1, 2. Маин пумисько Иеговалэн тросэз ужась-тыршисьёсыз но кызьы со соос вылын шӧдӥське?

 ЭСКЕРОМЫ куинь учыръёсты: егит агайлы эмъясь вера секыт висёнэз сярысь, кудӥз сэрен солы уродгес но уродгес луоз; семьялэн йырыз, кудӥзлы 50 ареслэсь тросгес ини, ужзэ ыштэ, но со тырше ке но, выль уж шедьтыны уг быгаты; оскымон мӧйы сузэр трос арлыдыз но уродмись тазалыкез сэрен Иеговалы ужан-тыршонын азьвыл мында лэсьтыны уг быгаты ини.

² Тӥляд но сыӵе ик шуг-секытъёсты вань ке, тӥ малпаны быгатоды, табере номырлы но уд яраське ни шуыса. Сыӵе югдуръёс сэрен тӥ быгатоды шумпотондэс ыштыны но асьтэды гажамысь дугдыны, озьы ик мукет адямиосын кусыпъёсты но сӧриськыны быгатозы.

3. Кызьы улон шоры учко Шайтан но соос, кинъёс солэн ки улаз возисько?

³ Та дуннеын адямилэн улонэз шоры учко озьы ик, кызьы со шоры учке Шайтан. Со адямиосты ноку ӧз дунъя. Шайтан Еваез ӧз жаля но ӵектӥз солы зэмос луисьтэм эрик, ачиз тодӥз ке но, Инмарлэсь кылзӥськытэк улон кулонэ вуттэ шуыса. Шайтан котьку но ки улаз возиз та дуннелэсь вуз каронэн, политикаен но религиен герӟаськем люкетъёссэ. Соин ик паймонэз ӧвӧл, та удысъёсысь азьветлӥсьёс адями улонэз уг гажало но соослэн шӧдонъёссы сярысь уг сюлмасько шуыса.

4. Мае ми эскеромы та статьяын?

⁴ Нош Иеговалэн потэ, ми асьмеды мед дунъяломы шуыса, но со юрттэ милемлы, куке шуг-секытъёс сэрен ми асьмеды  номырлы ярасьтэмен шӧдӥськомы (Пс. 135:23; Рим. 12:3). Та статьяын ми эскеромы, кызьы Иегова юрттэ милемлы: 1) куке ми висиськомы, 2) куке коньдонэн герӟаськем шуг-секытъёсын пумиськиськомы но 3) куке арлыдмы сэрен Иеговалы ужан-тыршонын асьмеды кулэтэмен шӧдӥськомы. Но нырысь ойдолэ вераськомы со сярысь, кытысь ми тодӥськомы, Иегова ми пӧлысь котькудмес дунъя шуыса.

5. Малы тӥ оскиськоды, Иегова адямиосты дунъя шуыса?

⁵ Ми сюй-тузонлэсь кылдытэмын ке но, Инмар понна ми туж дуноесь (Ул.-выл. 2:7). Эскеромы куд-ог мугъёсты гинэ, кудъёсыз валэкто, малы Иегова милемыз сокем дунъя. Со кылдытӥз милемыз аслаз сямъёсызлы адӟем карыны быгатонлыкен (Ул.-выл. 1:27). Соин ик, музъем вылын мукет кылдытэмъёсын ӵошатыса, Инмар адямиосты трослы дуноенгес лыдъя. Со сяна, со милемлы право сётӥз музъемен но пудо-животъёсын кузёяськыны (Пс. 8:5—9).

6. Мар эшшо оскытэ на милемыз, Иегова тырбыдэстэм адямиосты дунъя шуыса?

⁶ Иегова адямиосты дунъямысь ӧз дугды, Адамлэн сьӧлыкамез бере но. Ми солы сокем дуно потӥськомы, со ми понна яратоно Пизэ, Иисус Христосэз, но сётӥз, милемыз сьӧлыкъёсмылэсь мозмытон понна (1 Иоанн 4:9, 10). Христослэн мозмытӥсь курбонэзлы луыса Иегова улӟытоз соосты, кинъёс Адамлэн сьӧлыкез сэрен кулӥзы,— «шонер улэмъёсты но, шонер улымтэосты но» (Ап. уж. 24:15). Кызьы адӟиське Библиысь, Иегова дунъя милемыз, арлыдмы, тазалыкмы но ваньбурмы шоры учкытэк (Ап. уж. 10:34, 35).

7. Вералэ на мукет мугъёсты, кудъёсыз возьмато, Иегова милемыз дунъя шуыса.

⁷ Вань на мукет мугъёс, кудъёсыз возьмато, Иегова милемыз дунъя шуыса. Инмар саклыксэ висъяз солы, кызьы ми ӟеч иворлы вазиськимы, но милемыз ас дораз вайиз (Иоанн 6:44). Куке ми Иеговалы матэ кариськыны кутскимы, со но милемлы матэ кариськиз (Иак. 4:8). Со сяна, Иегова уг жаля дырзэ но кужымзэ, милемыз дышетон понна. Озьы со возьматэ, ми солы дуно потӥськомы шуыса. Со тодэ, кыӵеесь ми али луиськомы но кыӵеесь ми азьланяз луыны быгатомы. Но, Иегова милемыз яратэ бере, со милемыз тупатъя (Мад. 3:11, 12). Ваньмыз та валамон возьматэ, Иегова понна ми дуноесь шуыса!

8. Кызьы Псалтирьысь 17:28—30 кылъёс юртто милемлы шуг-секытъёс шоры шонер учкыны?

⁸ Куд-ог адямиос Давид эксэез номырлы ярасьтэм адямиен лыдъязы. Нош со тодӥз, Иегова сое яратэ но солы юрттэ шуыса. Со юрттӥз Давидлы шонер учкыны югдур шоры, кудаз со сюриз (2 Экс. 16:5—7). Куке милям мылкыдмы куашкамын яке шуг-секытъёсын пумиськимы, Иегова дась милемлы юрттыны. Солы луыса ми быгатомы ваньмыз шоры мукет сямен учкыны но котькыӵе шуг-секытъёс пыр потыны. (Лыдӟе Псалтирез 17:28—30.) Нош милемлы Иегова юрттэ бере, быгатоз-а милемлы мар ке но люкетыны солы шумпотыса ужаны-тыршыны? (Рим. 8:31). Ойдолэ эскеромы куинь учыръёсты, куке милемлы тужгес но тодамы возёно, Иегова милемыз яратэ но дунъя шуыса.

9. Кызьы ми висеменымы сэрен асьмеды шӧдыны быгатӥськомы?

⁹ Ӵем дыръя висеменымы сэрен милям мылкыдмы урод луэ, но ми малпаны кутскиськомы, нокинлы но пайда вайыны ум быгатӥське ини шуыса. Ми кепыраськомы, куке адямиос адӟо, милемын мар ке но луиз шуыса, яке куке ми мукетъёсызлэсь юрттэт куроно луиськомы. Висёнмы сярысь нокин уг тоды ке но, милемлы возьыт луыны быгатэ, малы ке шуоно ми азьвыл мында лэсьтыны  ум быгатӥське ни. Сыӵе секыт дыре Иегова милемыз юнматэ. Кызьы?

10. Мар милемыз висьыкумы юнматыны быгатэ, Мадёнъёсты 12:25 лыдэ басьтыса?

¹⁰ Куке ми висиськомы, милемыз «ӟеч кыл» юнматыны быгатэ. (Лыдӟе Мадёнъёсты 12:25.) Библиын Иегова люказ трос ӟеч кылъёсты, кудъёсыз оскыто милемыз, висёнъёсмы шоры учкытэк, со милемыз дунъя шуыса (Пс. 30:20; 40:4). Куке ми Иеговалэн духезлэн кивалтэмез улсын гожтэм кылъёсты лыдӟиськомы, нош куддыръя кӧня ке пол но, со юрттоз милемлы нюръяськыны урод мылкыдын, кудӥз висеменымы сэрен кылдӥз.

11. Кызьы Иегова одӥг агайлы юрттӥз?

¹¹ Эскеромы Хорхе нимо агайлэсь учырзэ. Егит дыръяз солы висён палаз, кудӥз солэсь тазалыксэ туж ӝог уродмытӥз, но соин сэрен со ассэ номырлы ярасьтэмен шӧдӥз. Со вера: «Мон дась ӧй вал солы, кыӵе шӧдонъёсы кылдозы висёнэлы луыса, озьы ик мон кепырасько вал, адямиос мыным саклык висъяло шуыса. Мыным уродгес но уродгес луэ вал, но мон малпаськыны кутски, кыӵе луоз мынам улонэ. Мынам киосы лэзиськизы, но мон Иеговалэсь сюлворыса юрттэт кури». Кызьы Иегова сое юнматӥз? Хорхе тодаз вае: «Мыным секыт вал сак лыдӟиськыны, соин ик мыным визь-кенеш сётӥзы Псалтирьысь пичи люкетъёсты лыдӟыны, кудъёсаз вераське, кызьы Иегова ужась-тыршисьёсыз сярысь сюлмаське. Мон котькуд нунал со кылбуръёсты лыдӟылӥ — соос мыным зэмос буйгатон вайылӥзы. Кӧня ке дыр ортчыса, котырысьтым адямиос адӟизы, мон ӵемгес пальпотыны кутски шуыса. Озьы ик соос вераллязы, мынам умой мылкыды соослэсь но мылкыдзэс ӝутэ шуыса. Мон валай: Иегова вӧсяськонъёсме кылӥз! Со юрттӥз мыным ачим шоры мукет сямен учкыны. Библилы луыса мон адӟи, кызьы Инмар мон шоры учке, висеме шоры учкытэк».

12. Мар кароно, висьыкуды Иеговалэсь юрттэтсэ басьтон понна?

 ¹² Тӥ висиськоды ке, оске: Иегова тодэ, маин тӥледлы пумиськоно луэ. Сюлворыса солэсь юрттэт куре, югдурды шоры шонер учкыны мед быгатоды шуыса. Собере Библиысь утчалэ Иеговалэсь ӟеч кылъёссэ, кудъёсыз тӥледыз буйгатыны быгатысалзы. Саклыктэс висъялэ со кылбуръёслы, кудъёсаз вераське, макем зол Иегова ужась-тыршисьёссэ дунъя. Соку тӥ адӟыны быгатоды, Иегова ӟеч сямзэ возьматэ шуыса котькинлы, кин солы оскымон ужа-тырше (Пс. 83:12).

13. Мае шӧдыны быгатэ семьялэн йырыз, ужзэ ыштэменыз?

¹³ Котькуд семьялэн йырыз мылкыд каре, матысь адямиосызлэн улон понна ваньмыз кулэез мед луоз шуыса. Но шуом, христиан муртэ ужысьтыз потто, со номыр шонертэмзэ ӧз лэсьты ке но. Со кыӵе ке но уже интыяськыны тырше, но уг быгаты, соин сэрен со ассэ номырлы ярасьтэмен шӧдэ. Кызьы солэн югдурез воштӥськоз, со Иеговалэн кылсётонъёсызлы саклыксэ висъяны кутскиз ке?

14. Малы Иегова сётэм кылзэ котьку но быдэстэ?

¹⁴ Иегова сётэм кылзэ котьку но быдэстэ (Иис. Н. 21:45; 23:14). Малы? Нырысетӥез, соин герӟаськемын солэн ӟеч нимыз. Иегова кыл сётӥз, вань оскымон ужась-тыршисьёсыз сярысь сюлмаськыны, но сётэм кылзэ со одно ик быдэстоно ужен лыдъя (Пс. 30:2—4). Кыкетӥез, Иегова тодэ, со ӧз сюлмаськы ке соос сярысь, кинъёс солэн семьяез пӧлы пыро, милям мылкыдмы туж куашкалоз шуыса. Со кылзэ сётэ, улон понна но солы оскымон ужан-тыршон понна милям ваньмыз кулэез луоз шуыса, но солы сётэм кылзэ быдэстыны номыр уз люкеты! (Матф. 6:30—33; 24:45).

15. а) Кыӵе шуг-секытъёсын пумиськизы нырысетӥ даурысь христианъёс? б) Кыӵе оскытон сётэ милемлы Псалтирь 36:18, 19?

 ¹⁵ Куке ми тодамы возиськомы, малы Иегова сётэм кылъёссэ котьку но быдэсъя, со оскытоз милемыз, Инмар коньдонэн герӟаськем шуг-секытъёсмес сэрттыны-пертчыны юрттоз шуыса. Тодамы ваёмы нырысетӥ даурысь христианъёсты. Куке Иерусалимысь кенеш лек уйылон-уллянъёсын пумиськиз, «ваньмыз, апостолъёс сяна... пазьгиськоно луизы» (Ап. уж. 8:1). Малпаське, кызьы со христианъёс вылын шӧдӥськиз? Соос коньдонэн герӟаськем шуг-секытъёсын пумиськизы, малы ке шуоно улон интызэс, ужзэс ыштӥзы, вылды. Нош Иегова секыт дыръя соосты ӧз кельты, но соос шумпотонзэс ӧз ыштэ (Ап. уж. 8:4; Евр. 13:5, 6; Иак. 1:2, 3). Иегова со оскымон христианъёслы юрттӥз, озьы ик со милемлы но одно ик юрттоз. (Лыдӟе Псалтирез 36:18, 19.)

16. Малы ми малпаны быгатомы, Иегова милемыз уг дунъя ини шуыса?

¹⁶ Куке ми пересьмиськомы, ми малпаны быгатомы, Иеговалы пайда вайыны ум быгатӥське ини шуыса. Давид эксэйлэн но, арлыдыз будэмъя, сыӵе ик шӧдонъёсыз вал, дыр (Пс. 70:9). Кызьы Иегова милемлы юрттыны быгатэ?

17. Малы дышетэ милемыз Джери сузэрлэн учырез?

¹⁷ Эскеромы Джери нимо сузэрлэсь учырзэ. Сое Эксэйлык юрттэ пумиськонэ ӧтизы, кытын дышетскон ортчыны кулэ вал, кызьы эскероно-тупатъяно юртъёсты, кудъёсыз Иеговалы ужан-тыршонын кутӥсько. Но солэн отчы мынэмез ӧз поты. Джери вераз: «Мон пересь ини но мон палкышно. Нокыӵе пайдаё быгатонлыкъёсы но мынам ӧвӧл. Мон номырлы уг яраськы ини». Дышетскон азьын ӝытазе со вӧсяськонын Иеговалы сюлэмзэ усьтӥз. Куке мукет нуналаз Джери Эксэйлык  юртэ лыктӥз, со азьло сямен ик паймемын вал, малы сое ӧтизы. Пумиськонын дышетсконэз ортчытӥсь одӥгез агай вераз, тужгес но кулэ луись быгатонлыкмы — со Иеговалэсь дышетскыны дась луон шуыса. Джери вера: «Мон малпай: „Та быгатонлыке мынам вань!“ Мон бӧрдыны кутски, куке валай, Иегова вӧсяськемелы ответ сётӥз шуыса. Со монэ оскытӥз: мон солы кыӵе ке пайдаё уж лэсьтыны быгатӥсько но солэн монэ дышетэмез потэ!» Тодаз вайыса, Джери вера: «Пумиськонэ мыныкум, мон туж сюлмаськи, но мынам мылкыды куашкамын вал. Нош бертыкум мынам бурдъёсы ик кылдӥзы кадь, малы ке шуоно мон валай, монэ дунъяло шуыса!»

18. Кызьы Библия возьматэ, арлыдмы трос луэмъя но, Иегова ужан-тыршонмес дунъямысь уг дугды шуыса?

¹⁸ Ми оскыны быгатӥськомы, кӧня гинэ арес милемлы медаз луы, Иегова милемлы котьку но уж шедьтоз шуыса (Пс. 91:13—16). Иисус дышетӥз: со, мае ми лэсьтыны быгатӥськомы, милемлы трос уг поты ке но, Иегова дунъя ваньзэ, мае ми лэсьтӥськомы ужан-тыршонын (Лука 21:2—4). Соин ик нырысь малпаське со сярысь, мае тӥ быгатӥськоды лэсьтыны. Кылсярысь, тӥ быгатӥськоды мукетъёсызлы Иегова сярысь вераны, вын-агайёс понна вӧсяськыны но соослэсь мылкыдзэс ӝутыны Инмарлы оскымон кыльыны. Иегова уг учкы со шоры, мар тӥ солы сётыны быгатӥськоды. Со тӥледыз аслаз ужасьёсыныз лыдъя, малы ке шуоно тӥ солэсь кылзӥськыны дась (1 Кор. 3:5—9).

19. Кыӵе оскытон сёто милемлы Римъёслы 8:38, 39 гожтэм кылъёс?

¹⁹ Ми туж шумпотӥськомы, куке ужаськомы-тыршиськомы Иеговалы, Инмарлы, кудӥз зэмзэ но дунъя соосты, кинъёс солы оскымон кылё! Со кылдытӥз милемыз, ми солэсь эриксэ мед быдэсъяломы шуыса, но солы ужаса-тыршыса, ми валаськомы, малы зэмзэ ик улӥськомы (Усьт. 4:11). Та дуннеын милемыз номырлы ярасьтэмен лыдъяны быгато ке но, Иегова милесьтым уг возьдаськы (Евр. 11:16, 38). Висёнмы, арлыдмы яке коньдонэн герӟаськем шуг-секытъёсмы сэрен мылкыдмы куашка ке, ойдолэ тодамы возёмы: милемыз инмысь Атаймылэн яратонэзлэсь номыр но люкыны уз быгаты! (Лыдӟе Римъёслы 8:38, 39.)