1. Маин аспӧртэмлыко луэ дыр, кудаз ми улӥськомы?

 МИ УЛӤСЬКОМЫ аспӧртэмлыко дыре. Кызьы Библиын азьло ик верамын вал ини, туннэ Иегова «вань выжыос, калыкъёс, пӧртэм кылын вераськисьёс, улыос-бечеос пӧлысь» туж-туж трос калыкез бича. Со «кужмо калык» пӧлы тямыс миллионлэсь тросгес шудо адямиос пыро, кудъёсыз «уй но нунал Солы [Иеговалы] служить каро» (Усьт. 7:9, 15; Ис. 60:22). Ноку но ӧй вал на сомында адямиос, кудъёсыз зэмзэ ик Инмарез но ог-огзэс мед яратысалзы.

2. Кыӵе яратонзы адямиослэн, кудъёсыз Инмарен уг эшъясько? (Учке статья кутсконысь суредэз.)

² Нош Библиын озьы ик верамын вал, асьме дыръёсы улӥсь адямиослэн, кудъёсыз Инмарен уг эшъясько, яратонзы чылкак мукет луоз шуыса. Апостол Павел гожтӥз, берпум нуналъёсы «адямиос асьсэды асьсэос но коньдонэз гинэ яратӥсесь луозы... Инмарез яратон сярысь, золгес каньылэн, эзылыса улонэз яратозы» (2 Тим. 3:1—4). Астэ ачид яратон Инмарез яратонлы пумит луэ. Кин ке но малпа, ас мыл потонъёсызъя улыса, шудо  луыны быгатоз шуыса, но со озьы ӧвӧл. Сыӵе мылкыд адямиосты асьсэды гинэ яратыны косэ, нош сыӵе адямиос пӧлын улыны секыт.

3. Мае ми эскеромы та статьяын но малы?

³ Павел вала вал, та дуннеын вӧлмем астэ ачид яратон христианъёслы кышкытлык вае шуыса. Соин ик со визь-кенеш сётӥз асьсэды гинэ яратӥсь адямиослэсь палэнын возиськыны (2 Тим. 3:5). Но сыӵе адямиосын чик пумиськылытэк улыны уг луы. Мар кароно, та дуннелэн мылкыдызлы сётскытэк но яратонлэсь Инмарзэ, Иеговаез, ас ужъёсынымы шумпоттыса улон понна? Ойдолэ ӵошатомы Инмарлы ярась яратонэз со яратонэн, кудӥз сярысь верамын 2 Тимофейлы 3:2—4. Со юрттоз милемлы асьмеды эскерыны но адӟыны, кыӵе воштӥськонъёс лэсьтоно, зэмос шуд вайись яратонэз возьматон понна.

4. Малы астэ яратонын номыр уродэз ӧвӧл?

⁴ «Адямиос асьсэды асьсэос... гинэ яратӥсесь луозы». Вераз-а Павел, астэ ачид яратыны шонер ӧвӧл шуыса? Ӧз. Номыр уродэз ӧвӧл, адями ас мылпотонъёсыз сярысь сюлмаське но аслыз ачиз яра ке. Озьы милемыз кылдытӥз Иегова. Иисус косӥз: «Матысьтэ астэ ачид кадь ик яраты» (Марк 12:31). Асьмеды асьмеос ӧм ке яратэ, матысьёсмес но яратыны ум быгатэ. Библиын озьы ик верамын на: «Воргоронъёс но асьсэлэсь кышнооссэс асьсэлэсь мугорзэс кадь яратыны кулэ: кин кышнозэ яратэ, со ассэ яратэ. Уго нокин но, ноку но аслэсьтыз мугорзэ синазькыль ӧз на кары, котькудӥз адями ас мугорзэ сюдэ, шунтэ» (Еф. 5:28, 29). Кызьы адӟиське, астэ яратоно, но эсэпсэ валано.

5. Мар тӥ верасалды, кыӵе со ассэ гинэ яратӥсь адями?

⁵ Астэ яратон, кудӥз сярысь верамын 2 Тимофейлы 3:2,— со чылкак мукет. Павел гожъяз шонертэм, астэ ачид гинэ яратон сярысь. Ассэ гинэ яратӥсь адями ачиз сярысь кулэезлэсь тросгес малпаське. (Лыдӟы Римъёслы 12:3.) Нырысь ик со ачиз сярысь малпаське, нош мукет адямиос солы кулэ но ӧвӧл. Мар ке луэ ке, со янгыше уськытэ мукетсэ, ассэ уг. Библия сярысь одӥг книгаын ассэ гинэ яратӥсь адями ӵушъялэн ӵошатэмын. Солэн дӥсез аслыз небыт, нош мукетъёсызлы — бышкись веньёс. Сыӵе асьсэды гинэ яратӥсь адямиос зэмзэ ик шудо луыны уг быгато.

6. Кыӵе емышъёс вае Инмарез яратон?

⁶ Малы Павел, берпум нуналъёсы адямиослэн урод сямъёссы сярысь веракуз, нырысетӥ интые пуктӥз астэ гинэ яратонэз? Библиез эскерись куд-ог тодосчиослэн малпамзыя, со бордысь пото мукетъёсыз урод сямъёс, кудъёсыз сярысь вераз Павел. Нош Инмарез яратӥсь адямиослэн сямъёссы мукетэсь. Библия верамъя, Инмарлы ярась яратон герӟаськемын шумпотонэн, тупаса улонэн, чидась луонэн, лякытлыкен, гажась-жалясь луонэн, осконэн, зӥбыт-востэм луонэн но возиськыны быгатонэн (Гал. 5:22, 23). Псаломъёсты гожъясь гожтӥз: «Шудо калык, кудӥзлэн Инмарез Кузё-Инмар луэ» (Пс. 143:15). Иегова — шудо Инмар. Солы ужась-тыршисьёс  но шудоесь. Со сяна, Иеговалэн ужась-тыршисьёсыз шумпотон басьто, куке мукетъёсызлы юртто. Соин соос пӧртэм луо асьсэды яратӥсь адямиослэсь, кудъёсыз асьсэлы пайда басьтон сярысь гинэ малпасько (Ап. уж. 20:35).

7. Кыӵе юанъёс милемлы валаны юрттозы, макем юн ми Инмарез яратӥськомы?

⁷ Мар юрттоз милемлы валаны, асьмеды яратон Инмарез яратонлэсь юнгес ӧз луы-а? Малпаське Филиппыослы 2:3, 4 кылъёс вылын: «Номыре но эн лэсьтэ, асьтэлы гинэ пайда басьтыны турттыса, ушъян-данъянэз эн яратэ. Асьтэдыз покчи каре, нош мукетъёссэ асьтэ сярысь умоесьгес шуыса лыдъялэ. Нокин но ас сярысьтыз гинэ медаз сюлмаськы, мукетъёс сярысь но мед сюлмаськоз». Аслэсьтыд юаны луоз: «Кылзӥськисько-а мон та визь-кенешлэсь? Зэмзэ ик-а мон Инмарлэсь эриксэ быдэсъяны тыршисько? Тыршисько-а мон юрттыны кенешысь вын-агайёслы но сузэр-апайёслы, озьы ик соослы но, кинъёслы ӟеч иворез верасько?» Озьы лэсьтыны котьку капчи ӧвӧл. Со понна куддыръя малэсь ке но куштӥськоно луэ. Но озьы улыса, ми Ваньмызлэсь Кужмо Инмарез шумпоттомы. Нош солэсь умоез мар ке вань-а?

8. Мар карыны куд-ог христианъёслэсь мылкыдзэс ӝутӥз Инмарез яратон?

⁸ Иеговаез яратон куд-ог христианъёслэсь мылкыдзэс ӝутӥз, та дуннеысь ужын азинлыко луон интые, Инмарлы тросгес ужаны-тыршыны. Эрика, кудӥз Огазеяськем Штатъёсын улэ, эмъясь луыса ужа. Солэн луонлыкез вал сӥё-дано эмъясь луыны, но со пионер луыны малпаз. Картэныз ӵош Эрика трос шаеръёсын  ӟеч иворез вераз. Аслаз улонэз сярысь малпаськыса, со вера: «Ми мукет кылын вераськись адямиослы юрттӥськомы. Ми трос эшъёс шедьтӥмы но милям трос тунсыко учыръёсмы вал. Со милесьтым улонмес яркытгес кариз. Мон озьы ик эмъясь луыса ужасько, но тросгес дырме но кужымме мон сётӥсько адямиосты духовноез ласянь эмъян но кенешлы юрттон понна. Со монэ зэмзэ ик шудо каре».

9. Малы коньдонэз яратон шуд уг вайы?

⁹ Павел гожтӥз, адямиос «коньдонэз гинэ яратӥсесь» луозы шуыса. Кӧня ке ар талэсь азьло Ирландиысь одӥг пионерен таӵе учыр луиз. Пиосмуртэн вераськыкуз, соиз кӧня ке бумага коньдон поттӥз но вераз: «Тани мынам инмаре!» Туннэ адямиос со пиосмурт кадь шонерак уг верало ке но, тросэз ярато коньдонэз но сое, мае коньдонэн басьтыны луэ. Нош Библия чакласькыны косэ: «Кин азвесез яратэ, солэн азвесен кӧтыз уз тыры, кин узырлыкез яратэ, со бордысь со пайда уз басьты» (Екк. 5:9). Кӧня гинэ коньдонзы медаз луы сыӵе адямиослэн, соослы ноку но уз тырмы. Тросгес но тросгес люкаса, соос асьсэлы «трос секытэсь адӟонъёс» ваё (1 Тим. 6:9, 10).

10. Мар верамын Библиын куанер но узыр улон сярысь?

¹⁰ Бен, коньдонтэк улыны уг луы. Коньдон уте но шуыны луоз (Екк. 7:12). Нош быгатоз-а адями шудо луыны, солэн самой кулэез гинэ луиз ке? Быгатоз! (Лыдӟе Екклесиастэз 5:11.) Иакейлэн Агур пиез куриз Инмарез: «Куанер улонэз но, узырлыкез но мыным эн сёты,— сиыны тырмымон нянен монэ тыр кар». Ми валаськомы, малы Агурлэн куанер улэмез ӧз поты. Со ачиз валэктӥз, озьы со лушкаськись луыны но Инмарез сантэманы быгатысал шуыса. Нош малы солэн узыр луэмез ӧз поты? Со гожтӥз: «Ортчыт кӧты тырыса, Тынэсьтыд куштӥськоно медам луы, тазьы шуоно медам луы: „Кин Кузё-Инмар?“» (Мад. 30:8, 9). Тӥляд но пумитамды вань, дыр, адямиосты, кудъёсыз Инмарлы оскиськем интые, узырлыксылы оскисько.

11. Кыӵе визь-кенеш сётӥз Иисус коньдон пумысен?

¹¹ Коньдонэз яратӥсь адямиос Инмарез шумпоттыны уг быгато. Иисус вераз: «Нокинлэн но кык кузёлы служить каремез уг луы: уго одӥгзэ адӟемпотостэм кароз, нош мукетсэ яратоз; яке огезлы сюлмысьтыз тыршоз, нош мукетыз сярысь уз сюлмаськы. Уд быгатӥське Инмарлы но, маммоналы [узырлык-байлыклы] но огдыре служить карыны». Озьы ик со вераз на: «Музъем вылэ асьтэлы ваньбур эн люкалэ, отын сое кей сие, сыномыса быре, лушкаськисьёс гудӟиськыса пыро но нуыса кошко. Асьтэлы ваньбур Инме люкалэ, отын кей но уг сиы, сыномыса но уг быры, лушкаськисьёс но гудӟиськыса уг пыро, уг лушкало» (Матф. 6:19, 20, 24).

12. Вералэ учырез, кудӥз возьматэ, огшоры улон Иеговалы ужаны-тыршыны тросгес луонлык сётэ шуыса.

¹² Тросэз соос пӧлысь, кинъёс улонзэс огшоры каризы, асьсэды шудоен  шӧдӥзы, но соослэн тросгес дырзы луиз, Иеговалы ужаны-тыршыны. Огазеяськем Штатъёсын улӥсь Джек ужбергатӥсь вал, но солэн бадӟым коркаез вал. Со ваньмызлэсь солэсь куштӥськиз, малы ке шуоно солэн кышноеныз ӵош пионер луыса ужамез-тыршемез потӥз. Со тодаз вае: «Чебер коркамес но музъеммес вузаны капчи ӧй вал. Но уж дорын шуг-секытъёс кылдэмен, мон трос аръёс ӵоже дорам куашкам мылкыдын но туж жадьыса бертылӥ. Нош пионер луыса ужась-тыршись кышное котьку шумпотэ вал. Со вералляз: „Мынам самой умой кивалтӥсе!“ Табере мон но пионер луи, но ми кыкнамы ик Иеговалы тыршиськомы».

13. Мар юрттоз милемлы эскерыны, кызьы ми коньдон шоры учкиськомы?

¹³ Кызьы тӥ коньдон шоры учкиськоды шуыса валан понна, таӵе юанъёс вылын малпаське: «Адӟиське-а мынам улонысьтым, мон соглаш луисько шуыса соин, мар вера Библия коньдон сярысь? Уг берга-а мынам улонэ тросгес коньдон поттон котырын? Мар мыным дуногес: ваньбур яке Иеговаен эшъяськон но мукет адямиосын кусыпъёс? Зэмзэ ик-а мон оскисько, Иегова мон сярысь сюлмаськоз шуыса?» Ми оскыны быгатӥськомы, Иегова солы оскисьёсты ӝоже уз уськыты шуыса (Матф. 6:33).

14. Кызьы шулдыръяськонъёс шоры шонер учконо?

¹⁴ Апостол Павел верамъя, берпум нуналъёсы адямиос «каньылэн, эзылыса улонэз яратозы». Ачид шоры но коньдон шоры, зарни шорзэ тодыса, учкиськод ке, отын номыр уродэз ӧвӧл, озьы ик шулдыръяськонъёсын но. Иеговалэн уг поты, ми чик но шулдыръяськытэк но шутэтскытэк мед уломы шуыса. Библиын шонерлыко адямиослы таӵе вазиськон гожтэмын: «Мын, шулдыръяськыса няньдэ си, сюлмыныд шумпотыса винадэ ю» (Екк. 9:7).

15. Кинъёс со «каньылэн, эзылыса улонэз» яратӥсь адямиос?

¹⁵ 2 Тимофейлы 3:4 гожтэмын сыӵе яратон сярысь, кудӥз Инмарез яратонэз быдтыны быгатэ. Висъялэ саклыктэс, кылбурын гожтэмын, адямиос «Инмарез яратон сярысь, золгес каньылэн, эзылыса улонэз яратозы» шуыса. Но со уг возьматы, соос Инмарез ӧжыт ке но яратозы шуыса. Та кылбур пумысен одӥг тодосчи гожтӥз: «Татын верамын ӧвӧл, со адямиослэн пичи ке но Инмарез яратонзы луоз шуыса. Соос сое чик но уз яратэ». Со туж умой алон соослы, кинъёс шулдыръяськыса улонэз ортчыт трос ярато! Сыӵе адямиосты Библия майбыр улон пӧлы выем адямиос шуыса нима (Лука 8:14).

16, 17. Кызьы Иисус шулдыръяськонъёс шоры учке вал?

¹⁶ Иисус аслаз примереныз возьматӥз милемлы, кызьы шулдыръяськонъёс шоры шонер учконо. Со куное ветлылӥз (Лука 5:29; Иоанн 2:1—10). Одӥг пол Иисусэз сюанэ ӧтизы. Но отын виназы быриз. Соку Иисус паймымон амалэн вуэз виналы пӧрмытӥз. Мукетаз учыре адямиос Иисусэз  тэрганы кутскизы, со «сие но, юэ но» шуыса. Нош Иисус возьматӥз, соос зарни шорзэ шедьтыны уг быгато шуыса (Лука 7:33—36).

¹⁷ Иисус шулдыръяськыса гинэ ӧз улы. Солэн улоназ валтӥсь инты басьтӥз Иегова. Со сяна, Иисус лэсьтӥз ваньзэ, мае быгатӥз, адямиослы юрттон понна. Адямиосты кулонлэсь утён понна, со дась луыса аслэсьтыз улонзэ сётӥз, но сое юбо вылэ кортӵогазы. Вазиськыса соослы, кинъёслэн потэ вал солэн пытьытӥз мынэмзы, со вераз: «Мон понна тӥледыз курлазы ке, уллязы ке, котькыӵе но урод кылъёсын юнме куаретӥзы ке, тӥ шудоесь. Шумпотэлэ, шулдыръяськелэ — Инмын басьтоно медды-кузьымды бадӟым. Тӥлесьтыд азьвыл улэм пророкъёсты но озьы ик уллязы» (Матф. 5:11, 12).

18. Кыӵе юанъёс юрттозы милемлы эскерыны, шонер-а ми учкиськомы шулдыръяськонъёс шоры?

¹⁸ Мар юрттоз милемлы эскерыны, кызьы ми шулдыръяськонъёс шоры учкиськомы? Юалэ асьтэлэсь: «Мар мон понна дуногес: кенешлэн пумиськонъёсыз но тодытон уж яке шулдыръяськонъёс? Дась-а мон малэсь ке куштӥськыны, Инмарлы ужан-тыршон понна? Шулдыръяськон амалэз бырйыкум, малпасько-а мон, кызьы со шоры учке Иегова?» Ми Инмарез зэмзэ ик яратӥськомы ке, ум палэнске солэсь гинэ, мае тодӥськомы, со Инмарлы уг яра шуыса, нош палэнскомы солэсь но, мар, ми малпамъя, солэсь сюлэмзэ вӧсь кароз. (Лыдӟе Матфейлэсь 22:37, 38.)

19. Кин ноку но зэмзэ ик шудо луыны уз быгаты?

¹⁹ Шайтанлэн дуннеяз улӥсь адямиос 6 000 ар ӵоже курадӟо ини. Ми улӥськомы та дуннелэн берпум нуналъёсаз. Музъем тырмемын адямиосын, кудъёсызлэн улонзы коньдон, шулдыръяськонъёс но асьсэ котырын гинэ берга. Ми улӥськомы адямиос пӧлын, кудъёсыз асьсэлы гинэ пайда басьтыны тыршо, адямиос пӧлын, кудъёсызлэн улоназы ас мыл потонъёссы нырысетӥ интыын луо. Соос ноку но зэмзэ ик шудо луыны уз быгатэ! Псаломъёсты гожъясь гожтӥз: «Шудо со мурт, кинлэн юрттӥсез Иаковлэн Инмарез луэ, со муртлэн оскиськонэз Инмар Кузё-Инмар вылын улэ» (Пс. 145:5).

20. Вералэ, малы Инмарез яратон тӥледыз шудо каре.

²⁰ Иеговалэн калыкез Иеговаез юнгес но юнгес яратэ. Котькуд ар милям лыдмы будэ. Со вера, Инмарлэн Эксэйлыкез кивалтэ шуыса но ӝоген ми сыӵе бакель каронъёсты басьтомы шуыса, кудъёсыз сярысь ми али малпаны но ум быгатӥське. Ми Иеговаез шумпоттӥськомы, куке кариськомы сое, мае со милесьтым возьма. Со милемлы зэмос шуд вае, кудӥз пырак дауръёс ӵоже уз быры! Мукетаз статьяын ми эскеромы, кыӵе сямъёс вордскытэ астэ гинэ яратон, но ӵошатомы соосты сямъёсын, кудъёссэ Иеговалэн адӟемез потэ аслаз ужась-тыршисьёсызлэсь.