1, 2. Мае ми эскеримы кылем статьяын, нош мае эскеромы таяз?

 КЫЛЕМАЗ статьяын ми эскеримы Левитысь 19-тӥ люкетысь куд-ог пайдаё законъёсты. Кылсярысь, 3-тӥ кылбурын Иегова израиль калыкез косӥз анай-атайёссэс гажаны. Ми эскеримы, кызьы ми быгатӥськомы анай-атайёсмылы юрттыны, соослэн улон понна ваньмыз кулэез мед луоз, Инмарен кусыпъёссы юнэсь мед луозы но умой мылкыдзы мед луоз шуыса. Со ик кылбурын Инмар израиль калыклы эшшо огпол вераз суббота сярысь законэз. Ми субботаез чакланы кулэ ӧвӧл ке но, возет, кудӥз вылэ та закон пыкиське, юрттоз милемлы Иеговалы йыбыртъян понна ялан дыр висъяны. Озьы ми возьматомы, дун-сьӧлыктэм луыны тыршиськомы шуыса, кызьы со сярысь гожтэмын Левитын 19:2 но 1 Пётрлэн 1:15.

² Та статьяын ми азьланьтомы эскерыны Левитысь 19-тӥ люкетэз. Ми тодомы, кызьы сӧсыр адямиосын асьмеды лякытэн возёно, кызьы пӧяськытэк ужано но кызьы матысь адямиосмылы яратонмес возьматоно. Милям дун-сьӧлыктэм Инмармылэсь адӟем кареммы потэ бере, ойдолэ та юанъёсты эскеромы.

3, 4. Левитэз 19:14 лыдэ басьтыса, кызьы адямиослы асьсэды возёно вал пельтэм но синтэм адямиосын?

³ Лыдӟе Левитэз 19:14. Иегова аслаз ужась-тыршисьёсызлэсь куре, соос сӧсыр адямиосын асьсэды лякытэн мед возёзы шуыса. Кылсярысь, израиль калыклы пельтэм муртэ лек кылъёсын куаретыны уг яра вал. Макем умойтэм луысал астэ озьы возьыны, эшшо ке пельтэм адямиен! Малы ке шуоно  адямиослэсь верамзэс со уг кылы. Соин ик, ассэ утён понна, со номыр вераны уг быгаты.

⁴ Со сяна, Инмарлэн ужась-тыршисьёсызлы синтэм адямилэн пыд улаз номыр поныны уг яра вал, со мед канжаськоз шуыса. Левит книгаез эскеронъя одӥг ужын сӧсыр адямиос сярысь вераське: «Вашкала дыръя Ближний Востокын сӧсыръёсын адямиос асьсэды ӵем дыръя шонерлыктэм но лек возизы» b. Жаляса верано луэ, сыӵе чурыт сюлэмо адямиос, синтэм адямиез серем карыса, солэн пыд улаз мар ке но поно вал, со мед канжаськоз но мед усёз шуыса. Но зэмзэ вераса, номыр серемез отын ӧй вал! Та курон-косонэз сётыса, Иегова аслаз калыкезлы валаны юрттӥз, пельтэм но синтэм адямиосты гажаны-жаляны кулэ шуыса.

5. Кызьы ми сӧсыр адямиослы гажан-жалянмес возьматыны быгатӥськомы?

⁵ Иисус сӧсыр адямиосты гажаз-жаляз. Тодамы ваёмы кылъёсты, кудъёссэ со вераны косӥз Иоанн Пылатӥсьлы: «Синтэмъёс адӟыны кутско, чутъёс ветло, гижлочерен висисьёс чылкытало, пельтэмъёс кыло, кулэмъёс улӟо» (Лука 7:20—22). Ваньзы, кинъёс Иисуслэсь паймымон ужъёссэ адӟизы, Инмарез данъязы (Лука 18:43). Христианъёслэн но потэ сӧсыр адямиослы гажан-жалянзэс возьматэмзы, асьсэды соосын лякытэн, валаса но чидаса воземзы. Иегова паймымон ужъёс лэсьтыны милемлы кужым ӧз сёты ке но, со куриз милемыз синтэмъёслы но зэмлыкез тодӥсьтэм адямиослы вуоно рай сярысь вераны (Лука 4:18). Шумпотон ивор, вань адямиослэн умой тазалыксы луоз шуыса, али ик ини тросэзлэсь мылкыдзэс ӝутэ Инмарез данъяны.

6. Кызьы Левитысь 19-тӥ люкет юрттэ милемлы Дас курон-косонъёсты умойгес валаны?

⁶ Левитысь 19-тӥ люкетысь куд-ог кылбуръёс милемлы Дас курон-косонъёсты умойгес валаны юртто. Кылсярысь, тямысэтӥ курон-косонын гожтэмын: «Эн лушкаськы» (Пот. 20:15). Кин ке но малпалоз: «Та  курон-косонэз мон быдэсъясько, малы ке шуоно мурт адямилэсь номырзэ басьтылэме ӧвӧл». Но лушкаськон пӧлы та гинэ уг пыры.

7. Кызьы вузчи тямысэтӥ курон-косонэз тӥяны быгатэ вал?

⁷ Вузчи, кудӥз мурт адямиослэсь ваньбурзэс аслыз ноку но ӧз карылы, ӧз ик малпа, вылды, со лушкаськись луыны быгатэ шуыса. Нош тани малы саклык висъяське Левитын 19:35, 36: «Кузьдалаез-ӝуждалаез, секталаез, быдӟалаез мертакуды, эн ӧрекчаське. Весъёсты шонер мед мерталозы, гираосты ярамонэсь-шонересь мед луозы, ефа шонер, гин оскиськымон мед луозы». Малы Иегова таӵе курон-косон сётӥз? Вераны луоз, вузчи, шонертэм мертакуз, лушкаське вал шуыса. Та малпанэз возьмато Левитысь 19-тӥ люкетысь мукет кылбуръёс но.

8. Кызьы Левитысь 19:11—13 кылъёс еврей калыклы тямысэтӥ курон-косонэз уже кутыны юрттӥзы но кыӵе пайда ваё милемлы та кылъёс?

⁸ Лыдӟе Левитэз 19:11—13. Левитын 19:11 гожтэмын: «Эн лушкаське... огдэс огды эн пӧялэ». Та кылбур уж дорын пӧяськонэз герӟа лушкаськонэн. Озьыен, кин ке но уж дораз пӧяськиз ке, вераны луоз, со лушкаськиз шуыса. Тямысэтӥ курон-косонын лушкаськон сярысь гинэ верамын ӧвӧл. Левит книга та законэз валэктӥз но еврей калыклы котькыӵе удысъёсын пӧяськытэк улыны юрттӥз. Милемлы но пайдаё луоз малпаськыны со сярысь, кызьы Иегова пӧяськон но лушкаськон шоры учке. Ми асьмелэсь юаны быгатӥськомы: «Левитэз 19:11—13 лыдэ басьтоно ке, кулэ-а мыным ас улонам мае ке воштыны, тужгес но ужен герӟаськем удысын?»

9. Кызьы Левитысь 19:13 закон медъям муртъёсты утиз?

⁹ Нош мае лыдэ басьтоно христиан муртлы, кудӥз ужбергатӥсь луэ? Левитын 19:13 кыкетӥ люкетаз гожтэмын: «Медъям муртэдлы дун тырондэ вуоно ӵукнаозьлы эн кельты». Медъям муртъёслы котькуд ужан нуналлэн пумаз уждунзэс сётыны кулэ вал, сотэк соос семьяоссэс сюдыны-вордыны ӧз быгатысалзы. Иегова медъям муртъёслэсь югдурзэс валаз, соин ик со косӥз: «Шунды пуксемлэсь азьло, со нуналэ ик, уждунзэ солы тыр, уго со куанер, солэн лулыз-сюлмыз уждундэ возьма» (К. Зак. 24:14, 15; Матф. 20:8).

10. Малы милемыз дышетэ Левит 19:13?

¹⁰ Туннэ тросэз адямиос уждунзэс котькуд нунал уг басьто, нош толэзяз огпол яке кык пол гинэ. Озьы ке но Левитысь 19:13 возетэз туннэ но уже кутыны луэ. Куд-огъёсыз медъям муртъёссэс пӧяло но соослы туж ӧжыт коньдон тыро. Сыӵе адямиос тодо, медъям муртъёслэн сокем секыт югдурзы, соос туж ӧжыт коньдон понна но ужаны дась луозы шуыса. Вераны луоз, сыӵе кузёос Левитысь 19:13 возетэз уже уг куто шуыса. Нош христиан мурт медъям муртъёсызлы ужам коньдонзэс пӧяськытэк сётоз. Табере эскеромы Левитысь 19-тӥ люкетысь мукет пайдаё малпанъёсты.

11, 12. Малы Иисус вераз кылъёсты, кудъёсыз гожтэмын Левитын 19:17, 18?

¹¹ Инмар возьма, ми мукетъёсызлы уродзэ лэсьтытэк гинэ ум улэ, нош эшшо мар ке но каромы на шуыса. Сое адӟыны луэ Левитысь 19:17, 18 (лыдӟе). Иегова валамон вера: «Астэ кызьы яратӥськод, матысьтэ но озьы ик яраты». Инмарез шумпоттон понна, христиан муртлы ӵапак озьы ассэ возёно.

¹² Иисус возьматӥз, макем кулэ луэ та курон-косон. Огпол фарисей юаз солэсь, законын кыӵе курон-косон самой кулэез шуыса. Иисус солы шуиз: «Инмардэ Кузё-Инмарез  вань сюлмыныд, вань лулыныд, вань визьмыныд яраты». Собере Левитысь 19:18 кылъёсты кутыса, Иисус вераз кыкетӥез самой кулэез курон-косон сярысь: «Матысьтэ астэ ачид кадь ик яраты» (Матф. 22:35—40). Вань трос луонлыкъёс матысь адямиосмылы яратонмес возьматыны. Ойдолэ эскеромы, кыӵе луонлыкъёс сярысь вераське Левитысь 19-тӥ люкетын.

13. Кызьы Иосифлэн учырез валаны юрттэ Левитысь 19:18 кылъёсты?

¹³ Со, кин матысь адямиоссэ яратэ, уже кутэ Левитысь 19:18 курон-косонэз: «Йыркуръяськыса эн улы, уродлы пумит уродэн пунэмзэ эн берыкты». Оло нош, тӥ но тодӥськоды сое, кин трос аръёс ӵоже ӵош ужасез, ӵош дышетскисез яке ӵыжы-выжыез вылэ йыркуръяськыса улэ. Библиын но сыӵе адямиос сярысь вераське. Кылсярысь, Иосифлэн агайёсыз. Соос трос аръёс ӵоже Иосиф вылэ йыркуръяськыса улӥзы но, берлогес солы пумит урод уж лэсьтӥзы (Ул.-выл. 37:2—8, 25—28). Нош Иосиф ассэ чылкак мукет сямен возиз. Египетын вылӥ инты басьтыса, со быгатэ вал агайёсызлы пунэмзэ берыктыны, нош со соослы гажан-жалянзэ возьматӥз. Иосиф соос вылэ йыркуръяськыса ӧз улы. Со уже кутӥз возетэз, кудӥз берлогес Левитын 19:18 гожтэмын вал (Ул.-выл. 50:19—21).

14. Малы вераны луоз, возетъёсты, кудъёсыз вылэ Левитысь 19:18 закон пыкиське, асьме нуналъёсы но уже кутыны луэ шуыса?

¹⁴ Иосиф агайёсызлы пунэмзэ берыктыны ӧз тыршы но соос вылэ йыркуръяськыса ӧз улы. Со интые, Иосиф соосты вань сюлмысьтыз простить кариз. Озьы со туж умой адӟем карон возьматӥз асьме нуналъёсы улӥсь Инмарлэн ужась-тыршисьёсызлы. Иисус но милесьтым мылкыдмес ӝутэ озьы ик малпаськыны. Кылсярысь, вӧсяськыны дышетыкуз, со вераз, милемыз вӧсь карись адямиосты ми простить карыны кулэ шуыса (Матф. 6:9, 12). Апостол Павел но гожтӥз: «Гажаноосы, тӥледлы урод лэсьтӥсьёслы пунэмзэ эн берыктэ» (Рим. 12:19). Нош Колоссыослы 3:13 со милесьтым мылкыдмес ӝутэ: «Ог-огдэс чидаса улэ, кинлэн ке кин ке вылэ йыркурез вань ке, ог-огдылы простить каре». Адӟиське, Иеговалэн  эсэпъёсыз уг вошъясько. Нош возетъёсты, кудъёсыз вылэ Левитысь 19:18 закон пыкиське, асьме нуналъёсы но уже кутыны луэ.

15. Пример вылын валэктэ, малы йыркуръяськыса улоно ӧвӧл.

¹⁵ Эскеромы таӵе примерез. Сюлэм вӧсь луэмез ӵошатыны луэ яраосын. Куд-огъёсыз бадӟымесь луо, мукетъёсыз — пичиесь. Куддыръя, конвертэз усьтыку, чиньымы бумагалэн дурыз борды вандӥське. Соку вӧсь луэ ке но, солэсь нокин уг кулы. Одӥг-кык нунал ортчыса, со тодамы но уг лыкты ни. Озьы ик йыркуръяськонэн но. Кылсярысь, эшмы милемлы малпаськытэк мае ке вераз яке лэсьтӥз ке, ми со вылэ йыркуръяськыса ум улэ но сое простить каромы. Нош куд-ог яраос муресь луо. Кылсярысь, мур вандӥськем яраез биньыны яке вурыны но кулэ луэ. Но ярамес ялан кутылӥмы ке, асьмелы ик уродгес каромы. Жаляса верано луэ, бадӟым йыркурен улӥсь адямиос асьсэды озьы ик возё. Соосты сюлмаськытӥсь учыр сярысь ялан малпаськыса, вераны луоз, соос яразылы бурмыны уг сёто но асьсэлы гинэ уродгес каро. Сыӵе учыре умой луысал уже кутыны курон-косонэз, кудӥз гожтэмын Левитын 19:18.

16. Кызьы ассэ возьыны кулэ вал израиль калык сьӧрлось лыктэм муртъёсын но малы со милемыз дышетэ? (Левит 19:33, 34).

¹⁶ Израиль калык понна матысь адямиос пӧлы ас калыкысьтызы адямиос гинэ ӧз пыре. Иегова возьмаз, соос сьӧрлось лыктэм адямиосты но яратозы шуыса. Та сярысь Инмар валамон вераз Левитын 19:33, 34 (лыдӟе). Израиль калыклы сьӧрлось лыктэм муртъёсын ассэ ас калыкеныз кадь возёно вал но соосты ассэ кадь ик яратоно вал. Кылсярысь, законын гожтэмын вал, кылем емышъёсты израиль калык но, сьӧрлось лыктэмъёс но бичаны быгато шуыса (Лев. 19:9, 10). Христианъёс уло возетъя, кудӥз вылэ та закон пыкиське, но ас калыксэс гинэ уг ярато (Лука 10:30—37). Оло нош, тӥ палан но мукет шаерысь трос лыктэмъёс уло. Асьме нуналъёсы та нокинэ уг паймыты ни. Сыӵе адямиосты — бадӟымъёссэ но, пичиоссэ но — гажаны кулэ.

17, 18. а) Мар карыны мылкыдмес ӝуто Левит 19:2 но 1 Пётрлэн 1:15? б) Кыӵе уже, Пётрлэн верамезъя, ми пыриськыны кулэ?

¹⁷ Левит 19:2 но 1 Пётрлэн 1:15 Инмарлэн  ужась-тыршисьёсызлэсь мылкыдзэс ӝуто дун-сьӧлыктэмесь луыны. Кызьы ми адӟимы, Левитын 19-тӥ люкетын вань на трос мукет кылбуръёс, кудъёсыз валэкто милемлы, мар карыны кулэ, Иеговаез шумпоттон понна. Со сяна, та люкетын вань на трос мукет пайдаё малпанъёс, кудъёссэ ми та кык статьяосын ӧм эскере c. Христиан Грек Гожтэмъёсысь адӟиське: Иеговалэн азьло сямен ик потэ, ми уже мед кутомы возетъёсты, кудъёсыз вылэ та курон-косонъёс пыкисько. Но апостол Пётр эшшо мае ке вера на.

¹⁸ Вань ӟеч ужъёс пӧлысь, кудъёссэ Инмарлэн ужась-тыршисьёсыз лэсьто, Пётр огзэ пусйиз. Дун-сьӧлыктэмесь луыны мылкыдзэс ӝутэмезлэсь азьло Пётр вераз: «Визьдылэсь куссэ думыса, сэзь... [улэ]» (1 Пётр 1:13, 15). Та кылъёсын Пётр вераз, Иеговалэн паймымон сямъёсыз сярысь зырӟем христианъёс котькытын ивортыны кулэ шуыса (1 Пётр 2:9). Туннэ та уже вань христианъёс пырисько. Со самой кулэ луись но самой пайдаё уж луэ. Ми понна, Инмарлэн дун-сьӧлыктэм калыкез понна, тодытыны но дышетскисьёсты дасяны — бадӟым дан! (Марк 13:10). Соин ик ми, кужыммес жалятэк, вань сюлмысьтымы та уже пыриськиськомы. Левитысь 19-тӥ люкетысь возетъёсты уже кутыса, ми Инмарлы но матысьёсмылы яратонмес возьматӥськомы, озьы ик ми возьматӥськомы, котьку но дун-сьӧлыктэмесь луэммы потэ шуыса.