1, 2. а) Мар верало тросэз христианъёс духовной адями луон сярысь? б) Кыӵе юанъёсты ми эскеромы таяз статьяын?

 «МОН тыршисько духовной адями луыны. Со монэ шудо каре но котькуд нунал пумиськись шуг-секытъёсты вормыны юрттэ»,— вера Канадаысь одӥг сузэр. Бразилиысь вын-агай вера: «Мон 23 ар кышнояськемын ини. Мон туж шудо, малы ке шуоно ми кышноеным нырысь ик духовноез сярысь малпаськыны тыршиськомы». Нош тани мар вера Филиппиныысь вын-агай: «Ваньмыз шоры мон Инмарлэн синмыныз учкыны тыршисько. Со юрттэ мыным каньыл сюлмын улыны но пӧртэм вын-агайёсын кусыпъёсме юнматыны».

² Та верамъёсысь адӟиське, духовной адями луон бадӟым пайда вае шуыса. Мар кароно милемлы, азьланяз но духовной адями луон понна но ас выламы солэсь пайдазэ шӧдон понна? Нырысь милемлы тодоно, мар вера Библия духовной адямиос сярысь. Та статьяын ми эскеромы куинь валтӥсь юанъёсты: 1) Кин со сыӵе духовной адями? 2) Кызьы  Инмарлы оскымон ужась-тыршисьёслэн примеръёссы юрттозы милемлы Инмарен кусыпъёсмес юнматыны? 3) Кызьы милям «Христослэн визьмыз» мед луоз шуыса тыршеммы юрттэ духовной адями луыны?

3. Библия верамъя, маин пӧртэм луэ духовной адями но адями, кудӥз бордын Инмарлэн Духез уг улы?

³ Апостол Павел юрттэ валаны, кинэ духовной адями шуыны луоз, солы пумит пуктыса адямиез, «кудӥз бордын Инмарлэн Духез уг улы». (Лыдӟе 1 Коринфъёслы 2:14—16.) Маин соос пӧртэм луо? Павеллэн кылъёсызъя, «адями, кудӥз бордын Инмарлэн Духез уг улы, Дух пыр дышетэм кылъёсты кабыл уг басьты, малы ке шуоно тае со осконтэм уж шуыса лыдъя — со валаны но уг быгаты». Нош духовной адями «котьмае шонер эскерыны-дунъяны быгатэ», но солы «Христослэн визьмыз» сётэмын. Павел ӧте милемыз духовной адямиос луыны. Маин эшшо пӧртэм луэ духовной адями но адями, кудӥз бордын Инмарлэн Духез уг улы?

4, 5. Кыӵе со адями, кудӥз бордын Инмарлэн духез уг улы?

⁴ Нырысь эскеромы, кыӵе со адями, кудӥз бордын Инмарлэн духез уг улы. Солы та дуннеын вӧлмем мылкыд пыӵа, кудӥз ас мыл потонъёсъя гинэ улыны косэ. Со мылкыдэз Павел нима «Инмарлы пумитъяськисьёсын кивалтыса улӥсь... духлы тэрытскыса» улонэн (Еф. 2:2). Со мылкыд троссэ адямиосты котырысьтызы адямиос кадь луыны косэ. Соин ик соос лэсьто сое, мар, соослэн малпамзыя, шонер луэ, нош Инмарлэн куронъёсызъя улыны уг ик тыршо. Адями, кудӥз бордын Инмарлэн духез уг улы, нырысь ик сюлмаське аслаз нимыз, ваньбурез но правооссэ утён сярысь.

⁵ Мар эшшо вераны луоз на адями сярысь, кудӥз бордын Инмарлэн духез уг улы? Со «лулмугорлэн сьӧлыко ужъёсыз» пӧлы выемын (Гал. 5:19—21). Коринфъёслы нырысетӥ гожтэтаз Павел вера мукет ужъёс сярысь но, кудъёссэ лэсьтэ адями, кудӥз бордын Инмарлэн духез уг улы. Сыӵе адями тупаса улонэз сура-пожа, споръяське, мукетъёссэ судэ сётъя, йыр луонэз лыдэ уг басьты но сиён-юон сярысь мултэс трос малпаське. Визь сынаськонэн пумиськыса, со ӝог сётске (Мад. 7:21, 22). Иуда азьло ик вераз вал, куд-ог адямиос пумен уродгес но уродгес луозы но «соос бордын Святой Дух ӧвӧл» шуыны луоз шуыса (Иуда 18, 19).

6. Кин со сыӵе духовной адями?

⁶ Нош кин со сыӵе духовной адями? Духовной адями туж сюлмаське Инмарен кусыпъёсыз сярысь. Нош адями, кудӥз бордын Инмарлэн духез уг улы, со сярысь уг но малпаськы. Духовной адями Инмарлэсь адӟем карыны тырше, тырше валаны, мар малпа Инмар со яке та юан пумысен, но тырше со кадь малпаськыны (Еф. 5:1). Инмар солы зэмос луэ. Со котьку Иеговалэн возетъёсызъя улэ, мае уд вера адями сярысь, кудӥз бордын Инмарлэн духез уг улы (Пс. 118:33; 142:10). Духовной адями «лулмугорлэсь сьӧлыко ужъёссэ» уг лэсьты но тырше будэтыны сямъёсты, кудъёсыз «духлэн емышез» пӧлы пыро (Гал. 5:22, 23). Кин со сыӵе духовной адями, таӵе пример валаны юрттэ: быгатыса ужъёсты нуись адямиез усто ужбергатӥсь шуо, нош духовной  ужъёслы саклыксэ висъясь адямиез — духовной адями.

7. Мар верамын Библиын духовной адямиос сярысь?

⁷ Библия умоен вера духовной адямиос сярысь: «Духовной кулэяськонъёссэс валасьёс шудоесь, малы ке шуоно соослэн Ин Эксэйлыксы вань» (Матф. 5:3, ВД). Нош Римъёслы 8:6 эшшо одӥгез кулэ малпан пусъемын на: «Лулмугорлэн кулэяськонъёсызъя улон кулонэ-быронэ нуэ, нош Духлэн валтэмезъя улон улэп улон но каньыллык вае». Нырысь ик духовной ужъёслы саклыкмес висъяса, милям Инмарен кусыпъёсмы умоесь луо, сюлэммы каньыл луэ но вуоно быронтэм улонлы осконмы будэ.

8. Малы милемлы куддыръя секыт луэ духовной адями луыны?

⁸ Дунне, кудаз ми улӥськомы, туж кышкыт. Но ми котырын асьсэ сярысь гинэ малпаськись адямиос уло бере, милемлы туж тыршоно луэ, визьёсмес утён но Инмар кадь малпаськон понна. Ми Инмар кадь малпаськыны ӧм тырше ке, визьмы та дуннеысь малпанъёсын тырмоз но та дуннеысь мылкыд пыӵалоз. Мар кароно, озьы медаз луы шуыса? Мар юрттоз милемлы Инмар доры матэ кариськыны?

9. а) Мар юрттэ милемлы Инмар доры матэ кариськыны? б) Кыӵе примеръёсты ми эскеромы?

⁹ Пинал анай-атаезлэсь адӟем каре но, соос шоры учкыса, умоезлы дышетске. Озьы ик ми но Инмарлы матэ кариськыны быгатӥськомы, адӟем карыса соослэсь, кинъёслэн соин матысь кусыпъёссы. Нош ас мыл потонъёссы сярысь гинэ малпаськись адямиос шоры учкыса, ми дышетскиськомы солы, мар карыны уг яра (1 Кор. 3:1—4). Библиын гожтэмын кызьы умой, озьы ик урод примеръёс  но. Милям Инмарен юн кусыпъёс воземмы потэ. Соин ик ойдолэ эскеромы умой примеръёсты, кудъёсызлэсь адӟем карыны быгатомы. Ми вераськомы Иаков, Мария но Иисус сярысь.

10. Кытысь адӟиське, Иаков духовной адями вал шуыса?

¹⁰ Нырысь Иаковлэсь примерзэ эскеромы. Асьмеос пӧлысь тросэзлэн кадь ик, солэн улонэз капчи ӧй вал. Солэн Исав агаез аслаз мыл потонъёсызъя улӥз но одӥг пол Иаковез виыны малпаз. Иаковлэн варматаез ялан узырмыны выриз Иаков пыр. Иаков котырын уло вал ке но адямиос, кудъёсыз бордын Инмарлэн духез уг улы, со озьы ик духовной адями кылиз. Со оскиз Инмарлэн кыл сётонэзлы, кудзэ Инмар Авраамлы сётӥз, но вань сюлмысьтыз семьяез сярысь сюлмаськиз, кудӥз Иеговалэн малпаназ нимысьтыз инты басьтыны кулэ вал (Ул.-выл. 28:10—15). Иаковлэн кылъёсыз но ужъёсыз возьматӥзы, со Инмарлэсь куронъёссэ но эриксэ котьку тодаз возе вал шуыса. Кылсярысь, куке Иаков малпа вал, Исав солы кышкытлык вае шуыса, со Инмарлы таӵе кылъёсын вазиськиз: «Уть монэ братэлэн киулаз сюронлэсь... Тон шуид: „Мон тыныд ӟеч каро, тынэсьтыд выжыдэ йылэто, зарезь дурысь лыдъяны луонтэм луо мында каро“» (Ул.-выл. 32:6—12). Та кылъёсысь адӟиське, Иаковлэн Иеговалэсь эриксэ быдэсъямез потэ вал но со Иеговалэн кыл сётонъёсызлы оске вал шуыса, кудъёссэ Иегова сётӥз Иаковлы но соослы, кинъёслэн выжыысьтызы потӥз Иаков.

11. Малы вераны луоз, Мария духовной адями вал шуыса?

¹¹ Табере Мариялэсь примерзэ эскеромы. Малы Иегова сое Иисуслэн анаез луыны бырйиз? Малы ке шуоно со духовной адями вал. Кытысь ми сое тодӥськомы? Тодады вае, мар вераз Мария, Захария но Елисавета ӵыжы-выжыез  дорын куноын дыръяз. (Лыдӟе Лукалэсь 1:46—55.) Солэн кылъёсыз возьмато, со Инмарлэсь Кылзэ туж яратэ но Еврей Гожтэмъёсты умой тодэ вал шуыса (Ул.-выл. 30:13; 1 Экс. 2:1—10; Мал. 3:12). Озьы ик вераны кулэ, Мария но Иосиф кемалась ӧвӧл кузпалъяськемын вал ке но, Иисус вордӥськытозь, ӵош ӧз кӧлалэ шуыса. Со возьматэ, соос понна нырысетӥ интыын Инмарлэн эрикез вал шуыса, нош собере ини ас мыл потонъёссы (Матф. 1:25). Озьы ик, Мария туж сак чаклаз сое, мар Иисуслэн улоназ вал, но санэ понӥз солэсь визьмо кылъёссэ. Со сяна, со «ваньзэ та кылъёсты аслаз сюлэмаз возиз» (Лука 2:51). Солы туж тунсыко потэ вал, кызьы Инмар Мессия сярысь кыл сётонзэ быдэстоз. Мариялэн примерез милесьтым мылкыдмес ӝутэ малпаськыны, кызьы Инмарлэсь эриксэ быдэсъянэз нырысетӥ интые пуктоно.

12. а) Маин Иисус аслаз Атаез кадь вал? б) Кыӵе удысын ми Иисуслэсь адӟем карыны быгатомы? (Учке статья кутсконысь суредэз.)

¹² Иисус Христос самой умой пример возьматӥз, кызьы духовной адями луоно. Со котьку Иегова атаезлэсь адӟем кариз. Солэн малпанъёсыз но шӧдонъёсыз Инмарлэн кадь вал. Со кариз сое, мар карысал ачиз Иегова, Иисус интыын ке луысал. Иисус Инмарлэсь куронъёссэ гажаз но солэн эрикезъя улӥз (Иоанн 8:29; 14:9; 15:10). Висъялэ саклыктэс, мар гожтӥз Исаия пророк Иеговалэн жалямез сярысь, но ӵошатэ соин, мар гожтӥз Марк Иисуслэн шӧдонъёсыз сярысь. (Лыдӟе Исаиялэсь 63:9; Марклэсь 6:34.) Дась-а тӥ Иисуслэсь адӟем карыны но жаляны соосты, кинъёслы юрттэт кулэ? Учкиськоды-а тӥ адямиослы ӟеч иворез веран но соосты зэмлыклы дышетон шоры озьы ик, кызьы учкиз Иисус? (Лука 4:43). Озьы ке, соку тӥ духовной адямиос шуыны луоз.

13, 14. а) Малы милемыз дышето вын-агайёслэн но сузэр-апайёслэн примеръёссы, кудъёсыз Иисуслэсь адӟем карыны тыршо? б) Вералэ сыӵе христианъёс сярысь.

¹³ Туннэ но трос вын-агайёс но сузэр-апайёс, кудъёсызлэн Инмарен юн кусыпъёссы но кудъёсыз Христослэсь адӟем карыны тыршо. Тӥ адӟиськоды, дыр, кыӵе мылысь-кыдысь соос ужан-тыршонэ пырисько, макем соос куно карисесь но жалясесь, озьы ик соослэн трос мукет умой сямъёссы вань шуыса. Соос тырбыдэстэмесь ке но, Инмарлы ярась сямъёс будэтыны тыршо. Тани мар вера Бразилиысь Рейчел нимо сузэр: «Мон чебер дӥсяськыны яратӥсько вал но мукетъёсызлэсь бере кылеме уг поты вал. Соин ик мынам дӥськутэя, мон зӥбыт-востэм адями шуыны уг луы вал. Зэмлыкез тодыса, мынам воштӥськеме но духовной адями луэме потӥз. Воштӥськыны капчи ӧй вал, но солы луыса мон шудогес луи, но мынам улонэ тунсыко луиз».

¹⁴ Филиппиныын улӥсь Рейлинлэн мукет шуг-секытэз вал. Со малпа вал, вылӥ образование басьтӥз но умой уж шедьтӥз ке, азинлыко луоз шуыса. Рейлин тодаз вае: «Мон пумен духовной ужпумъёсы сярысь вунэтыны кутски, нош собере валай, мае ке ыштӥсько шуыса, мае ке, мар ужелэсь трослы дуногес. Озьы мон нош ик нырысетӥ интые Иеговалы ужан-тыршонэз пуктыны кутски». Со дырысен Рейлин аслаз улонэныз возьматэ, Матфейлэсь 6:33, 34 гожтэм кыл сётонлы оске шуыса. Со вера: «Мон тодӥсько: Иегова мон сярысь одно ик сюлмаськоз!» Тӥляд кенешады  но сыӵе ик вын-агайёс но сузэр-апайёс вань, дыр. Иисуслэсь адӟем каремзэс адӟыса, тӥляд но соослэсь адӟем каремды потэ, луоз (1 Кор. 11:1; 2 Фес. 3:7).

15, 16. а) Мар юрттоз милемлы Христослэсь адӟем карыны? б) Мар юрттоз милемлы умойгес тодыны, кызьы малпаськиз Христос?

¹⁵ Кызьы котькудмы Христослэсь адӟем карыны быгатомы? 1 Коринфъёслы 2:16 верамын, милям «Христослэн визьмыз» луыны кулэ шуыса. Со сяна, Римъёслы 15:5 но тодамы вайытэ, милемлы Иисуслэсь адӟем кароно шуыса. Нош Иисус Христослэсь адӟем карон понна, кулэ тодыны, кызьы со малпаськиз, кыӵе солэн сямъёсыз но ужъёсыз вал. Иисус понна самой валтӥсез вал Инмарен кусыпъёсыз. Соин ик Иисуслэсь адӟем кариськомы ке, ми Иеговаен матэ кариськиськомы. Тӥни малы туж кулэ милемлы дышетскыны Иисус кадь малпаськыны.

¹⁶ Мар со понна кароно? Иисуслэн дышетскисьёсыз адӟизы, кызьы со паймымон ужъёс лэсьтылӥз, кылзӥзы солэсь дышетэмзэ, учкизы, кызьы со пӧртэм адямиосын ассэ возе но кызьы Инмарлэсь возетъёссэ улоназ кутэ. Соос веразы: «Мар Со лэсьтӥз... ми ваньзэ тае адӟисьёс луиськомы» (Ап. уж. 10:39). Но туннэ ми Иисусэз адӟыны ум быгатӥське, соин ик Иегова, асьмемыз яратэменыз, сюлмаськиз, милям Евангелиосмы мед луозы шуыса. Соосты лыдӟыса, ми яркыт син азямы пуктыны быгатӥськомы, кыӵе вал Иисус. Матфейлэсь ӟеч иворез, Марклэсь ӟеч иворез, Лукалэсь ӟеч иворез но Иоаннлэсь ӟеч иворез лыдӟыса но соос сярысь малпаськыса, ми умойгес тодӥськомы, кызьы малпаськиз Христос. Озьы ми лулмес-сюлэммес юнматыны но «Солэн пытьы кузяз» мыныны быгатомы (1 Пётр 2:21; 4:1).

17. Кыӵе пайда вае милемлы Христос кадь малпаськеммы?

¹⁷ Кыӵе пайда милемлы вае, ми Христос кадь малпаськиськомы ке? Кызьы пайдаё сиён мугормес юнматэ, озьы ик Христослэн примерез вылын малпаськон милемлы кужым сётэ Инмарлы эшшо но матэ кариськыны. Пумен ми валаны кутскиськомы, мар карысал Иисус со яке та учырын. Со юрттэ милемлы сыӵе ужпумъёс кутыны, кудъёсызлы луыса милям возьытлыкмы чылкыт улэ но ми Инмарез шумпоттӥськомы. Нош со понна, тӥ соглаш луоды, дыр, кужымез жаляно ӧвӧл но таӵе ӧтёнлэсь кылзӥськоно шуыса: «Тӥляд дӥсяськонды-шобырсконды Кузё-Инмармы Иисус Христос мед луоз» (Рим. 13:14).

18. Мае тӥ тодӥды духовной адями сярысь, та статьяез лыдӟыса?

¹⁸ Таяз статьяын ми эскеримы, кин со сыӵе духовной адями. Тодӥмы, ми адӟем карыны быгатӥськомы шуыса адямиослэсь, кудъёсызлэн Инмарен матысь кусыпъёссы. Озьы ик, ми тодӥмы, визьмы «Христослэн визьмыз» кадь луиз ке, ми Инмарен кусыпъёсмес юнматыны быгатомы шуыса. Нош вань на мукет юанъёс но, кудъёсызлы саклыкмес висъяны кулэ. Кылсярысь, кызьы валано, кыӵеесь кусыпъёсмы милям Инмарен? Мар эшшо юрттоз на Инмарлы матэ кариськыны? Адӟиське-а ужъёсысьтымы, ми духовной адямиос шуыса? Та юанъёслы валэктонъёс ми эскеромы мукетаз статьяын.