1, 2. Малы вань христианъёслы тунсыко луыны кулэ инмын улон понна улӟытон?

 ТУННЭ Иеговалэн тросэз ужась-тыршисьёсыз оско музъем вылын пырак улыны. Нош куд-ог христианъёс святой духен зырӟемын — соос оско инмын улон понна улӟыны. Зырӟем христианъёслэн тодэмзы потэ, кыӵе соослэн улонзы луоз улӟемзы бере. Нош малы та тунсыко луыны кулэ со христианъёслы но, кудъёсызлэн музъем вылын улыны осконзы вань? Кызьы ми адӟомы, инмын улон понна улӟытон соослы но бакель каронъёс ваёз. Соин ик со милемлы но тунсыко луыны кулэ, кыӵе гинэ осконмы медаз луы.

² Иисуслэн куд-ог дышетскисьёсыз, кудъёсыз нырысетӥ даурын улӥзы, Инмарлэн кивалтэмез улсын гожъязы инмын улыны осконзы сярысь. Соос пӧлын вал апостол Иоанн но, кудӥз вераз: «Асьмеос табере Инмар нылпиос луиськомы; но али усьтэмын ӧвӧл на, кыӵеесь асьмеос луомы. Но тодӥськомы: Иисус Христос лыктэм бере Солы укшасесь луомы» (1 Иоанн 3:2). Вераны луоз, зырӟем христианъёс уг тодо, кыӵеесь соос луозы инмын улыны улӟемзы бере. Но соос Иеговаез адӟозы, куке асьсэлэсь кузьымзэс басьтозы. Инмын улыны улӟытон сярысь Библиын пыр-поч верамын ӧвӧл, но ми сое кӧня ке син азямы пуктыны быгатӥськомы, апостол Павеллэсь кылъёссэ лыдӟыса. Зырӟем христианъёс Христосэн  ӵош луозы, куке со «уродлэсь котькыӵе кузёяськонзэ-кивалтонзэ, котькыӵе властьсэ но кужымзэ» быдтоз, нош самой пумаз кулонэз но быдтоз. Собере Иисус но соин ӵош кивалтӥсьёс Иеговалы асьсэос тэрытскозы но ваньзэ солы тэрытскись карозы (1 Кор. 15:24—28). Кӧня со шумпотон ваёз! b

3. Кызьы Павеллы улӟытонлы оскон юрттӥз, 1 Коринфъёслы 15:30—32 гожтэмъя?

³ Улӟытонлы оскон Павеллы пӧртэм шуг-секытъёс дыръя юн кыльыны юрттӥз. (Лыдӟе 1 Коринфъёслы 15:30—32.) Павел Коринфын улӥсьёслы гожтӥз: «Нуналлы быдэ мон кулон азьын сылӥсько». Озьы ик со ватсаз на, «Ефесын лек пӧйшуръёсын» нюръяськиз шуыса. Оло нош, Павел вераз со сярысь, кызьы солы Ефесысь стадионын пӧйшуръёсын нюръяськоно луиз (2 Кор. 1:8; 4:10; 11:23). Яке пӧйшуръёсын со ӵошатӥз солы пумит мынӥсь лек иудейёсты но мукет адямиосты (Ап. уж. 19:26—34; 1 Кор. 16:9). Кызьы гинэ медам луы, Павел кышкыт югдуръёсы шедьылӥз, озьы ке но вуоноез шоры со юн осконэн учкиз (2 Кор. 4:16—18).

4. Кызьы улӟытонлы оскон христианъёсты юнматэ? (Учке вылбамысь суредэз.)

⁴ Ми улӥськомы кышкыт дыре. Куд-ог вын-агайёс но сузэр-апайёс йыружъёсын пумиськыло. Куд-огъёсыз уло сыӵе интыосын, кытын ожмаськонъёс мыно. Нош куд-огъёсыз Иеговалы ужало-тыршо со шаеръёсын, кытын кивалтӥсьёс ужмылы люкето яке сое нуыны уг лэзё. Асьсэлэн осконзы понна со шаеръёсысь вын-агайёсмы но сузэр-апайёсмы пытсэтэ шедьыны но улонзэс ыштыны быгато. Озьы ке но ваньзы соос азьланьто Иеговалы оскымон ужаны-тыршыны но милемлы умой адӟем карон возьмато. Соос юн оско: та дуннеын улонзэс ыштӥзы ке но, Иегова соосты улӟытоз паймымон выль дуннеын.

5. Кыӵе мылкыд улӟытонлы осконмес лябӟытыны быгатэ?

⁵ Павел вын-агайёслы гожтӥз, макем кышкыт тазьы малпаськыны: «Ваелэ, сиёме-юоме, ӵуказе асьме доры кулон вуэ ук!» Сыӵе малпаськонъёс вылесь ӧй вал ини. Павел вераз, дыр, Исаиялэн 22:13 кылъёс сярысь, кытын вераське, кыӵе мылкыд вӧлмемын вал израиль калык пӧлын. Инмарен кусыпъёссэс юнматон интые, соос малпаськизы асьсэлэн мылпотонъёссы сярысь гинэ. Вераны луоз, соос улӥзы таӵе мылкыдын: улӥськомы одӥг пол. Та мылкыд туннэ но туж вӧлмемын. Нош Библиысь ми умой тодӥськомы, кыӵе кышкыт бервылъёсын израиль калык таин сэрен пумиськиз (2 Пар. 36:15—20).

6. Малы улӟытонлы оскон мылкыдмес ӝутыны кулэ малпаськыны, кинэн эшъяськыны?

⁶ Ми оскиськомы, Иегова кулэмъёсты улӟытоз шуыса. Та оскон мылкыдмес ӝутыны кулэ малпаськыны, кинэн ми эшъяськомы. Коринфысь вын-агайёслы палэнсконо вал соослэсь, кинъёс улӟытонлы ӧз оске но одӥг нуналэн улӥзы. Озьыен, милемлы но матысь кусыпъёс возёно ӧвӧл соосын, кинъёс ас мылпотонъёссыя гинэ уло но уг малпасько, мар луоз азьланяз. Сыӵе адямиосын кусып возён уродэн шӧдӥськыны быгатэ христиан муртлэн мылкыдыз но сямъёсыз вылын. Озьы ик со адямиос солэсь мылкыдзэ ӝутыны быгатозы лэсьтыны сое, мае  Инмар адӟемпотостэм каре. Соин ик Павел христианъёслэсь мылкыдзэс ӝутӥз: «Сазьтӥське, дугдэ сьӧлыкамысь» (1 Кор. 15:33, 34).

7. Кыӵе юанъёс сётъяны быгато куд-ог адямиос улӟытон пумысен, 1 Коринфъёслы 15:35—38 гожтэмъя?

⁷ Лыдӟе 1 Коринфъёслы 15:35—38. Христиан мурт улӟытонлы медаз оскы ни шуыса, кин ке но солэсь юаны быгатэ: «Кызьы кулэмъёс улӟыса султыны быгатозы? Кыӵе мугорзы соослэн луоз?» Милемлы туж кулэ малпаськыны со сярысь, кызьы Павел та юанлы валэктон сётӥз. Туннэ тросэз адямиос пӧртэм сямен малпало со сярысь, мар луэ адямиен кулэм бераз. Нош малы дышетэ Библия?

8. Кыӵе пример валаны юрттэ, мар луэ инмын улыны улӟытон дыръя?

⁸ Куке адями кулэ, солэн мугорыз сисьме-быре. Нош Иегова, кудӥз номырлэсь быдэс дуннеез кылдытӥз, сое улӟытыны быгатэ (Ул.-выл. 1:1; 2:7). Инмын улыны улӟытон сярысь веракуз, Павел вера кидыс сярысь пример. Та пример возьматэ, Инмарлы кулэ ӧвӧл адямиез улӟытыны сыӵе ик мугорын, кыӵе солэн мугорыз вал, музъем вылын улыкуз. Музъеме сюрыса, пичи кидыс уда но будэ. Со чылкак пӧртэм луэ кизем кидыслэсь. Та пример вылын Павел возьматӥз: Кылдытӥсь адямилы сётыны быгатэ сыӵе мугор, кыӵе солэн сётэмез потэ.

9. Мар сярысь вераське 1 Коринфъёслы 15:39—41?

⁹ Лыдӟе 1 Коринфъёслы 15:39—41. Павел саклыкмес висъя, Иеговалэн вань кылдытэмъёсыз туж пӧртэмесь шуыса. Кылсярысь, пудо-животъёслэн, тылобурдоослэн но чорыгъёслэн мугорзы ог-огзылы чик уг кельшо. Павел озьы ик пусйиз, Толэзь Шундылэсь пӧртэм луэ, «кизили но кизилилэсь данэныз-чебереныз пӧртэм луэ» шуыса. Со озьы, ми ас синъёсынымы пӧртэмлыксэ адӟыны ум быгатӥське  ке но. Тодосчиослэн верамзыя, вань пӧртэм кизилиос: бадӟымъёсыз, пичиосыз, гордъёсыз, тӧдьыосыз, ӵужъёсыз. Павел озьы ик гожтӥз, «вань ин мугоръёс, вань музъем мугоръёс» шуыса. Мар сярысь со вера? Соослэсь, кинъёс музъем вылын уло, мугорзэс адӟыны луэ, нош соослэсь, кинъёс инмын,— адӟыны уг луы, соослэн мугорзы кылчинъёслэн кадь.

10. Кыӵе мугорзы луоз соослэн, кинъёс инмын улыны улӟозы?

¹⁰ Висъялэ саклыктэс, мар гожтэ Павел азьланяз: «Озьы ик кулэмъёслэн но улӟыса султонзы: сисьмонлы кизиське, сисьмонтэмлы султэ». Зэм но, куке адями кулэ, солэн мугорыз сисьме-быре но сюйлы пӧрме (Ул.-выл. 3:19). Нош кызьы соку мугор «сисьмонтэмлы султэ»? Татын Павел уг вера адямиос сярысь, кудъёссэ улӟытӥзы Илья, Елисей, Иисус но кудъёсыз улӟемзы бере музъем вылын улӥзы. Со вера соос сярысь, кинэ Инмар инмын улыны улӟытэ но кинлы «духовной мугор» сётэ (1 Кор. 15:42—44).

11, 12. Мар луиз Иисусэн улӟемез бере но мар луэ зырӟем христианъёсын?

¹¹ Куке Иисус музъем вылын улӥз, со лулмугорлэсь но вирлэсь адями вал. Нош улӟемез бере со «улэп карись Дух» луиз но инме берытскиз. Озьы ик зырӟем христианъёслы но улӟемзы бере сётэмын луоз сыӵе мугор, кудӥзлы луыса соос инмын улыны быгатозы. Павел валэктэ: «Кызьы асьмеос сюйлэсезлэсь адямилэсь тусбуйзэ нуллӥмы, озьы ик Инмысезлэсь Адямилэсь но тусбуйзэ нулломы» (1 Кор. 15:45—49).

¹² Тодамы возёно: улӟемез бере Иисуслэн адямилэн кадь мугорыз ӧй вал ини. Павел йылпумъяса вераз, малы со озьы: «Лулмугор но, вир но [инмысь] Инмар Эксэйлыкез люкет басьтыны уг быгато» (1 Кор. 15:50). Соин ик апостолъёс но мукет христианъёс улӟытэмын уз луэ  лулмугорлэсь но вирлэсь мугорын, кудӥз сисьме-быре. Ку луоз та улӟытон? Павел пусйиз, со кулэмзы бере ик уз луы, нош вуонояз луоз шуыса. Со дырлы, куке Павел Коринфъёслы нырысетӥ гожтэтсэ гожтӥз, Христослэн дышетскисьёсыз пӧлысь «куд-огез кулӥзы» ини, кылсярысь, апостол Иаков (1 Кор. 15:6; Ап. уж. 12:1, 2). Нош мукет зырӟем христианъёс кулэмын ӧй вал на.

13. Библиын гожтэмъя, мар луыны кулэ, куке Христос Эксэй луоз?

¹³ Иисус но, Павел но азьло ик веразы, нимысьтыз вакыт вуоз шуыса. Со вакыт — Христослэн Эксэй луонэз. Та дыр ӵоже быдэс дунне вылын луыны кулэ кышкыт югдур: ожъёс, музъемзурканъёс, паласькись висёнъёс но мукет куректонъёс. Ми адӟиськомы, та азьпалзэ ивортон 1914-тӥ арысен быдэсмыны кутскиз шуыса. Иисус вераз Эксэй луонэзлэн эшшо одӥг тодметэз сярысь: ӟеч ивор, Инмарлэн Эксэйлыкез кивалтэ шуыса, «быдэс дунне вылын тодытэмын луоз; собере пум вуоз» (Матф. 24:3, 7—14). Нош Павеллэн гожтэмезъя, Иисус кивалтыку, Инмар улӟытоз зырӟем христианъёсты, кудъёсыз «кулон умме» усизы (1 Фес. 4:14—16; 1 Кор. 15:23).

14. Мар луэ зырӟем христианъёсын, кудъёсыз куло, Христос Эксэй кадь кивалтыку?

¹⁴ Туннэ зырӟем христианъёс кулэмзы бере соку ик улӟо инмын улон понна. Тае возьмато Павеллэн кылъёсыз, кудъёсыз гожтэмын 1 Коринфъёслы 15:51, 52: «Асьмеос ваньмы ум кулэ, нош ваньмы воштӥськомы туж ӝог, син куспын ик, берпуметӥ гумы куара потэм бере ик». Павеллэн  кылъёсыз али быдэсмо ини! Улӟемзы бере Христослэн вынъёсыз туж шумпото, малы ке шуоно «вань вапумъёс ӵоже» соос Иисусэн огазьын улозы (1 Фес. 4:17).

15. Улӟемзы бере кыӵе ужзы луоз зырӟем христианъёслэн инмын?

¹⁵ Улӟемзы бере кыӵе ужез быдэсъялозы зырӟем христианъёс инмын? Иисус соослы вераз: «Вормисьлы, Мынэсьтым ужъёсме пумозяз быдэсъяса улэм муртлы, язычникъёсын кивалтыны эрик сёто. Соосты со корт бодыен возьмалоз, горд сюйлэсь лэсьтэм сосудъёс кадь соос куашкалозы-пырдылозы, кызьы Мон но Аслам Атаелэн киысьтыз кивалтыны эрик басьтӥ» (Усьт. 2:26, 27). Иисуслэн кивалтэмез улсын зырӟем христианъёс калыкъёсты «корт бодыен» возьмалозы, яке музъем вылысь калыкъёсын кивалтозы (Усьт. 19:11—15).

16. Кызьы тросэз адямиос кулонэз вормозы?

¹⁶ Зырӟем христианъёс кулонэз вормозы (1 Кор. 15:54—57). Улӟытонлы луыса соос Армагеддон ожмаськон дыръя музъемез уродэзлэсь чылкытатыны быгатозы. Трос миллион мукет христианъёс «туж бадӟым курадӟон-куректон пыр» потозы. Соос улозы выль дуннеын но адӟозы, кызьы эшшо кулон вормемын луоз на, кызьы улӟозы трос миллиард кулэм адямиос (Усьт. 7:14). Малпалэ гинэ, кӧня шумпотон ваёз вормон! (Ап. уж. 24:15). Соос, кинъёс Иеговалы быдэсак оскымон луозы, кулонэз вормозы, кудӥз соослы Адамлэсь выжиз. Соос быгатозы пырак улыны.

17. Мар милемлы кароно, 1 Коринфъёслы 15:58 лыдэ басьтыса?

¹⁷ Котькуд христиан мурт тау карыны кулэ улӟытон сярысь буйгатӥсь кылъёс понна, кудъёссэ Павел гожтӥз Коринфын улӥсьёслы. Милям трос мугъёсмы вань кылзӥськыны Павеллэн кылъёсызлэсь: «Кузё-Инмарлы ужаны берекетты мед луоз». (Лыдӟе 1 Коринфъёслы 15:58.) Ми та кылъёсъя улӥськомы ке, соку оскыны быгатӥськомы, азьпалан милемыз шудо улон возьма шуыса. Со туж паймымон улон луоз, кудзэ ми али син азямы пуктыны но ум быгатӥське. Со возьматоз, Инмар азьын ужаммы юнме ӧй вал шуыса.