1. Мар милемын луыны быгатэ, куке ӝож мылкыдын улӥськомы?

 КОТЬКУД нунал милемлы нюръяськоно луэ пӧртэм шуг-секытъёсын. Нош куке милям мылкыдмы куашкамын, сое лэсьтыны секытгес. Соин ик милемлы ӝож мылкыд шоры учконо лушкаськись шоры кадь, кудӥз милесьтым юн мылкыдмес, кышкасьтэм луонмес но шумпотонмес лушканы быгатэ. Мадёнъёсын 24:10 верамын: «Шугадӟон нуналэ ляблыко луид ке, соку начар тынад кужымед». Зэм, ӝож мылкыд милемыз кужымтэк кельтыны быгатэ. Соин сэрен тужгес но секыт луэ шуг-секытъёсын нюръяськыны.

2. Маин сэрен милям мылкыдмы ӝож луыны быгатэ? Мае ми эскеромы та статьяын?

² Ми ӝоже усьыны быгатӥськомы пӧртэм мугъёсын сэрен. Кинлэн ке но мылкыдыз куашка тырмымтэосыз, ляб интыосыз но тазалыкеныз герӟаськем шуг-секытъёсыз сэрен. Нош кинлэн ке но мылкыдыз ӝож луыны быгатэ, ужан-тыршонын солы кыӵе ке уж уг сёто шуыса, кудзэ солэн кемалась быдэсъямез потэ вал ини. Мукетъёсызлэн мылкыдзы усе, тросэз ӟеч ивормес уг кылзо шуыса. Та статьяын ми эскеромы пайдаё визь-кенешъёсты, кудъёсыз юрттозы милемлы ӝож мылкыдын нюръяськыны.

3. Мар юрттоз милемлы тырмымтэосмы шоры шонер учкыны?

³ Асьмелэн тырмымтэосмы но ляб интыосмы сэрен ми асьме шоры шонертэм учкыны быгатомы. Озьы ик малпаны быгатомы: Иеговалэн уг поты, ми выль дуннеын мед уломы шуыса. Озьы малпаны кышкыт. Нош кызьы соку учконо асьмелэн тырмымтэосмы шоры? Библиын верамын, Иисус сяна, «ваньмыз сьӧлыке пыремын» шуыса (Рим. 3:23). Нош Иегова  милесьтым шекъёсмес уг утча. Со сюлмаськись Атай, кудӥз яратэ милемыз но кудӥзлэн милемлы юрттэмез потэ. Со сяна, Иегова чидась. Со тодэ, милемлы котьку шонер лэсьтыны капчи ӧвӧл шуыса но макем милемлы секыт асьме шоры шонер учкыны. Со котьку дась милемлы юрттыны (Рим. 7:18, 19).

4, 5. Мае валазы Дебора но Мария 1 Иоаннлэн 3:19, 20 гожтэм кылъёсысь? Кызьы тае валан соослы юрттӥз?

⁴ Эскеромы Деборалэсь но Мариялэсь b учыръёссэс. Пичи дыръяз Дебораез семьяяз нокин но ӧз яраты, соин сэрен со ассэ гажамысь дугдӥз. Сое туж ӧжыт ушъязы, соин ик солэн аслыз осконэз быриз. Пичи гинэ янгыш лэсьтыса но, Дебора лыдъяз, со номыр умойзэ карыны уг быгаты шуыса. Мариялэн но та выллем шуг-секытэз вал. Ӵыжы-выжыосыз сое ултӥязы, соин ик со ассэ номырлы ярасьтэмен шӧдӥз. Пылатӥськемез бере но Мария малпаз, со Иеговалэн ужась-тыршисез луыны ярамон ӧвӧл шуыса.

⁵ Озьы ке но та сузэръёс Иеговалы ужамысь-тыршемысь ӧз дугдэ. Мар соослы юрттӥз? Соос Инмарлы вӧсяськизы но солы асьсэлэсь сюлэмзэс усьтӥзы (Пс. 54:23). Соос валазы: Иегова тодэ, кызьы ми вылын шӧдӥське азьвыл улэммы но асьмеды умойтэмен лыдъяммы. Озьы ик соос валазы, Инмар милесьтым умойзэ адӟе шуыса — сое, мае асьмеос но куддыръя ум адӟиське. (Лыдӟе 1 Иоаннлэсь 3:19, 20).

6. Мае шӧдыны быгатэ адями, кудӥз урод сямыныз нюръяське?

⁶ Со, кин мур пыӵам урод сямыныз нюръяське, сыӵе ик сьӧлык выльысь лэсьтэ ке, ӝоже усьыны быгатэ. Зэм но, сьӧлыкаменыд сэрен астэ янгышен шӧдӥськод ке, со урод ӧвӧл (2 Кор. 7:10). Но соин сэрен кулэ ӧвӧл астэ ялан йырйыса улыны но малпаны: «Мон номырлы но ярасьтэм адями. Иегова монэ ноку но простить уз кары». Асьме шоры озьы учкимы ке, Иеговалы ужамысь-тыршемысь но дугдыны быгатомы. Тодады возе: ми ӝоже усимы ке, милям кужыммы ӧжыт луоз (Мад. 24:10). Соин ик милемлы Иеговаен кусыпъёсмес тупатоно: вӧсяськоно солы но куроно солэсь, милемыз мед гажалоз-жалялоз шуыса (Ис. 1:18). Куке Иегова адӟоз, ми вань сюлмысьтымы ӧпкелиськомы шуыса, со милемыз простить кароз. Со сяна, туж кулэ тӧроослы вазиськыны. Соос чидаса юрттозы милемлы Иеговаен кусыпъёсмес выльысь тупатыны (Иак. 5:14, 15).

7. Малы ӝоже усёно ӧвӧл, куке милемлы шонерзэ лэсьтыны секыт?

⁷ Тани мар вера Франциысь Жан-Люк нимо тӧро: «Иеговалэн син азяз шонерлыко ӧвӧл со, кин ноку но янгыш уг лэсьты, нош со, кин лэсьтэм сьӧлыкъёсыз сярысь ӧпкеле  но вань кужмысь воштӥськыны тырше» (Рим. 7:21—25). Соин ик, куке умойтэм сямъёсыныды нюръяськиськоды, асьтэды номырлы ярасьтэм адямиен эн лыдъялэ. Ми ваньмы янгышаськомы. Инмарлэн син азяз нокин но шонерлыко луыны уг быгаты аслаз тыршемезлы луыса гинэ. Ми Инмарлэн син азяз шонерлыко луыны быгатӥськомы Иисуслэн курбонэзлы но Иеговалэн гажан-жалянэзлы луыса гинэ (Еф. 1:7; 1 Иоанн 4:10).

8. Кинлэсь милемлы юрттэт куроно, куке мылкыдмы куашкамын?

⁸ Юрттэт куре вын-агайёслэсь но сузэр-апайёслэсь! Милям соослы сюлэммес усьтэммы потэ ке, соос быгатозы милемыз кылзыны но ӟеч кылъёсын мылкыдмес ӝутыны (Мад. 12:25; 1 Фес. 5:14). Нигериысь Джой нимо сузэр, кудӥз усем мылкыдын нюръяськиз, вера: «Мар мон карысал вын-агайёстэк но сузэр-апайёстэк! Соослэн юрттэмзы возьматэ, Иегова вӧсяськонъёсылы ответ сётэ шуыса. Кенешлы луыса мон дыши юрттыны соослы, кинъёс ӝоже усемын». Нош валаны кулэ, вын-агайёс но сузэр-апайёс котьку ик уг тодо, ку милемлы юрттэт кулэ. Соин ик милемлы асьмелы юрттэт куроно соослэсь, кинъёслэн Иеговаен юн кусыпъёссы.

9. Кызьы милемыз юнмато кылъёс, кудъёсыз гожтэмын Псалтирьын 40:4 но 93:19?

⁹ Иеговалэсь юрттэтсэ утчалэ. Куке ми висиськомы, тужгес но куке кема дыр ӵоже висиськомы, секыт луэ умой мылкыдын улыны. Туннэ Иегова адямиосты уг бурмытъя ке но, со буйгатэ милемыз но кужым сётэ, ми ваньзэ чиданы мед быгатомы шуыса. (Лыдӟе Псалтирез 40:4; 93:19). Со вын-агайёслэсь но сузэр-апайёслэсь мылкыдзэс ӝутыны быгатэ юрттыны милемлы гурт ужъёсмес лэсьтыны, вузкаронние ветлыны но милемын ӵош вӧсяськыны. Озьы ик со милемлы аслаз Кылысьтыз буйгатӥсь малпанъёсты тодамы вайыны быгатэ, кылсярысь, выль дуннеын паймымон улон сярысь, кытын висёнъёс но курадӟонъёс уз луэ (Рим. 15:4).

10. Мар юрттӥз Исанглы сюлэмшугъяськонзэ вормыны, шудтэм учырен пумиськемез бере?

¹⁰ Исанг, кудӥз Нигериын улэ, шудтэм учырен пумиськиз. Сое паралич шуккиз. Эмъясь шуиз, со ноку но ветлыны уз быгаты ни шуыса. Исанг вера: «Та кышкыт иворез кылыса, мынам сюлмы ик чигиськиз». Нош со та сюлэмшугъяськонзэ вормыны быгатӥз. Мар солы юрттӥз? Исанг валэктэ: «Ми кышноеным Иеговалы вӧсяськемысь но солэсь Кылзэ эскеремысь ноку но ӧм дугдэ. Нош эшшо милям юн мылкыдмы вал дунъяны ваньзэ, мае Иегова милемлы кузьмаз, озьы ик выль дуннеын улыны осконэз но».

11. Мар Синдилы шумпотон вайиз, секыт висьыкуз?

¹¹ Мексикаысь Синди сузэрмылэсь кышкыт висёнзэ шедьтӥзы, кудӥз сэрен со кулыны но быгатэ вал. Мар солы юрттӥз та шуг-секытэз чиданы? Эмъяськыкуз со аслыз ужпум пуктӥз — котькуд нунал ӟеч иворез вераны. Синди гожтэ: «Талы луыса мон ӧй малпаськы операция сярысь, висёнэ сярысь но со сярысь, макем мыным секыт, нош малпаськи мукет адямиос сярысь. Ӵем дыръя мон тазьы тодытӥ. Эмъясьёсын вераськыкум, мон юай: „Кызьы улэ семьяды?“ Собере мон тунсыкъяськи, малы соос таӵе секыт ужез бырйизы. Со мыным валаны юрттӥз, мар сярысь вераськыны соослы тунсыко луоз. Тросэз эмъясьёс веразы, висисьёс соослэн ужъёссы сярысь шер юаллясько шуыса. Соос монэ тау каризы, соослы саклык висъяме понна. Нош куд-огез мыным адрессэс но телефон номерзэс сётӥзы. Мон тодӥсько вал, Иегова мыным та шуг-секытэз чиданы юрттоз шуыса. Но мон ӧй но малпа, Инмар мыным сомында шумпотон сётоз шуыса!» (Мад. 15:15).

12, 13. Кызьы куд-ог вын-агайёс но сузэр-апайёс, кудъёсызлэн урод тазалыксы, тодытон понна луонлыкъёс шедьтӥзы но кыӵе со пайда вае?

 ¹² Вын-агайёс но сузэр-апайёс, кудъёсызлэн урод тазалыксы, ӝоже усьыны быгато, соос ужаны-тыршыны уг быгато шуыса сомында, кӧня соослэн потэ. Озьы ке но тросэз соос пӧлысь тодытон понна трос луонлыкъёс шедьто. Тани Огазеяськем Штатъёсысь Лорел нимо сузэрлэн учырез. Та сузэр 37 ар ӵоже кыллиз аппарат пушкын, кудӥз солы шоканы юрттэ вал. Лорел ракен висиз, солы трос операциос лэсьтӥзы, озьы ик кема дыр ӵоже ку висёнэн курадӟиз. Таӵе секыт югдуръёсын но со адямиослы Инмарлэн Эксэйлыкез сярысь вералляз. Лорел тодытӥз эмъясьёслы, кудъёсыз со доры ветлӥзы, дораз эмъяськыкуз. Солэн юрттэменыз ог 17 адямиос Иеговалэн Адӟись-Ивортӥсез луизы! c

¹³ Тани кыӵе визь-кенеш сётэ Франциысь Ришар нимо тӧро соослы, кинъёс доразы яке эмъяськон юртъёсын ялан кыллёно луо: «Мон ӵектӥсько соослы адӟиськымон интыын книгаосмес но журналъёсмес возьыны. Соосты адӟыса, адямиос юалляськыны кутско но, вераськыны луонлык кылдэ. Со мылкыдзэс ӝутыны быгатэ вын-агайёсмылэсь но сузэр-апайёсмылэсь, кудъёсыз коркась корка ветлыса тодытыны уг быгато ни». Со сяна, сыӵе христианъёслэн луонлыксы вань гожтэтъёс гожъяны но телефон пыр ӟеч иворез вераны.

14. Кыӵе умой адӟем карон возьматӥз Давид?

¹⁴ Вань трос мугъёс, кудъёсыз сэрен ми ум быгатӥське ужан-тыршонын лэсьтыны сое, мае милям потэ, кылсярысь, бадӟым арлыдмы, урод тазалыкмы яке кыӵе ке мукет мугъёс сэрен. Таӵе учыре милемлы тодамы возёно Давид эксэйлэсь примерзэ. Солэн туж потэ вал Иеговалы храм пуктэмез. Нош Инмар вераз, сое Давидлэн пиез пуктоз шуыса. Та сярысь тодыса, Давид пиезлы юрттӥз но, храмез пуктон понна, трос зарнизэ но азвесьсэ сётӥз. Кыӵе умой адӟем карон! (2 Экс. 7:12, 13; 1 Пар. 29:1, 3—5).

15. Кызьы Анри ӝож мылкыдзэ вормиз?

¹⁵ Франциысь Анри нимо агай тазалыкеныз герӟаськем шуг-секытъёс сэрен тӧро луыса ужамысь-тыршемысь дугдӥз. Со сяна, со номыр но лэсьтыны ӧз быгаты ни корка котыраз, огшоры ужъёсты гинэ но. Анри гожтэ: «Нырысь мон туж ӝоже уси но лыдъяй, мон номырлы но уг яраськы ни шуыса. Нош кӧня ке дыр ортчыса, мон валай: ялан куректыса улоно ӧвӧл со понна, мае лэсьтыны уг быгатӥськы ини. Соку мон шумпотыны быгатӥ солы, мае Иеговалы ужан-тыршонын  лэсьтэме луэ на. Мынам сётскеме уг поты. Мынам луэме потэ Гедеон кадь но солэн куинь сю ожгарчиосыз кадь, кудъёсыз, жадемзы шоры учкытэк, тушмонъёсынызы ожмаськизы!» (Суд. 8:4).

16. Малы ми дышетскыны быгатӥськомы кылчинъёслэсь?

¹⁶ Туж умой адӟем карон возьматӥзы Инмарлы оскымон кылчинъёс но. Одӥг пол Иегова юаз соослэсь, кин соос пӧлысь быгатоз пӧяны сьӧлыклэсь кышкасьтэм Ахав эксэез. Инмар кӧня ке кылчинъёсты кылзӥз, нош бырйиз одӥгзэ гинэ, но вераз, со та ужез быдэстыны быгатоз шуыса (3 Экс. 22:19—22). Ӝоже усизы-а мукет кылчинъёс таин сэрен? Малпаз-а соос пӧлысь кудӥз ке: «Малы мыным соку талы дырме быдтоно вал?» Ӧз, соос озьы ӧз малпалэ. Кылчинъёс зэмзэ ик зӥбыт-востэмесь, соослэн Иеговаез гинэ данъямзы потэ (Суд. 13:16—18; Усьт. 19:10).

17. Кызьы вормоно ӝож мылкыдэз, кудӥз кылдыны быгатэ, куке милемлы дано уж уг сёто?

¹⁷ Тодады возе, Иегова милемлы бадӟым дан сётӥз — солэн Адӟись-Ивортӥсьёсыз луыны но солэн Эксэйлыкез сярысь тодытыны. Туннэ ми кенешын дано ужъёсты быдэсъяськомы, нош ӵуказе соосты ыштыны быгатӥськомы. Но Инмар милемыз дано ужъёс понна уг дунъя. Со возьма, ми зӥбыт-востэмесь луомы шуыса. Ӵапак та сям понна яратэ милемыз Инмар, озьы ик вын-агайёсмы но сузэр-апайёсмы. Соин ик куре Иеговаез, со тӥледлы азьланяз но зӥбыт-востэм луыны мед юрттоз шуыса. Малпаське Библиысь Иеговалэн ужась-тыршисьёсызлэн примеръёссы вылын, кудъёсыз та сямъёсты возьматъязы. Дась луэ ужаны-тыршыны вын-агайёслы но сузэр-апайёслы (Пс. 137:6; 1 Пётр 5:5).

18, 19. Мар юрттоз ужан-тыршонын тросгес шумпотон шедьтыны, адямиослэн ӟеч иворез кылзэмзы уг поты ке но?

¹⁸ Оло нош, тӥ ӝоже усиськоды, адямиос ӟеч иворез уг кылзо шуыса яке соосты дорысьтызы шедьтыны секыт шуыса. Кызьы милемлы сыӵе учыре шумпотонмес ыштытэк улоно но эшшо но тросгес шумпотон басьтоно? Куд-ог пайдаё визь-кенешъёсты шедьтыны луоз « Мар юрттоз ужан-тыршонын тросгес шумпотон шедьтыны» рамкаысь. Со сяна, туж кулэ ужан-тыршон шоры шонер учкыны. Мае со возьматэ?

¹⁹ Тодады возе, милям ужпуммы — адямиослы  Инмарлэн нимыз но солэн Эксэйлыкез сярысь вераны. Иисус валамон вераз, улонэ нуись сюресэз ӧжытэз шедьтозы шуыса (Матф. 7:13, 14). Ужан-тыршонын ми Иеговаен, Иисусэн но кылчинъёсын ӵош ужаськомы (Матф. 28:19, 20; 1 Кор. 3:9; Усьт. 14:6, 7). Иегова утча соосты, кинъёслэн солы ужамзы-тыршемзы потэ (Иоанн 6:44). Оло нош, адями, кудӥзлэн туннэ милемыз кылзэмез уг поты, ӟеч иворен тунсыкъяськыны кутскоз, мукет дыръя со доры лыктӥмы ке.

20. Кызьы Иеремиялэн 20:8, 9 гожтэм кылъёс дышето милемыз куашкам мылкыдын нюръяськыны?

²⁰ Ми тросэзлы дышетскыны быгатӥськомы Иеремия пророклэн примерысьтыз. Инмар косӥз сое тодытыны отын, кытын адямиос сое ялан ултӥязы но серекъязы. (Лыдӟе Иеремиялэсь 20:8, 9.) Иеремиялэн сокем мылкыдыз куашкамын вал, со ужпум но кутӥз, Иеговалэн нимыныз уз ни вера шуыса. Озьы ке но вератэк улыны со ӧз быгаты. Малы? Малы ке шуоно «Кузё-Инмарлэн кылъёсыз» со понна ӝуась тыл кадь вал, кудзэ кутыса возьыны уг луы. Милям йырвизьмы но сюлэммы Инмарлэн Кылысьтыз зэмлыкен тырмемын ке, ми но ум быгатэ со сярысь вератэк улыны. Тӥни малы милемлы туж кулэ Библиез эскерыны но со вылын малпаськыны. Озьы лэсьтӥмы ке, ужан-тыршонын ми тросгес шумпотон басьтомы но тросгес адямиос милемыз кылзыны быгатозы (Иер. 15:16).

21. Мар юрттоз тӥледлы ӝож мылкыддэс вормыны?

²¹ «Шайтан ӝоже усёнэз милемын ожмаськон понна кутэ»,— пусъе Дебора, кудӥз сярысь та статьяын вераськиз ини. Нош Иегова трослы кужмогес Шайтанлэсь но солэн вань ожтӥрлыкъёсызлэсь. Соин ик тӥ ӝоже усиды ке, куре Иеговаез тӥледыз юнматыны. Со юрттоз тӥледлы шонер учкыны тырмымтэосты но ляб интыосты шоры. Со юнматоз тӥледыз висьыкуды. Со юрттоз куректытэк улыны, куке тӥледлы кенешын дано ужъёс уг сёто но куке адямиос ӟеч иворез уг кылзо. Озьы ик вералэ Инмысь Атайдылы ваньзэ, мар тӥледыз сюлмаськытэ. Солэн юрттэменыз тӥ ӝож мылкыддэс вормыны быгатоды.