Шайтан со сярысь ӧз вера, вылды. Со ӧз вера, Ева Инмарен лэзьымтэ емышез сииз ке, со кулоз, нош солэн лулыз кытын ке но улоз на шуыса. Кый пыр Шайтан шуиз, та писпуысь емышез сиыса, Ева ноку но уз кулы шуыса. Со малпан сётыны тыршиз, соин номыр уз луы шуыса: солэн музъем вылын улонэз эшшо но умойгес луоз, Инмарлэсь кылзӥськытэк но (Ул.-выл. 2:17; 3:3—5).

Адямилэн лулыз уг кулы шуыса зэмос луисьтэм дышетон Едемын ӧз кылды ке, соку ку со кылдӥз? Милемлы со быдэсак тодмо ӧвӧл. Но ми тодӥськомы, зэмос луисьтэм йыбырттон Ной нуналъёсы Ву тудӟон дыръя быриз шуыса. Соку вань шонертэм религиозной дышетонъёс быризы, малы ке шуоно Ву тудӟон бере музъем вылын Инмарлэн оскымон ужась-тыршисьёсыз гинэ кылизы — Ной но солэн семьяез.

Соин ик адямилэн лулыз уг кулы шуыса зэмос луисьтэм дышетон Ву тудӟон бере кылдӥз, луоз. Куке Инмар Вавилонын кылъёсты сураз, калыкъёс «быдэс дунне вылэ улыны» пазьгиськизы (Ул.-выл. 11:8, 9). Кызьы гинэ та зэмос луисьтэм дышетон медаз кылды, ми тодӥськомы, соин кивалтӥз «ӧрекчаськонлэн атаез», Шайтан, но со шумпотӥз, со сокем паськыт вӧлмиз шуыса (Иоанн 8:44).