1, 2. а) Кызьы Исаиялэн 41:10 кылъёс Ёсико нимо сузэрез юнматӥзы? б) Кинлы пайда вайыны быгато Иеговалэн та кылъёсыз?

 ИНМАРЛЫ оскымон Ёсико нимо сузэр эмъясезлэсь кышкыт ивор кылӥз: солы кӧня ке толэзь улыны кылиз. Мар кариз сузэрмы? Со тодаз вайиз Библиысь яратоно кылбурзэ: «Эн кышка, Мон — тонэн огазьын. Эн сюлмаськы, Мон — тынад Инмаред. Мон тонэ юнмато, юртто тыныд, Ас шонерлыкелэн бур киыныз тонэ юн кутыса возё» (Ис. 41:10, Выль дуннелэн берыктэмез, 2013-тӥ ар, англ.). Ёсико каньылак эмъясезлы вераз, номырлэсь но уг кышка шуыса, малы ке шуоно Иегова сое китӥз кутэ b. Та кылбурысь буйгатӥсь кылъёс юрттӥзы дуно сузэрмылы быдэсак Иеговалы оскиськыны. Та кылъёс ик юрттозы милемлы но сюлмаськытэк улыны, бадӟым шуг-секытъёсын пумиськыса но. Нош кызьы? Сое валан понна, ойдолэ эскеромы, малы Иегова Исаияез со кылъёсты гожтыны косӥз.

² Инмарлэн буйгатэмез потэ вал иудейёсты, кудъёсыз берлогес Вавилонэ пленэ сюрыны кулэ вал. Нош Исаиялэн 41:10 кылъёс соослы гинэ гожтэмын ӧй вал. Озьы ик соос гожтэмын вал Инмарлэн вань ужась-тыршисьёсызлы, кудъёсыз вашкала дыръёсы улӥзы но кудъёсыз туннэ нуналъёсы уло (Ис. 40:8; Рим. 15:4). Ми «секыт дыръёсы» улӥськомы но милемлы туж кулэ буйгатскон, кудзэ Исаиялэн книгаысьтыз шедьтыны луэ (2 Тим. 3:1).

3. а) Кыӵе оскытон шедьтыны луэ Исаиялэн 41:10 кылъёсысь, кудъёсыз 2019-тӥ арлы кылбурлы быръемын? б) Малы милемлы туж кулэ со оскытонъёс?

 ³ Та статьяын ми эскеромы Исаиялэн 41:10 гожтэм Иеговалэсь куинь оскытонъёссэ c, кудъёсыз милесьтым осконмес юнмато: 1) Иегова милемын луоз; 2) со милям Инмармы; 3) со милемлы юрттоз. Милемлы туж кулэ та оскытонъёс, малы ке шуоно, Ёсико сямен ик, ми но шуг-секытъёсын пумиськиськомы. Со сяна, милемлы нюръяськоно луэ дуннеысь югдуръёсын сэрен кылдэм шуг-секытъёсын. Озьы ик ми пӧлысь куд-огъёссэ кивалтӥсьёс уйыло-улляло. Ойдолэ со оскытонъёсты радызъя эскеромы.

4. а) Кыӵе оскытонэз ми нырысь эскеромы? (Озьы ик учке сноскаез.) б) Мар вера Иегова аслаз ми пумысен шӧдонъёсыз сярысь? в) Мар тӥ шӧдӥськоды, куке тодӥськоды, кызьы Инмар ми шоры учке?

⁴ Нырысь Иегова оскытэ милемыз: «Эн кышка, Мон — тонэн огазьын» d. Кызьы Иегова возьматэ, со милемын шуыса? Со милемлы трос саклыксэ висъя но яратэ милемыз. Учке, кызьы Инмар возьматэ аслэсьтыз шӧдонъёссэ. Исаиялэн 43:4 гожтэмын: «Мынам син азям тон дуно, мусо, Мон тонэ яратӥ». Дунне вылысь нокыӵе кужым но Инмарез ужась-тыршисьёссэ яратэмысь уз дугдыты; Иегова котьку оскымон луэ (Ис. 54:10). Нош солэн яратэмез но милемын эшъяськемез милемыз кышкасьтэм каро. Со туннэ уте милемыз озьы ик, кызьы куке но утиз аслэсьтыз эшсэ, Аврамез (Авраамез). Иегова шуиз солы: «Эн кышка, Аврам, Мон тынад утиськон щитэд» (Ул.-выл. 15:1).

5, 6. а) Кытысь ми тодӥськомы, Иеговалэн милемлы юрттэмез потэ шуыса? б) Малы дышетэ милемыз Ёсико сузэрен луэм учыр?

⁵ Ми тодӥськомы: Иеговалэн милемлы юрттэмез потэ шуг-секытъёсмес вормыны. Со калыкезлы кылзэ сётэ: «Вуос вамен-а выжод — Мон тонэн, шуръёс вамен-а потод — соос тонэ уз выйытэ; тыл пыр-а мынод — уд сутӥськы, гомась тыл но тонэ уз ӵушка» (Ис. 43:2). Мае возьмато та кылъёс?

⁶ Иегова кыл уг сёты быдтыны шуг-секытъёсты, кудъёсыз улонмес секытгес каро. Но со уз лэзьы шур выллем шуг-секытъёслы  милемыз выйытыны но тыл выллем визь сынаськонъёслы милемлы тупатыны луонтэм изъян вайыны. Иегова оскытэ милемыз, шуг-секытъёс пыр потыкумы, со милемын луоз шуыса. Со юрттоз милемлы кышканъёсмес вормыны, кулонэн пумиськыса но, ми солы оскымон кыльыны мед быгатомы шуыса (Ис. 41:13). Ёсико но сое ас вылаз шӧдӥз. Тани мар вера солэн нылыз: «Ми паймиськомы вал, кызьы анаймы сюлмаськытэк чида шуыса. Адӟиське вал, Иегова солы каньыллык сётӥз шуыса. Анаймы кулытозяз эмъюртын ужасьёслы но, висисьёслы но Иегова сярысь но солэн кыл сётонъёсыз сярысь вераз». Малы дышетэ милемыз Ёсико сузэрен луэм учыр? Ми оскиськомы ке, Иегова милемын луоз шуыса, ми но кышкатэк но юн луыса ваньзэ чиданы быгатомы.

7, 8. а) Кыӵе кыкетӥ оскытон сётӥз Иегова но мае со возьматэ? б) Малы Иегова еврей калыкез сюлмаськытэк улыны косӥз, соослы пленэ сюроно вал ке но? в) Исаиялэн 46:3, 4 кыӵе кылъёс Инмарлэн калыкезлы сюлмаськытэк улыны юрттӥзы, дыр?

⁷ Табере эскеромы Исаияен гожтэм кыкетӥ оскытонэз: «Эн сюлмаськы, Мон — тынад Инмаред». Мае возьмато «эн сюлмаськы» кылъёс? Еврей кылын «сюлмаськыны» кыл возьматэ «солань-талань кышкаса учкыны, кин ке яке маке тӥледлы изъян вайыны быгатоз шуыса» яке «кышкыт учыре сюрыса, куалекъяса берез-азез учкылыны» верамез.

⁸ Малы Иегова еврей калыкез сюлмаськытэк улыны косӥз, соослы вавилон пленын 70 ар ортчытоно вал ке но? Со тодэ вал, Вавилонын улӥсьёс кышкатскозы шуыса. Мар соосты кышкатоз? 70 ар ортчем бере, Вавилонэз Мидиысь но Персиысь кужмо ожгарчиос киултыны кулэ вал. Озьы Иегова ас калыксэ пленысь мозмытыны малпа вал (Ис. 41:2—4). Куке Вавилонын улӥсьёс но мукет калыкъёсысь адямиос тодӥзы, тушмонъёссы вуо ини шуыса, соос, ог-огзэс буйгатыны тыршыса, веразы: «Юнматскы!» Со сяна, соос кутскизы эшшо но тросгес сульдэръёсты-идолъёсты лэсьтыны, оскыса, соос соосты утёзы шуыса (Ис. 41:5—7). Со дыре пленын улӥсь еврейёс ӧз сюлмаське, малы ке шуоно тодазы возизы Иеговалэсь кылъёссэ: «Нош тон, Израиль ляльчие... [артэ улӥсь калыкъёсын ӵошатыса] тон — Мынам ляльчие. ...Эн сюлмаськы, Мон — тынад Инмаред» (Ис. 41:8—10). «Мон — тынад Инмаред» кылъёсын Иегова оскымон ужась-тыршисьёссэ оскытӥз, со соосты ӧз вунэты шуыса. Со азьло сямен ик соослэн Инмарзы вал, нош соос — солэн калыкез. Иегова вераз соослы: «Нулло... утьыса возё тӥледыз». Та буйгатӥсь кылъёс пленын улӥсь еврейёсты юнматӥзы. (Лыдӟе Исаиялэсь 46:3, 4.)

9, 10. Малы милемлы кышкано ӧвӧл? Вералэ пример.

⁹ Азьвыл дауръёс сярысь, туннэ адямиос туж кышкаса уло, малы ке шуоно дуннеын югдур уродгес но уродгес луэ. Шуг-секытъёсын ми но пумиськиськомы. Но милемлы кышкано ӧвӧл. Иегова вера милемлы: «Мон — тынад Инмаред». Малы та кылъёс милемлы сюлмаськытэк улыны юртто?

¹⁰ Эскеромы таӵе примерез. Павел но Артур самолётэн лобо, но шӧдтэк шорысь самолёт зол зурканы кутске. Динамикъёсысь куара кылӥське: «Куриськомы тӥледыз, думе еостэс. Самолётмы турбулентной интыетӥ ортче». Павел сюлмаськыны кутске. Но динамикъёсысь нош ик куара кылӥське: «Вера́ экипажлэн командирез. Мон югдурез  чакласько. Курисько, эн сюлмаське». — «Вераны капчи!» — шуэ Павел. Пилотлэн кылъёсыз сое ӧз буйгатэ. Адӟыса, Артур нокӧня но уг сюлмаськы шуыса, Павел солэсь юа: «Тӥ чик но уд кышкаське шат?» — «Уг,— пальпотыса вера соиз.— Малы ке шуоно экипажлэн командирез — мынам атае. Ваелэ мон тӥледлы кӧня ке со сярысь верало. Куке тӥ тододы, макем усто пилот со, тӥ но уд сюлмаське».

11. Малы дышетэ милемыз та пример?

¹¹ Малы дышетэ милемыз та пример? Артур сямен ик, ми но ум кышкаське, малы ке шуоно умой тодӥськомы инмысь Атаймес, Иеговаез. Ми оскиськомы, со милемлы сильтӧл выллем шуг-секытъёс пыр потыны юрттоз шуыса, кудъёсыныз ми пумиськиськомы та дуннелэн берпуметӥ нуналъёсаз (Ис. 35:4). Иеговалы оскиськыса, ми ум сюлмаськиське, нош адямиос, кудъёсыз Инмарез уг тодо, туж кышкаса уло (Ис. 30:15). Маин эшшо ми кельшиськомы Артурлы? Ми валэктӥськомы адямиослы, малы Инмарлы оскиськыны луэ. Соку соос но оскозы, кыӵе гинэ шуг-секытэн соос медам пумиське, Иегова соослы юрттыны быгатоз шуыса.

12. а) Кыӵе оскытонэз ми али эскеромы? б) Мае тодамы вайыто Иеговалэн «суйбыгытэз бордын кужым луоз» кылъёс?

¹² Табере эскеромы Иеговалэсь куинетӥ оскытонзэ, кудзэ гожтӥз Исаия: «Мон тонэ юнмато, юртто тыныд». Азьлогес Исаия аслаз книгаяз гожтӥз, кызьы Инмар ас калыксэ юнматоз: «Инмар Кузё-Инмар кужымен лыктоз, суйбыгытэз бордын кужым луоз» (Ис. 40:10). «Суйбыгытэз бордын кужым луоз» кылъёс милемлы тодамы вайыто, Иегова туж кужмо Эксэй шуыса. Самой  кужмо луыса, Иегова ужась-тыршисьёссэ азьвыл юнматӥз но утиз, озьы ик со туннэ но юнматэ но уте соосты, кинъёс солы оскисько (К. Зак. 1:30, 31; Ис. 43:10).

13. а) Кыӵе дыре Иегова тужгес но дась милемыз юнматыны? б) Иеговалэн кыӵе кылъёсыз юнмато но оскыто милемыз?

¹³ Иегова юнматэ милемыз тужгес но соку, куке ми уйылон-уллянъёсын пумиськиськомы. Куд-ог шаеръёсын тушмонъёсмы лэсьто ваньзэ, тодытон ужез дугдытон понна яке организацимес пытсан понна. Но кышкан милемыз китэм-пыдтэм уг кары, малы ке шуоно Иегова ачиз шуиз: «Тыныд пумит лэсьтэм одӥг арберилэн но азинлыкез уз луы» (Ис. 54:17). Та кылъёс милемлы кужым но оскон сёто. Со сяна, соос тодамы вайыто куинь кулэ луись малпанъёсты.

14. Малы милемыз уг паймыто Инмарлэн тушмонъёсызлэн урдскылэмъёссы?

¹⁴ Нырысетӥез — Христослэн дышетскисьёсыз луыса, ми валаськомы, милемыз адӟемпотостэм карозы шуыса (Матф. 10:22). Иисус азьло ик вераз, солэсь дышетскисьёссэ лек уйылозы-уллялозы шуыса (Матф. 24:9; Иоанн 15:20). Кыкетӥез — Исаиялэн азьпалзэ тодытонэз алэ, милемыз адӟемпотостэм карем сяна, тушмонъёсмы милемлы пумит пӧртэм ожмаськон «арбериез» но уже кутозы шуыса. Кылсярысь, соос кырсь пӧяськонъёсты ми сярысь вӧлмыто, ӟеч ниммес саптало но милемыз лек уйыло-улляло (Матф. 5:11). Иегова уз дугдыты соосты, куке соос ожмаськон тӥрлыксэс милемлы пумит уже кутозы (Еф. 6:12; Усьт. 12:17). Но со милемыз кышкатыны кулэ ӧвӧл. Малы?

15, 16. а) Кыӵе оскытонэз тодамы возьыны кулэ на но мар со сярысь вераське Исаиялэн 25:4, 5? б) Кыӵе пум возьма милемын нюръяськисьёсты Исаиялэн 41:11, 12 гожтэм кылъёсъя?

¹⁵ Куинетӥез — Инмарлэн верамезъя, «одӥг арберилэн но», кудзэ тушмонъёсмы милемлы пумит уже куто, «азинлыкез уз луы». Кызьы борддор кужмо сильтӧллэсь  уте, озьы ик Иегова уте милемыз «жалянэз тодӥсьтэм эксэйёслэн йыркурен шокамзылэсь». (Лыдӟе Исаиялэсь 25:4, 5.) Тушмонъёсмы ноку но уз быгатэ милемлы тупатыны луонтэм изъян вайыны (Ис. 65:17).

¹⁶ Кызьы эшшо Иегова солы оскиськонмес юнматэ? Со пыр-поч валэктэ, мар луоз соосын, кинъёс милемлы вожзэс потто. (Лыдӟе Исаиялэсь 41:11, 12.) Тушмонъёсмы милемыз вормыны кызьы гинэ медаз тырше, пумыз тодмо: Инмар калыклэн вань тушмонъёсыз «ӧвӧлтэм макелы пӧрмозы, кулозы-бырозы».

17, 18. а) Кызьы Библиез лыдӟон юрттэ милемлы быдэсак Инмарлы оскиськыны? Вералэ пример. б) Кыӵе пайда ваёз 2019-тӥ арлы кылбур вылын малпаськон?

¹⁷ Иеговалы быдэсак оскиськон понна, сое умойгес тодыны кулэ. Нош со понна Библиез сак лыдӟоно но лыдӟеммы вылын малпаськоно. Библиын гожтэмын, кызьы Иегова вашкала дыръёсы калыксэ утьылӥз. Со оскытэ милемыз, Иегова милемыз но утёз шуыса.

¹⁸ Возьматон понна, кызьы Иегова милемыз уте, Исаия син азямы чебер суред суреда. Со Иеговаез пудо возьмасен ӵошатэ, нош солэсь ужась-тыршисьёссэ — ыжпиосын. Пророк вера Иегова сярысь: «Ыжпиоссэ кияз кутоз но гадь бордаз ӟыгыртыса нуллоз» (Ис. 40:11). Куке ми лыдӟиськомы, кызьы Иегова кужмо киосыныз юн ӟыгыртэ милемыз, ми асьмеды утемын шуыса шӧдӥськомы. Оскиськымон но визьмо ляльчилэн потэ, ми, шуг-секытъёс шоры учкытэк, медам кышкалэ шуыса, соин ик со 2019-тӥ ар понна кылбурлы бырйиз Исаиялэн 41:10 таӵе кылъёсты: «Эн сюлмаськы, Мон — тынад Инмаред» (Выль дуннелэн берыктэмез, 2013-тӥ ар, англ.). Малпаське та кылъёс вылын. Соос юнматозы тӥледыз но юрттозы вуоно шуг-секытъёсты вормыны.