзэ. Но тӥ сюлмаськоды, дыр, со сярысь, кызьы та коньдонэз возёно. Иегова, милям матысь Эшмы, анай-атайёслы сётэ сое, мар коньдонлэсь но дуно луэ. Со оске соослы нылпиосты будэтон ужез, пиналъёс шудоесь но азинлыкоесь мед луозы шуыса.

2. Кыӵе юанъёсты ми эскеромы?

² Кин ужпум кутэ, кулэ-а кузпалъёслы нылпи вордыны, нош кулэ ке, соку ку вордоно? Мар кароно анай-атайёслы, пиналъёссы шудо мед луозы шуыса? Учкомы Библиысь куд-ог возетъёсты гинэ, кудъёсыз христиан луись кузпалъёслы визьмо ужпумъёс кутыны юртто.

3. а) Кин ужпум кутыны кулэ, вордоно-а кузпалъёслы нылпи? б) Библиысь кыӵе возетъёсты тодазы возёно кузпалъёслэн эшъёссылы но ӵыжы-выжыоссылы?

³ Куд-ог шаеръёсын лыдъяло, кузпалъёс кузпалъяськемзы бере ик ӝоггес нылпи вордыны кулэ шуыса. Ӵыжы-выжыоссы но мукет адямиос соосты кужмысь косыны но быгато та сям-йылолъя лэсьтыны. Азиысь Джетро нимо агай вера: «Кенешысь со кузпалъёс, кудъёсызлэн нылпиоссы  вань, кужмысь косыны быгато со кузпалъёсты, кудъёсызлэн нылпиоссы ӧвӧл, соос ӝоггес анай-атай мед луозы шуыса». Азиысь Джеффри нимо мукетыз агай вера: «Куд-огъёсыз нылпитэм кузпалъёслы верало, пересьмем беразы соос сярысь нокин но сюлмаськыны уз быгаты шуыса». Нош котькуд кузпалъёслы асьсэлы ужпум кутыны кулэ: вордоно-а нылпи яке ӧвӧл-а. Со быдэсак соослэн гинэ ужпумзы луэ, соос асьсэос кыл куто (Гал. 6:5). Валамон, кузпалъёслэн эшъёссы но ӵыжы-выжыоссы умойзэ гинэ сӥзё шуыса. Нош соослы тодазы возьыны кулэ: нылпиосты вордоно-а, ӧвӧл-а шуыса, кышноен картлы асьсэлы ужпум кутоно (1 Фес. 4:11).

4, 5. Кыӵе кык кулэ луись юанъёсты кузпалъёслы эскероно но ку сое лэсьтыны умойгес луысал? Валэктэ.

⁴ Кузпалъёслы, кудъёсыз анай-атай луыны ужпум кутӥзы, кык кулэ луись юанъёсты эскероно: ку но кӧня пиналъёсты вордэмзы потэ? Ку умойгес луоз та юанъёс вылын малпаськыны? Но малы та юанъёс туж кулэ луо?

⁵ Тросаз учыръёсын та юанъёс пумысен вераськыны умой луысал сюан азьын. Малы? Туж кулэ, та юанъёсын кузпалъёс огкылысь мед луозы шуыса. Озьы ик картлы но кышнолы валаны кулэ, дась-а соос ас вылазы таӵе кыл кутон басьтыны. Куд-ог кузпалъёс сюанзы бере одӥг яке кык ар пинал вайытэк улыны ужпум кутӥзы. Соос тае визьмоен лыдъязы, малы ке шуоно соослэн ог-огзылы дышемзы но матэгес луэмзы потэ вал (Еф. 5:33).

6. Кыӵе ужпум кутӥзы куд-ог кузпалъёс, лыдэ басьтыса сое, кыӵе дыре ми улӥськомы?

⁶ Мукет христианъёс Нойлэн пиосызлэсь но соослэн кышнооссылэсь адӟем карыны ужпум кутӥзы. Со куинь кузпалъёс соку ик нылпи ӧз вордэ (Ул.-выл. 6:18; 9:18, 19; 10:1; 2 Пётр 2:5). Иисус асьме нуналъёсты «Ной улон нуналъёсын» ӵошатӥз, но ми адӟиськомы, «секыт дыръёсы» улӥськомы шуыса (Матф. 24:37; 2 Тим. 3:1). Та вылын малпаськыса, куд-ог кузпалъёс нылпи вордыны уг дырто, Иеговалы ужан-тыршонэ тросгес пыриськон понна.

7. Кызьы кузпалъёслы юрттозы возетъёс, кудъёсыз гожтэмын Лукалэсь 14:28, 29 но Мадёнъёсын 20:18?

⁷ Ужпум кутон понна, вордоно-а нылпи яке ӧвӧл-а, но вордоно ке, соку кӧня вордоно, умой луысал лыдъяны, «кӧня луоз кутон-тыриськонэз». (Лыдӟе Лукалэсь 14:28, 29.) Нылпиосты будэтэм анай-атайёс верало, пиналэз будэтон понна, коньдон гинэ  кулэ ӧвӧл, озьы ик трос дыр но кужым кулэ шуыса. Соин сэрен кузпалъёслы эскерыны кулэ таӵе юанъёсты: «Кулэ луоз-а кыкнамылы ик ужаны, семьямылэн ваньмыз кулэез мед луоз шуыса? Тупало-а милям малпанъёсмы со пумысен, мар со сыӵе „кулэез“? Ми кыкнамы ик ужамы ке, соку кин милям пиналъёсынымы пукоз? Кинлэсь соос адӟем карозы?» Кузпалъёс, кудъёсыз та юанъёсты лякытэн эскеро, лэсьто кылъёсъя, кудъёсыз гожтэмын Мадёнъёсын 20:18. (Лыдӟе.)

8. Кыӵе шуг-секытъёсын пумиськыны быгато кузпалъёс но мар кароз сюлмаськись карт?

⁸ Котькуд нылпилы анай но, атай но тырмыт дыр но кужым висъяны кулэ. Нылпилы со туж кулэ. Соин ик, куке семьяын кӧня ке пиналъёс одӥг аресъемесь луо, анай-атайёслы капчи ӧвӧл котькуд пиналзылы дыр висъяны. Куд-ог кузпалъёс, кудъёсызлэн кӧня ке пичи нылпиоссы вань, верало, соослэн дырзы но кужымзы уг тырмы шуыса. Анай ассэ шӧдыны быгатэ, со котьку жадемын шуыса. Солэн кужымез уг кыльы ни Библиез эскерыны, вӧсяськыны но ужан-тыршонэ пыриськыны, озьы ик христиан пумиськонъёсын сак кылзыны. Зэм но, сюлмаськись карт лэсьтоз ваньзэ, кышноезлы но пиналъёсызлы юрттон понна,— кызьы кенешлэн пумиськоназ, озьы ик дораз но. Кылсярысь, со гурт котырын юрттыны быгатысал. Со тыршоз, семьяен йыбырттонзы ялан мед ортчытӥськоз шуыса но со быдэс семьязылы пайда мед ваёз шуыса. Озьы ик христиан луись атай дыр висъялоз, аслаз семьяеныз ӵош тодытон понна.

9, 10. Мар кароно анай-атайёслы, кудъёсызлэн нылпиоссылы юрттэмзы потэ?

⁹ Кызьы анай-атайёс нылпиоссылы юрттыны быгатозы Иеговаез яратыны? Кызьы утёно нылпиосты, та кырсь дунне соослы кышкытлык медаз вайы шуыса? Тани кӧня ке визь-кенешъёс.

¹⁰ Иеговалы, юрттэт курыса, вӧсяське. Тодамы ваёмы Манойлэсь но солэн кышноезлэсь, Самсонлэн анай-атаезлэсь, примерзэс. Куке Маной тодӥз, соослэн пизы вордӥськоз шуыса, со Иеговаез сюлворыса куриз, пиналзэс будэтыны мед юрттоз шуыса.

11. Мар сярысь Маной Иеговаез куриз, Судьяос книгаез 13:8 лыдэ басьтыса, но кызьы анай-атайёс солэсь адӟем карыны быгатозы?

¹¹ Манойлэн примерез Босния но Герцоговинаысь Нихадлы но Алмалы юрттӥз. Соос верало: «Маной сямен ик, ми Иеговаез сюлворыса куримы, милемыз умой анай-атай луыны мед дышетоз шуыса. Но Иегова милемлы пӧртэм сямен юрттӥз: Библия пыр, со вылэ пыкиськыса гожтэм публикациос пыр,  кенешлэн пумиськонъёсыз но конгрессъёс пыр». (Лыдӟе Судьяос книгаез 13:8.)

12. Кыӵе пример возьматӥзы Иосиф но Мария асьсэлэн нылпиоссылы?

¹² Дышетэ асьтэлэн примереныды. Со, мар тӥ вераськоды нылпиостылы, кулэ луэ, нош тужгес но кулэгес луэ со, кызьы тӥ асьтэдыз возиськоды. Оскыны луэ, Иосиф но Мария асьсэлэн нылпиоссылы, озьы ик Иисуслы но, умой адӟем карон возьматӥзы шуыса. Иосиф туж тыршыса ужаз, семьязэ сюдон понна. Со сяна, со пиналъёсызлэсь мылкыдзэс ӝутӥз Инмарен кусыпъёссэс дунъяны (К. Зак. 4:9, 10). Иосиф семьязэ котькуд ар Иерусалиме Пасхаез пусйыны нуллӥз, Законъя одно ик озьы карыны кулэ ӧй вал ке но (Лука 2:41, 42). Куд-ог атайёс малпаны быгатысалзы, Иерусалиме кыдёке мыноно но со понна трос коньдон но дыр кулэ шуыса. Озьы ке но Иосиф Инмарен кусыпъёссэ дунъя вал, озьы ик пиналъёссэ но дышетӥз Инмарен умой кусыпъёс возьыны. Мария но Инмарез яратӥз. Со Гожтэмъёсты умой тодэ вал. Оскыны луэ, аслаз кылъёсыныз но улонэныз Мария пиналъёссэ Инмарлэсь Кылзэ яратыны дышетӥз шуыса.

13. Кызьы Иосифлэн но Мариялэн примерзы одӥг кузпалъёслы юрттӥз?

¹³ Нихад но Алма, кудъёсыз сярысь вылӥынгес вераськиз ини, адӟем карыны тыршизы Иосифлэсь но Мариялэсь. Кызьы соослэн примерзы та кузпалъёслы юрттӥз пизэс будэтыны, со Инмарез мед яратоз но солы мед ужалоз-тыршоз шуыса? Соос верало: «Вань улонэнымы ми пимылы возьматыны тыршимы, макем шудо каре милемыз Иеговалэн возетъёсызъя улон». Нихад озьы ик вера на: «Тӥляд потэ ке, пиналдылэн Иеговаен юн кусыпъёсыз мед луозы шуыса, тӥледлы асьтэлы но Инмарен юн кусыпъёс возёно».

14. Малы анай-атайёслы тодыны кулэ, кинэн кусып возё соослэн нылпиоссы?

¹⁴ Юрттэ нылпиостылы умой эшъёс шедьтыны. Кызьы атайлы, озьы ик анайлы но тодыны кулэ, кинэн дырзэс ортчыто пиналъёссы но маин соос выро. Озьыен, анай-атайёс тодыны кулэ, кинэн нылпиоссы кусып возё социальной сетьёсын но мобильной телефон пыр. Сыӵе кусып возён нылпиослэн малпаськонзы но ужъёссы вылын шӧдӥськыны быгатэ (1 Кор. 15:33).

15. Малы дышетскыны быгатозы анай-атайёс Джессилэн примерысьтыз?

¹⁵ Мар кароно анай-атайёслы, кудъёсыз компьютерен но электрон тӥрлыкъёсын вырыны уг быгато? Тани мар вера Филиппиныысь Джесси нимо агай, кудӥз семьялэн йырыз луэ: «Туала электрон тӥрлыкъёс сярысь ми ӧжыт тодӥськомы. Нош со ӧз люкеты милемлы пиналъёсмес дасяны кышкытлыкъёслы, кудъёссэ вайыны быгато электрон тӥрлыкъёс». Джесси та удысын ачиз номыр уг вала вал ке но, со лэзиз пиналъёсызлы та тӥрлыкъёсын вырыны. Со вера: «Мон пиналъёсылэсь мылкыдзэс ӝутӥ электрон тӥрлыкъёсын вырыны, соос выль кылэз дышетыны, кенешъёслы дасяськыны но котькуд нунал Библиез лыдӟыны мед быгатозы шуыса». Тӥляд пиналъёсты вань ке, тыршиды-а тӥ соосын ӵош лыдӟыны но эскерыны электрон гожтэтъёсты но туспуктэмъёсты келян сярысь пайдаё визь-кенешъёсты? Та темая статьяосты шедьтыны луоз jw.org^® сайтысь «Подростки» люкетысь. Учкиды-а тӥ нылпиосыныды ӵош «Электронные устройства. Ты их хозяин или раб?» но «Соцсети. Не ведите себя как дети!» видеороликъёсты? b Та туж  умой материалъёс, кызьы юрттыны луоз нылпиостылы электрон тӥрлыкъёсты визьмо уже кутыны (Мад. 13:20).

16. Мар каро тросэз анай-атайёс но кытчы со вуттэ?

¹⁶ Тросэз анай-атайёс лэсьто ваньзэ, соослэн нылпиоссы кусып мед возёзы шуыса соосын, кинъёс Инмарлы ужан-тыршонын кужымзэс уг жаляло. Кылсярысь, Н’Дени но Бомин, Кот-д’Ивуарысь кузпалъёс, ӵемысь ас доразы ёросэз чакласез улыны ӧтьылӥзы. Н’Дени тодаз вае: «Со милям пимы вылын умоен шӧдӥськиз. Со пионер луиз, нош али со ёросэз чакласьлэн воштӥсез луыса ужа-тырше». Быгатоды-а тӥ сюлмаськыны со сярысь, пиналъёстылэн умой эшъёссы мед луозы шуыса?

17, 18. Ку кутсконо нылпиосты дышетыны?

¹⁷ Нылпиостэс пичи дырысенызы ик дышетыны кутске. Тодады возе: макем вазьгес кутскоды, сокем умойгес луоз (Мад. 22:6). Малпаськомы Тимофей сярысь, кудӥз будэм бераз апостол Павел сьӧры ветлӥз. Тимофейлэн Евника анаез но Лоида песянаез сое пичи дырысеныз ик дышетӥзы (2 Тим. 1:5; 3:15).

¹⁸ Кот-д’Ивуарысь мукетыз кузпалъёс, Жан-Клод но Пис, куать нылпиоссылы ик Иеговаез яратыны но солэн ужась-тыршисьёсыз луыны юрттӥзы. Мар соослы юрттӥз? Соос Евникалэсь но Лоидалэсь адӟем каризы. Кузпалъёс верало: «Нылпиосмес пичи дырысенызы ик, куке соос али гинэ вордскизы, ми дышетӥмы Инмарлэсь Кылзэ яратыны».

19. Мае возьматэ Инмарлэсь Кылзэ нылпиосыдлы «ялан вералля» шуэм?

¹⁹ Кыкетӥ Законын 6:6, 7 анай-атайёслы визь-кенеш сётэмын, Иеговалэсь курон-косонъёссэ нылпиослы ялан вералляно шуыса. Еврей кыл, кудӥз «ялан вералля» шуыса берыктэмын, озьы ик возьматыны быгатэ «трос пол вераны», «оскытыны» шуэмез. Со понна анай-атайёслы дырзэс пиналъёсынызы ялан ортчытъяно. Куддыръя тӥ ӝоже усьыны быгатоды, пиналъёслы одӥгзэ ик трос пол верано луэ шуыса. Нош ӝоже усён интые, трос пол веранэз лыдъялэ умой амалэн, кызьы нылпиосты дышетоно Инмарлэсь Кылзэ валаны но сое улоназы пыртыны.

20. Кызьы кутыны луэ Псалтирез 126:4 нылпиосты будэтонын?

 ²⁰ Валаны тырше, мар кулэ пиналъёстылы. 126-тӥ Псаломын нылпиос ньӧлъёсын ӵошатӥсько. (Лыдӟе Псалтирез 126:4.) Ньӧлъёс висъясько быдӟалаенызы но соин, малэсь соос лэсьтэмын. Вань нылпиос пӧртэмесь луо, соин ик анай-атайёслы валаны кулэ, кызьы дышетоно котькуд пиналзэс. Израильысь одӥг кузпалъёс, кудъёсыз кык пиналъёссэс умой будэтӥзы, верало, мар соослы юрттӥз: «Ми котькуд пиналэнымы Библиез нимаз дышетӥмы». Зэм но, семьялэн йырыз ачиз ужпум кутыны кулэ, тупа-а таӵе амал солэн семьяезлы но кулэ-а со.

21. Иеговалэсь кыӵе юрттэтсэ басьтыны быгато анай-атайёс?

²¹ Куддыръя анай-атайёс малпаны быгатозы, нылпиосты дышетон — со туж секыт уж шуыса. Нош соослы тодазы возёно: нылпиос — со Иеговалэн кузьымез, но со одно ик соослы юрттыны дась. Со сак кылзэ анай-атайёслэсь вӧсяськонъёссэс но юрттэ соослы Библия но публикациосмы пыр. Со сяна, Иегова юрттыны быгатэ тодӥсь-валась христиан анай-атайёслэн примерзы пыр яке соослэн визь-кенешсы пыр.

22. Анай-атайёслэн кыӵе кузьымзы тужгес но умой луэ?

²² Куд-ог адямиослэн малпамзыя, нылпиосты будэтон 20 ар ӵоже кыстӥське. Нош зэмзэ вераса, анай-атайёс ноку но уг дугдо анай-атай луэмысь. Тужгес но умоез, мае соос нылпиоссылы кузьманы быгато,— со яратон, дыр но Библия вылэ пыкиськыса дышетон. Котькуд нылпи та дышетонлы пӧртэм сямен вазиське. Нош тросэзлэн соос пӧлысь, кинъёсыз Иеговаез яратӥсь анай-атайёс будэтӥзы, Азиысь Джоанна-Мэйлэн кадь ик шӧдонъёссы. Со вера: «Мон анай-атайме туж тау карисько, соос монэ умой будэтӥзы но Иеговаез яратыны дышетӥзы шуыса! Соос мыным улон гинэ ӧз кузьмалэ, нош озьы ик валаны юрттӥзы, малы мон улӥсько» (Мад. 23:24, 25). Таӵе шӧдонъёссы сярысь ик вераны быгато быдэс дунне вылысь трос миллион христианъёс но.