Кыкетӥ Законын 22:25—27 гожтэм курон-косонъёслэн валтӥсь ужпумзы пиосмуртлэсь янгыш луэмзэ возьматон ӧй вал (солэн янгыш луэмез валамон вал ини), нош нылмуртлэсь янгыш луымтэзэ возьматон вал. Учкомы, мар гожтэмын та кылбуръёс азьын но соос бере.

Кыкетӥ Законын 22:23, 24 вераське учыр сярысь, кудӥз карын луиз: пиосмурт картлы курам нылмуртэн азон-калгон сьӧлыке пыриз, нош нылмурт со дыре ӧз кесяськы. Та учырын пиосмурт азон-калгон сьӧлык понна янгыш луэ вал, малы ке шуоно картлы курам нылмурт быземын шуыса лыдъяськиз. Нылмурт кесяськысал ке, мукет адямиос сое кылысалзы но утьысалзы. Нош нылмурт ӧз кесяськы бере, со но азон-калгон сьӧлык понна янгыш луэ вал, соин ик соосты кыкназэс но янгыш шуыса лыдъязы.

Собере Законын мукет учыр сярысь вераське: «Картлы курам нылмуртэз кыӵе ке пиосмурт бусыысен пумитаса кутӥз но сое эриктэмаз ке, соку эриктэмась пиосмуртэз гинэ виыны кулэ, нош нылашлы номыр но эн кар; нылмурт виыны ярамон йыруж ӧз лэсьты, уго та учыр укша кин ке матысез вылэ урдскыса виён учырлы; уго пиосмурт нылашен бусыысен пумиськиз но, картлы курам нылаш черекъяз ке но, нокинлы вал сое мозмытыны» (К. Зак. 22:25—27).

Та учырын судьяос нылмуртлы оскизы. Малы озьы вераны луоз? Малпало вал, «нылаш черекъяз ке но, нокинлы вал сое мозмытыны» шуыса. Соин ик азон-калгон сьӧлык понна со янгыш ӧй вал. Нош пиосмурт эриктэман но азон-калгон сьӧлык понна янгыш вал, малы ке шуоно картлы курам нылмуртэз со кужмысь кутӥз но сое эриктэмаз.

Озьыен, та закон нылмуртлэсь янгыш луымтэзэ валаны юрттӥз, но со вераз гинэ, пиосмурт эриктэман но азон-калгон сьӧлык понна янгыш луэ вал шуыса. Оскыны луэ, судьяос ужпум кутӥзы, ваньзэ пыр-поч эскерыса-чакласа но лыдэ басьтыса возетъёсты, кудъёсыз сярысь Инмар валамон но трос пол вераз (К. Зак. 13:14; 17:4; Пот. 20:14).