1, 2. Мар паймымон амалэн огазеялоз 2018-тӥ арын быдэс дунне вылысь трос миллион адямиосты? (Учке статья кутсконысь туспуктэмъёсты.)

 ТРОС миллион адямиос понна 2018-тӥ арын 31-тӥ южтолэзь нимысьтыз нунал луоз. Иеговалэн Адӟись-Ивортӥсьёсыз но трос мукет адямиос пӧртэм интыосын шунды пуксем бере огазе люкаськозы. Соос Иисус Христослэсь кулонзэ Тодэ ваён ӝытанэз пусъёзы. Котькуд ар Ӝытанэз пусъён быдэс дунне вылысь адямиосты паймымон амалэн огазея!

² Тырше син азяды пуктыны, макем шумпотоз Иегова но Иисус, трос миллион адямиослэсь Ӝытанэз пусъемзэс адӟыса. Библиын азьло ик верамын вал, «вань выжыос, калыкъёс, пӧртэм кылын вераськисьёс, улыос-бечеос пӧлысь» «туж-туж трос калык», кудзэ нокин лыдъяны уг быгаты, бадӟым куараен тазьы вералозы шуыса: «Престол вылын пукись Инмармылэн но Ыжпилэн кияз утиськон!» (Усьт. 7:9, 10). Зэмзэ но, Ӝытанэз пусъён — со  туж умой луонлык Иеговаез но Иисусэз данъяны!

3. Кыӵе юанъёсты ми эскеромы?

³ Та статьяын ми таӵе юанъёсты эскеромы: 1) Кызьы котькудмы дасяськыны быгатомы Ӝытанэз пусйыны? 2) Кызьы Ӝытан Инмарлэсь калыксэ огазея? 3) Мар ми карыны быгатӥськомы, огкылысь улон понна? 4) Ку берпуметӥез Ӝытанэз пусъён луоз?

4. Малы туж тыршоно Ӝытанэ мыныны?

⁴ Малпаське со сярысь, макем кулэ Ӝытанэ ветлыны. Ми тодӥськомы, кенешлэн пумиськонъёсаз ветлон — со Инмарлы йыбырттонлэн оглюкетэз. Веранэз ӧвӧл, Иегова но Иисус дунъяло котькинэ, кин вань кужымзэ понэ, арысь самой кулэ пумиськонын луон понна. Милям потэ, Иегова но Иисус мед адӟозы: ми, номыр шоры учкытэк, Ӝытанэ мыныны тыршомы. Ужъёсысьтымы мед адӟиськоз, ми христиан пумиськонъёсты туж дунъяськомы шуыса. Соку Иеговалэн эшшо одӥг мугез луоз на милесьтым ниммес «буре ваён книгае» гожтыны. «Буре ваён книгае» — со «улон книга», кудаз гожтэмын соослэн нимъёссы, кинъёслы пырак улон кузьмамын луоз (Мал. 3:16; Усьт. 20:15).

5. Кызьы Ӝытан азьын ми возьматыны быгатомы, Павеллэн таӵе визь-кенешезлэсь кылзӥськиськомы шуыса: «Асьтэдыз асьтэос чаклалэ-эскере: осконэн-а тӥ улӥськоды?»

⁵ Ӝытан азьын кӧня ке арня ӵоже тырше дыр висъяны, Иеговаен кусыпъёсты сярысь вӧсяськыса малпаськон понна. (Лыдӟе 2 Коринфъёслы 13:5.) Апостол Павел Коринфын улӥсьёслы таӵе визь-кенеш сётӥз: «Асьтэдыз асьтэос чаклалэ-эскере: осконэн-а тӥ улӥськоды?» Нош кызьы сое эскероно? Кылсярысь, аслыд таӵе юанъёс сётыны луоз: «Оскисько-а мон, организация, кудаз мон пырисько, одӥг гинэ организация луэ шуыса, кудзэ Иегова уже кутэ, аслэсьтыз эриксэ быдэстон понна? Луоз-а вераны, тодытон уже но дышетскисьёсты дасянэ мон вань сюлэмме понӥсько шуыса? Возьмато-а ужъёсы сюлмысь оскемме, ми берпум нуналъёсы улӥськомы но ӝоген Шайтанлэн кивалтэмезлы пум вуоз шуыса? Оскисько-а мон Иеговалы но Иисуслы озьы ик юн, кызьы мон оскисько вал сӥзиськеме бере ик?» (Матф. 24:14; 2 Тим. 3:1; Евр. 3:14). Та юанъёс вылын малпаськимы ке, асьмеды эскерыны быгатомы.

6. а) Кыӵе сюрес пырак улонэ нуэ? б) Кызьы одӥг тӧро котькуд ар Ӝытанлы дасяське но кызьы солэсь адӟем карыны луоз?

⁶ Лыдӟе Библия вылэ пыкиськем публикациосмес, кудъёсаз гожтэмын, макем кулэ луэ Ӝытан, но малпаське лыдӟемды вылын. (Лыдӟе Иоаннлэсь 3:16; 17:3.) Одӥг гинэ сюрес вань, кудӥз пырак улонэ нуэ. Иегова сярысь тодон-валан басьтыса но солэн одӥг гинэ вордӥськем Пиезлы, Иисус Христослы, оскыса гинэ, пырак улон басьтыны луэ. Ӝытанлы дасяськон понна, эскере темаосты, кудъёсыз юрттозы тӥледлы Иеговалы но Иисуслы матэ кариськыны. Тани кызьы дасяське одӥг вын-агай, кудӥз кема дыр ӵоже тӧро луыса ужа-тырше. Трос аръёс ӵоже ини со «Возьмаськон башняысь» статьяос люка Ӝытан сярысь но со сярысь, кыӵе  яратонзэс возьматӥзы милемлы Иегова но Иисус. Ӝытан азьын кӧня ке арня ӵоже со выльысь но выльысь лыдӟе со статьяосты но малпаське, малы Ӝытанэз пусйыны кулэ. Куддыръя со эшшо одӥгзэ-кыксэ выль статьяосты шедьтэ на. Люкам статьяоссэ выльысь лыдӟыса, озьы ик Ӝытан азьын Библиез лыдӟон графикъя Библиез лыдӟыса но со вылын умой малпаськыса, со вын-агай котькуд ар мар ке но выльзэ тодэ. Нош самой кулэез — озьы солэн арысь аре Иеговаез но Иисусэз яратонэз юнма. Тӥ но со выллем эскеронъёс ортчытъяды ке, тӥляд но Иеговалы но Иисуслы тау каронды но яратонды будоз. Соку Ӝытанэз пусъён тӥ понна зэмзэ ик нимысьтыз луоз.

7. а) Мар сярысь вӧсяськиз Иисус, куке Ӝытанэз пусйыны косӥз? б) Малы вераны луоз, Иегова солэсь вӧсяськемзэ кылӥз шуыса?

⁷ Со ӝытэ, куке Иисус аслэсьтыз дышетскисьёссэ Ӝытанэз пусйыны косӥз, со вӧсяськиз, вань дышетскисьёсыз огкылысь мед улозы шуыса, кызьы со инмысь Атаеныз огкылысь улэ. (Лыдӟе Иоаннлэсь 17:20, 21.) Кылӥз-а Иегова солэсь вӧсяськемзэ? Одно ик. Ӝытанэз пусъён яркыт возьматэ Иеговалэн Адӟись-Ивортӥсьёсызлэсь огкылысь улэмзэс: быдэс дунне вылын огазе люкасько трос пӧртэм калыкъёсысь пӧртэм куо трос миллион адямиос, кудъёсыз оско, Инмар аслэсьтыз Пизэ музъем вылэ ыстӥз шуыса. Куд-ог шаеръёсын пӧртэм калыкысь адямиос, огазе люкаськыса, Инмарлы уг йыбыртъяло, нош люкасько ке, мукет адямиос соос шоры умоен уг учко. Нош Иеговалы но Иисуслы туж кельше, куке пӧртэм калыкысь адямиос огазе люкасько но Ӝытанэз пусъё.

8. Кыӵе оскон сётӥз Иегова Иезекиильлы?

⁸ Инмарлэн калыкез уг паймы, адямиос озьы огкылысь улыны быгато шуыса, малы ке шуоно со сярысь Инмар азьло ик вераз вал. Тодамы ваёмы, мар вераз Иегова Иезекиильлы, куке косӥз сое кык бодыосты огазеяны. Одӥг боды вылын гожтэмын вал «Иудалы», нош мукетыз вылын — «Иосифлы». (Лыдӟе Иезекиильлэсь 37:15—17.) «Ищите Царство, а не материальных благ» брошюраын «Лыдӟисьёслэн юанъёсазы» гожтэмын вал: «Иегова Иезекиильлы кылзэ сётыса вераз, Сӥзем музъеме берытскемез бере Израиль огазеям калык луоз шуыса. Озьы со Иезекиильлы оскон сётӥз. Со кылъёс озьы ик верамын берпум нуналъёсы Инмарлэсь калыксэ огазеян сярысь».

9. Кызьы Ӝытанэз пусъён возьматэ, Иезекиильлэн азьпалзэ ивортонэз быдэсме шуыса?

⁹ 1919-тӥ арысен кутскыса, Иегова зырӟем христианъёсты огазеяны но соослэсь ужзэс радъяны кутскиз. Соос сярысь верамын вал, соос Иудалэн бодыез луо шуыса. Собере соос борды итӥськыны кутскизы христианъёс, кудъёсызлэн осконзы музъем вылын улыны,— Иосифлэн бодыез. Озьы кык пӧртэм группаысь Инмарлэн ужась-тыршисьёсыз «одӥг уллё» луизы (Иоанн 10:16; Зах. 8:23). Иегова кылзэ сётӥз, солэн кияз та кык бодыос одӥг боды луозы шуыса (Иез. 37:19).  Али христианъёс, кудъёсыз инмын улыны оско, но христианъёс, кудъёсыз музъем вылын улыны оско, огкылысь ужало-тыршо. Соосын кивалтэ одӥг Эксэй, данъям Иисус Христос. Сое Инмар Иезекиильлэн азьпалзэ ивортоназ «Мынам ляльчие, Давид» шуыса нимаз (Иез. 37:24, 25). Котькуд ар Ӝытанэз пусйыку, ми адӟиськомы, макем тупаса улэ Инмарлэн калыкез. Со сярысь верамын вал Иезекиильлэн книгаяз: зырӟем христианъёс но «мукет ыжъёс» огазе люкасько, Христослэсь кулонзэ Тодэ ваён ӝытанэз пусйыны. Нош мар карыны быгатӥськомы котькудмы, со огкылысь улонэз утён но юнматон понна?

10. Мар ми карыны быгатӥськомы, Инмарлэн калыкез пӧлын огкылысь улон мед луоз шуыса?

¹⁰ Нырысь ик, милям зӥбыт-востэм луэммы огкылысь улыны юрттэ. Иисус аслэсьтыз дышетскисьёссэ асьсэды вылӥе пуктытэк улыны ӧтиз (Матф. 23:12). Милям сюлэммы уг вылтӥяськы ке, отчы уз пыӵа та дуннеын вӧлмем вылтӥяськись мылкыд. Со сяна, зӥбыт-востэм сям кенешын кыл кутӥсь вын-агайёслэсь кылзӥськыны юрттэ. Со быдэс кенешлы пайда вае. Нош нырысь ик милям зӥбыт-востэм луэммы Иеговаез шумпоттэ, малы ке шуоно  «вылӥ мылкыдоослы Инмар пумит кариське, нош зӥбыт-востэм улӥсьёслы дэлет сётэ» (1 Пётр 5:5).

11. Кызьы Ӝытанын кутӥськись символъёс сярысь малпаськон милемыз огазея?

¹¹ Кыкетӥез, мар юрттэ милемлы вын-агайёсынымы но сузэр-апайёсынымы огкылысь улыны,— со малпаськон со сярысь, мае возьмато Ӝытанын кутӥськись символъёс. Ӝытанэз пусъён азьын, нош тужгес но Ӝытанэз пусъён дыръя, малпаське, мае возьматэ юмал нянь но горд вина (1 Кор. 11:23—25). Нянь — со Иисус Христослэн сьӧлыктэм мугорыз, кудзэ со ми понна курбонэ сётӥз, нош вина — солэн кисьтэм вирыз. Но символъёслэсь мае возьматэмзэс тодыны гинэ тырмыт ӧвӧл. Тодамы возёно, дун сётыса Иегова но Иисус асьсэлэсь юн яратэмзэс возьматӥзы шуыса. Асьмемыз яратэменыз, Иегова аслэсьтыз Пизэ ми понна сётӥз. Нош Иисус аслэсьтыз яратэмзэ возьматӥз, куке аслэсьтыз улонзэ ми понна жалятэк сётӥз. Со сярысь малпаськимы ке, со милесьтым мылкыдмес ӝутоз соосыз но озьы ик яратыны. Иеговаез яратон огазея милемыз вын-агайёсынымы но сузэр-апайёсынымы но огкылысь улыны юрттэ.

12. Кызьы Иисуслэн эксэй сярысь мадёнэз, кудӥз ляльчиезлы бадӟым тыриськонзэ простить кариз, возьматэ, Иеговалэн потэ, ми мукетъёссэ прощать мед каромы шуыса?

¹² Куинетӥез, ми огкылысь улӥськомы, куке мукетъёссэ вань сюлмысьтымы простить кариськомы. Озьы ми возьматомы, Христослэн мозмытӥсь курбонэзлы тау кариськомы шуыса, кудӥзлы луыса Иегова милесьтым сьӧлыкъёсмес куштыны быгатэ. Малпаське Иисуслэн мадёнэз вылын, кудӥз гожтэмын Матфейлэсь 18:23—34. Юалэ асьтэлэсь: «Потэ-а мынам озьы улэме, кызьы Иисус дышетӥз? Огъя оскись вын-агайёслы но сузэр-апайёслы чидамме но соосты валамме возьматӥсько-а? Капчи-а мыным простить карыны сое, кин монэ ӝоже уськытӥз?» Вераны кулэ, сьӧлыкъёс пӧртэмесь луо: куд-огъёсыз секытэсь, нош мукетъёсыз сокем секытэсь ӧвӧл. Но куддыръя, тырбыдэстэм луэменымы сэрен, куд-ог янгышъёсты простить карыны туж секыт. Та мадён юрттэ валаны, мае возьма милесьтым Иегова. (Лыдӟе Матфейлэсь 18:35.) Иисус валэктӥз, Иегова милемыз простить уз кары шуыса, вын-агайёсмес простить ӧм каре ке, соос янгышсы понна сюлмысь ӧпкельыку. Сое тодон милемыз сак луыны косэ. Огкылысь улон понна, милемлы мукетъёссэ прощать кароно, кызьы Иисус дышетӥз.

13. Кызьы милям тупаса улыны тыршеммы огкылысь улыны юрттэ?

¹³ Огъя оскись вын-агайёсмес но сузэр-апайёсмес простить карыса, ми возьматӥськомы, ми тупаса улыны тыршиськомы шуыса. Апостол Павел христианъёсты ӧтиз «одӥг духен тупаса, огмылкыдын улыны» (Еф. 4:3). Ӝытанэз пусъён вакытэ, тужгес но Ӝытанэз пусйыку, мур малпаське, кызьы тӥ асьтэды мукетъёсыныз возиськоды. Юалэ асьтэлэсь: «Уг лыдъяло-а монэ сыӵе адямиен, кудӥз кӧт ӝожъёссэ уг вунэты? Малпало-а мон сярысь, мон вань кужымме понӥсько шуыса, тупаса но огкылысь улон понна?» Милемлы туж кулэ та юанъёс вылын малпаськыны.

14. Кызьы ми возьматыны быгатӥськомы, ог-огмес яратыса чидаськомы шуыса?

 ¹⁴ Ньылетӥез, ми огкылысь улыны юрттӥськомы, куке тыршиськомы мукетъёсыз шоры учкыны озьы ик, кызьы учке Иегова, яратонлэн Инмарез (1 Иоанн 4:8). Милемлы ноку но тазьы малпано ӧвӧл: «Вын-агайёсме но сузэр-апайёсме мыным яратоно ке но, со уг возьматы, соос ваньзы мыным кельшыны кулэ шуыса». Озьы малпасалмы ке, со возьматысал, ми Ефесъёслы гожтэтысь 4:2 Павеллэсь визь-кенешсэ санэ ум басьтӥське шуыса, кудаз со христианъёсты ог-огзэс яратыса чиданы ӧтиз. Павел вераз, мукетъёссэ чидам сяна, эшшо мар ке но кулэ на шуыса. Со пусйиз, милемлы мукетъёссэ яратоно на шуыса. Со туж кулэ, малы ке шуоно кенешъёсамы туж пӧртэм адямиос, но ваньзэс соосты Иегова ас дораз вайиз (Иоанн 6:44). Нош со соосты ас дораз вайиз бере, озьыен, со шедьтӥз, мар понна соосты яратыны. Соин ик шонертэм луысал малпаны, кенешысь кин ке но милемлы яратыны ярамон уг луы шуыса. Милемлы уг яра кинэ ке но яратытэк улыны, малы ке шуоно яратыны милемыз ачиз Иегова косэ! (1 Иоанн 4:20, 21).

15. Кытысь ми тодӥськомы, вуоз шуыса дыр, куке ми Ӝытанэз берпуметӥзэ пусъёмы?

¹⁵ Вуоз дыр, куке Инмарлэн калыкез Ӝытанэз берпуметӥзэ пусъёз. Кытысь ми сое тодӥськомы? Коринфъёслы нырысетӥ гожтэтаз Павел зырӟем христианъёслы гожтӥз, котькуд ар Ӝытанэз пусйыса, соос Христослэсь кулонзэ, «со лыктытозь», тодыто шуыса (1 Кор. 11:26). Дышетскисьёсызлы берпум нуналъёс сярысь веракуз, Иисус ачиз но аслаз лыктонэз сярысь вераз. Тани мар со вераз бадӟым куректон сярысь, кудӥз милемыз азьланяз возьма: «Инбамын Адями Пилэн тодметэз возьматскоз; соку музъем вылысь вань калык выжыос бӧрдозы но быдӟым кужымен, пиштӥсь данлыкен ин пилемъёс вылын лыктӥсь Адями Пиез адӟозы. Аслэсьтыз Кылчинъёссэ бадӟым куараё гумыен ыстоз но дуннелэн ньыль палысьтыз, инлэн вань пумъёсысьтыз Солэсь быръем адямиоссэ люкалозы» (Матф. 24:29—31). Кылчинъёс быръем адямиосты люкалозы, куке вань зырӟем христианъёс, кудъёсыз музъем вылын уло на, инме басьтэмын луозы. Со луоз бадӟым куректон кутскем бере, но Армагеддон ожмаськон кутскемлэсь азьло. Собере ваньмыз 144 000 зырӟемъёс Иисуслэн кивалтэмез улсын музъем вылысь эксэйёсын ожмаськозы (Усьт. 17:12—14). Берпуметӥез Ӝытан луоз соиз, кудӥз пусйиськоз Иисус зырӟем христианъёсты люканы лыктон азьын.

16. Малы тӥляд таяз аре Ӝытанэ мынэмды потэ?

¹⁶ Одно ик мынэ 2018-тӥ арын 31-тӥ южтолэзе Ӝытанэз пусйыны. Озьы ик куре, Иегова тӥледлы мед юрттоз шуыса лэсьтыны ваньзэ, мае быгатӥськоды, солэн калыкез пӧлын огкылысь улон мед луоз шуыса. (Лыдӟе Псалтирез 132:1.) Тодады возе: вуоз дыр, куке Ӝытанэз ми берпуметӥзэ пусъёмы. Нош али ойдолэ одӥг Ӝытанэз но пусйытэк ум кельтэ но христианъёс пӧлысь огкылысь улонэз дунъяломы, кудӥз яркыт адӟиське Ӝытанэз пусъён дыръя!